ລັດຖະບານຫັນບໍລິສັດອີທີແອລ ຮ່ວມທຶນກັບຕ່າງປະເທດ

243 09 ສ.ຫ. 2017 ຂ່າວໜ້າ​ໜຶ່ງ
ລັດຖະບານຫັນບໍລິສັດອີທີແອລ ຮ່ວມທຶນກັບຕ່າງປະເທດ

ພິທີ​ປ່ຽນ​ຊື່ ບໍລິສັດ ອີ​ທີ​ແອລ ມະຫາຊົນ ເປັນ​ບໍລິສັດ ອີ​ທີ​ແອລ ຈຳກັດ ແລະ ມອບ-ຮັບ​ໜ້າທີ່ລະຫວ່າງ​ທ່ານ ທອງ​ສິງ ວິໄລ​ວົງ ຜູ້ອຳນວຍ​ການ​ໃຫຍ່​ບໍລິສັດ ອີ​ທີແອລ ມະຫາຊົນ ແລະ ທ່ານ ວູ ຈິງ ເຊິນ (WU JING CHENG) ຜູ້ອຳນວຍການບໍລິສັດ ອີ​ທີ​ແອລ ຈຳກັດ ຈັດ​ຂຶ້ນ​ວັນ​ທີ 8 ສິງຫາ 2017 ທີ່​ສຳນັກງານ​ໃຫຍ່​ບໍລິສັດ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ທັນສະໄໝ ກົມ​ມະ​ສິດ ລັດຖະມົນຕີກະຊວງ​ໄປສະນີ ໂທລະ​ຄົມ​ມະນາ​ຄົມ ແລະ ການ​ສື່ສານ ທ່ານນາງ ທິບ​ພະ​ກອນ ຈັນທະ​ວົງສາ ຮອງ​ລັດຖະມົນຕີ​ກະຊວງ​ການເງິນ ພ້ອມ​ດ້ວຍ​ຜູ້ຕາງໜ້າ​ສະຖານ​ທູດ​ຈີນ​ປະຈຳ​ລາວ ຫົວໜ່ວຍ​ທຸລະ​ກິດ ແລະ ພາກສ່ວນກ່ຽວຂ້ອງ.

ເພື່ອ​ປະຕິບັດ​ຕາມ​ສັນຍາຮ່ວມ​ທຶນ​ລະຫວ່າງ​ລັດຖະບານລາວ ແລະ ບໍລິສັດ ເຈຍ​ຟູ​ໂຮນດິ້ງ ຈຳກັດ ແລະ ຕາມ​ການ​ເຫັນດີ​ເປັນ​ເອກະ​ພາບ​ຂອງ​ຜູ້ຕາງໜ້າຜູ້​ຖື​ຮຸ້ນ​ທັງ​ສອງ​ຝ່າຍ ເຊິ່ງ​ລັດ​ຖະມົນຕີ​ກະຊວງ​ໄປສະນີ ໂທລະ​ຄົມມະ​ນາ​ຄົມ ແລະ ການ​ສື່ສານ ໄດ້ເຫັນ​ເຖິງ​ຄວາມ​ຈຳເປັນ​ພາວະ​ວິໄສ ແລະ ການຕັດສິນ​ໃຈ​ຂອງ​ລັດຖະ​ບານ​ໃນ​ການ​ຫັນບໍລິສັດ ອີທີ​ແອລ ມະຫາຊົນ ໄປ​ເປັນບໍ​ລິສັດ​ຮ່ວມ​ທຶນ​ກັບ​ຕ່າງປະເທດ ພ້ອມ​ທັງ​ຍ້ອງຍໍ​ຊົມເຊີຍ ຄະນະອຳນວຍ​ການບໍລິສັດ ອີ​ທີ​ແອລ ມະຫາຊົນ ທີ່​ໄດ້​ອົດທົນ​ຜ່ານ​ຜ່າ​ອຸປະ​ສັກ​ນາໆ​ປະການ ເພື່ອ​ປະ​ຄັບປະຄອງ​ການ​ດຳເນີນ​ທຸລະ​ກິດຂອງ​ບໍລິສັດ​ ໃຫ້​ສາມາດ​ບໍລິການແກ່​ສັງຄົມ ແລະ ປະສົບ​ຜົນ​ສຳເລັດ​ໃນ​ຫຼາຍ​ດ້ານ ສາມາດ​ມອບພັນທະ​ໃຫ້​ລັດຖະບານ​ໄດ້​ຄົບ​ຖ້ວນ ຕາມ​ແຜນການ​ທີ່​ວາງ​ໄວ້ ນອກນັ້ນຍັງ​ໄດ້​ຊົມເຊີຍ​ບັນດາ​ສະ​ມາຊິກ​ພັກ-ພະ​ນັກງານ​ບໍລິສັດ ທີ່​ໄດ້ຫ້າວຫັນ​ປະຕິບັດ​ວຽກ​ງານ​ວິຊາສະເພາະ​ຂອງ​ຕົນ​ ດ້ວຍ​ຄວາມຫ້າວຫັນ ສະຫງົບ ອຸ່ນ​ອ່ຽນ​ທຸ່ນທ່ຽງ​ເຊື່ອ​ໝັ້ນ​ຕໍ່​ການ​ນຳພາ​ຂອງພັກ-ລັດ ປະຕິບັດ​ໜ້າທີ່​ດ້ວຍຄວາມ​ຮັບຜິດຊອບ​ສູງ ແລະ ໄດ້ຮຽກຮ້ອງ​ມາ​ຍັງ​ບັນດາ​ສະມາຊິກພັກ-ພະນັກງານ​ທຸກ​ຄົນ​ພາຍ​ໃຕ້ ການ​ຊີ້​ນຳ-ນຳພາ​ຂອງ​ຄະນະ​ອຳນວຍ​ການ​ບໍລິສັດ ອີ​ທີ​ແອລ ຈຳກັດ ໃຫ້​ສືບຕໍ່​ຮັກສາ​ມູນເຊື້ອ​ອັນດີງາມ​ຂອງ​ຕົນ​ໄວ້ ພ້ອມ​ກັນ​ຕັ້ງໜ້າ​ປະຕິບັດ​ໜ້າທີ່​ຮັບຜິດຊອບຂອງ​ຕົນ ​ໃຫ້​ປະສົບ​ຜົນສຳເລັດຕາມ​ແຜນການ​ວາງ​ໄວ້.

ຂ່າວທີ່ກ່ຽວຂ້ອງ