ສະຫຼອງວັນສ້າງຕັ້ງອາຊຽນ ດ້ວຍການຈັດກິດຈະກຳໃຕ້ໄຟສ່ອງໃສ່ປະຕູໄຊ

208 10 ສ.ຫ. 2017 ຂ່າວໜ້າ​ໜຶ່ງ
ສະຫຼອງວັນສ້າງຕັ້ງອາຊຽນ ດ້ວຍການຈັດກິດຈະກຳໃຕ້ໄຟສ່ອງໃສ່ປະຕູໄຊ

ເພື່ອ​ເປັນ​ການ​ສະເຫຼີມ​ສະຫຼອງ​ສອງ​ວັນ​ສຳຄັນ​ຄື: ວັນ​ຄົບຮອບ 50 ປີ ແຫ່ງ​ການ​ສ້າງຕັ້ງອາ​ຊຽນ (8/8/1967-8/8/2017) ແລະ ຄົບຮອບ 20 ປີ​ທີ່ ​ສປປ ລາວ ເຂົ້າ​ເປັນ​ສະມາຊິກ​ອາ​ຊຽນ (23/7/1997-23/7/2017) ວັນທີ 8 ສິງຫາ 2017 ໄດ້​ຈັດ​ພິທີໃຕ້​ໄຟ​ໃສ່​ປະຕູ​ໄຊ ທີ່​ນະຄອນຫຼວງວຽງ​ຈັນ ເປັນ​ປະທານ​ໂດຍ​ທ່ານ ອາ​ລຸນ​ແກ້ວ ກິດ​ຕິ​ຄຸນ ລັດ​ຖະ​ມົນຕີ​ປະຈຳ​ສຳນັກງານ​ນາຍົກ​ລັດ​ຖະມົນຕີ ມີ​ບັນດາ​ການ​ນຳ​ຂອງ​ກະຊວງ ແລະ ຂະແໜງການ​ທີ່​ຮັບຜິດ​ຊອບ​ວຽກ​ອາ​ຊຽນ ແລະ ທູຕານຸ​ທູດ​ຕ່າງປະເທດ​ປະຈຳ​ລາວ ພ້ອມ​ດ້ວຍ​ມວນ​ຊົນ​ຊາວ​ນະຄອນຫຼວງ​ວຽງ​ຈັນ ​ເຂົ້າ​ຮ່ວມ​ຫຼາຍ​ກວ່າ 200 ຄົນ.

ພິທີ​ໃຕ້​ໄຟ​ແມ່ນ​ເປັນ​ໜຶ່ງ​ໃນກິດຈະກຳ​ສະເຫຼີມສະຫຼອງ ​ວັນ​ຄົບຮອບ 50 ປີ ແຫ່ງ​ການ​ສ້າງຕັ້ງອາ​ຊຽນ ແລະ ໄດ້​ຈັດ​ຂຶ້ນ​ພ້ອມໆກັນ ​ຢູ່​ຕາມ​ບັນດາ​ເມືອງ​ຫຼວງ​ຂອງບັນດາ​ປະເທດ​ສະມາຊິກ​ອາ​ຊຽນ ແລະ ຈະ​ໃຕ້​ຢູ່​ຕາມ​ສະຖານທີ່​ສຳຄັນ​ຕ່າງໆ ເຊິ່ງ​ນອກຈາກ​ຈະ​ເປັນການ​ສ້າງ​ຄວາມ​ຮັບ​ຮູ້​ກ່ຽວ​ກັບ​ອາ​ຊຽນ​ໃຫ້​ແກ່​ປະຊາຊົນ​ແລ້ວ ຍັງ​ເປັນ​ການ​ສະເຫຼີມສະຫຼອງ​ຜົນສຳເລັດ​ຂອງ​ອາ​ຊຽນ ຕະຫຼອດ​ໄລຍະ 50 ປີຜ່ານມາ.

