ແສງສະຫວັນ ໄດ້ຮັບລາງວັນຜູ້ປະກອບການດີເດັ່ນ

188 16 ສ.ຫ. 2017 ຂ່າວໜ້າ​ໜຶ່ງ

ກຸ່ມ​ການ​ສຶກ​ສາ​ແສງ​ສະຫວັນ ຖືກ​ຄັດ​ເລືອກ​ເປັນ​ຕົວ​ແທນຜູ້​ປະກອບ​ການ​ທຸລະ​ກິດ​ດີເດັ່ນຂອງ​ລາວ ໄປ​ຮັບ​ລາງວັນ​ຜູ້​ປະກອບ​ການ​ທຸລະ​ກິດ​ດີເດັ່ນ ​ທີ່​ໃຫ້ຄວາມ​ຮັບຜິດຊອບ​ຕໍ່​ສັງຄົມ​ໃນລະດັບ​ອາ​ຊຽນ ຄັ້ງ​ທີ 1 ໃນ​ໂອກາດ​ພິທີ​ສະເຫຼີມສະຫຼອງ​ວັນ​ສ້າງຕັ້ງ​ອາ​ຊຽນ ຄົບຮອບ 50 ປີ ຈັດຂຶ້ນ​ວັນ​ທີ 6-9 ສິງຫາ 2017 ຢູ່ນະຄອນຫຼວງ​ມະນີ​ລາ ປະເທດ​ຟີລິບ​ປິນ.

ທ່ານ ຄຳ​ແສນ ສີສະ​ວົງ ປະທານ​ກຸ່ມ​ການ​ສຶກ​ສາ​ແສງ​ສະຫວັນ ໄດ້​ກ່າວ​ວ່າ: ລາງວັນ​ຜູ້​ປະກອບ​ການ​ທຸລະ​ກິດ​ດີເດັ່ນ​ຄັ້ງ​ນີ້ ຈັດ​ຂຶ້ນ​ເປັນ​ຄັ້ງ​ທຳ​ອິດ ເພື່ອ​ເຮັດ​ໃຫ້ການ​ສະເຫຼີມສະຫຼອງ​ ວັນ​ສ້າງຕັ້ງອາ​ຊຽນ​ມີ​ເນື້ອ​ໃນ​ຄວາມ​ໝາຍເລິກເຊິ່ງ ໂດຍ​ປະເທດ​ສະມາຊິກອາ​ຊຽນ ​ຈະ​ມີ​ການ​ຄັດ​ເລືອກ​ເອົາຜູ້​ປະກອບ​ການ​ທຸລະ​ກິດ​ດີເດັ່ນ​ ມາຮັບ​ລາງວັນ​ດັ່ງກ່າວ ໃນ​ນີ້ ຂ້າ​ພະເຈົ້າ​ໄດ້​ເປັນ​ຕົວ​ແທນ​ຈາກ​ລາວ​ໄປ​ຮັບ​ລາງວັນ ນອກຈາກ​ລາງວັນ ແລະ ໃບ​ກຽດ​ຕິ​ຄຸນ​ຕ່າງໆ​ແລ້ວ ຍັງ​ໄດ້​ຮັບ​ເງິນ​ຜູ້​ລະ 5.000 ໂດລາ​ສະຫະລັດ ຫຼື ປະມານ 40 ລ້ານ​ກີບ ເພື່ອ​ເປັນ​ທຶນຮອນ​ສຳລັບ​ການ​ສືບຕໍ່​ໃຫ້ການ​ຊ່ວຍເຫຼືອສັງຄົມ​ໃນຕໍ່ໜ້າ ເຊິ່ງ​ຂ້າພະເຈົ້າຈະ​ນຳ​ເງິນ​ດັ່ງກ່າວ​ເປັນ​ກອງ​ທຶນ ນຳ​ໃຊ້​ເຂົ້າ​ໃນ​ການ​ເຝິກອົບຮົມ​ຜູ້ປະກອບ​ການ​ທຸລະ​ກິດ​ໃໝ່ ແລະ ສ້າງ​ສູນ​ສະໜອງ​ຂໍ້​ມູນ​ຂ່າວສານ ທີ່​ມີ​ຄວາມ​ຍືນ​ຍົງ​ໃຫ້​ເຂົາເຈົ້າ.

