ວຽງ​ຈັນ​ສະ­ອາດ - ໂດຍ : ດັ້ນ​ກີບ​ເມກ

260 25 ສ.ຫ. 2017 ນານາສາລະ

ພາຍ​ໃນ​ກາງປີ​ນີ້​ເຫັນ​ວ່າ ໄດ້​ມີ​ຂ່າວ​ດີຫຼາຍ​ຢ່າງ​ເກີດຂຶ້ນ​ຢູ່​ນະ­ຄອນ­ຫຼວງ​ວຽງ​ຈັນ ຕົວ­ຢ່າງ ທາງ​ວາ­ລະສານນະ­ຄອນ­ຫຼວງວຽງ​ຈັນ ໄດ້​ລົງ​ຂ່າວ​ເລື່ອງຊົ່ວ­ໂມງ​ວຽງ​ຈັນ​ສະ­ອາດ ເຊິ່ງ​ຖືກ​ນຳ​ມາ​ປະ­ຕິ­ບັດແລ້ວ​ໃນ​ທຸກ​ວັນ​ພຸດ ນີ້​ຄື​ວິ­ໄສ​ທັດ ແລະ ຍຸດ​ທະສາດ​ຂອງ​ການ​ພັດ­ທະ­ນາ​ນະ­ຄອນ­ຫຼວງ ຕາມ​ທິດຍືນ​ຍົງ​ສີ­ຂຽວ ເພື່ອ​ໃຫ້​ບັນ­ລຸ​ຕາມ​ແຜນ​ຕົວ​ຊີ້​ວັດ (6 ສ) ຕາມ​ມະ­ຕິ​ຕົກ­ລົງ​ຂອງ​ອົງ­ການ​ປົກ­ຄອງ​ທີ່ໄດ້​ກຳ­ນົດ​ອອກ ມີ​ຄື: ຖະ­ໜົນ​ສະ­ອາດ...ເຄ­ຫາ​ສະຖານ​ສະ­ອາດ ໂຮງ​ຈັກໂຮງ­ງານ​ສະ­ອາດ...ວັນ​ພຸດ ທີ 7 ມິ­ຖຸ­ນາ ແມ່ນ​ໄດ້​ເລີ່ມ​ລົງ­ມື​ເຮັດ​ຄວາມ​ສະອາດ ນຳ­ພາ​ໂດຍ​ທ່ານ ປອ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ ພ້ອມ​ດ້ວຍ​ຄະ­ນະ ແລະ ອົງ​ການ­ຈັດ­ຕັ້ງ​ກ່ຽວ­ຂ້ອງ ນີ້​ຖື​ວ່າ​ເປັນ​ແຜນ​ພັດ​ທະນາ​ທີ່​ສັງ­ຄົມ​ໃຫ້​ຄວາມ​ຊົມ­ເຊີຍ ແລະ ຄວນ​ຈັດ​ຕັ້ງປະ­ຕິ­ບັດ​ຊ່ວຍ​ກັນ ເພື່ອ​ໃຫ້​ວຽງ​ຈັນ​ ກາຍ­ເປັນ​ນະຄອນ​ຫຼວງ​ສະ­ອາດ.

