ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ໄທ ຟີ​ລິບ​ປິນ ບຣູໄນ ດາ​ຣູ​ຊາ​ລາມ

174 31 ສ.ຫ. 2017 ຫົວຂໍ້ຂ່າວອື່ນໆ

ຄໍ​ລຳ​ປະ­ຈຳ​ວັນ​ນີ້ ຂໍ​ເລີ່ມ​ກ່ຽວ​ກັບ​ຂ່າວ​ທາງການ​ໄທ ໃຫ້​ຄວາມ​ສຳ­ຄັນ​ຄວາມ​ຮູ້​ພາ­ສາ​ອັງ­ກິດ ເລື່ອງ​ຟີ​ລິບ​ປິນ ຈັບ​ກຸມ​ນັກ­ບວດ​ຫົວ​ງູ ແລະ ເລື່ອງ​ບຣູໄນ ດາ​ຣູ​ຊາ​ລາມ ວາງ​ເປົ້າ​ໝາຍ​ສ້າງ​ຊາວ​ໜຸ່ມໃຫ້​ປອດ​ໃສ​ຂາວ​ສະ­ອາດ.

ທີ່ ໄທ: ໃນ​ຍຸກ​ເຊື່ອມ​ໂຍງ​ນີ້ ພະ­ນັກ­ງານຂັ້ນ​ສູງ​ໃນ​ທຸກ​ສາ­ຂາ​ອາ­ຊີບ ຕ້ອງ​ຮູ້​ພາ­ສາ​ອັງ­ກິດ ໜັງ­ສື­ພິມ ​ເດີ​ ເນ​ເຊິນ (The Nation) ສະ­ບັບ​ວັນ​ທີ 5 ກໍ­ລະ­ກົດ​ປີ​ນີ້ ໄດ້​ສື່​ຄຳ​ເວົ້າ​ຂອງ​ທ່ານ​ນາ­ຍົກ ປຣະຢຸດ ຈັນ​ໂອ­ຊາ ທີ່​ບອກ​ວ່າ ການ​ສອບ­ເສັງ​ເພື່ອຊັບຊ້ອນ​ພະ­ນັກ­ງານ​ລັດ ​ແຕ່​ນີ້​ເມືອ​ໜ້າ ຕ້ອງ​ມີ​ພາ­ສາອັງ­ກິດ​ເປັນ​ວິ­ຊາ​ຈຳ­ເປັນ​ເຂົ້າ​ນຳເອ­ກະ­ສານ​ທາງ ການ​ຄວນ​ເຮັດເປັນ​ສອງ​ພາ­ສາ ຄື: ພາ­ສາ​ໄທ ແລະ ພາ­ສາ​ອັງ­ກິດ ເພື່ອ​ພັດ­ທະ­ນາ ແລະ ເປີດກວ້າງ​ການ​ສື່­ສານ ແລ້ວ​ທ່ານ​ນາ­ຍົກ​ກໍ່​ມີມຸກ​ຕະຫຼົກ​ວ່າ “ຂ້າ­ພະ­ເຈົ້າ​ບໍ່​ຢາກ​ໃຫ້​ຄົນ​ອື່ນໆ​ບອດ​ໃບ້​ພາສາ​ອັງ­ກິດ​ຄື​ຂ້າ­ພະ­ເຈົ້າ” ຂ່າວ​ໃຫ້​ຮູ້​ຕື່ມ​ວ່າ ທາງເບື້ອງ​ກອງ­ທັບໄທ​ນັ້ນ ຜູ້​ບັນ­ຊາ​ການ​ລະ­ດັບ​ກອງ­ພັນໃນ​ທົ່ວ​ປະ­ເທດ ຕ້ອງ​ໄດ້​ຜ່ານ​ການ​ສອບ­ເສັງ​ວັດຄວາມ​ສາ­ມາດ​ດ້ານ​ພາ­ສາ​ອັງ­ກິດ​ໄປ​ຄຽງ​ຄູ່​ກັບຄວາມ​ແຂງ­ແຮງ​ທາງ​ຮ່າງ­ກາຍ ເພື່ອ​ໃຫ້​ເປັນ​ໄປຕາມ​ຄຳ​ສັ່ງ​ຂອງ​ທ່ານ​ນາ­ຍົກ.

