ຍ້ອງຍໍຜົນສຳເລັດ ວຽກງານລົບລ້າງຄວາມບໍ່ຮູ້ໜັງສື-ບຳລຸງຊັ້ນປະຖົມ

141 12 ກ.ຍ. 2017 ຂ່າວໜ້າ​ໜຶ່ງ
ຍ້ອງຍໍຜົນສຳເລັດ ວຽກງານລົບລ້າງຄວາມບໍ່ຮູ້ໜັງສື-ບຳລຸງຊັ້ນປະຖົມ

ເພື່ອ​ບັນລຸ​ເປົ້າ​ໝາຍ​ຂອງ​ແຜນປະຕິບັດ​ງານ​ແຫ່ງ​ຊາດ ການ​ສຶກສາ​ເພື່ອ​ໝົດ​ທຸກ​ຄົນ ກໍ່​ຄືເປົ້າໝາຍ​ສະຫັດ​ສະ​ວັດດ້ານ​ການພັດທະນາ ກະຊວງ​ສຶກ​ສາ​ທິ​ການ ແລະ ກີລາ ໄດ້​ວາງ​ແຜນ​ຍຸດ​ທະສາດ​ການ​ປະຕິ​ຮູບ​ລະບົບ​ການສຶກ​ສາ ທັງ​ໃນ-ນອກ​ໂຮງຮຽນ ໂດຍ​ສະເພາະແມ່ນ​ການ​ສຶກສາ​ນອກ​ໂຮງຮຽນ ໄດ້​ສືບຕໍ່​ປັບປຸງເນື້ອ​ໃນ​ຫຼັກສູດ​ການ​ຮຽນ-ການສອນ​ຄືນໃໝ່ ປັບປຸງ​ແບບແຜນ ຂັ້ນ​ຕອນ ບາດກ້າວ ແລະ ວິທີການ​ຮຽນ-ການ​ສອນ ໃຫ້​ເໝາະສົມ​ກັບ​ສະພາບ​ຕົວ​ຈິງ​ຂອງ​ປະຊາ​ຊົນ​ບັນດາເຜົ່າ​ໃນ​ທຸກ​ທ້ອງຖິ່ນ ໂດຍ​ການ​ເອົາ​ການ​ຮຽນ​ໜັງສື ແລະ ບຳລຸງ​ຍົກ​ລະດັບ​ການ​ສຶກສາ ຄຽງ​ຄູ່​ກັບ​ການ​ອົບຮົມ​ວິຊາຊີບ​ຂັ້ນ​ພື້ນຖານ ເຊິ່ງ​ມາ​ຮອດ​ປັດຈຸ​ບັນ ທົ່ວ​ປະເທດມີ​ປະຊາກອນໃນ​ເກນ​ອາຍຸ 15-45 ປີ ໄດ້​ຈົບການຈັດຕັ້ງ​ປະຕິບັດ​ການ​ລົບ​ລ້າງບໍ່​ຮູ້​ໜັງສື ແລະ ຈົບ​ຊັ້ນ​ປະຖົມ​ບຳລຸງ ຈຳນວນ 640.743 ຄົນ/ຍິງ 338.739 ຄົນ ຖື​ວ່າການຈັດຕັ້ງປະຕິບັດ​ວຽກ​ງານ​ດັ່ງກ່າວ ແມ່ນປະສົບ​ຜົນສຳເລັດ​ຕາມ​ແຜນການ​ທີ່​ລັດຖະບານ​ວາງ​ໄວ້.

ວັນ​ທີ 8 ກັນຍາ 2017 ຢູ່​ທີ່ສະໂມສອນ​ໃຫຍ່ ມະຫາ​ວິທະຍາໄລ​ແຫ່ງ​ຊາດ​ລາວ ໄດ້​ມີ​ພິທີ​ຍ້ອງຍໍກ່ຽວ​ກັບ​ຜົນສຳເລັດ​ວຽກ​ງານລົບ​ລ້າງ​ຄວາມ​ບໍ່​ຮູ້​ໜັງສື ແລະ ບຳລຸງ​ຈົບ​ຊັ້ນ​ປະຖົມຢູ່ ສປປ ລາວ ໄລຍະ​ຜ່ານ​ມາ ເຊິ່ງ​ມີ​ທ່ານນາງ ແສງ​ເດືອນ ຫຼ້າ​ຈັນທະ​ບູນ ລັດຖະມົນຕີ​ກະຊວງ​ສຶກ​ສາ​ທິການ ແລະ ກີລາ ພ້ອມ​ດ້ວຍ​ບັນດາ​ອະດີດ​ລັດຖະມົນຕີ ຫົວໜ້າກົມ ແລະ ພະນັກງານ​ຫຼັກ​ແຫຼ່ງອ້ອມ​ຂ້າງ​ຂະແໜງການ​ສຶກ​ສາ ເຂົ້າ​ຮ່ວມ.

