ປະຊາຊົນສະເໜີຫຼາຍບັນຫາຕໍ່ ສສຊ-ສສ ນວ

703 17 ສ.ຫ. 2017 ຂ່າວໜ້າ​ໜຶ່ງ
ປະຊາຊົນສະເໜີຫຼາຍບັນຫາຕໍ່ ສສຊ-ສສ ນວ

ສະມາຊິກ​ສະພາ​ແຫ່ງ​ຊາດ ຊຸດ​ທີ VIII ປະຈຳ​ເຂດ​ເລືອກ​ຕັ້ງທີ 1 ແລະ ສະມາຊິກ​ສະພາ​ປະຊາ​ຊົນ ນະຄອນຫຼວງ​ວຽງ​ຈັນ ຊຸດທີ I ມີ​ທ່ານ​ນາງ ຄຳ​ຟອງ ພູມວົງ​ໄຊ ​ສສຊ ປະຈຳ​ເຂດ​ເລືອກຕັ້ງ​ທີ 1 ຮອງ​ປະທານ​ສະພາ​ປະຊາ​ຊົນ​ນະຄອນຫຼວງ​ວຽງ​ຈັນ ພ້ອມ​ຄະນະ ໄດ້​ລົງເຄື່ອນ​ໄຫວ​ພົບ​ປະ​ປະຊາຊົນ​ບ້ານວຽງ​ຈະເລີນ ເມືອງ​ໄຊ​ເຊດ​ຖາ ນະຄອນຫຼວງ​ວຽງ​ຈັນ ວັນ​ທີ 16 ສິງຫາ 2017.

ທ່ານ ສົມ​ພິດ ວົງ​ພະຈັນ ນາຍບ້ານ​ວຽງ​ຈະເລີນ ໄດ້​ລາຍ​ງານສະພາບ​ລວມ​ຂອງ​ບ້ານ​ໂດຍ​ຫຍໍ້ ຈາກ​ນັ້ນ ​ສສຊ-​ສສ ນວ ໄດ້​ຜັດປ່ຽນ​ກັນ​ເຜີຍແຜ່​ພາລະ​ບົດບາດ ສິດ​ໜ້າທີ່​ຂອງ​ສະມາຊິກ​ສະພາແຫ່ງ​ຊາດ ສະພາ​ປະຊາຊົນ ຜົນສຳເລັດ​ກອງ​ປະຊຸມ​ສະໄໝ​ສາມັນເທື່ອ​ທີ 3 ຂອງ​ສະພາ​ແຫ່ງ​ຊາດ ຊຸດ​ທີ VIII ແລະ ສະພາ​ປະຊາຊົນ ນະຄອນຫຼວງ​ວຽງ​ຈັນ ຊຸດ​ທີ I ເພື່ອ​ໃຫ້​ປະຊາຊົນ​ໄດ້​ຮັບ​ຮູ້ ແລະ ເຂົ້າໃຈ ພ້ອມ​ນັ້ນຍັງ​ໄດ້​ຮັບ​ຟັງແລກປ່ຽນ​ຄຳ​ຄິດ​ເຫັນ​ກັບ​ປະຊາຊົນ​ບ້ານ​ວຽງ​ຈະເລີນ ເພື່ອ​ຈະ​ນຳສະເໜີ​ຕໍ່​ອຳນາດ​ການ​ປົກຄອງ ແລະ ຂະແໜງການ​ທີ່​ກ່ຽວຂ້ອງ ບັນຫາ​ປະຊາຊົນ​ໄດ້​ສະເໜີ​ແມ່ນໃຫ້​ມີ​ການ​ແກ້​ໄຂ​ບັນຫາ​ຄອງ​ນ້ຳທີ່​ເປື້ອນ ໂດຍ​ສະເພາະແມ່ນຮ່ອງ​ແຊງ​ທີ່​ໄຫຼ​ຜ່ານ ເນື່ອງ​ຈາກມີ​ປະຊາຊົນ​ຖິ້ມ​ຂີ້​ເຫຍື້ອ​ລົງ​ໃສ່ຄອງ​ນ້ຳ​ດັ່ງກ່າວ​ເປັນ​ຈຳນວນຫຼວງຫຼາຍ ສະເໜີ​ໃຫ້​ມີ​ການ​ແກ້ໄຂ​ການ​ອອກ​ໃບ​ຕາດິນ​ຖາວອນໃຫ້​ແກ່​ປະຊາຊົນ​ເຂດ​ໜ່ວຍ 45 ເພາະ​ເຂດ​ດັ່ງກ່າວ​ມີ​ແຜນທີ່​ຈະຖືກ​ໂຄງການ ຜ່ານ​ມາ​ປະຊາຊົນ ໄດ້​ຮັບ​ແຕ່​ສິດ​ໃບ​ນຳ​ໃຊ້​ເທົ່າ​ນັ້ນ ແລະ ບໍ່​ສາມາດ​ນຳ​ໃຊ້​ດິນ​ໄດ້ຕາມ​ຈຸດປະສົງ​ຂອງ​ຕົນ​ເອງ ພ້ອມ​ນັ້ນ ໃຫ້​ມີ​ການ​ສ້າງ​ເສັ້ນທາງ​ຮ່ອມ​ບ້ານ​ທີ່​ຍັງ​ບໍ່​ທັນ​ສຳເລັດ ​ໃຫ້​ເປັນ​ທາງ​ເບ​ຕົງ ໃຫ້​ມີການ​ກວດກາກຳນົດ​ຄອງ​ນ້ຳຮ່ອງ​ແຊງ ເພາະ​ມີ​ບາງ​ຄອບຄົວທີ່ຢູ່​ໃກ້​ໄດ້​ຖົມ​ເອົາ​ດິນ​ທີ່​ເປັນ​ເຂດຄອງ​ນ້ຳ​ໄປ​ເປັນ​ດິນ​ຂອງ​ຕົນ​ເອງ ເຮັດ​ໃຫ້​ເກີດ​ນ້ຳ​ອັ່ງ ແລະ ຖ້ວມໃນ​ເວລາ​ຝົນຕົກ ໃຫ້​ມີ​ການ​ເພີ່ມຈຳນວນ​ລົດ​ເກັບ​ຂີ້​ເຫຍື້ອ ໃຫ້​ມີການ​ແກ້​ໄຂ​ກ່ຽວ​ກັບ​ເຈົ້າ​ໜ້າທີ່​ຕັ້ງດ່ານ​ກວດ​ລົດ​ນຳ​ເສັ້ນທາງ ປັບໃໝ​ເອົາ​ເງິນ​ນຳ​ປະຊາຊົນ​ແບບບໍ່​ຖືກຕ້ອງ ແລະ ເອົາ​ເງິນ​ໄປ​ໃຊ້ສ່ວນ​ຕົວ ໃຫ້​ມີ​ການ​ອົບຮົມ​ກ່ຽວກັບ​ຈັນ​ຍາ​ບັນ​ຂອງ​ແພດ​ໝໍ​ຕໍ່​ການປິ່ນປົວ​ຄົນ​ເຈັບ ​ບໍ່​ໃຫ້​ມີ​ການ​ຈຳແນກ ໃຫ້​ພິຈາລະນາ​ຄືນ​ກ່ຽວກັບ​ເງິນ​ກອງ​ທຶນ​ທາງ ເຊິ່ງ​ເຫັນວ່າ​ມູນ​ຄ່າ​ສູງ​ຫຼາຍ ແລະ ສະເໜີໃຫ້​ມີ​ການ​ກວດກາ​ຄືນ​ກ່ຽວ​ກັບບັນຫາ​ຄ່າ​ໄຟຟ້າ​ແພງ ປັດຈຸບັນ ເຫັນ​ວ່າ​ນັບ​ມື້​ນັບ​ແພງ​ຂຶ້ນ ແລະ ອື່ນໆ.

