ນັກທຸລະກິດ ລາວ-ໄທ ຈັບຄູ່ຄ້າຮ່ວມກັນ

213 12 ກ.ຍ. 2017 ຂ່າວໜ້າ​ໜຶ່ງ
ນັກທຸລະກິດ ລາວ-ໄທ ຈັບຄູ່ຄ້າຮ່ວມກັນ

ໃນ​ໂອກາດ​ທີ່​ຄະນະ​ຜູ້​ແທນຈາກ​ພາກ​ລັດ ແລະ ພາກ​ເອກະຊົນ​ກຸ່ມ​ຕາເວັນ​ອອກສຽງ​ເໜືອຕອນ​ເທິງ 1 ແຫ່ງ​ລາຊະ​ອານາຈັກ​ໄທ ນຳ​ໂດຍ​ທ່ານ​ນາງ ຊົນ​ວິຊາ ລັດດາ​ວັນ ຫົວໜ້າ​ພານິດ ແຂວງ​ໜອງ​ຄາຍ ແລະ ທ່ານນາງ ດວງ​ໃຈ ສຸກ​ກະເສນ​ສີ ຮອງປະທານ​ສະພາ​ການ​ຄ້າແຂວງໜອງ​ຄາຍ ເດີນທາງ​ມາ​ເຂົ້າຮ່ວມ​ກອງ​ປະຊຸມ​ພົບ​ປະ​ເຈລະ​ນາການ​ຄ້າ​ຢູ່ ​ສປປ ລາວ ແລະ ວັນທີ 9 ກັນຍາ 2017 ຄະນະ​ຜູ້​ແທນດັ່ງກ່າວ​ໄດ້​ໄປ​ຢ້ຽມຢາມ ແລະ ເຮັດ​ວຽກ​ກັບ​ບໍລິສັດ ພັນ​ເພັດ​ພັດທະ​ນາ​ກະສິກຳ ຢູ່​ເມືອງ​ຫາດ​ຊາຍຟອງ ນະຄອນຫຼວງ​ວຽງ​ຈັນ ຖືກຕ້ອນຮັບ​ໂດຍ​ທ່ານ ທອງ​ສະຫວັນ ມີ​ບຸນ ປະທານ​ບໍລິສັດ ພັນ​ເພັດພັດທະນາ​ກະສິກຳ ພ້ອມ​ດ້ວຍ​ນັກທຸລະ​ກິດ​ລາວ ແລະ ພະນັກງານວິຊາ​ການ​ບໍລິສັດ.

ໂອກາດ​ນີ້ ທ່ານ​ປະທານ​ບໍ​ລິສັດ​ ພັນ​ເພັດ ໄດ້​ລາຍ​ງານ​ໃຫ້​ຄະນະ​ຜູ້​ແທນ​ຊາບ ກ່ຽວ​ກັບ​ການ​ດຳເນີນ​ທຸລະ​ກິດ​ຂອງ​ຕົນ​ເອງ ​ຈາກເບື້ອງ​ຕົ້ນ​ເປັນ​ພຽງ​ແຕ່​ພໍ່ຄ້າຊື້-ຂາຍ​ເຂົ້າ ແລະ ເປັນ​ພໍ່ຄ້າ​ຊາຍແດນ​ທີ່​ນຳ​ເອົາ​ສິນຄ້າ​ລາວ​ໄປ​ຈຳໜ່າຍ​ຢູ່​ໄທ ແລະ ນຳ​ເອົາ​ສິນຄ້າ​ຢູ່ໄທ​ມາ​ຈຳໜ່າຍ​ຢູ່​ລາວ ເພື່ອ​ໃຫ້​ຜູ້ບໍລິໂພກ​ໄດ້​ຊົມໃຊ້​ສິນຄ້າ​ຈາກປະສົບ​ການ ມາ​ຮອດ​ປີ 2008 ຈຶ່ງ​ໄດ້​ສ້າງຕັ້ງ​ບໍລິສັດ ເພື່ອ​ຊຸກຍູ້ສົ່ງເສີມ​ປະຊາຊົນ ເຮັດ​ການ​ຜະລິດ​ກະສິກຳ​ດ້ວຍ​ນະໂຍບາຍ​ສອງບວກ​ສາມ ພ້ອມ​ທັງ​ນຳ​ໃຊ້​ເຄື່ອງກົນ​ຈັກ​ກະສິກຳ​ທີ່​ທັນ​ສະໄໝ ​ເຂົ້າໃນ​ການ​ຜະລິດ​ເພື່ອ​ຫຼຸດ​ຕົ້ນ​ທຶນການ​ຜະລິດ ແລະ ປະຢັດ​ແຮງງານ​ຄົນ ຈາກ​ການ​ຊຸກ​ຍຸ້​ສົ່ງເສີມຂອງ​ພາກ​ລັດ ເຮັດ​ໃຫ້​ປັດຈຸບັນ​ບໍລິ​ສັດ​ໄດ້​ກາຍເປັນ​ຟາມ​ຕົວ​ແບບແຫ່ງ​ຊາດ ​ດ້ານ​ທຸລະ​ກິດ​ກະສິກຳປູກຝັງ-ລ້ຽງສັດ ແລະ ດຳເນີນ​ທຸລະ​ກິດ ປະກອບ​ມີ​ຫຼາຍ​ກິດ​ຈະການ ສຳລັບ​ປະເທດ​ໄທ​ກໍ່​ເປັນ​ປະເທດ​ໜຶ່ງ ​ທີ່​ເປັນ​ຄູ່​ຄ້າ​ຮ່ວມ​ກັບບໍ​ລິສັດ​ມາ​ຫຼາຍ​ປີ​ໃນ​ຜ່ານ​ມາ ເຊິ່ງ​ໄດ້ຮ່ວມ​ມື​ກັບ​ນັກທຸລະກິດ​ໄທ ແລະ ການ​ຮ່ວມ​ມື​ກັນ​ກໍ່​ເພື່ອ​ເຮັດ​ໃຫ້​ຕົ້ນທຶນ​ຕ່ຳ ແລະ ມີ​ຄວາມ​ສະດວກຫຼາຍ​ດ້ານ.

