ຮ່ວມກັນຊອກຫາວິທີການແກ້ໄຂຄວາມເດືອດຮ້ອນຂອງປະຊາຊົນ

547 16 ສ.ຫ. 2017 ຂ່າວໜ້າ​ໜຶ່ງ
ຮ່ວມກັນຊອກຫາວິທີການແກ້ໄຂຄວາມເດືອດຮ້ອນຂອງປະຊາຊົນ

ກອງ​ປະຊຸມ​ຮ່ວມ​ລະຫວ່າງຄະນະ​ປະຈຳ​ສະພາ​ແຫ່ງ​ຊາດ ກັບ​ຄະນະ​ລັດຖະບານ ຈັດ​ຂຶ້ນ​ວັນທີ 15 ສິງຫາ 2017 ທີ່​ຫໍ​ປະຊຸມແຫ່ງ​ຊາດ ໂດຍ​ເປັນ​ປະທານຮ່ວມ​ລະຫວ່າງທ່ານ​ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ ແລະ ທ່ານ ທອງ​ລຸນ ສີ​ສຸ​ລິດ ນາຍົກ​ລັດຖະມົນຕີ ມີ​ບັນດາ​ຮອງ​ນາຍົກ​ລັດຖະມົນຕີ ຮອງ​ປະທານ​ສະພາ​ແຫ່ງ​ຊາດ ລັດຖະມົນຕີ ຮອງລັດຖະມົນຕີ ແລະ ພະນັກງານກ່ຽວຂ້ອງ​ເຂົ້າ​ຮ່ວມ.

ຈຸດປະສົງ​ກອງ​ປະຊຸມ​ຄັ້ງ​ນີ້ ເພື່ອ​ພ້ອມ​ກັນ​ປຶກສາ​ຫາລື ແລະ ຮ່ວມ​ກັນ​ຊອກ​ຫາ​ວິທີ​ການ​ແກ້​ໄຂ ບັນຫາ​ພົ້ນ​ເດັ່ນ​ທີ່​ເກີດ​ຂຶ້ນ​ໃນ​ສັງຄົມ ສົ່ງ​ຜົນ​ກະທົບ​ຕໍ່​ສິດ​ຜົນ​ປະໂຫຍດ​ຂອງ​ປະຊາຊົນ​ບັນດາເຜົ່າ ໃນ​ໂຄງການ​ລົງທຶນ​ພັດທະນາຂອງ​ລັດ ແລະ ພາກ​ເສດຖະກິດຕ່າງໆ ຕິດຕາມ​ການຈັດຕັ້ງ​ປະຕິບັດ​ບັນດາ​ຄາດໝາຍ​ໃຫຍ່ ​ທາງດ້ານ​ເສດຖະກິດ-ສັງຄົມ ງົບ​ປະມານ​ແຫ່ງ​ລັດ​ປີ 2017 ຕາມ​ມະຕິກອງ​ປະຊຸມ​ສະໄໝ​ສາມັນ​ເທື່ອ​ທີ 2 ຂອງ​ສະພາ​ແຫ່ງ​ຊາດ​ວາງອອກ ເພື່ອ​ສືບຕໍ່​ຊຸກຍູ້ ແລະ ຊີ້​ນຳການຈັດຕັ້ງ​ປະຕິບັດ​ແຜນ​ດັ່ງກ່າວໃນ 6 ເດືອນ​ທ້າຍ​ປີ​ໃຫ້​ບັນລຸ​ຕາມຄາດໝາຍ​ທີ່​ວາງ​ໄວ້.

ນອກ​ນີ້ ຜູ້​ເຂົ້າ​ຮ່ວມ​ຍັງ​ໄດ້​ຮັບຟັງ ແລະ ປຶກສາ​ຫາລື​ບັນຫາຕ່າງໆ ເຊັ່ນ: ຮັບ​ຟັງ​ລາຍ​ງານການຈັດຕັ້ງ​ປະຕິບັດ​ນະໂຍບາຍຊົດ​ເຊີຍ​ຕໍ່​ປະຊາຊົນ ​ທີ່​ໄດ້​ຮັບ​ຜົນກະທົບ​ຈາກ​ໂຄງການ​ພັດທະນາຂອງ​ລັດ ​ລວມ​ທັງ​ໂຄງການ​ກໍ່ສ້າງເສັ້ນທາງ​ລົດໄຟ ໂຄງການ​ລົງທຶນພາຍ​ໃນ ແລະ ຕ່າງປະເທດ ​ທີ່​ພົວພັນ​ເຖິງ​ການ​ຊົດ​ເຊີຍ ການ​ຈັດສັນ​ທີ່ຢູ່​ອາໄສ ແລະ ອາຊີບ​ຄົງ​ທີ່ໃຫ້​ແກ່​ປະຊາຊົນ​ທີ່​ຖືກ​ຜົນ​ກະທົບ ຈັດ​ຕັ້ງ​ປະຕິບັດບັນດາ​ຄາດໝາຍໃຫຍ່​ທາງ​ດ້ານ​ເສດຖະກິດ-ສັງຄົມ ງົບປະມານ​ແຫ່ງ​ລັດ​ຕາມ​ມະຕິ​ກອງ​ປະຊຸມ​ສະໄໝ​ສາມັນ​ເທື່ອທີ 2 ຂອງ​ສະພາ​ແຫ່ງ​ຊາດ​ໃນ 6 ເດືອນ​ຕົ້ນ​ປີ 2017 ບັນດາ​ນະ​ໂຍບາຍ ແລະ ມາດ​ຕະ​ການຈັດຕັ້ງປະຕິບັດ​ແຜນ​ດັ່ງກ່າວ​ໃນ 6 ເດືອນ​ທ້າຍ​ປີ 2017 ປຶກສາ​ຫາລື​ກ່ຽວ​ກັບ​ກົນ​ໄກ​ປະສານ​ງານ ແລະ ການ​ຊີ້​ນຳ​ຂອງ​ຄະນະ​ປະຈຳ​ສະພາ​ແຫ່ງ​ຊາດ ແລະ ລັດ​ຖະບານ​ຕໍ່​ກັບ​ການຈັດຕັ້ງ​ຜັນ​ຂະຫຍາຍ​ມະຕິ​ກອງ​ປະຊຸມ​ສະໄໝສາມັນ​ເທື່ອ​ທີ 4 ຂອງ​ສະພາ​ແຫ່ງຊາດ​ທີ່​ຈະ​ມາ​ເຖິງ​ໃນ​ທ້າຍ​ປີ​ນີ້ ກ່ຽວ​ກັບ​ແຜນ​ພັດທະນາ​ເສດ​ຖະກິດ-ສັງຄົມ ແລະ ແຜນ​ງົບ​ປະມານ​ແຫ່ງ​ລັດ ປະຈຳ​ປີ 2018 ຕໍ່ສາຍ​ຕັ້ງ​ຂອງ​ຕົນ ນັບ​ແຕ່​ສູນ​ກາງລົງ​ຮອດ​ທ້ອງຖິ່ນ ແນໃສ່​ຮັບ​ປະກັນ​ຄວາມ​ເປັນ​ເອກະ​ພາບ​ໃນການ​ຊີ້​ນຳ ແລະ ການຈັດຕັ້ງ​ຜັນຂະຫຍາຍ​ແຜນ​ດັ່ງກ່າວ ​ໃຫ້​ທັນຕາມ​ກຳນົດ​ເວລາ ແລະ ມີ​ໝາກຜົນ.

ຂ່າວທີ່ກ່ຽວຂ້ອງ