ຕອນ​ບ່າຍ​ວັນ​ດຽວ​ກັນ ທ່ານ ໄຊ​ສົມ​ພອນ ພົມວິຫານ ປະທານສູນ​ກາງ​ແນວ​ລາວ​ສ້າງ​ຊາດ ສະມາ​ຊິກ​ສະພາ​ແຫ່ງ​ຊາດ ຊຸດ​ທີ 8 ປະຈຳ​ເຂດ​ເລືອກ​ຕັ້ງ​ທີ 1 ນະຄອນຫຼວງ​ວຽງ​ຈັນ ພ້ອມ​ຄະນະ ໄດ້​ສືບຕໍ່​ລົງ​ເຄື່ອນ​ໄຫວ​ພົບ​ປະ​ກັບປະຊາຊົນ​ບ້ານ​ທາດຫຼວງ​ເໜືອກາງ ແລະ ບ້ານ​ທາດຫຼວງ​ໃຕ້ ຢູ່ວັດ​ບ້ານ​ທາດຫຼວງ​ໃຕ້ ເພື່ອ​ແລກປ່ຽນ​ຄຳ​ຄິດ​ຄຳ​ເຫັນ ຄຳ​ສະເໜີຂັດຂ້ອງ​ໝອງ​ໃຈ​ຕ່າງໆ​ຂອງ​ພໍ່ແມ່​ປະຊາຊົນ​ໃນ​ບ້ານ​ດັ່ງກ່າວ ເພື່ອ​ສະເໜີ​ຕໍ່​ພາກສ່ວນ​ກ່ຽວຂ້ອງພິຈາລະນາ​ແກ້​ໄຂ.

ຂ່າວທີ່ກ່ຽວຂ້ອງ