ຄວາມຄືບໜ້າການກໍ່ສ້າງເສັ້ນທາງລົດໄຟ ລາວ-ຈີນ ຢູ່ແຂວງຫຼວງພະບາງ

310 11 ສ.ຫ. 2017 ຂ່າວໜ້າ​ໜຶ່ງ

ການ​ປະຕິບັດ​ໂຄງການ​ກໍ່ສ້າງ​ເສັ້ນທາງ​ລົດໄຟ ລາວ-ຈີນ ທີ່​ແຂວງ​ຫຼວງ​ພະ​ບາງ ໄດ້​ຮັບຜິດຊອບ​ມີ 2 ໄລຍະ​ສັນຍາ ຄື: ໄລຍະ​ສັນຍາ​ທີ 3 ຮັບ​ເໝົາ​ກໍ່ສ້າງ ໂດຍ​ກຸ່ມ​ບໍລິສັດ​ທາງ​ລົດໄຟ ເລກ 8 ​ສປ ຈີນ ແລະ ໄລຍະ​ສັນຍາ​ທີ 4 ຮັບ​ເໝົາ​ກໍ່ສ້າງ​ໂດຍ​ກຸ່ມ​ບໍລິສັດ ຊີ​ໂນຣີ​ໂດຣ ມີ 6 ສະຖານີ ໃນ​ນີ້ ສະຖານີ​ໃຫຍ່ 1 ແຫ່ງ ຕັ້ງ​ຢູ່​ບ້ານ​ພິກ​ນ້ອຍ ເມືອງ​ຫຼວງ​ພະ​ບາງ ແລະ ສະຖານີ​ນ້ອຍ 5 ແຫ່ງ ຄື: ຢູ່​ເມືອງ​ຈອມ​ເພັດ 2 ແຫ່ງ ແລະ ເມືອງ​ຊຽງ​ເງິນ 3 ແຫ່ງ ເສັ້ນທາງ​ຜ່ານ​ແຂວງ​ຫຼວງ​ພະ​ບາງ​ມີ 80 ກິໂລແມັດ ຜ່ານ 3 ເມືອງ 29 ບ້ານ ຄື: ເມືອງ​ຫຼວງ​ພະ​ບາງ 11 ກິໂລແມັດ ມີ 8 ບ້ານ ຜ່ານ​ເມືອງ​ຈອມ​ເພັດ 19 ກິໂລແມັດ ມີ 7 ບ້ານ ແລະ ເມືອງ​ຊຽງ​ເງິນ 50 ກິໂລແມັດ ມີ​ຂົວ 30 ແຫ່ງ ເຊິ່ງ​ໄດ້​ລົງມື​ກໍ່ສ້າງ​ແລ້ວ 2 ແຫ່ງ ຄື: ຂົວ​ຂ້າມ​ນ້ຳຂອງ ແລະ ອຸມົງ 22 ແຫ່ງ ລົງມື​ກໍ່ສ້າງ​ແລ້ວ 9 ແຫ່ງ.

ທ່ານ ຈັນທະ​ວົງ ຜົນ​ນະ​ຈິດ ຫົວໜ້າ​ພະ​ແນກ​ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ ແຂວງ​ຫຼວງ​ພະ​ບາງ ໃນ​ຄະນະ​ຮັບຜິດຊອບ​ໂຄງການ​ກໍ່ສ້າງ​ທາງ​ລົດໄຟ ລາວ-ຈີນ ຢູ່​ແຂວງ​ຫຼວງ​ພະ​ບາງ ໃຫ້​ຮູ້​ວ່າ: ການຈັດຕັ້ງ​ປະຕິບັດ​ໂຄງການ​ດັ່ງກ່າວ ມາ​ຮອດ​ປັດຈຸບັນ ແມ່ນ​ສາມາດ​ປະ​ເມີນ​ຄວາມ​ຄືບ​ໜ້າ​ໄດ້ຫຼາຍ​ດ້ານ ຄື: ສຳເລັດ​ການ​ຈັດ​ສັນ​ຊົ່ວຄາວ​ໃຫ້ 3 ຄອບຄົວ ທີ່​ຖືກ​ຜົນ​ກະທົບ​ຕໍ່​ການ​ສ້າງ​ອຸມົງ ໂດຍ​ການເຊົ່າ​ເຮືອນ​ໃຫ້ ແລະ ຍັງ​ຢູ່​ໃນ​ຂັ້ນ​ຕອນ​ຄົ້ນຄວ້າ​ຈັດ​ສັນ​ທີ່​ດິນ​ຊົດ​ເຊີຍ ສຳເລັດ​ການ​ເກັບ​ຂໍ້​ມູນ​ທີ່​ດິນ ເພື່ອ​ກໍ່ສ້າງ​ຕາ​ຂ່າຍ​ໄຟຟ້າ​ເຂົ້າ​ຫາ​ຈຸດ​ກໍ່ສ້າງ​ອຸມົງ ແລະ ກໍ່ສ້າງ​ຕາ​ຂ່າຍ​ໄຟຟ້າ​ຂ້າມ​ນ້ຳຂອງ​ໄປ​ຫາ​ເມືອງ​ຈອມ​ເພັດ ສຳເລັດ​ການ​ກຳນົດ​ຈຸດ​ທີ່​ຕັ້ງ​ສາງ​ມ້ຽນ​ວັດ​ສະ​ດຸ​ຂອງ​ບໍລິສັດ​ຮັບ​ເໝົາ​ກໍ່ສ້າງ ສຳເລັດ​ການ​ກຳນົດ​ຈຸດ​ຖີ້ມ​ດິນ ການ​ເຈາະ​ອຸມົງ ລວມ​ທັງ​ການ​ຄົ້ນຄວ້າ​ພິຈາລະນາ​ກຳນົດ​ລາຄາ​ຫົວໜ່ວຍ ​ຄ່າ​ຊົດ​ເຊີຍ​ສິ່ງ​ກີດຂວາງ​ຂອງ​ໂຄງການ​ກໍ່ສ້າງ​ທາງ​ລົດໄຟ ລາວ-ຈີນ ແລະ ໄດ້​ລົງ​ເຜີຍແຜ່​ສຶກ​ສາ​ອົບຮົມ​ແນວ​ຄິດ​ໃຫ້​ປະຊາຊົນ​ໄດ້ 23 ບ້ານ ແລະ ພວມ​ຈັດ​ຕັ້ງ​ປະຕິບັດ​ອີກ 6 ບ້ານ ຢູ່​ເມືອງ​ຊຽງ​ເງິນ.