ການຈັດຕັ້ງ​ປະຕິບັດ​ວຽກ​ງານລົບ​ລ້າງ​ຄວາມ​ບໍ່​ຮູ້​ໜັງສື​ຢູ່​ລາວເຮົາ ໄດ້​ເລີ່ມ​ເກີດ​ຂຶ້ນ​ແຕ່​ປີ 1976 ເປັນຕົ້ນ​ມາ ຈົນ​ມາ​ຮອດປີ 1984 ລັດຖະບານ​ກໍ່​ສາມາດ​ປະກາດລົບ​ລ້າງ​ຄວາມ​ບໍ່​ຮູ້​ໜັງສື​ທົ່ວ​ປະເທດ ​ໄດ້​ຢ່າງ​ເປັນ​ທາງ​ການ ປະກາດ​ໂດຍ​ທ່ານ ສຸ​ພານຸ​ວົງ ອະດີດ​ປະທານ​ປະເທດ​ແຫ່ງ ​ສປປ ລາວ ແລະ ເພື່ອ​ເປັນ​ການ​ສືບຕໍ່ແກ້​ໄຂ​ບັນຫາ​ການ​ລົບ​ລ້າງຄວາມ​ບໍ່​ຮູ້​ໜັງສື​ຄືນໃໝ່ ລັດ​ຖະບານ ແລະ ອຳນາດ​ການ​ປົກຄອງທຸກ​ຂັ້ນ​ໃນ​ຂອບ​ເຂດ​ທົ່ວ​ປະເທດ ໄດ້​ສືບຕໍ່​ເປີດ​ບັ້ນ​ຂະ​ບວນ​ການຮຽນ​ການ​ສອນ ລົບ​ລ້າງ​ຄວາມ​ບໍ່ຮູ້​ໜັງສື​ໃຫ້​ແກ່​ປະຊາຊົນ​ຜູ້​ທີ່​ຍັງກືກ ແລະ ກືກ​ໜັງສື​ຄືນ ພ້ອມກັບ​ເປີດ​ຂະ​ບວນ​ການ​ຮຽນ-ການສອນລະບົບ​ບຳລຸງ​ຍົກ​ລະດັບ​ຊັ້ນປະຖົມ​ຂຶ້ນ​ຢ່າງ​ກວ້າງຂວາງ ໃນ​ປີ 1992 ເປັນຕົ້ນ​ມາ.

ສຳລັບ​ການ​ຍ້ອງຍໍ-ຊົມເຊີຍທົ່ວ​ຂະແໜງການ​ສຶກ​ສາ ໃນການຈັດຕັ້ງ​ປະຕິບັດ​ວຽກ​ງານລົບ​ລ້າງ​ຄວາມ​ບໍ່​ຮູ້​ໜັງສືຄັ້ງ​ນີ້ ມີ​ຫຼຽນ​ໄຊ​ແຮງ​ງານ​ຊັ້ນ 1 ຈຳນວນ 1 ກົມ​ກອງ ແລະ 28 ທ່ານ ຫຼຽນ​ໄຊ​ແຮງ​ງານ ຊັ້ນ 2 ມີ 9 ກົມ​ກອງ ແລະ 44 ທ່ານ ຊັ້ນ 3 ມີ 14 ກົມ​ກອງ ແລະ 40 ທ່ານ ຫຼຽນ​ກາ​ແຮງ​ງານ 34 ທ່ານ ແລະ ໃບ​ຍ້ອງຍໍຂັ້ນ​ລັດຖະບານ 23 ທ່ານ.

ຂ່າວທີ່ກ່ຽວຂ້ອງ