ລັດຂຸ້ນຂ້ຽວຄິດໄລ່ຄ່າຊົດເຊີຍ ສິ່ງກີດຂວາງເສັ້ນທາງລົດໄຟ ລາວ-ຈີນ

247 17 ສ.ຫ. 2017 ຂ່າວໜ້າ​ໜຶ່ງ

ກະຊວງ​ໂຍທາ​ທິ​ການ ແລະ ຂົນສົ່ງ ຮ່ວມ​ກັບ​ຄະນະ​ກຳມະການ​ໄກ່​ເກ່ຍ​ຂັ້ນ​ແຂວງ ແລະ ຄະນະ​ຄຸ້ມ​ຄອງ​ໂຄງການ​ກໍ່ສ້າງ​ເສັ້ນທາງ​ລົດໄຟ ລາວ-ຈີນ ໄດ້​ສຳເລັດ​ການ​ລົງ​ເກັບ​ກຳ​ຂໍ້​ມູນ​ໂດຍ​ພື້ນຖານ ​ກ່ຽວ​ກັບ​ການ​ຄິດໄລ່​ລາຄາ​ຫົວໜ່ວຍ​ຄ່າ​ຊົດ​ເຊີຍ​ສິ່ງ​ກີດຂວາງ​ໃນ​ໂຄງການ​ດັ່ງກ່າວ ​ໄດ້​ມີ​ຄວາມ​ເປັນ​ເອກະ​ພາບ​ໃນການຈັດຕັ້ງ​ປະຕິບັດ​ຫຼາຍໆ​ຂັ້ນ​ຕອນ.

ຄະນະ​ກຳມະການ​ໄກ່​ເກ່ຍ​ໄດ້​ລົງ​ສົມທົບ​ກັບ​ເຈົ້າ​ຂອງ​ທີ່​ດິນ ແລະ ສິ່ງ​ປຸກ​ສ້າງ​ຕ່າງໆ ເພື່ອ​ເກັບ​ກຳ​ຂໍ້ມູນ​ຕາມ​ພື້ນ​ທີ່​ທີ່​ຜູ້​ຮັບ​ເໝົາ ​ໄດ້​ປັກ​ຫຼັກ​ໝາຍ​ກຳນົດ​ຂອບ​ເຂດ​ເພື່ອ​ການ​ກໍ່ສ້າງ ດຳເນີນ​ການ​ຈັດ​ລຽງ​ສາລະບານ​ລາຍການ​ສິ່ງ​ກີດຂວາງ​ທີ່​ດິນ ຜົນລະປູກ ແລະ ຄົ້ນຄວ້າ​ຄິດໄລ່​ຫົວໜ່ວຍ​ຄ່າ​ຊົດ​ເຊີຍ​ທັງ​ໝົດ ເປີດ​ກອງ​ປະຊຸມ​ຫາລືລະຫວ່າງຄະນະ​ຄຸ້ມ​ຄອງ​ໂຄງການ​ກໍ່ສ້າງ​ເສັ້ນທາງ​ລົດໄຟ ລາວ-ຈີນ ແລະ ຄະນະກຳມະການ​ໄກ່​ເກ່ຍ​ສິ່ງ​ກີດຂວາງ​ຂັ້ນ​ນະຄອນຫຼວງ ແຂວງ​ວຽງ​ຈັນ ຫຼວງ​ພະ​ບາງ ອຸດົມ​ໄຊ ແລະ ແຂວງ​ຫຼວງ​ນ້ຳ​ທາ ເຊິ່ງ​ໄດ້​ເປັນ​ເອກະ​ພາບ​ຄິດໄລ່​ຫົວໜ່ວຍ​ຄ່າ​ຊົດ​ເຊີຍ​ທັງ​ໝົດ​ມີ 242 ລາຍການ ເຊິ່ງ​ການ​ຄິດໄລ່​ດັ່ງກ່າວ​ໃຫ້​ຖືກຕ້ອງ​ຕາມ​ນິຕິ​ກຳ ​ທີ່​ມີໂດຍ​ສົມ​ທຽບໃສ່​ສະພາບ​ຕົວ​ຈິງ ແລະ ມີ​ຄວາມ​ເປັນ​ເອກະ​ພາບ​ກັບ​ບັນດາ​ລາຍການ​ທີ່​ຄ້າຍຄື​ກັນ ແລະ ຢູ່​ໃນ​ບັນດາ​ແຂວງ​ທີ່​ໃກ້​ຄຽງ​ກັນ.