ພ້ອມ​ດຽວ​ກັບ​ຂ່າວ​ດີ​ຂ້າງ​ເທິງ​ນັ້ນ ທາງ​ໂຄງການ​ປັບ­ປຸງ​ສິ່ງ­ແວ­ດລ້ອມ​ນ້ຳ ຍັງ​ໄດ້​ລາຍ​ງານ​ຜົນສຳ­ເລັດ​ບາງ​ປະ­ການ ໂດຍສະ­ເພາະແມ່ນ​ການ​ບຳບັດ​ນ້ຳ​ເປື້ອນ​ອອກ​ຈາກ​ໂຮງ­ງານ​ອຸດ­ສາ­ຫະ­ກຳ ໃນນັ້ນ ເພິ່ນ​ຍັງ​ເວົ້າ​ເຖິງ​ແຜນ­ການ​ປູກ​ຈິດ​ສຳ­ນຶກໃຫ້ປະ­ຊາ­ຊົນ​ໃຫ້​ມີ​ສ່ວນ​ຮ່ວມ ເຊິ່ງ​ທັງ​ສອງ​ຂ່າວ​ດີ​ດັ່ງກ່າວ​ຖື​ໄດ້​ວ່າເປັນ​ການ​ມຸ່ງ​ພັດ­ທະ­ນາ​ນະ­ຄອນ­ຫຼວງ ໃຫ້​ມີ​ຄວາມສະ­ອາດ ສວຍ​ງາມ-ໜ້າ​ຢູ່ ເຊິ່ງ​ຈະ​ສົ່ງຜົນ​ດີ​ຕໍ່​ການ­ທ່ອງ­ທ່ຽວ ຫຼື ຊາວ​ຕ່າງ­ປະ­ເທດ​ມາທ່ຽວ ​ກໍ່​ຈະ​ພົບ​ຄວາມ​ສວຍ​ງາມ-ສະ­ອາດ ທີ່​ສຳ­ຄັນ ອົງ­ການ​ປົກ­ຄອງ​ບ້ານ-ທ້ອງ­ຖິ່ນຕ້ອງ​ໄດ້​ຮ່ວມ​ມືນຳ​ກັນ​ ປຸກ­ລະ­ດົມ​ໃຫ້​ທຸກ​ຄົນ​ຕື່ນ​ຕົວ​ຮັກ­ສາ​ຄວາມສະ­ອາດ.

ຄວາມ​ຈິງ​ໃນ​ກາງ​ປີ 2017 ນີ້ ບໍ່​ພຽງ​ແຕ່​ສອງຂ່າວ​ດີ​ຂ້າງ​ເທິງ​ນັ້ນ​ດອກ ເພາະ​ຜູ້​ຂຽນ​ໄດ້​ອ່ານ​ວາລະ​ສານ​ສະ­ບັບ​ດຽວ​ກັນນັ້ນ (ສະ​ບັນ​ທີ 28 ກໍ​ລະກົດ 2017) ຍັງ​ໄດ້​ພົບ​ວ່າ: ຍທຂ ນະ­ຄອນ­ຫຼວງ ໄດ້ອອກ​ແຈ້ງ​ການ​ສະ­ບັບເລກ​ທີ 2856/ຍທຂ ລົງວັນ​ທີ 13 ມິ­ຖຸ­ນາ 2017 ເຖິງ​ບັນ­ດາ​ບໍ­ລິ­ສັດ-ລັດ​ວິສາ​ຫະ​ກິດ ບຸກ­ຄົນ ນິ­ຕິ­ບຸກ­ຄົນ ທະ­ຫານ ຕຳ­ຫຼວດ ຊາວ​ຄ້າ­ຂາຍ ສະ­ມາ­ຄົມ​ລົດ​ຕ່າງໆ... ພໍ່​ແມ່​ປະ­ຊາຊົນ​ທົ່ວ​ນະ­ຄອນ­ຫຼວງ ຫ້າມ​ບໍ່​ໃຫ້​ຂາຍ­ເຄື່ອງ ຈອດລົດ​ທຸກ​ປະ­ເພດ ແລະ ວາງ​ສິ່ງ​ກີດ­ຂວາງ​ຢູ່​ບໍ­ລິ­ເວນພື້ນ​ທີ່ເສັ້ນ­ທາງ​ເດີນ​ລົດ ແລະ ເຂດ​ສະ­ຫງວນ​ທາງ ລວມ​ທັງ​ພື້ນ​ທີ່​ທາງ​ຍ່າງຕາມ​ຖະ­ໜົນ​ສາຍ​ຫຼັກ​ໃນຕົວເມືອງ ໜ່ວຍ​ງານ​ຮັບ­ຜິດ­ຊອບ​ຄວາມ​ເປັນ​ລະບຽບ​ຮຽບ​ຮ້ອຍ ພະ​ແນກ​ໂຍ­ທາ​ທິ​ການ ແລະ ຂົນສົ່ງ ​ຮ່ວມ​ກັບ​ເຈົ້າ​ໜ້າ­ທີ່​ຕຳ­ຫຼວດ​ຈະ­ລາ­ຈອນ ໜ່ວຍງານ​ຈັດ​ສັນ​ເມືອງ​ທີ່​ກ່ຽວ­ຂ້ອງ... ອົງ​ການ­ຈັດ­ຕັ້ງກ່ຽວ­ຂ້ອງ ​ຈະ​ໄດ້​ລົງ­ມື​ປະ­ຕິ­ບັດ​ເຂັ້ມ​ງວດ ເຊັ່ນ: ຫ້າມ​ບໍ່​ໃຫ້​ບໍ­ລິ­ສັດ... ປຸກ​ສ້າງ​ຕໍ່​ເທີບ​ຕິດ​ຕັ້ງ​ປ້າຍໂຄ­ສະ­ນາ​ໃນ​ຊ່ອງ​ທາງ​ເດີນ​ລົດ ແລະ ຫ້າມ​ຂາຍເຄື່ອງ​ເທິງ​ທາງ​ຍ່າງ...ຫ້າມ​ບໍ­ລິ­ສັດ​ຖົມ​ດິນ​ເອົາເຂດ​ສະ­ຫງວນ​ແຄມ​ທາງ... ຄວາມ​ຈິງ​ລາຍ​ລະອຽດ​ຍັງ​ມີ​ຫຼາຍ​ຂໍ້ ແຕ່​ຜູ້​ຂຽນ​ນຳ​ສະ­ເໜີ​ແຕ່​ບາງ​ປະເດັນ​ເພື່ອ​ໃຫ້​ທ່ານ​ຜູ້​ອ່ານ​ຮັບ​ຮູ້​ນຳ​ກັນ ຫຼື ມີ​ຄົນ­ຮູ້ຈັກ-ຍາດ​ພີ່­ນ້ອງ​ກະ​ຄວນ​ບອກ​ກັນ​ຕໍ່​ໃນ​ວົງ​ສົນທະ​ນາ-ກາ­ເຟ ເພື່ອ​ຮັບຮູ້​ນະ­ໂຍ­ບາຍ​ນະ­ຄອນ­ຫຼວງ.