ທີ່ ຟີ​ລິບ​ປິນ: ໃນ​ທີ່​ສຸດ ນັກ­ບວດ​ຄົນ​ໜຶ່ງ​ທີ່​ເປັນຫົວ­ໜ້າ​ໂຮງ­ຮຽນ​ສາ­ສະ­ໜາ​ກາ­ໂຕ­ລິກ ກໍ່​ໄດ້​ຖືກເຈົ້າ​ໜ້າ­ທີ່​ຕຳ­ຫຼວດ​ຟີ​ລິບປິນ​ ຈັບ​ກຸມ ໃນ​ຄວາມ​ຜິດທີ່​ອ່ອຍ​ເດັກ​ຍິງ​ອາ­ຍຸ​ພຽງ 13 ໄປ​ເຮືອນ​ພັກ ເພື່ອ​ປຸ້ນສະ­ຫວາດ ເຫດ­ການ​ນີ້​ເກີດ​ຂຶ້ນ​ທີ່​ເມືອງມາຣິ​ກີ​ນາ ແຂວງ​ບາ​ຣັງ​ໄກ​ສະ​ໂຕ​ນິ​ໂນ ນັກ­ບວດ​ຄົນ​ນັ້ນ​ຊື່ ລາກາ​ເຣ​ຢົດ ອາ­ຍຸ 55 ປີ (The Nation 31/7/2017) ຫ້ອງ­ການ​ເຈົ້າ​ໜ້າ­ທີ່​ຕຳ­ຫຼວດ​ເມືອງ​ມາ​ຣີ​ກີ​ນາ ໃຫ້ຮູ້​ລະ­ອຽດ​ຕື່ມ​ວ່າ ທາງ​ກຳ­ລັງ​ຕຳ­ຫຼວດ ແລະ ຫ້ອງການ​ສະ­ຫວັດ­ດີ​ການ​ສັງ­ຄົມ ແລະ ການ​ພັດ­ທະ­ນາຂອງ​ເມືອງ ສາ­ມາດ​ຈັບ​ນັກ­ບວດ​ຄົນ​ນີ້​ໄດ້​ຄາ​ໜັງຄາ​ເຂົາ ໃນ​ຂະ­ນະ​ທີ່​ເຂົາ​ພວມ​ຊັກ​ຊວນ​ເດັກຍິງ​ເຂົ້າໄປ​ເຮືອນ​ພັກ ນອກ­ຈາກ​ນັກ­ບວດ​ແລ້ວ ເຈົ້າ​ໜ້າ­ທີ່ຕຳ­ຫຼວດ​ຍັງ​ໄດ້​ຈັບ​ກຸມ​ເດັກ​ຍິງອາ­ຍຸ 16 ປີ ຊຶ່ງ​ເຮັດໜ້າ­ທີ່​ເປັນແມ່­ສື່ ແນະ­ນຳ​ໃຫ້​ນັກ­ບວດ​ຮູ້​ກັບ​ເດັກ​ຍິງອາ­ຍຸ 13 ປີ​ຄົນ​ນັ້ນ ກ່ອນ​ໜ້າ​ນັ້ນ ແມ່​ຂອງ​ເດັກ​ທີ່ເປັນ​ເປົ້າເຫຍື່ອ ໄດ້​ສົ່ງ​ສັນ­ຍານໃຫ້​ເຈົ້າ​ໜ້າ­ທີ່​ຮູ້ກ່ຽວ​ກັບ​ການ​ພົວ­ພັນ​ແບບ​ແຕກ​ປອກ​ອອກ​ທາງ​ ລະຫວ່າງ​ນັກ­ບວດ​ກັບ​ເດັກ​ຍິງທີ່​ເປັນ​ລູກ​ສາວ ໃນເບື້ອງຕົ້ນ ນັກ­ບວດ ລາ​ກາ​ເຣ​ຢົດ ບອກ​ເຈົ້າ​ໜ້າ­ທີ່ຕຳ­ຫຼວດ​ວ່າ ເຂົາ​ມີ​ອາ­ຊີບ​ເປັນ​ຜູ້​ປະ­ກອບ​ການ​ສ່ວນຕົວ ແລະ ຕໍ່​ມາ​ຈິງ​ສາ­ລະ­ພາບ​ວ່າ ເຂົາ​ເປັນ​ນັກບວດ (ປະ­ເພດ​ນັກ­ບວດ​ໃຈ​ບາບ​ຊອກ​ບຽດ!) ໂຊກດີ​ທີ່​ເຈົ້າ​ໜ້າ­ທີ່​ສາ­ມາດ​ແກ້​ບັນ­ຫາ​ນີ້​ໄດ້​ທັນ​ການ ກ່ອນ​ເດັກ​ຍິງ​ຈະ​ກາຍ­ເປັນ​ເຫຍື່ອ​ກາມ​ຂອງ​ຜູ້​ອ້າງຕົນ​ເອງ​ວ່າ “ຢູ່​ໃນ​ສິນ ກິນ​ໃນ​ທຳ” ເລື່ອງ​ນີ້​ເປັນ​ອຸທາ​ຫອນ​ສອນ​ໃຈ​ວ່າ “ເບິ່ງ​ຄົນ​ຕ້ອງ​ເບິ່ງ​ໜ້າ ເບິ່ງຜ້າ​ຕ້ອງ​ຈັບ​ເບິ່ງ​ເນື້ອ​ແພ” ໃນ​ປັດ­ຈຸ­ບັນ ຄົນ​ບາບ​ໃນຄາບ​ນັກ­ບຸນ​ນັ້ນ​ມີ​ຈຳ­ນວນ​ບໍ່​ໜ້ອຍ ແນວ­ໃດ​ກໍ່​ດີ ນັກ­ບວດ ລາ​ກາ​ເຣ​ຢົດ ແລະ ເດັກ​ຍິງ​ທີ່​ເຮັດ​ໜ້າ­ທີ່ເປັນ​ແມ່­ສື່​ນັ້ນ ຕ່າງ​ກໍ່​ໄດ້​ຮັບ​ໂທດ​ໃນ​ຄວາມ​ຜິດ​ຄ້າມະ­ນຸດ​ຕາມ​ກົດ­ໝາຍຕ້ານ​ການ​ຄ້າ​ມະ­ນຸດ​ຂອງ​ຟີລິບ​ປິນ.

