ເສີມຂະຫຍາຍມູນເຊື້ອ 23 ສິງຫາ ເຂົ້າໃນການພັດທະນາປະເທດຊາດ

642 17 ສ.ຫ. 2017 ຂ່າວໜ້າ​ໜຶ່ງ
ເສີມຂະຫຍາຍມູນເຊື້ອ 23 ສິງຫາ ເຂົ້າໃນການພັດທະນາປະເທດຊາດ

ຫ້ອງ​ວ່າການ​ນະຄອນຫຼວງວຽງ​ຈັນ ສະພາ​ປະຊາຊົນນະຄອນ​ຫຼວງ ຮ່ວມ​ກັບ​ຄະນະ​ໂຄສະນາ​ອົບຮົມ ນວ ຈັດ​ປາຖະກະຖາ ເນື່ອງ​ໃນ​ໂອກາດ​ວັນ​ລັດ​ຖະ​ທຳມະນູນ​ແຫ່ງ ​ສປປ ລາວ ຄົບຮອບ 26 ປີ ວັນ​ຢຶດ​ອຳນາດ 23 ສິງຫາ ຄົບຮອບ 42 ປີ ຢູ່​ທີ່​ຫ້ອງ​ວ່າການປົກຄອງ​ນະຄອນຫຼວງ​ວຽງ​ຈັນ ໃນ​ວັນ​ທີ 16 ສິງຫາ 2017 ໃຫ້ກຽດ​ປາຖະກະຖາ​ວັນ​ລັດ​ຖະ​ທຳມະນູນ​ແຫ່ງ ​ສປປ ລາວ ໂດຍທ່ານ ອານຸພາບ ຕຸ​ນາ​ລົມ ຮອງເລຂາ​ຄະນະ​ພັກ ປະທານ​ສະພາປະຊາຊົນ ນວ ແລະ ໃຫ້​ກຽດ​ປາຖະ​ກະຖາວັນ​ຢຶດ​ອຳນາດ 23 ສິງຫາ ໂດຍ​ທ່ານ ສີ​ຫຸນ ສິດທິ​ລື​ໄຊ ຮອງ​ເລຂາ​ຄະນະ​ພັກ ຮອງ​ເຈົ້າຄອງ ນວ ມີ​ຄະນະ​ປະຈຳ​ພັກ ຄະນະ​ພັກ ນວ ເລຂາ​ພັກ​ເມືອງ ເຈົ້າເມືອງ ຫົວໜ້າ​ພະແນກການ ອົງການ​ທຽບ​ເທົ່າ ທະຫານ ຕຳຫຼວດ ພະນັກງານ​ຫຼັກ​ແຫຼ່ງ​ອ້ອມ​ຂ້າງ ນວ ເຂົ້າ​ຮ່ວມ.

ໃນ​ການ​ປາຖະກະຖາ​ຄັ້ງ​ນີ້ ທ່ານ ອານຸພາບ ຕຸ​ນາ​ລົມ ໄດ້ຍົກ​ໃຫ້​ເຫັນ​ສະພາບ​ແວດ​ລ້ອມ ຄວາມ​ໝາຍ​ສຳຄັນ​ຂອງ​ລັດ​ຖະທຳ​ມະນູນ​ລວມ​ໄປ​ເຖິງ​ສະພາບ ການຈັດຕັ້ງ​ປະຕິບັດ​ລັດ​ຖະ​ທຳ​ມະນູນ ແລະ ກົດໝາຍ ເຖິງ​ຜົນ​ດີ ຜົນ​ຮ້າຍ ແລະ ເພີ່ມ​ທະວີ​ການ​ຈັດຕັ້ງ​ປະຕິບັດ​ລັດ​ຖະ​ທຳ​ມະນູນ ແລະ ກົດໝາຍ​ຕ່າງໆ​ໃຫ້​ເຂັ້ມງວດ ແລະ ມີ​ປະ​ສິດທິ​ຜົນ.

