ເລີ່ມປະຕິບັດຂຶ້ນທະບຽນເຄື່ອນໄຫວຊົ່ວຄາວ ໃຫ້ຄົນຕ່າງປະເທດ

188 08 ກ.ຍ. 2017 ຂ່າວໜ້າ​ໜຶ່ງ

ກະຊວງ​ແຮງ​ງານ ແລະ ສະຫວັດ​ດີ​ການ-ສັງຄົມ ແລະ ກະຊວງ​ປ້ອງ​ກັນ​ຄວາມ​ສະຫງົບ ຮ່ວມ​ກັບພະ​ແນກ​ແຮງ​ງານ ແລະ ສະຫວັດດີ​ການ-ສັງຄົມ ນະຄອນ​ຫຼວງ​ວຽງ​ຈັນ ຈັດ​ກອງ​ປະຊຸມ​ການຈັດຕັ້ງ​ປະຕິບັດ​ການ​ຂຶ້ນທະບຽນ ແລະ ການ​ອອກ​ບັດ​ອະນຸ​ຍາດ​ເຄື່ອນ​ໄຫວ​ຊົ່ວຄາວ​ໃຫ້​ຄົນຕ່າງປະເທດ ​ທີ່​ມາ​ເຄື່ອນ​ໄຫວ​ບໍ່ຖືກຕ້ອງ​ຢູ່ ນວ ຂຶ້ນ​ວັນ​ທີ 5 ກັນຍາ 2017 ທີ່​ຫ້ອງ​ວ່າການ​ປົກຄອງ ນວ ໂດຍ​ເປັນ​ປະທານ​ຂອງທ່ານ ບຸນ​ຄົງ ຫຼ້າ​ສຸ​ກັນ ຮອງ​ລັດຖະ​ມົນຕີ​ກະຊວງ​ແຮງ​ງານ ແລະ ສະຫວັດດີ​ການ-ສັງຄົມ ທ່ານ​ພົນຕີ ກົງ​ທອງ ພົງ​ວິຈິດ ຮອງ​ລັດ​ຖະມົນຕີ​ກະຊວງ​ປ້ອງ​ກັນ​ຄວາມ​ສະຫງົບ ມີ​ທ່ານ​ນາງ ລຳ​ພອຍ ສີ​ອັກຄະ​ຈັນ ຫົວໜ້າ​ພະ​ແນກ​ແຮງງານ ແລະ ສະຫວັດດີ​ການ-ສັງຄົມ ນວ ບັນດາ​ຮອງ​ເຈົ້າເມືອງ ພະແນກການ​ອ້ອມ​ຂ້າງ ​ປກສ ແລະ ພາກສ່ວນ​ກ່ຽວຂ້ອງ​ເຂົ້າຮ່ວມ.

