ກຽມພົບກັບງານມະຫະກຳສີມືຫັດຖະກຳລາວ ໃນຕົ້ນເດືອນຕຸລານີ້

98 08 ກ.ຍ. 2017 ຂ່າວໜ້າ​ໜຶ່ງ

ພິທີ​ຖະແຫຼງ​ຂ່າວ​ງານ​ມະ​ຫະກຳ​ສີມື​ຫັດຖະກຳ​ລາວ ປີ 2017 ຈັດ​ຂຶ້ນ​ວັນ​ທີ 5 ກັນຍາ 2017 ທີ່ສະມາຄົມ​ນັກ​ຂ່າວ​ແຫ່ງ ​ສປປ ລາວ ມີ​ທ່ານ ຫານ​ຊະນະ ສີ​ສານ ປະທານ​ສະມາຄົມ​ຫັດຖະກຳລາວ ທ່ານ ສົມ​ສະໜຸກ ມີ​ໄຊ ຮອງ​ປະທານ​ສະມາຄົມ​ນັກ​ຂ່າວແຫ່ງ ​ສປປ ລາວ ທັງ​ເປັນ​ທີ່​ປຶກສາ​ອາວຸໂສ​ສະມາຄົມ​ຫັດຖະກຳລາວ ທ່ານ​ນາງ ສີ​ອອນ ສີ​ຣິ​ປັນຍາ ຄະນະ​ບໍລິຫານ​ງານ​ສະ​ມາຄົມ​ຫັດຖະກຳ​ລາວ ແລະ ສື່​ມ່ວນຊົນ​ເຂົ້າ​ຮ່ວມ.

ເພື່ອ​ສົ່ງເສີມ​ການ​ຕະຫຼາດ​ໃຫ້ແກ່​ຊາວ​ຊ່າງ​ຫັດຖະກຳ​ລາວ ​ເຕົ້າໂຮມ​ຄວາມ​ສາມັກຄີ​ຊາວ​ຊ່າງຫັດຖະກຳ​ທຸກ​ຊົນເຜົ່າ​ຢູ່​ທຸກ​ທ້ອງຖິ່ນ ເສີມ​ຂະຫຍາຍ​ພູມ​ປັນຍາທາງ​ດ້ານ​ຫັດຖະກຳ ແລະ ຟື້ນ​ຟູການ​ຜະລິດ​ເຄື່ອງ​ຫັດຖະກຳ​ຂອງຊົນເຜົ່າ​ຕ່າງໆ ໃຫ້​ມີ​ຄວາມ​ຫຼວງຫຼາຍ ມີ​ຄວາມ​ສວຍ​ງາມປານີດ ແຕ່​ຍັງ​ຮັກສາ​ໄວ້​ຄວາມ​ເປັນເອກະລັກ​ຂອງ​ຊົນເຜົ່າ​ຂອງ​ທ້ອງຖິ່ນ ສ້າງ​ໂອກາດ​ໃຫ້​ຊາວ​ຊ່າງຫັດຖະກຳ​ໄດ້​ມາ​ພົບ​ປະ ເພື່ອແລກປ່ຽນ​ບົດຮຽນ​ແລກປ່ຽນ​ປະສົບ​ການ​ທາງ​ດ້ານ​ການ​ຜະລິດເຄື່ອງ​ຫັດຖະກຳ ແລະ ພົບ​ປະ​ກັບລູກ​ຄ້າ​ຂາ​ປະຈຳ ແລະ ຄູ່​ຄ້າ ເພື່ອ​ຮ່ວມ​ມື​ກັນ​ດຳເນີນ​ທຸລະ​ກິດ ແລະ ສະໜັບສະໜູນ​ປີ​ທ່ອງ​ທ່ຽວລາວ ປີ 2018 ສ້າງ​ລາຍການທ່ອງ​ທ່ຽວ​ໃຫ້​ມີ​ຫຼາຍ​ລາຍການ ເປັນ​ການ​ເປີດ​ໂອກາດ​ດ້ານ​ການຕະຫຼາດ​ແບບ​ກວ້າງຂວາງ​ ສາມາດ​ສ້າງ​ລາຍ​ຮັບ​ໃຫ້​ຊາວ​ຊ່າງຫັດຖະກຳ​ຊາວບ້ານ ແລະ ຊ່ວຍເຫຼືອ​ເຂົາເຈົ້າ​ໃຫ້​ຫຼຸດ​ພົ້ນ​ອອກຈາກ​ຄວາມທຸກ​ຍາກ​ ຕາມ​ແນວທາງ​ນະໂຍບາຍ​ຂອງ​ພັກ ແລະ ລັດຖະບານ ພ້ອມ​ດຽວ​ກັນ​ນັ້ນ ກໍ່ເປັນ​ການ​ພັດທະນາ ແລະ ສົ່ງເສີມ​ຜະລິດ​ຕະ​ພັນ​ຫັດຖະກຳ​ລາວ ໃຫ້​ກາຍເປັນ​ສິນຄ້າ​ອອກ​ສູ່​ຕະຫຼາດ​ພາຍ​ໃນ ແລະ ຕ່າງປະເທດ.

