ຍຸກ​ແຫ່ງ​ຂອງ​ປອມ - ໂດຍ: ຊຽງ​ເອງ

428 23 ສ.ຫ. 2017 ນານາສາລະ

ເຫັນ​ຂ່າວການ​ທຳ­ລາຍຊີ້ນ​ປາ​ອາ­ຫານທີ່​ມາ​ຈາກ​ການຄ້າ­ຂາຍ​ສັດ­ສາວາ​ສິ່ງ​ຂອງ​ຕ່າງ­ປະ­ເທດ ຕະ­ຫຼອດ​ເຖິງ​ເຄື່ອງ­ໃຊ້ສອຍປຸງ​ແຕ່ງ​ເພື່ອ​ຢູ່​ກິນ​ປະ­ຈຳ​ວັນ​ແລ້ວ​ ຮູ້­ສຶກ​ວ່າ “ອາເຫຍືອງ​ຄີງ” ເບິ່ງ​ຄື​ວ່າ​ຊີ­ວິດ​ຊຸມ​ເຮົາເຈົ້າ​ຂ້ອຍ​ຜູ້​ມີເຮືອນ­ຄົວ​ລວມ​ຢູ່ທ້ອງ​ຕະ­ຫຼາດ​ນີ້ ຫຼື ກິນ​ອາ­ຫານ​ສຸກຕາມ​ແຄມ​ທາງ ຫຼື ບ່ອນ​ຂາຍ​ຕ່າງໆ ສະ­ດວກ​ຊື້​ສະ­ດວກ​ກິນ ​ເພື່ອ​ຟ້າວ​ໄປ​ຫາ​ໜ້າ­ທີ່ວຽກ​ງານ​ນັ້ນ ປາ ກົດ​ວ່າ ​ພວກ​ເຮົາ​ເຫຼົ່າ​ນີ້​ມີ​ຄວາມ​ສ່ຽງ​ຕໍ່​ການ​ເກີດໂຣກ​ໄພ​ໄຂ້​ເຈັບ​ເສຍ​ແລ້ວ ເນື່ອງ​ຈາ​ກວ່າ ອາ­ຫານຖ້າດີບໍ່​ປອມ​ແປງ ແມ່ນ​ຂອງ​ສົດ​ຂອງ​ແທ້​ກໍ່ ແມ່ນ​ສາທຸ​ຍໍ​ມື​ສຸດ​ສອກ ແຕ່​ຖ້າ​ແມ່ນ​ໂຊກ​ບໍ່​ເຂົ້າ​ຂ້າງ ​ຖືກຊີ້ນ​ປາ​ອາ­ຫານ​ແຊ່​ສານກັນ​ບູດ ຜັກ​ນາງ​ອາງ​ຫຍ້າ​ເອືອບ​ເອົາ​ຢາ​ຂ້າ​ແມງ­ໄມ້​ມາ​ນຳ ​ກໍ່​ເຫັນ​ທ່າ​ວ່າ​ຕ້ອງຮ້ອງ­ເພງ ”ລໍ” ເຈັບ​ໄປ​ກ່ອນ ວ່າ​ມັນ​ຊິ​ອອກມາ​ໃນ​ຮູບໃດ ຊາມ­ຊາ​ຮອດ​ມື້​ມັນ​ອອກ​ລິດ. 

