ການກໍ່ສ້າງເສັ້ນທາງແຕ່ 3 ແຍກຈີ່ນາຍໂມ້ ບ້ານບໍ່ໂອ-ບ້ານຫ້ອມ-ບ້ານທ່າແຂກ ຄືບໜ້າ 60%

548 16 ສ.ຫ. 2017 ຂ່າວໜ້າ​ໜຶ່ງ
ການກໍ່ສ້າງເສັ້ນທາງແຕ່ 3 ແຍກຈີ່ນາຍໂມ້ ບ້ານບໍ່ໂອ-ບ້ານຫ້ອມ-ບ້ານທ່າແຂກ ຄືບໜ້າ 60%

ໂຄງການ​ກໍ່ສ້າງ​ເສັ້ນທາງ​ເບຕົງ​ເສີມ​ເຫຼັກ​ແຕ່ 3 ແຍກ​ຈີ່ນາຍໂມ້ ເມືອງ​ສີ​ສັດຕະ​ນາກ-ບ້ານ​ບໍ່ໂອ-ບ້ານ​ຫ້ອມ-ບ້ານ​ທ່າ​ແຂກ ເມືອງ​ຫາດ​ຊາຍ​ຟອງ ນະຄອນຫຼວງ​ວຽງ​ຈັນ ດຳເນີນ​ໄປ​ຢ່າງ​ໜ້າເພິ່ງ​ພໍໃຈ ບັນດາ​ໜ້າ​ວຽກ​ຫຼັກ​ໄດ້ຖືກ​ຈັດ​ຕັ້ງ​ປະຕິບັດ​ມີ​ຄວາມ​ຄືບໜ້າ ແລະ ຄາດ​ວ່າ​ຈະ​ສຳເລັດຕາມ​ແຜນການ​ທີ່​ວາງ​ໄວ້.

ທ່ານ Yan Mai Chao ຜູ້ອຳນວຍ​ການ​ບໍລິສັດ​ ຫາຍ​ຫານການ​ທຸລະ​ກິດ ຈຳກັດ​ຜູ້​ດຽວ ໃຫ້ສຳພາດ​ວ່າ: ເສັ້ນທາງ​ແຕ່ 3 ແຍກ​ຈີ່ນາຍ​ໂມ້-ບ້ານ​ບໍ່​ໂອ-ບ້ານຫ້ອມ-ບ້ານ​ທ່າ​ແຂກ ມີ​ຄວາມຍາວ 14 ກິໂລແມັດ ເບື້ອງ​ຕົ້ນ ໜ້າ​ທາງ​ກວ້າງ 18 ແມັດ ແຕ່ຍ້ອນ​ມີ​ສິ່ງ​ກີດຂວາງ​ຫຼາຍ ລັດ​ຖະບານ​ຈຶ່ງ​ໄດ້​ຕົກລົງ​ຫຼຸດ​ໜ້າ​ທາງລົງ​ຍັງ​ເຫຼືອ 15 ແມັດ (ລວມ​ທັງທາງ​ຄົນ​ຍ່າງ 2 ຟາກ) ລວມ​ມູນຄ່າ 44 ລ້ານ​ກວ່າ​ໂດ​ລາ​ສະຫະລັດ ຫຼື ປະມານ 362 ຕື້​ກີບ ເຊິ່ງເປັນ​ການ​ລົງທຶນ​ກ່ອນ 100% ຂອງ​ບໍລິສັດ​ຫາຍ​ຫານ​ການ​ທຸລະກິດ​ຈຳກັດ​ຜູ້​ດຽວ ຈາກ​ນັ້ນ ລັດຖະ​ບານ​ຈະ​ທົດ​ແທນ​ຄືນ​ໃນ​ໄລຍະ​ເວລາ 5 ປີ ການຈັດຕັ້ງ​ປະຕິບັດ​ໄດ້​ເລີ່ມ​ແຕ່​ປີ 2015 ເປັນຕົ້ນມາ ໃນ​ນີ້ ວຽກ​ຍົກຍ້າຍ​ສິ່ງ​ກີດຂວາງ​ຄືບ​ໜ້າ​ຫຼາຍ​ກວ່າ 80% ວຽກ​ວາງ​ທໍ່​ລະບາຍ​ນ້ຳ ຍັງ​ເຫຼືອພຽງ 2 ກິໂລແມັດ ກໍ່​ຈະ​ສຳເລັດ ພ້ອມ​ນີ້ຍັງ​ໄດ້​ປູ​ເບ​ຕົງ​ໄດ້ 50% ສັງ​ລວມ​ແລ້ວ​ໂຄງການ​ມີ​ຄວາມຄືບ​ໜ້າ 60% ຂອງ​ແຜນການທັງ​ໝົດ ປັດຈຸບັນ ພວກ​ເຮົາ​ກຳລັງ​ສຸມ​ໃສ່​ວຽກ​ວາງ​ທໍ່​ລະບາຍນ້ຳ ຈາກ​ນັ້ນ ກໍ່​ຈະ​ກ້າວ​ສູ່​ການ​ເທເບ​ຕົງ ແລະ ວຽກ​ຕົບແຕ່ງ​ຕາມລຳດັບ ຄາດ​ວ່າ​ຈະ​ໃຫ້​ສຳເລັດ ແລະ ຈັດ​ພິທີ​ມອບ-ຮັບ​ເປັນ​ທາງການ​ໃນ​ເດືອນ​ພຶດສະພາ 2018.

ທ່ານ ຄູນ​ສົມບັດ ເຝື້ອຍ​ມະນີ​ວົງ ຫົວໜ້າ​ໂຄງການກໍ່​ໄດ້​ກ່າວ​ວ່າ: ການຈັດຕັ້ງ​ປະຕິບັດ​ໂຄງການ​ນີ້ແມ່ນ​ດຳເນີນ​ໄປ​ຢ່າງ​ໜ້າ​ເພິ່ງ​ພໍໃຈ ປະຊາຊົນ​ໄດ້​ອຳນວຍ​ຄວາມສະດວກ ແລະ ໃຫ້ການ​ສະໜັບສະ​ໜູນ​ເປັນ​ຢ່າງ​ດີ ໂດຍ​ສະເພາະການ​ຍົກຍ້າຍ​ສິ່ງ​ກີດຂວາງ ຈຶ່ງເຮັດ​ໃຫ້ການ​ປະຕິບັດ​ໂຄງການ​ມີຄວາມ​ຄືບ​ໜ້າ​ໄວ ພ້ອມ​ທັງ​ຮັບ​ປະກັນ​ດ້ານ​ຄຸນະພາບ ແຕ່​ແນວໃດກໍ່​ດີ ຂ້າພະເຈົ້າ​ຂໍ​ຮຽກຮ້ອງ​ມາຍັງ​ຜູ້​ໃຊ້​ລົດ​ໃຊ້​ຖະໜົນ​ ຈົ່ງ​ເພີ່ມຄວາມ​ລະມັດລະວັງ​ໃນ​ການ​ສັນຈອນ​ໃຫ້​ຫຼາຍ​ຂຶ້ນ ເພື່ອ​ຫຼີກ​ລ່ຽງການ​ເກີດ​ອຸບັດ​ຕິ​ເຫດ ໂດຍ​ສະເພາະ ໃນ​ໄລຍະ​ການ​ກໍ່ສ້າງ.

ຂ່າວທີ່ກ່ຽວຂ້ອງ