ການຈັດຕັ້ງ​ປະຕິບັດ​ການ​ຂຶ້ນທະບຽນ ແລະ ອອກ​ບັດ​ອະນຸຍາດ​ເຄື່ອນ​ໄຫວ​ຊົ່ວຄາວ​ໃຫ້​ຄົນຕ່າງປະເທດ​ທີ່​ມາ​ເຄື່ອນ​ໄຫວ​ຢູ່ ​ສປປ ລາວ ໄດ້​ເລີ່ມ​ຈັດ​ຕັ້ງ​ປະຕິບັດ​ພ້ອມ​ກັນ ​ໃນ​ຂອບ​ເຂດ​ທົ່ວ​ປະເທດ ແຕ່​ວັນ​ທີ 1 ກັນຍາ-30 ພະຈິກ 2017 ເປົ້າ​ໝາຍ​ທີ່​ຈະ​ອອກບັດ​ອະນຸຍາດ​ເຄື່ອນ​ໄຫວ​ຊົ່ວຄາວໃຫ້​ຄັ້ງ​ນີ້ ສຳລັບ​ຄົນ​ຕ່າງປະເທດ ທີ່​ໄດ້​ອອກ​ບັດ​ໃຫ້​ຜ່ານ​ມາ​ຄື: ຜູ້ທີ່​ໄດ້​ອອກ​ບັດ​ໃຫ້​ເພື່ອ​ປັບ​ສະ​ຖານະ​ພາບ ຖ້າ​ພົບ​ວ່າ​ຜູ້ກ່ຽວ​ກຳລັງດຳເນີນ​ການ​ປັບ​ສະຖານະ​ພາບຕົນ​ເອງ​ຢູ່ ແຕ່​ຍັງ​ບໍ່​ທັນ​ສຳເລັດ ແມ່ນ​ໃຫ້​ພິຈາລະນາ​ຕໍ່​ອາຍຸ​ບັດ ໃຫ້ແຕ່​ສູງ​ສຸດ​ບໍ່​ໃຫ້​ເກີນ 3 ເດືອນ ແຕ່​ຖ້າ​ພົບ​ວ່າຜູ້ກ່ຽວ​ບໍ່​ດຳເນີນການ​ຕາມ​ທີ່​ໄດ້​ອະນຸຍາດ​ໃຫ້​ນັ້ນ ແມ່ນ​ບໍ່​ອະນຸຍາດ​ອອກ​ບັດ​ໃຫ້​ຕື່ມ ແລະ ໃຫ້​ອອກ​ຈາກ​ປະເທດ ຜູ້​ທີ່ໄດ້​ອອກ​ບັດ​ເພື່ອ​ຊຳລະ​ສະ​ສາງ ຖ້າ​ພົບ​ວ່າຜູ້ກ່ຽວ​ຍັງ​ບໍ່​ສາມາດຊຳລະ​ສະ​ສາງ​ໄດ້ ​ແມ່ນ​ບໍ່​ໃຫ້​ອະນຸ​ຍາດ​ຂຶ້ນ​ທະບຽນ​ອີກ ຖ້າ​ຜູ້ກ່ຽວ​ບໍ່​ປັບ​ສະຖານະ​ພາບ ​ກໍ່​ໃຫ້ພິຈາລະນາ​ອອກ​ບັດ​ອະນຸຍາດ​ໃຫ້ໃນ​ກຳນົດ 3 ເດືອນ ແຕ່​ຖ້າ​ຜູ້ກ່ຽວບໍ່​ປັບ​ສະຖານະ​ພາບ​ກໍ່​ໃຫ້​ອອກຈາກ​ປະເທດ ຜູ້​ທີ່​ຂຶ້ນ​ທະບຽນ​ໃໝ່ ກໍ່​ໃຫ້​ອອກ​ບັດ​ອະນຸຍາດ​ຊົ່ວຄາວ ໃຫ້​ແຕ່​ສູງ​ສຸດ​ບໍ່​ໃຫ້​ເກີນ​ພາຍ​ໃນ 3 ເດືອນ ທັງ​ຜູ້​ທີ່​ຕ້ອງການ​ຊຳລະສະ​ສາງ ແລະ ຜູ້​ທີ່​ຕ້ອງການຢາກ​ປັບ​ສະຖານະ​ພາບ ສຳລັບ​ຜູ້ອຳນວຍ​ຄວາມ​ສະດວກ​ໃຫ້​ແກ່ຄົນ​ຕ່າງປະເທດ ໄດ້​ເຄື່ອນ​ໄຫວແບບ​ບໍ່​ຖືກຕ້ອງ​ ແມ່ນ​ໃຫ້​ປະຕິບັດດັ່ງນີ້​ຜູ້​ໃຊ້​ແຮງ​ງານ​ທີ່​ອະນຸຍາດໃຫ້​ຄົນ​ຕ່າງປະເທດ ​ເຮັດ​ວຽກຢູ່​ໃນ​ຫົວໜ່ວຍ​ແຮງ​ງານ​ຂອງຕົນ​ໂດຍ​ບໍ່​ຖືກຕ້ອງ ​ແມ່ນ​ໃຫ້​ປະຕິ​ບັດ​ຕາມ​ກົດໝາຍ ແລະ ລະບຽບ​ການຂອງ ​ສປປ ລາວ ຜູ້​ທີ່ໃຫ້​ຄົນ​ຕ່າງປະເທດ​ເຊົ່າ​ສະຖານທີ່​ພັກ​ເຊົາ​ຄ້າຂາຍ ແລະ ເຊົ່າ​ທະບຽນ​ການ​ຄ້າ ໃຫ້​ປະຕິບັດ​ຕາມລະບຽບ​ການ​ຄ້າ ແລະ ການ​ລົງທຶນ​ຢ່າງ​ເຂັ້ມ​ງວດ ການ​ຕໍ່​ອາຍຸບັດ ແລະ ການ​ອອກ​ບັດ​ອະນຸຍາດ​ເຄື່ອນ​ໄຫວ​ຊົ່ວຄາວ​ໃຫ້​ໃໝ່ ແມ່ນ​ເກັບ​ຄ່າ​ບໍລິການ 3 ແສນກີບ​ຕໍ່​ຄົນ​ຕໍ່​ເດືອນ.

ຂ່າວທີ່ກ່ຽວຂ້ອງ