ການຮ່ວມມືວຽກງານທ່ອງທ່ຽວ 5 ປະເທດລຸ່ມແມ່ນ້ຳຂອງ

141 13 ກ.ຍ. 2017 ຂ່າວໜ້າ​ໜຶ່ງ
ການຮ່ວມມືວຽກງານທ່ອງທ່ຽວ 5 ປະເທດລຸ່ມແມ່ນ້ຳຂອງ

ພາຍຫຼັງ​ທີ່​ມີ​ການ​ຮ່ວມ​ມື ດ້ານ​ການທ່ອງທ່ຽວ​ໃນ​ຂອບແມ່ນ້ຳຂອງ ແມ່ນ້ຳ​ເອ​ຣາ​ວະ​ດີ ແລະ ແມ່ນ້ຳ​ເຈົ້າ​ພະຍາ ເຊິ່ງ​ປະກອບ​ມີ 5 ປະເທດຄື: ກຳປູເຈຍ ລາວ ມຽນ​ມາ ໄທ ແລະ ຫວຽດນາມ ເຫັນ​ວ່າໃນ​ປີ 2016 ມີ​ນັກ​ທ່ອງທ່ຽວ​ສາກົນ​ເຂົ້າ​ມາ​ທ່ອງ​ທ່ຽວ​ໃນຂົງເຂດມີ​ເຖິງ 65 ລ້ານ​ກວ່າ​ຄົນ ເຊິ່ງ​ເປັນ​ຕົວ​ເລກ​ທີ່​ຊີ້​ໃຫ້​ເຫັນ​ວ່າ ການ​ຮ່ວມ​ມື​ດ້ານ​ການທ່ອງທ່ຽວ ສາມາດ​ດຶງ​ດູດ​ນັກ​ທ່ອງ​ທ່ຽວ​ສາກົນ​ເຂົ້າ​ມາ​ທ່ອງ​ທ່ຽວ​ໃນ 5 ປະເທດ​ເພີ່ມ​ຂຶ້ນ ຂໍ້​ມູນ​ດັ່ງກ່າວ​ນີ້ ໄດ້ລາຍ​ງານ​ຢູ່​ໃນ​ກອງ​ປະຊຸມ​ເຈົ້າໜ້າທີ່​ອາວຸໂສ​ດ້ານ​ການ​ທ່ອງທ່ຽວ ເພື່ອ​ກະກຽມ​ໃຫ້​ແກ່​ກອງປະຊຸມ​ລັດຖະມົນຕີ​ທ່ອງ​ທ່ຽວຂອງ 5 ປະເທດ.

ການ​ພັດທະນາ​ການທ່ອງທ່ຽວແບບ​ຍືນ​ຍົງ ແລະ ການ​ຮ່ວມ​ມືເຊື່ອມ​ໂຍງ​ການທ່ອງທ່ຽວ ເພື່ອດຶງ​ດູດ​ນັກ​ທ່ອງ​ທ່ຽວ​ສາກົນ​ເຂົ້າມາ​ທ່ອງ​ທ່ຽວ​ໃນ​ຂົງເຂດ​ໃຫ້​ຫຼາຍຂຶ້ນ ແມ່ນ​ເນື້ອ​ໃນ​ທີ່​ສຳຄັນ​ຂອງກອງ​ປະຊຸມ​ເຈົ້າ​ໜ້າທີ່​ອາວຸໂສດ້ານ​ການທ່ອງທ່ຽວ​ຂອງ 5 ປະເທດ ກອງ​ປະຊຸມ​ເຈົ້າ​ໜ້າທີ່​ອາ​ວຸໂສ​ດ້ານ​ການທ່ອງທ່ຽວ​ ໄດ້​ທົບທວນຄືນ​ແຜນການ​ຮ່ວມ​ມື​ດ້ານການທ່ອງທ່ຽວ​ໄລຍະ 2015-2017 ແລະ ກຳນົດ​ແຜນການຮ່ວມ​ມື 2017-2018 ໃນ​ນັ້ນ ອັນສຳຄັນ​ແມ່ນ​ໄດ້​ທົບ​ທວນຄືນ​ດ້ານການ​ຮ່ວມ​ມື​ໂຄສະນາ​ສົ່ງເສີມການທ່ອງທ່ຽວ ການ​ພັດທະນາຜະລິດ​ຕະ​ພັນ​ການທ່ອງທ່ຽວ ຮ່ວມ​ກັນ​ສ້າງ​ລາຍການ​ທ່ອງທ່ຽວ​ໃນ​ຂົງເຂດ ການ​ສ້າງ​ຄວາມສະດວກ​ໃນ​ການ​ເຂົ້າ​ອອກ​ປະເທດ​ຂອງ​ບັນດາ​ນັກ​ທ່ອງ​ທ່ຽວ ເຊິ່ງ​ການຈັດຕັ້ງ​ປະຕິບັດ​ເຫັນ​ວ່າໄດ້​ດີ ຈິ່ງ​ສາມາດ​ດຶງ​ດູດ​ນັກ​ທ່ອງທ່ຽວ​ເຂົ້າ​ມາ​ທ່ອງ​ທ່ຽວ​ເພີ່ມ​ຂຶ້ນ ແຕ່​ຕ້ອງ​ໄດ້​ເອົາໃຈໃສ່​ການ​ທ່ອງທ່ຽວ​ແບບ​ຍືນ​ຍົງ ໃນ​ນັ້ນ ຈະ​ສຸມໃສ່​ສ້າງ​ຜະລິດ​ຕະ​ພັນສ້າງ​ລາຍການທ່ອງທ່ຽວ​ໃຫ້​ໂດດ​ເດັ່ນ​ຄືແນວໃດ ເພື່ອ​ດຶງ​ດູດ​ນັກ​ທ່ອງທ່ຽວ​ໄດ້​ດີ ແຕ່​ຖື​ສຳຄັນ​ເປົ້າ​ໝາຍການທ່ອງທ່ຽວ​ແບບ​ຍືນ​ຍົງ​ ຕ້ອງມີ​ມາດ​ຕະການ​ໃນ​ການ​ຄຸ້ມ​ຄອງໃຫ້​ສອດຄ່ອງ​ ເພື່ອ​ສົ່ງເສີມ​ການທ່ອງ​ທ່ຽວ.