ສ່ວນ​ຄະນະ​ຜູ້​ແທນ​ໄທ​ທີ່​ມາຢ້ຽມຢາມ​ຟາມ​ພັນ​ເພັດ​ຄັ້ງ​ນີ້ ໄດ້ນຳ​ເອົາ​ຫົວໜ່ວຍ​ທຸລະ​ກິດ​ສິນຄ້າໂອ​ດ໋ອບ​ທີ່​ມີ​ຄຸນະພາບຫຼາຍ​ກວ່າ 10 ຫົວໜ່ວຍ​ໃນ 4 ແຂວງຄື: ແຂວງ​ເລີຍ ໜອງ​ຄາຍ ອຸດອນທານີ ແລະ ແຂວງ​ບຶງ​ການ ເຊິ່ງເປັນ​ແຂວງ​ທີ່​ມີ​ຊາຍ​ແດນ​ຕິດ​ກັບ ​ສປປ ລາວ ນຳ​ເອົາ​ສິນຄ້າ​ຫຼາຍລາຍການ ເປັນຕົ້ນ ຜະລິດ​ຕະພັນ​ເຂົ້າສານ ເຫັດ ປາແດກ ປາກ່ອງ ຜະລິດ​ຕະ​ພັນ​ໝາກ​ມອນ ແລະ ອື່ນໆ​ມາ​ວາງສະແດງ​ໃຫ້ຫົວໜ່ວຍ​ທຸລະ​ກິດ​ຂອງ​ລາວ ​ໄດ້ເຫັນ​ຜະລິດ​ຕະ​ພັນ ພາຍຫຼັງ​ນັກທຸລະ​ກິດ​ສອງ​ປະເທດ​ໄດ້​ພົບ​ປະກັນ ຈາກ​ນັ້ນ ສອງ​ຝ່າຍ​ກໍ່​ໄດ້​ຕົກລົງ​ເຊັນ​ສັນຍາ​ຮ່ວມ​ມື​ກັນ ​ເປັນຕົວ​ແທນ​ຈຳໜ່າຍ​ສິນຄ້າ​ເຊິ່ງ​ກັນ ແລະ ກັນ ນັກທຸລະກິດ​ລາວ 3 ບໍລິ​ສັດ ໄດ້​ຈັບ​ຄູ່​ກັບ​ຫົວໜ່ວຍ​ທຸລະກິດ​ໄທ ຄື: ບໍລິສັດ ພັນ​ເພັດ​ພັດທະ​ນາ​ກະສິກຳ ຈັບ​ຄູ່ 8 ຫົວໜ່ວຍ ບໍລິສັດ ຄູນ​ວິໄລ​ພັດທະນາກະສິກຳ ລ້ຽງສັດ ຈຳກັດ ຈັບ​ຄູ່ 6 ຫົວໜ່ວຍ ແລະ ບໍລິສັດ ລາວບຣອດແຄດສ໌ ຈຳກັດ ຈັບ​ຄູ່ 2 ຫົວໜ່ວຍ ນີ້​ແມ່ນ​ບາດກ້າວ​ເລີ່ມຕົ້ນລະຫວ່າງນັກທຸລະກິດ​ສອງປະເທດ ລາວ-ໄທ ໃນ​ການ​ເປັນຄູ່​ຄ້າ​ທີ່​ດີ​ຮ່ວມ​ກັນ​ໃນ​ອະນາຄົດ ເພື່ອ​ພ້ອມ​ກັນ​ນຳ​ເອົາ​ສິນຄ້າ​ທີ່ມີ​ຄຸນະພາບ​ຈຳໜ່າຍ​ເຖິງ​ຜູ້​ບໍ​ລິໂພກ​ຂອງ​ສອງ​ປະເທດ.

ຂ່າວທີ່ກ່ຽວຂ້ອງ