ໂອກາດ​ດຽວ​ກັນ ທ່ານ ສີ​ຫຸນ ສິດທິ​ລື​ໄຊ ກໍ່​ໄດ້​ຍົກ​ໃຫ້​ເຫັນ​ປະຫວັດ​ຄວາມ​ເປັນ​ມາ​ຂອງ​ການ​ຢຶດອຳນາດ ໃນ​ວັນ​ທີ 23 ສິງຫາ ລວມ​ທັງ​ການ​ເຕີບ​ໃຫຍ່​ຂະຫຍາຍຕົວ​ຂອງ​ນະຄອນຫຼວງ​ວຽງ​ຈັນ ໃນ​ໄລຍະ 42 ປີຜ່ານມາ ໂດຍສະເພາະ ວຽກ​ງານ​ປ້ອງ​ກັນ​ຊາດປ້ອງ​ຄວາມ​ສະຫງົບ ທີ່​ພົ້ນ​ເດັ່ນສາມາດ​ສ້າງ​ບ້ານ​ປອດ​ຄະດີໄດ້ 398 ບ້ານ ໃນ​ຈຳນວນ 481 ບ້ານ ທົ່ວ ນວ ສ້າງ​ບ້ານ​ປອດ​ຢາເສບ​ຕິດ​ໄດ້ 319 ບ້ານ ບ້ານ​ປ້ອງກັນ​ຄວາມ​ສະຫງົບ​ດີ 379 ບ້ານ ສົກ 2015-2016 ສາມາດ​ແກ້ໄຂ​ຄະດີ​ໄດ້ 1.680 ເລື່ອງ​ໃນ​ຈຳນວນ 3.747 ເລື່ອງ ລາຍ​ໄດ້​ສະເລ່ຍ 4.700 ໂດ​ລາ/ຄົນ/ປີ (2016) ສ້າງ​ບ້ານ​ວັດທະນະທຳໄດ້ 433 ບ້ານ ແລະ ຜົນງານ​ອື່ນອີກ​ຫຼາຍ​ຢ່າງ ເຊິ່ງ​ສະແດງ​ໃຫ້ເຫັນ​ເຖິງ​ໝາກຜົນ​ຂອງ​ການ​ຊີ້​ນຳ ນຳພາ​ຂອງ​ພັກ​ປະຊາຊົນ​ປະຕິວັດລາວ ໝາກຜົນ​ຂອງ​ການ​ປະຕິວັດ ກໍ່​ຄືການ​ພັດທະນາ​ນະຄອນຫຼວງວຽງ​ຈັນ.

ຈາກ​ຜົນງານ​ດັ່ງກ່າວ​ເພື່ອ​ສືບຕໍ່​ເສີມ​ຂະຫຍາຍ​ມູນເຊື້ອ 23 ສິງຫາ ເຂົ້າ​ໃນ​ການ​ພັດທະນາ​ປະເທດ​ຊາດ ກໍ່​ຄືນະຄອນຫຼວງ​ວຽງຈັນ ເພີ່ມ​ທະວີ​ການ​ສຶກ​ສາ​ອົບຮົມ ພະນັກງານ ນັກຮົບ ລັດຖະກອນ ແລະ ປະຊາຊົນ​ລາວ​ບັນດາເຜົ່າ ເປັນຕົ້ນ ຄົນ​ຮຸ່ນ​ໜຸ່ມ ໄດ້​ຮັບ​ຮູ້​ເຂົ້າໃຈ​ກ່ຽວ​ກັບ​ມູນເຊື້ອ​ດັ່ງກ່າວ ດ້ວຍ​ຮູບ​ການ​ຕ່າງໆ​ໃຫ້​ກວ້າງຂວາງ ແລະ ເລິກເຊິ່ງ.

ຂ່າວທີ່ກ່ຽວຂ້ອງ