ນີ້​ຍັງ​ບໍ່​ເວົ້າ​ເລື່ອງ​ຂອງ​ໃຊ້​ສອຍ​ທີ່​ບໍ່​ແມ່ນ​ອາ­ຫານ​ການ​ກິນ​ ກໍ່​ແມ່ນ​ແຫ່­ແຫນ​ການ​ປອມ​ມາ​ໃຫ້​ໃຊ້​ບໍ່ ວ່າຈະ​ເປັນ​ເຄື່ອງ ສິ້ນ​ເສື້ອຜ້າ​ ແຜ່ນ­ແພ​ຍີ່­ຫໍ້ ຫຼື ບໍ່ຍີ່­ຫໍ້ ຢາ​ປົວ​ພະ­ຍາດ ອາ­ຫານ​ເສີມ ຢາ​ບຳ­ລຸງ ​ແຫ່ເຂົ້າ​ມາ​ໃຫ້​ໃຊ້ ຍ້ອນ​ການ​ໂຄ­ສະ­ນາ​ມາ​ເໜືອເມກ ແມ່ນ​ແຕ່​ກຸນ­ແຈ ຄ້ອນ​ຕີ​ຕອກ​ເຫຼັກ​ຕະ­ປູ​ ຍັງ​ຢ້ານ ເຫຼັກ​ຕະ­ປູ ກະ­ແຈ​ແປງ​ລົດ ​ກໍ່​ໃຊ້​ບໍ່​ທັນ​ເທົ່າ­ໃດ​ກໍ່​ຫຼຸ້ຍ ແລະ ອື່ນໆ ເບິ່ງ​ຄື​ວ່າ​ໜ້າ​ຕາ​ຊຸມ​ເຮົາ​ເຈົ້າ​ຂ້ອຍເຈົ້າ​ຂອງ​ປະ­ເທດ​ຊາດ​ນີ້​ເໝາະ​ສົມ​ແຕ່​ຂອງ​ປອມ ຂອງ​ບໍ່​ດີ​ນີ້​ຫວະ?.

ສື່​ອອນ​ລາຍ​ຈະ​ອ່ອນ​ຫຼາຍ ຫຼື ບໍ່ ແລະ ບາງ­ເທື່ອກໍ່​ມີ​ດີ​ຫຼາຍ ເພາະ​ບາງ​ຄັ້ງ​ກໍ່​ໂຄ­ສະ­ນາ​ທາງ​ດີ ຖ້າເປັນ​ຢາ​ຄ້າຍ­ຄື​ປົວ​ແລ້ວ​ຈະ​ເຊົາ​ມື້­ນີ້​ມື້­ອື່ນ ຄົນ​ຜູ້​ເຈັບເມື່ອ​ພົບ­ພໍ້​ຂ່າວ​ແບບ​ນີ້​ກໍ່​ຫ້າວ​ໃສ່​ໝົດ​ເທົ່າ­ໃດ​ກໍ່​ບໍ່​ຫວັ່ນ ຂໍ​ພຽງ​ແຕ່​ເຊົາ­ເຈັບ​ເປັນ ສ່ວນ​ການໂຄ­ສະ­ນາ ຜູ້​ເຊົາ­ເຈັບ​ເປັນ​ແມ່ນ­ແທ້ ຫຼື ບໍ່ ແມ່ນ​ຂາດ​ການ​ຕິດ­ຕາມ ຫຼື ແມ່ນ​ເຊີຍ​ກໍ່​ຍັງ​ບໍ່​ມີ​ໃຜ​ຮູ້​ໄດ້ ສ່ວນ​ຜູ້​ລົງ​ໂຄສະ​ນາເລື່ອງ​ຂອງ​ປອມ ເອົາ​ຂ່າວ​ກ່ຽວ​ກັບ​ການ​ຈັບກຸມ​ຜູ້​ລະ­ເມີດ​ກໍ​ເກີດ​ຂຶ້ນ​ເລື້ອຍ​ມາ ເຮັດ​ໃຫ້​ຄົນ​ອຸ່ນໃຈ​ມີ​ສະ­ຕິ​ລະ­ວັງ​ຕົວ​ແດ່ຫຼາຍ​ຂຶ້ນ ແຕ່​ເຖິງ​ຈະ​ເວົ້າ​ຈະວ່າ​ ທາງ​ອອນ​ລາຍ ທາງ​ສື່​ກໍ່​ພຽງ​ແຕ່​ຕັກ­ເຕືອນ​ໃຫ້​ມີສະ­ຕິ​ໄປ​ວັນໆ ຄວາມ​ຕັດ­ສິນ​ໃຈ​ທີ່­ແທ້​ຈິງແມ່ນ​ຜູ້­ນຳ​ໃຊ້-ຜູ້​ບໍ­ລິ­ໂພກ ຕ້ອງ​ຊ່າງ​ຮູ້ ສັງ­ເກດ​ຊອກ​ຮູ້​ບົດ­ຮຽນ ບໍ່​ດັ່ງ­ນັ້ນກໍ່​ຄົງ​ຫຼົງ​ກົນ​ໄປ​ຕາມໆ​ກັນ ສິ່ງ​ສຳ­ຄັນ​ປະການ​ໜຶ່ງ​ຕ້ອງ​ແມ່ນ​ອົງ­ການ​ປົກ​ປ້ອງ​ຜູ້​ບໍ­ລິ­ໂພກ ຕ້ອງ​ເປັນ​ຫົວ​ຈັກ​ຫຼັກ​ແຫຼ່ງ​ສະ­ກັດ​ກັ້ນ​ສິ່ງ​ປອມ​ແປງ​ນີ້.

