ພະຍຸຊົງກາ ສົ່ງຜົນກະທົບ 181 ບ້ານຂອງສະຫວັນນະເຂດ

194 17 ສ.ຫ. 2017 ຂ່າວໜ້າ​ໜຶ່ງ

ຜົນ​ກະທົບ​ຈາກ​ພະຍຸ​ຊົງ​ກາ ເຮັດ​ໃຫ້​ເກີດ​ມີ​ສະພາບ​ຝົນຕົກ​ຕິດຕໍ່​ກັນ​ຫຼາຍ​ວັນ ໃນ​ລະຫວ່າງ​ວັນ​ທີ 24-28 ກໍລະກົດ​ຜ່ານ​ມາ ເຮັດ​ໃຫ້​ນ້ຳ​ຖ້ວມ​ອັ່ງ​ເປັນ​ບໍລິເວນ​ກວ້າງ ບ້ານ​ເຮືອນ ແລະ ເນື້ອທີ່​ການ​ຜະລິດ​ຂອງ​ປະຊາຊົນ​ເສຍ​ຫາຍ​ຫຼາຍ​ພໍ​ສົມຄວນ​ຢູ່ 7 ເມືອງ​ຂອງ​ແຂວງ​ສະຫວັນ​ນະ​ເຂດ ລວມ​ມີ 181 ບ້ານ ມີ 9.304 ຄອບຄົວ ປະຊາກອນ 40.759 ຄົນ ມີ​ເນື້ອທີ່​ນາ​ຖືກ​ນ້ຳ​ຖ້ວມ ຈຳນວນ​ທັງ​ໝົດ 15.680 ເຮັກຕາ ມາ​ຮອດ​ປັດຈຸບັນ ​ແມ່ນ​ຍັງ​ບໍ່​ສາມາດ​ປະ​ເມີນ​ມູນ​ຄ່າ​ຄວາມ​ເສຍ​ຫາຍ​ໄດ້.

ຕາມ​ການ​ລາຍ​ງານ​ຂອງ​ພະ​ແນກ​ກະສິກຳ-ປ່າໄມ້ ແຂວງ​ສະຫວັນ​ນະ​ເຂດ ໃຫ້​ຮູ້​ວ່າ: ສຳລັບ​ບັນດາ​ເມືອງ​ທີ່​ໄດ້​ຮັບ​ຜົນ​ກະທົບ​ຈາກ​ໄພ​ນ້ຳ​ຖ້ວມ​ປີ​ນີ້ ​ມີ​ເມືອງ​ຈຳ​ພອນ ສອງ​ຄອນ ໄຊ​ພູ​ທອງ ຊົນ​ນະ​ບູ​ລີ ທ່າ​ປາງ​ທອງ ໄຊ​ບູ​ລີ ແລະ ເມືອງ​ອາດ​ສະພັງ​ທອງ ນອກຈາກ​ສ້າງ​ຄວາມ​ເສຍ​ຫາຍ​ແກ່​ຊັບ​ສິນ ແລະ ເນື້ອທີ່ການ​ຜະລິດ​ແລ້ວ ຍັງ​ສ້າງ​ຄວາມ​ເສຍ​ຫາຍ​ແກ່​ສັດລ້ຽງ ໂດຍ​ສະເພາະ ​ງົວຕາຍ 29 ໂຕ ແລະ ສັດ​ປີກ​ຫຼາຍ​ກວ່າ 213 ໂຕ ໜອງ​ປາ​ເສຍ​ຫາຍ 265 ໜອງ ແລະ ລະບົບ​ຊົນລະປະທານ 8 ແຫ່ງ ຝາຍ 2 ແຫ່ງ ປະຕູ​ນ້ຳ 4 ແຫ່ງ ແລະ ຮ່ອງ​ສົ່ງ​ນ້ຳ 2 ແຫ່ງ.

ພາຍຫຼັງ​ເກີດ​ໄພ​ທຳ​ມະ​ຊາດ ທ່ານ ສັນຕິພາບ ພົມວິຫານ ເຈົ້າແຂວງ​ສະຫວັນ​ນະ​ເຂດ ພ້ອມ​ຄະນະ ກໍ່​ໄດ້​ລົງ​ຕິດຕາມ ແລະ ຢ້ຽມຢາມ​ປະຊາຊົນ​ຜູ້​ທີ່​ໄດ້​ຮັບ​ຜົນ​ກະທົບ​ຢູ່​ເມືອງ​ຕ່າງໆ ພ້ອມ​ທັງ​ນຳ​ເອົາເຄື່ອງ​ຊ່ວຍເຫຼືອ​ສຸກ​ເສີນ​ປະເພດ​ນ້ຳ​ດື່ມ ແລະ ອາຫານ​ສຳເລັດ​ຮູບ​ຈຳນວນ​ໜຶ່ງ ມອບ​ໃຫ້​ປະຊາຊົນ ເພື່ອ​ເປັນ​ກຳລັງ​ໃຈ ທັງ​ຊີ້​ນຳ​ໃຫ້​ມີ​ສະຕິ​ຕໍ່​ສະພາບ​ດິນ​ຟ້າ​ອາກາດ​ທີ່​ອາດ​ຈະ​ເກີດ​ຂຶ້ນ​ໄດ້​ທຸກເມື່ອ ນັບ​ທັງ​ປີ​ນີ້ ແລະ ປີ​ຕໍ່​ໄປ ແລະ ເມື່ອ​ບໍ່​ດົນ​ມາ​ນີ້ ທ່ານ ໄຊ​ສົມ​ພອນ ພົມວິຫານ ກໍ່​ໄດ້​ນຳ​ເອົາ​ເຄື່ອງ​ຊ່ວຍເຫຼືອ​ບັນເທົາ​ທຸກ​ປະເພດ​ເຂົ້າສານ ອາຫານ​ແຫ້ງ ນ້ຳ​ດື່ມ ແລະ ຢາ​ປົວ​ພະຍາດ​ ໄປ​ມອບ​ໃຫ້​ປະຊາຊົນ​ຜູ້​ທີ່​ໄດ້​ຮັບ​ຜົນ​ກະທົບ​ຢູ່ເມືອງ​ຈຳ​ພອນ ແລະ ເມືອງ​ຊົນ​ນະ​ບູ​ລີ ມູນ​ຄ່າ​ກວ່າ 70 ລ້ານ​ກີບ.

ຫຼ້າ​ສຸດ ຄະນະ​ນຳ​ວິທະຍາ​ໄຊ​ສົມບັດເຕັກ​ໂນ​ໂລ​ຊີ ແຂວງ​ສະຫວັນ​ນະ​ເຂດ ກໍ່​ໄດ້​ນຳ​ເຄື່ອງ​ອຸປະໂພກ-ບໍລິໂພກ ໄປ​ຊ່ວຍ​ບັນເທົາ​ທຸກ​ໃຫ້​ປະຊາຊົນ​ຜູ້​ໄດ້​ຮັບ​ຜົນ​ກະທົບ ​ຢູ່​ເມືອງ​ອາດ​ສະ​ພອນ ເຊິ່ງ​ເມືອງ​ດັ່ງກ່າວ​ມີ​ປະຊາຊົນ​ໄດ້​ຮັບ​ຜົນ​ກະທົບ 27 ບ້ານ ເນື້ອທີ່​ນາ​ຖືກ​ນ້ຳ​ຖ້ວມ​ທັງ​ໝົດ 500 ກວ່າ​ເຮັກຕາ ແລະ ເສຍ​ຫາຍ​ໜັກ 244 ເຮັກຕາ.

ຂ່າວທີ່ກ່ຽວຂ້ອງ