ງານ​ມະຫາ​ກຳ​ສີມື​ຫັດຖະກຳລາວ ​ຈັດ​ໂດຍ​ສະມາຄົມ​ຫັດຖະກຳ​ລາວ ຮ່ວມ​ກັບ​ສະພາ​ການ​ຄ້າ ແລະ ອຸດສາຫະກຳ​ແຫ່ງ​ຊາດລາວ ເຊິ່ງ​ຄະນະ​ຮັບຜິດຊອບ​ຈັດຕັ້ງ​ງານ​ຈະ​ປຸກລະດົມ​ເອົາ​ຊາວຊ່າງ​ຫັດຖະກຳ​ທຸກ​ແຂວງ​ໃນ​ທົ່ວປະເທດ ມາ​ຮ່ວມ​ກັນ​ສ້າງ​ກິດ​ຈະກຳ​ຕ່າງໆ ພັດທະນາ​ສີໄມ້ລາຍມືຂອງ​ຄົນ​ລາວ​ເອກະລັກ​ລາວ-ຜະລິດ​ຕະ​ພັນ​ຂອງ​ຄົນ​ລາວ ໃຫ້​ເຕີບໃຫຍ່​ຂະຫຍາຍຕົວ​ທາງ​ດ້ານ​ປະລິ​ມານ ແລະ ຄຸນະພາບ ເພື່ອ​ເຮັດໃຫ້​ການວາງສະແດງ​ຂາຍ​ສິນຄ້າຫັດຖະກຳ​ມີ​ຄວາມ​ຍືນ​ຍົງ ແລະ ສາມາດ​ກຸ້ມ​ຕົນ​ເອງ​ໃນ​ອະນາຄົດ ສະເພາະ​ປີ​ນີ້ ໄດ້​ເປີດ​ກວ້າງ​ໃຫ້​ມີຫຼາຍ​ສິນຄ້າ​ມາ​ຮ່ວມ​ວາງ​ສະແດງ ແລະ ຂາຍ ໂດຍ​ຈັດ​ເຂດວາງສະແດງ​ອອກ​ເປັນ 2 ເຂດ ຄື: ເຂດ​ວາງສະແດງ​ຂາຍ​ສຳລັບສິນຄ້າ​ຫັດຖະກຳ-ສິນຄ້າ​ກະ​ສິກຳ-ການ​ຄ້າ​ໂອ​ດ໋ອບ (ODOP) ແລະ ເຂດ​ວາງສະແດງ​ຂາຍ​ສຳລັບ​ສິນຄ້າ​ອຸປະໂພກ-ບໍລິໂພກທົ່ວ​ໄປ ນອກ​ນີ້ ພາຍ​ໃນ​ງານ​ຍັງມີ​ກິດຈະກຳ​ຕ່າງໆ ເຊັ່ນ: ການຄັດ​ເລືອກ​ຜະລິດ​ຕະ​ພັນ​ດີເດັ່ນ​ໃນຫົວຂໍ້ “ເຄື່ອງ​ທີ່​ລະນຶກ” ກິດ​ຈະກຳ​ສາທິດ ການ​ສຳ​ມະ​ນາເດີນແບບ​ເສື້ອ​ຜ້າ​ອາພອນ​ລາວ​ປະຈຳວັນ ແລະ ອື່ນໆ ເຊິ່ງ​ງານ​ຈະ​ໄດ້ຈັດ​ຂຶ້ນ​ວັນ​ທີ 14-22 ຕຸລາ 2017 ທີ່​ສູນ​ການ​ຄ້າລາວ-ໄອ​ເຕັກ (ຕຶກ​ເກົ່າ) ນະຄອນຫຼວງ​ວຽງ​ຈັນ.

ຂ່າວທີ່ກ່ຽວຂ້ອງ