ຄສຄ ສ້າງບຸຄະລາກອນ ໄດ້ 500 ກວ່າຄົນ

120 11 ກ.ຍ. 2017 ຂ່າວໜ້າ​ໜຶ່ງ

ຄະນະ​ວິທະຍາສາດ​ສັງຄົມ (​ຄສຄ) ມະຫາວິທະຍາໄລ​ແຫ່ງຊາດ (​ມຊ) ຈັດ​ພິທີ​ສະຫຼຸບ​ການຮຽນ-ການ​ສອນ ສົກ​ສຶກ​ສາ 2013-2017 ຂຶ້ນ​ວັນ​ທີ 6 ກັນຍາ 2017 ຢູ່​ສະໂມສອນ ມຊ ມີ​ທ່ານ ອຸດົມ ພອນ​ຄຳ​ເພັງ ຮອງ​ອະທິການ​ບໍດີ ​ມຊ ທ່ານ ບຸນ​ມາກ ອິນທິ​ພອນ ຄະນະບໍດີ ​ຄສຄ ພະນັກງານ​ຄູ-ອາຈານ ແລະ ນັກ​ສຶກສາ​ເຂົ້າ​ຮ່ວມ.

ທ່ານ ບຸນ​ທະວີ ສໍ​ສຳພັນ ຮອງຄະນະບໍດີ ​ຄສຄ ກ່າວ​ວ່າ: ​ຄສຄ ສ້າງຕັ້ງ​ຂຶ້ນ​ພ້ອມ​ກັບ ​ມຊ ເຊິ່ງ​ເວລາ​ນັ້ນ​ໃສ່​ຊື່ວ່າ​ຄະນະ​ພາສາ​ວັນນະ​ຄະດີ ແລະ ມະນຸດ​ສາດ ມາເຖິງປີ 2000 ໄດ້​ແຍກ​ອອກ​ເປັນຄະນະ​ອັກສອນສາດ ແລະ ​ຄສຄ ເບື້ອງ​ຕົ້ນ ​ຄສຄ ໄດ້​ເປີດ​ການຮຽນ-ການ​ສອນ 3 ຫຼັກສູດຄື: ວິທະຍາສາດ​ການເມືອງ-ການ​ບໍລິ​ຫານ​ລັດ ປະຫວັດສາດ-ມະນຸດວິທະຍາ ແລະ ເຄ​ມີ​ສາດ-GSI ມີນັກ​ສຶກ​ສາ 122 ຄົນ ຍ້ອນການ​ຂະຫຍາຍຕົວ​ຂອງ​ເສດ​ຖະກິດ-ສັງຄົມ ມາ​ຮອດ​ສົກຮຽນ 2005-2006 ຈຶ່ງ​ໄດ້​ເປີດ​ຫຼັກສູດການ​ຮຽນ-ການ​ສອນ​ຕື່ມ​ອີກ 3 ຫຼັກສູດຄື: ສັງຄົມ​ວິທະຍາ-ພັດທະ​ນາ​ສັງຄົມ ການທ່ອງທ່ຽວ ແລະ ການ​ໂຮງແຮມ ສົກຮຽນ 2009-2010 ໄດ້​ເປີດ​ຫຼັກສູດ​ບູຮານ​ວິທະຍາ ແລະ ຄຸ້ມ​ຄອງ​ມໍລະ​ດົກ ສົກຮຽນ 2010-2011 ໄດ້​ພັດທະນາ​ຫຼັກສູດ​ຈາກ​ລະບົບ 5 ປີ ມາ​ເປັນ 4 ປີຮຽນ ແລະ ໄດ້​ເປີດ​ສອນ​ຫຼັກສູດ​ສາຂາ​ບັນນາ​ຮັກ​ສາດ ແລະ ສາລະ​ສົນເທດສາດ ພ້ອມ​ນີ້ ຫຼັກສູດ​ສັງຄົມ​ວິ​ທະຍາ ແລະ ພັດທະນາ​ສັງຄົມ ກໍ່​ໄດ້ແຍກ​ເປັນ 2 ສາຂາ ຄື: ສັງຄົມສົງເຄາະ ແລະ ພັດທະນາ​ຊຸມ​ຊົນ-ຊົນນະບົດ ແລະ ສົກຮຽນ 2014-2015 ໄດ້​ຮັບ​ອະນຸມັດ​ເປີດ​ສອນຫຼັກສູດ​ຕໍ່​ເນື່ອງ​ປະລິນຍາ​ຕີ 3 ສາຂາ ຄື: ການເມືອງ-ບໍລິຫານ​ລັດຖະ​ກິດ ການທ່ອງທ່ຽວ ແລະ ການ​ໂຮງແຮມ.

ສະເພາະ​ສົກຮຽນ 2013-2017 ປະກອບ​ມີ 2 ລະບົບ​ຮຽນ ຄື: ລະບົບ 4 ປີ ມີ 9 ຫຼັກສູດ​ຮຽນ ແລະ ລະບົບ​ຕໍ່​ເນື່ອງ​ປະລິນຍາ​ຕີ 2 ປີ ມີ 2 ຫຼັດ​ສູດ ມີ​ນັກ​ສຶກ​ສາ 558 ຄົນ ໃນ​ນີ້ ນັກ​ສຶກ​ສາ​ໃນແຜນ 153 ຄົນ ນອກ​ແຜນ 400 ຄົນ ນັກ​ສຶກ​ສາ​ຕ່າງປະເທດ 5 ຄົນ ຜ່ານ​ການ​ຮຽນ-ການ​ສອນ ມີຜູ້​ສຳເລັດ​ການ​ສຶກ​ສາ 2016-2017 ມີ 504 ຄົນ ເທົ່າ​ກັບ 90% ນອກ​ນີ້ ນັກ​ສຶກ​ສາ​ຈຳນວນ​ຫຼາຍ​ສາມາດ​ຍາດ​ໄດ້​ຄະແນນ​ສະເລ່ຍ​ສະ​ສົມ ໃນ 4 ສົກ ຮຽນ​ໄດ້ 3 ຂຶ້ນ​ໄປ ຄະແນນ​ການຂຽນ​ບົດ​ຈົບ​ຊັ້ນ ແລະ ປ້ອງ​ກັນບົດ ເກຣດ A ຫຼາຍ​ບົດ ແລະ ນັກສຶກ​ສາ 3 ຄົນ ຍັງ​ໄດ້​ຮັບ​ໃບ​ປະກາ​ສະ​ນີ​ຍະ​ບັດ​ກຽດ​ນິຍົມ 124 ຄົນ ຖືກ​ຈັດ​ເປັນ​ບຸກຄົນ​ດີເດັ່ນຮອບດ້ານ 90 ຄົນ ເປັນ​ບຸກຄົນ​ດີເດັ່ນ​ດ້ານ​ການ​ຮຽນ ແລະ 133 ຄົນ ເປັນ​ບຸກຄົນ​ດີເດັ່ນ​ດ້ານ​ການເຄື່ອນ​ໄຫວ​ນອກ​ຫຼັກສູດ ນອກ​ນີ້ຍັງ​ໄດ້​ເຂົ້າ​ເປັນ​ສະມາຊິກ​ອົງການຈັດ​ຕັ້ງ​ແມ່ຍິງ ແລະ ຊາວ​ໜຸ່ມ 100% ກຳມະບານ 479 ຄົນ ເສັງ​ເອົາ​ທຶນ​ທັງ​ພາຍ​ໃນ ແລະ ຕ່າງປະເທດ 60 ຄົນ.

ຂ່າວທີ່ກ່ຽວຂ້ອງ