ທີ່ ບຣູ​ໄນ ດາ​ຣູ​ຊາ​ລາມ: ໃນ​ຊຸມ​ປີ​ຫຼັງໆ​ມາ​ນີ້ ທາງການ​ບຣູ​ໄນ ດາ​ຣູ​ຊາ​ລາມ ໄດ້​ສຸມ​ໃສ່​ພັດ­ທະ­ນາ​ຊາວໜຸ່ມໃຫ້​ມີ​ຄວາມຮູ້ຄວາມ​ສາ­ມາດ ແລະ ຊຳ­ນານງານ​ຫຼາຍ​ດ້ານ ໂດຍ​ຜ່ານ​ລະ­ບົບ​ການ​ສຶກ​ສາ​ທີ່ເນັ້ນ​ວິ­ຊາ​ຊີບ ເພື່ອ​ໃຫ້​ເຂົາ­ເຈົ້າ​ເປັນ​ເຈົ້າຕົນ​ເອງຮອບ­ດ້ານ ແລະ ອີງ​ຕາມ​ຂ່າວ ​ວຽງ​ຈັນ​ ທາມ (Vientiane Times) ສະ­ບັບ​ວັນ​ທີ 26 ເດືອນ​ສິງຫາ​ນີ້ ພວກ​ເຮົາຊາບ​ວ່າ ໃນ​ປັດ­ຈຸ­ບັນທາງ​ການຂອງ​ປະ­ເທດ​ນີ້ ໄດ້​ມີ​ແຜນ​ງານ​ທີ່​ໃສ່​ຊື່­ວ່າ: “ແຜນງານ​ຕິດ­ຕາມ​ຄຸ້ມ​ຄອງ​ລູກ​ຫຼານ​ຂອງພວກ​ເຮົາ” (Monitor Our Children Programs) ແຜນງານ​ຊຶ່ງ​ຢູ່​ພາຍ​ໃຕ້​ການ​ຊີ້​ນຳ​ຂອງ​ກະ­ຊວງ​ຖະ­ແຫຼງຂ່າວ​ນີ້ ໄດ້ກຳ­ນົດ​ທິດ​ພັດ­ທະ­ນາ ແລະ ສຶກ​ສາ​ອົບຮົມ​ຊາວ​ໜຸ່ມ​ໃຫ້​ປອດ​ໃສ​ຂາວ​ສະ­ອາດ ປາ­ສະ­ຈາກຮອຍ​ມົນ­ທິນ ແລະ ປາ­ກົດ­ການຫຍໍ້­ທໍ້​ທັງ​ປວງ ພ້ອມ​ທັງ​ຊີ້​ທິດ​ເຍືອງ​ທາງ​ໃຫ້​ຄົນ​ລຸ້ນ​ໃໝ່​ສືບ​ທອດຕາມ​ໄຕ່​ສູ່​ຄວາມ​ຈະ­ເລີນ​ກ້າວ­ໜ້າ ແຜນ​ງານ​ດັ່ງກ່າວຍັງໄດ້​ຮັບ​ການ​ປະ­ສານ​ງານ​ຮ່ວມ​ມື​ກັບ​ຫ້ອງການ​ຄວບ​ຄຸມ​ຢາ​ເສບ​ຕິດ ກະ­ຊວງ​ຄວາມ​ໝັ້ນ­ຄົງພາຍ​ໃນ ສະ­ພາ​ໄອ​ຍະ​ການ ແລະ ອື່ນໆ.

ຂ່າວທີ່ກ່ຽວຂ້ອງ