ກຸ່ມ​ການ​ສຶກ​ສາ​ແສງ​ສະຫວັນ ສ້າງຕັ້ງ​ຂຶ້ນ​ມີ​ເປົ້າ​ໝາຍ​ເພື່ອ​ປະກອບ​ສ່ວນ​ສ້າງ​ບຸ​ຄະລາ​ກອນ ​ໃຫ້ມີ​ຄວາມ​ຮູ້​ຄວາມ​ສາມາດ​ເທົ່າທຽມ​ກັບ​ປະເທດ​ອື່ນໆ ​ຈຶ່ງ​ໄດ້​ສຸມທຶນຮອນ​ເຂົ້າ​ໃນ​ການ​ສ້າງ​ໂຮງຮຽນ ສ້າງ​ຫຼັກສູດ ແລະ ບຸ​ຄະລາ​ກອນ​ເພື່ອ​ຮັບ​ໃຊ້​ໃນ​ຂະແໜງ​ນີ້ ໂດຍ​ຈະ​ເນັ້ນ​ໃຫ້​ນັກ​ສຶກ​ສາ​ໄດ້ຮຽນ​ຢ່າງ​ມີ​ຄຸນະພາບ​ຈົບ​ອອກ​ມາ​ ໄດ້​ມີ​ວຽກ​ເຮັດ​ງານ​ທຳ ສຳລັບການ​ຊ່ວຍເຫຼືອ​ສັງຄົມ​ໃນ​ໄລຍະຜ່ານ​ມາ ​ໄດ້​ໃຫ້​ທຶນ​ການ​ສຶກ​ສາ​ຜູ້ທີ່​ຮຽນ​ເກ່ງ​ນັບ​ແຕ່​ຊັ້ນ​ອະນຸບານ ຈົນ​ເຖິງ​ລະດັບ​ວິທະຍາໄລ ພ້ອມທັງ​ມີ​ທຶນ​ນະໂຍບາຍ​ໃຫ້​ລູກ​ຫຼານ ຜູ້​ທີ່​ມີ​ຄຸນງາມຄວາມດີ​ຕໍ່​ປະເທດຊາດ ປະມານ 60 ທຶນ​ຕໍ່​ປີ ສົ່ງ​ນັກສຶກ​ສາ​ໄປ​ຊ່ວຍ​ສອນ​ພາສາ​ຕ່າງປະເທດ​ໃຫ້​ແກ່​ໂຮງຮຽນ​ລັດ ໃຫ້ການ​ຊ່ວຍເຫຼືອ​ໂດຍ​ກົງ​ໃນ​ການຕ້ານ​ແລ້ງ-ຕ້ານ​ຖ້ວມ ແລະ ມອບ​ອຸປະກອນ​ການ​ສຶກ​ສາ​ໃຫ້ເຂດ​ຫ່າງ​ໄກ​ສອກຫຼີກ ນອກ​ນີ້ຍັງໄດ້​ເປັນ​ຄະນະ​ບໍລິຫານ​ສັງກັດ​ຢູ່ສະມາຄົມ​ຕ່າງໆ ເພື່ອ​ເຮັດ​ວຽກຊ່ວຍເຫຼືອ​ສັງຄົມ​ຕື່ມ​ອີກ.

ສຳລັບ​ການ​ມອບ​ລາງວັນ​ດັ່ງກ່າວ ​ຈະ​ຈັດ​ຂຶ້ນ 3 ປີ​ຕໍ່​ຄັ້ງ ເຊິ່ງ​ຈະມີ​ການ​ຄັດ​ເລືອກ​ຜູ້​ປະກອບ​ການທີ່​ດີເດັ່ນ​ ຈາກ​ຂະແໜງການຕ່າງໆ​ ເພື່ອ​ຮັບ​ລາງວັນ.

ຂ່າວທີ່ກ່ຽວຂ້ອງ