ບັນ­ຫາ​ທີ່​ເປັນ​ຢາ​ແກ້​ທີ່​ດີ​ທີ່​ສຸດ ຕ້ອງ​ແມ່ນ​ເຈົ້າ​ໜ້າທີ່ທີ່​ມີ​ສ່ວນ​ກ່ຽວ­ຂ້ອງ​ກ່ຽວ​ກັບ​ວິ­ຊາ​ສະ­ເພາະ​ໃດ ແມ່ນ​ມາ​ຈາກ​ພາກ­ສ່ວນ​ນັ້ນ ເຊັ່ນ: ອາ­ຫານ ແລະ ຢາ ອຸດ­ສາ­ຫະ­ກຳ-ການ​ຄ້າ ເຈົ້າ​ໜ້າ­ທີ່​ຕຳ­ຫຼວດ ພາ­ສີ ຕ້ອງ​ກວດ­ກາ​ຄຸ­ນະ­ພາບ​ມາ​ແຕ່​ຕົ້ນທາງ ແຕ່​ບໍ່​ແມ່ນ​ຕະ­ຫຼາດ​ບາດ​ດຽວ ​ເພາະ​ຢ່າງ​ນ້ອຍ​ສຸດ​ເຂົາຂາຍ​ຂາ​ປະ­ຈຳ​ໄປ​ແລ້ວ ແລະ ອົງ­ການ​ປົກ­ຄອງ​ທ້ອງຖິ່ນ (ທີ່ຕ້ອງ​ກຳ­ກັບ​ນັບ​ຊາ​ນຳ​ການ​ຂາຍ​ອາ­ຫານຕາມ​ຊອກ​ຊອຍ ຮ່ອມ​ບ້ານ).

ເພື່ອ​ຕັດ​ໄຟ​ແຕ່​ຕົ້ນ​ລົມ​ ຕ້ອງ​ໃຊ້​ມາດ​ຕະ­ການຕາມ​ກົດ­ໝາຍ ແຕ່​ບໍ່​ແມ່ນ​ອະ­ນຸ­ໂລມ​ຄັ້ງ​ແລ້ວ​ຄັ້ງເລົ່າ ເຫັນ­ແກ່​ການ​ຄຳ​ຂໍອ່ອນ​ຂໍ​ຍອມ ການ​ທຳ​ມາຫາ​ກິນ​ແບບ​ດັ່ງ­ກ່າວມັນ​ທຳ­ລາຍ​ມະ­ນຸດ ເຮັດ​ໃຫ້ຄົນ​ເຈັບ​ໄຂ້​ໄດ້​ປ່ວຍ ບາງ​ຄັ້ງ​ອາດ​ສູນ​ເສຍ​ບຸຄະ­ລາກອນ​ທີ່​ເປັນ​ກຳ­ລັງ​ແຮງ​ໃນ​ການ​ພັດ­ທະ­ນາ​ປະ­ເທດ​ຊາດ​ບ້ານ​ເມືອງ​ນຳ​ອີກ.

ຂ່າວທີ່ກ່ຽວຂ້ອງ