ສຳລັບ​ພື້ນຖານ​ການ​ຄິດໄລ່​ຄ່າ​ຊົດ​ເຊີຍ​ໃຫ້​ແກ່​ກຸ່ມ​ທີ 1 ແຂວງ​ຫຼວງ​ນ້ຳ​ທາ ອຸດົມ​ໄຊ ແລະ ແຂວງຫຼວງ​ພະ​ບາງ ເຊິ່ງ​ໃນ​ເບື້ອງ​ຕົ້ນ​ໄດ້​ຄົ້ນຄວ້າ​ຈາກ 3 ບ່ອນ​ອີງ ຄື: ອີງໃສ່​ຄ່າ​ຊົດ​ເຊີຍ​ຈາກ​ບັນດາ​ໂຄງການ​ທີ່​ໄດ້​ຈັດ​ຕັ້ງ​ປະຕິບັດ​ໄລຍະ​ຜ່ານ​ມາ​ໃນ​ເຂດ​ໃກ້​ຄຽງ ອີງໃສ່​ລາຄາ​ທີ່​ກະຊວງ​ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ​ກຳນົດ ແລະ ອີງໃສ່​ລາຄາ​ຊື້-ຂາຍ​ຕົວ​ຈິງ ກ່ອນ​ມີ​ໂຄງການ​ກໍ່ສ້າງ​ທາງ​ລົດໄຟ​ເກີດ​ຂຶ້ນ ໂດຍ​ສະເພາະ​ແມ່ນ​ທີ່​ດິນ ສ່ວນ​ກຸ່ມ 2 ແຂວງ​ວຽງ​ຈັນ ແລະ ນະຄອນຫຼວງ​ວຽງ​ຈັນ ສະເພາະ​ແຂວງ​ວຽງ​ຈັນ ໃຫ້​ອີງໃສ່​ການ​ປະ​ເມີນ​ລາຄາ​ທີ່​ດິນ​ທີ່​ອົງການ​ປົກຄອງ​ແຂວງ​ຮັບຮອງ​ເອົາ​ແລ້ວ​ນັ້ນ ສ່ວນ​ນະຄອນຫຼວງ​ວຽງ​ຈັນ ໄດ້​ຄິດໄລ່​ເປັນ​ລາຄາ​ສະເລ່ຍ ໂດຍ​ເອົາ​ມູນ​ຄ່າ​ເກົ່າ ແລະ ມູນ​ຄ່າ​ໃໝ່​ບວກ​ກັນ ແລ້ວ​ຫານ​ສອງ ແລະ ສະເລ່ຍ​ເປັນ​ລາຄາ​ກາງ ສັງ​ລວມ​ແລ້ວ​ການ​ຄິດໄລ່​ລາຄາ​ຫົວໜ່ວຍ​ຄ່າ​ຊົດ​ເຊີຍ​ທີ່​ດິນ ສິ່ງ​ປຸກ​ສ້າງ ແລະ ຜົນ​ລະປູກ​ແມ່ນ​ໄດ້​ເປັນ​ເອກະ​ພາບ​ກັນ​ໂດຍ​ພື້ນຖານ ໂດຍ​ຈະ​ເລັ່ງ​ດຳເນີນ​ການ​ນຳ​ສະເໜີ​ຕໍ່​ສະພາ​ທ້ອງຖິ່ນ​ໂດຍ​ໄວ ກ້າວ​ໄປ​ເຖິງ​ການ​ສະເໜີ​ຕໍ່​ລັດຖະບານ ເພື່ອ​ອະນຸມັດ​ໃນ​ການຈັດຕັ້ງ​ປະຕິບັດ​ໃຫ້​ມີ​ຜົນສຳເລັດ.

ຂ່າວທີ່ກ່ຽວຂ້ອງ