ທ້າຍ​ສຸດ​ເພິ່ນ​ຍັງ​ເວົ້າ​ເຖິງ​ການ​ຈອດ​ລົດ ຫຼື ຕັ້ງຮ້ານ​ຂາຍ​ທີ່​ບໍ່​ຖືກ​ຈຸດ ກໍ່​ຈະ​ຖືກ​ປັບ​ໃໝ​ໃສ່​ລະ­ບຽບ ເຂົ້າ­ໃຈ​ວ່າ ​ນະ­ໂຍ­ບາຍ ຫຼື ແຜນ​ພັດ­ທະ­ນາ​ຂ້າງ​ເທິງນັ້ນ​ເປັນ​ສິ່ງ​ທີ່​ປະ­ຊາ­ຊົນ​ລໍ­ຄອຍ​ມາ​ດົນ ເພື່ອ​ໃຫ້​ປະຕິ​ບັດ​ກ້າວ​ໄປ​ສູ່​ຄວາມ​ເປັນ​ລະ­ບຽບ​ຮຽບຮ້ອຍ ເຮັດໃຫ້​ວຽງ​ຈັນ​ກາຍ­ເປັນ​ນະ­ຄອນ­ຫຼວງ​ທີ່​ສະ­ອາດ​ງາມຕາ.

ຂໍ​ຊົມ­ເຊີຍ​ໂຄງ­ການ​ຂ້າງ​ເທິງ​ຢ່າງ​ສຸດ​ອົກ​ສຸດ​ໃຈ !!.

ຂ່າວທີ່ກ່ຽວຂ້ອງ