ຫາລືການໂຄສະນາວຽກງານໂພຊະນາການ ສັກຢາກັນພະຍາດແກ່ຊຸມຊົນ

107 13 ກ.ຍ. 2017 ຂ່າວໜ້າ​ໜຶ່ງ
ຫາລືການໂຄສະນາວຽກງານໂພຊະນາການ ສັກຢາກັນພະຍາດແກ່ຊຸມຊົນ

ສູນ​ກາງ​ແນວ​ລາວ​ສ້າງ​ຊາດ ຮ່ວມ​ກັບ​ສະຫະພາບ​ເອີ​ຣົບ​ປະຈຳ ​ສປປ ລາວ ອົງການ​ຢູ​ນີ​ເຊັບປະຈຳ ​ສປປ ລາວ ຈັດ​ກອງ​ປະຊຸມ​ປຶກສາ​ຫາລື​ການ​ໂຄສະນາ ວຽກ​ງານ​ໂພຊະ​ນາ​ການ​ສັກ​ຢາກັນ​ພະຍາດ​ສຸ​ຂະ​ອະນາໄມ ການຕ້ານ​ການ​ໃຊ້​ຄວາມ​ຮຸນ​ແຮງ​ຕໍ່ເດັກ ການ​ຄ້າ​ມະນຸດ ແລະ ການສຶກ​ສາ​ສຳລັບ​ເດັກ​ກ່ອນ​ໄວ​ຮຽນ ຂຶ້ນ​ໃນ​ລະຫວ່າງວັນ​ທີ 11-13 ກັນຍາ 2017 ນີ້ ທີ່​ສູນ​ເຝິກ​ອົບຮົມ​ແນວ​ລາວ​ສ້າງ​ຊາດ ໂດຍເປັນ​ປະທານ​ຂອງ​ທ່ານ ສົມ​ອົກ ກິ່ງ​ສະ​ດາ ຮອງ​ປະທານ​ແນວລາວ​ສ້າງ​ຊາດ ມີ​ຜູ້ຕາງໜ້າ​ສະຫະ​ພາບ​ເອີ​ຣົບ​ປະຈຳ ​ສປປ ລາວ ອົງການ​ຢູ​ນີ​ເຊັບປະຈຳ ​ສປປ ລາວ ຫົວໜ້າ​ຫ້ອງການ​ພະນັກງານ​ແນວ​ລາວ​ສ້າງ​ຊາດ ແລະ ບັນດາ​ຜູ້ຕາງໜ້າ​ແນວ​ລາວ​ສ້າງຊາດ​ຈາກ 8 ແຂວງ​ທົ່ວ​ປະເທດ ເຂົ້າ​ຮ່ວມ.

ກອງ​ປະຊຸມ​ຄັ້ງ​ນີ້ ເພື່ອ​ເສີມ​ຂະຫຍາຍ​ຄວາມ​ຮັບ​ຮູ້ ແລະ ຄວາມສາມາດ​ໃຫ້​ແກ່​ພະນັກງານ​ແນວລາວ​ສ້າງ​ຊາດ ໃນ​ການ​ປຸກ​ລະດົມ​ຊຸມ​ຊົນ​ກ່ຽວ​ກັບ​ບັນຫາ​ຕ່າງໆທີ່​ກ່ຽວຂ້ອງ​ກັບ​ເດັກ ເຊັ່ນ: ວຽກງານ​ໂພຊະ​ນາ​ການ​ສັກ​ຢາ​ກັນພະຍາດສຸ​ຂະ​ອະນາໄມ ການ​ປົກປ້ອງ​ເດັກ ແລະ ການ​ສຶກ​ສາ​ສຳລັບ​ເດັກ​ກ່ອນ​ໄວ​ຮຽນ ເສີມ​ຂະຫຍາຍ​ບົດບາດ​ຂອງ​ແນວ​ລາວສ້າງ​ຊາດ​ສູນ​ກາງ ແຂວງ ເມືອງ ແລະ ບ້ານ ໃນ​ການ​ປຸກລະດົມ​ປະຊາ​ຊົນ​ບັນດາເຜົ່າ ໃນ​ການ​ປັບປຸງບັນຫາ​ສຸຂະພາບ​ຂອງ​ແມ່ຍິງ ແລະ ເດັກ ຊຸກຍູ້​ການ​ມີ​ສ່ວນຮ່ວມ​ຂອງ​ຜູ້ນຳ​ເຜົ່າ​ຕ່າງໆ ​ໃນການ​ປຸກລະດົມ​ປະຊາຊົນ​ບັນດາເຜົ່າ ເພື່ອ​ໃຫ້​ເອົາໃຈໃສ່​ໃນ​ການປັບປຸງ​ບັນຫາ​ສຸຂະພາບ​ໃນ​ຊຸມຊົນ​ຂອງ​ຕົນ​ເອງ.

ອົງການ​ຢູ​ນີ​ເຊັບ ແລະ ສູນກາງ​ແນວ​ລາວ​ສ້າງ​ຊາດ ໄດ້ຮ່ວມ​ກັນ​ຕອບ​ໂຕ້​ການ​ລະບາດຂອງ​ພະຍາດ​ໂປ​ລີ​ໂອ ຮ່ວມ​ກັນ​ກໍ່ສ້າງ​ຄວາມ​ສາມາດ​ໃຫ້​ແກ່​ພະນັກ​ງານ​ໂຄສະນາ​ຂອງ​ແນວ​ລາວສ້າງ​ຊາດ ພາກ​ເໜືອ ພາກ​ກາງ ແລະ ພາກ​ໃຕ້ ໃນ​ການ​ໂຄສະນາໃຫ້​ຄວາມ​ຮູ້ ແລະ ຮັບຮອງ​ເອົາຍຸດ​ທະ​ສາດ ເພື່ອ​ປັບປຸງ​ຄວາມເປັນ​ຢູ່​ອັນ​ດີ​ຂອງ​ແມ່ຍິງ ແລະ ເດັກນ້ອຍ ໂດຍ​ສະເພາະ ໃນ​ເຂດຊຸມ​ຊົນ​ຫ່າງ​ໄກ​ສອກຫຼີກ​ ປະກອບສ່ວນ​ຢ່າງ​ແຂງແຮງ​ເຂົ້າ​ໃນ​ການໂຄສະນາ​ຊຸກຍູ້​ການ​ປັບປຸງ​ວຽກງານ​ຮັກສາ​ສຸຂະພາບ ແລະ ຊີວິດການ​ເປັນ​ຢູ່​ທີ່​ດີ​ຂອງ​ເດັກ.

ຂ່າວທີ່ກ່ຽວຂ້ອງ