ແຂວງ​ຫຼວງ​ພະ​ບາງ ມີ​ປະຊາຊົນ​ໄດ້​ຮັບ​ຜົນ​ກະທົບ 29 ບ້ານ 241 ຄອບຄົວ ໃນ​ນັ້ນ ດິນ​ເຮັດການ​ຜະລິດ 253 ຕອນ ມີ​ເນື້ອທີ່​ທັງ​ໝົດ 92.691 ເຮັກຕາ ຕົ້ນໄມ້​ປະເພດ​ຕ່າງໆ 60.291 ຕົ້ນ ເຄື່ອງປູກ​ປະເພດ​ສຸມສິ່ງ​ປຸກ​ສ້າງ 145 ຫຼັງ ເຮືອນ​ຢູ່​ອາໄສ 104 ຫຼັງ ທີ່​ຈຳເປັນ​ຕ້ອງ​ຍົກຍ້າຍ​ໄປ​ບ່ອນ​ໃໝ່ ໂຮງຮຽນ​ປະຖົມ 5 ຫຼັງ ເລົ້າ​ເຂົ້າ​ສາມັກຄີ 1 ບ້ານ ສະໂມສອນ 1 ຫຼັງ ຄຽງ​ຄູ່​ກັນ​ນັ້ນ ການຈັດຕັ້ງ​ປະຕິບັດ​ໂຄງການ​ດັ່ງກ່າວ ຍັງ​ພົບ​ບັນຫາ​ຫຍຸ້ງຍາກ​ຫຼາຍ​ດ້ານ ເປັນຕົ້ນແມ່ນ​ການ​ກໍ່ສ້າງ​ຢູ່​ບາງ​ບ່ອນ​ຂອງ​ບໍລິສັດ​ຮັບ​ເໝົາ ​ກໍ່ສ້າງ​ມີ​ລັກສະນະ​ຟ້າວ​ຟັ່ງ ແຕ່​ການ​ເກັບ​ກຳ​ຂໍ້​ມູນ​ບໍ່​ທັນ​ສຳເລັດ ການ​ປະຕິບັດ​ວຽກ​ງານ​ໄກ່​ເກ່ຍ​ຍັງ​ພົບ​ຄວາມ​ຫຍຸ້ງຍາກ ເນື່ອງ​ຈາກ​ຍັງ​ບໍ່​ທັນ​ໄດ້​ກຳນົດ​ຄ່າ​ຫົວໜ່ວຍ​ຊົດ​ເຊີຍ ເຮັດ​ໃຫ້​ຜູ້​ຖືກ​ຜົນ​ກະທົບ​ຂາດ​ຄວາມ​ເຊື່ອ​ໝັ້ນ ແລະ ການ​ປະສານ​ສົມທົບ​ລະຫວ່າງ​ວິຊາ​ການ​ຂອງ​ບໍລິສັດ​ຮັບ​ເໝົາ ແລະ ວິຊາ​ການ​ຂອງ​ແຂວງ​ຍັງ​ເຮັດ​ບໍ່​ທັນ​ໄດ້​ດີ.

ຂ່າວທີ່ກ່ຽວຂ້ອງ