ຕະຫຼອດ​ໄລຍະ​ຜ່ານ​ມາ​ອາຊຽນ​ ໄດ້​ສຸມ​ໃສ່​ການ​ເຊື່ອມ​ໂຍງພາກ​ພື້ນ​ອາ​ຊຽນ ແລະ ການສ້າງ​ປະຊາ​ຄົມ​ອາ​ຊຽນ ອັນ​ໄດ້​ນຳມາສູ່​ການ​ປະກາດ​ສ້າງຕັ້ງ​ເປັນປະຊາ​ຄົມ​ອາ​ຊຽນ​ຢ່າງ​ເປັນ​ທາງການ ໃນ​ວັນ​ທີ 31 ທັນວາ 2015 ທີ່​ປະກອບ​ດ້ວຍ 3 ເສົາຄ້ຳ​ປະຊາຄົມ​ອາ​ຊຽນ​ຄື: ປະຊາ​ຄົມ​ການເມືອງ-ຄວາມ​ໝັ້ນຄົງ​ອາ​ຊຽນ ປະຊາ​ຄົມ​ເສດຖະກິດ​ອາ​ຊຽນ ແລະ ປະຊາ​ຄົມ​ວັດທະນະທຳ-ສັງຄົມ​ອາ​ຊຽນ ພ້ອມ​ນີ້ ​ອາ​ຊຽນຍັງ​ໄດ້​ຮັດ​ແໜ້ນ​ການ​ພົວພັນ​ກັບພາຍ​ນອກ ໂດຍ​ໄດ້​ຂະຫຍາຍການ​ເປັນ​ຄູ່​ຮ່ວມ​ເຈລະຈາ ​ກວມເອົາ​ບັນດາ​ປະເທດ​ໃຫຍ່​ໃນ​ໂລກ ໂດຍ​ຜ່ານ​ບັນດາ​ກົນ​ໄກ​ຮ່ວມ​ມື​ທີ່ອາ​ຊຽນ​ເປັນ​ຜູ້​ລິ​ເລີ່ມ ເຊິ່ງ​ບໍ່​ພຽງແຕ່​ສຳລັບ​ໃຫ້​ອາ​ຊຽນ​ພົວພັນຮ່ວມ​ມື​ກັບ​ຄູ່​ເຈລະຈາ​ຂອງ​ຕົນ ແລະ ຄູ່​ຮ່ວມ​ມື​ພາຍ​ນອກ​ອື່ນໆເທົ່າ​ນັ້ນ ແຕ່​ຍັງ​ເປັນ​ເວທີ​ໃຫ້​ຄູ່​ເຈລະ​ຈາ ແລະ ຄູ່​ຮ່ວມ​ມື​ພາຍ​ນອກອື່ນ ລວມ​ທັງ​ບັນດາ​ປະເທດ​ມະຫາ​ອຳນາດ​ ໄດ້​ພົບ​ປະ​ປຶກສາ​ຫາລືກັນ ເຊິ່ງ​ເປັນ​ການ​ປະກອບສ່ວນເຂົ້າ​ໃນ​ການ​ສົ່ງເສີມ​ຄວາມ​ເຂົ້າໃຈ​ເຊິ່ງ​ກັນ ແລະ ກັນ ຄວາມ​ໄວ້​ເນື້ອ​ເຊື່ອ​ໃຈ​ດ້ານ​ຍຸດ​ທະ​ສາດ ສົ່ງເສີມ​ສັນຕິພາບ ສະຖຽນ​ລະ​ພາບ ແລະ ການ​ຮ່ວມ​ມື​ເພື່ອ​ການ​ພັດທະ​ນາ​ໃນ​ພາກ​ພື້ນ ກໍ່​ຄື​ໃນ​ໂລກ.

ສຳລັບ​ລາວ​ເຮົາ​ເຂົ້າ​ເປັນ​ສະມາ​ຊິກ​ອາ​ຊຽນ ໃນ​ປີ 1997 ອາຊຽນ​ໄດ້​ກາຍເປັນ​ເສົາຄ້ຳ​ໜຶ່ງ​ທີ່ສຳຄັນ ​ໃນ​ນະໂຍບາຍ​ການ​ຕ່າງປະເທດ​ຂອງ​ລາວ ຕະຫຼອດ​ໄລຍະສອງ​ທົດ​ສະ​ຫວັດ​ຜ່ານ​ມາ ​ສປປ ລາວ ໄດ້​ເຄື່ອນ​ໄຫວ​ວຽກ​ງານ​ອາຊຽນ​ຢ່າງ​ຕັ້ງໜ້າ​ໃນ​ທຸກ​ຂົງເຂດ ການ​ຮ່ວມ​ມື​ພາຍ​ໃຕ້ 3 ເສົາຄ້ຳປະຊາ​ຄົມ​ອາ​ຊຽນ ລວມ​ທັງ​ການພົວພັນ​ກັບ​ພາຍ​ນອກ​ຂອງ​ອາຊຽນ ແລະ ໄດ້​ປະຕິບັດ​ພັນທະຕ່າງໆ​ຂອງ​ຕົນ ອັນ​ໄດ້​ນຳ​ຜົນ​ປະໂຫຍດ​ມາສູ່​ປະເທດ​ຊາດ ແລະ ປະຊາຊົນ​ລາວ ອັນ​ສຳຄັນ​ລາວເຮົາ​ໄດ້​ຮັບ​ກຽດ​ເປັນ​ປະທານ​ອາຊຽນ ຄັ້ງ​ທີ 2 ໃນ​ປີ 2016  ພາຍໃຕ້​ຄຳ​ຂວັນ “ຫັນ​ວິໄສ​ທັດ​ໃຫ້​ເປັນຮູບ​ປະ​ທຳ ເພື່ອ​ຄວາມ​ເຂັ້ມແຂງຂອງ​ປະຊາ​ຄົມ​ອາ​ຊຽນ” ໃນ​ການເປັນ​ປະທານ​ອາ​ຊຽນ ຄັ້ງ​ທີ 2 ນີ້ ພວກ​ເຮົາ​ໄດ້​ສຳເລັດ​ການ​ສ້າງເອກະສານ​ຫຼາຍ​ສະບັບ ອັນ​ເປັນພື້ນຖານ​ສຳລັບ​ການ​ຮ່ວມ​ມື​ພາຍໃນ​ອາ​ຊຽນ ພາຍ​ໃຕ້ 3 ເສົາຄ້ຳ ແລະ ການ​ຮ່ວມ​ມື​ລະຫວ່າງ​ອາຊຽນ​ກັບ​ພາຍ​ນອກ ຜົນສຳເລັດດັ່ງກ່າວ​ ໄດ້​ສົ່ງເສີມ​ຖານະ​ບົດບາດ​ຂອງ​ລາວ​ໃນ​ເວທີ​ພາກ​ພື້ນ ແລະ ສາກົນ​ໃຫ້​ສູງ​ເດັ່ນ​ຂຶ້ນ.

ຂ່າວທີ່ກ່ຽວຂ້ອງ