ລ້ານຊ້າງມີເນໂຣນ ມອບເງິນພາສີຊັບພະຍາກອນແຮ່ທາດ 32 ຕື້ກວ່າກີບ

154 07 ກ.ຍ. 2017 ຂ່າວໜ້າ​ໜຶ່ງ

ບໍລິສັດ ​ລ້ານ​ຊ້າງ​ມີ​ເນ​ໂຣນ ຈຳກັດ (ບໍ່​ຄຳ-ທອງ​ເຊ​ໂປນ) ຫຼື MMG LXML ໄດ້​ມອບ​ເງິນ​ຄ່າ​ພາສີ​ຊັບພະຍາກອນ​ແຮ່​ທາດ ຈາກ​ການ​ຜະລິດ-ຈຳໜ່າຍ​ຄຳ ແລະ ທອງ ໃນ​ໄຕ​ມາດ​ທີ 2 ຂອງ​ປີ 2017 ລວມ​ມູນ​ຄ່າ​ຫຼາຍ​ກວ່າ 4,40 ລ້ານ​ໂດ​ລາ​ສະຫະລັດ (ປະມານ 33 ຕື້​ກວ່າ​ກີບ) ໃຫ້​ແກ່​ລັດຖະບານ​ລາວ.

ພິທີ​ມອບ​ຮັບ​ເງິນ​ຈຳນວນ​ດັ່ງກ່າວ ມີ​ຂຶ້ນ​ໃນ​ວັນ​ທີ 5 ກັນຍາ 2017 ທີ່​ນະຄອນຫຼວງ​ວຽງ​ຈັນ ມອບ​ໂດຍ​ທ່ານ ສະໝານ ອະ​ເນ​ກາ ຜູ້ອຳນວຍການ ແລະ ຜູ້​ຈັດການ​ດ້ານ​ການ​ພົວພັນ​ກັບ​ຜູ້​ມີ​ສ່ວນ​ຮ່ວມ​ບໍລິສັດ​ ລ້ານຊ້າງ​ມີ​ເນ​ໂຣນ ແລະ ກ່າວ​ຮັບ​ຕາງໜ້າ​ລັດຖະບານ​ລາວ ໂດຍ​ທ່ານ​ນາງ ກະເສີມ​ສີ ພົມ​ມະ​ວົງສາ ຫົວໜ້າກົມ​ຄຸ້ມ​ຄອງ​ຊັບ​ສິນ​ຂອງ​ລັດ ກະຊວງ​ການ​ເງິນ.

ນັບ​ແຕ່​ໄຕ​ມາດ​ທີ 1 ຂອງ​ປີ 2017 ເປັນຕົ້ນ​ມາ ບໍລິສັດ ​ລ້ານ​ຊ້າງ​ມີ​ເນ​ໂຣນ ໄດ້​ປະກອບສ່ວນ​ໃນ​ການ​ຈ່າຍ​ເງິນ​ພາສີ​ຊັບພະຍາກອນ​ແຮ່​ທາດ ​ໃຫ້​ແກ່​ລັດຖະບານ​ລາວ​ທັງ​ໝົດ ເປັນ​ຈຳນວນ​ເງິນ 8,56 ລ້ານ​ໂດ​ລາ​ສະຫະລັດ ແລະ ຖ້າ​ນັບ​ແຕ່​ເລີ່ມ​ມີ​ການ​ຂຸດ​ຄົ້ນ-ປຸງ​ແຕ່ງ-ຜະລິດ​ຄຳ-ທອງ ຢູ່​ແຂວງ​ສະຫວັນ​ນະ​ເຂດ ເປັນຕົ້ນ​ມາ ຄື​ແຕ່​ປີ 2003 ບໍລິສັດ​ດັ່ງກ່າວ​ໄດ້​ປະກອບສ່ວນ​ພັນທະ​ຂອງ​ຕົນ ​ທີ່​ເປັນ​ລາຍ​ຮັບ​ໂດຍ​ກົງ​ໃຫ້​ແກ່​ລັດຖະ​ບານແຫ່ງ ​ສປປ ລາວ ເປັນ​ເງິນ​ທັງ​ໝົດ ປະມານ 1,4 ຕື້​ໂດ​ລາ​ສະຫະລັດ.

ສະເພາະ​ໄຕ​ມາດ​ທີ 2 ຂອງ​ປີ 2017 ບໍ່​ຄຳ-ທອງ​ເຊ​ໂປນ ສາມາດ​ຜະລິດ​ແຜ່ນ​ທອງ​ໄດ້ 15.606 ໂຕນ ແລະ ຄາດ​ຄະເນ​ຈະ​ຜະລິດ​ແຜ່ນ​ທອງ​ໝົດ​ປີ​ໃຫ້​ໄດ້​ປະມານ 65.000-75.000 ໂຕນ.

ຂ່າວທີ່ກ່ຽວຂ້ອງ