ກອງ​ປະຊຸມ​ດັ່ງກ່າວ​ໄດ້​ຈັດ​ຂຶ້ນໃນ​ວັນ​ທີ 6 ກັນຍາ 2017 ທີ່​ນະຄອນ​ໂຮ່​ຈີ​ມິງ ​ສສ ຫວຽດນາມ ໂດຍ​ການ​ເຂົ້າ​ຮ່ວມ​ຂອງ​ເຈົ້າ​ໜ້າທີ່​ອາວຸໂສ 5 ປະເທດ ແລະ ໃນວັນ​ດຽວ​ກັນ ກໍ່​ໄດ້​ຈັດ​ໃຫ້​ມີ​ງານເປີດ​ຕະຫຼາດນັດ​ການ​ທ່ອງທ່ຽວ​ສາກົນ ໂດຍ​ການ​ເຂົ້າ​ຮ່ວມຂອງ​ທ່ານ ບໍ່​ແສງ​ຄຳ ວົງ​ດາລາ ລັດຖະມົນຕີກະຊວງ​ຖະແຫຼງຂ່າວ ວັດທະນະທຳ ແລະ ທ່ອງທ່ຽວ ມີ​ລັດຖະມົນຕີ ຮອງ​ລັດ​ຖະມົນຕີ ພ້ອມ​ດ້ວຍ​ຮອງ​ເຈົ້າ​ຄອງ ແລະ ຜູ້​ຮັບຜິດຊອບ​ວຽກ​ງານທ່ອງ​ທ່ຽວ​ຂອງ​ຫຼາຍ​ປະເທດ​ເຂົ້າຮ່ວມ.

ໃນ​ງານ ທ່ານ​ລັດຖະມົນຕີກະຊວງກີລາ ແລະ ທ່ອງ​ທ່ຽວຂອງ ​ສສ ຫວຽດນາມ ໃນ​ນາມເຈົ້າພາບ​ ໄດ້​ກ່າວ​ເຖິງ​ຄວາມ​ສຳຄັນ​ຂອງ​ຕະຫຼາດ​ການທ່ອງທ່ຽວສາກົນ ແລະ ໄດ້​ກ່າວ​ສະແດງຄວາມ​ຂອບໃຈ​ຕໍ່​ບັນດາ​ຄະນະ​ຜູ້ແທນ​ຈາກ​ປະເທດ​ຕ່າງໆທີ່​ມາຮ່ວມ​ງານ ແລະ ໄດ້​ຮຽກຮ້ອງ​ໃຫ້ບັນດາ​ປະເທດ​ຕ່າງໆ​ໃຫ້​ມີ​ການຮ່ວມ​ມື​ກັນ​ໃຫ້​ຫຼາຍ​ຂຶ້ນ ແລະ ທີ່ສຳຄັນ ​ໃນ​ງານ​ກໍ່​ໄດ້​ມີ​ການ​ສະແດງ​ສິລະ​ປະ​ທີ່​ຍິ່ງ​ໃຫຍ່ ສ້າງຄວາມ​ປະ​ທັບ​ໃຈ​ໃຫ້​ແກ່​ແຂກ​ທີ່ມາ​ຮ່ວມ​ງານ ໂດຍ​ມີ​ການ​ສະແດງ​ສິລະ​ປະ​ທີ່​ເປັນ​ເອກະລັກຂອງ​ແຕ່​ລະ​ປະເທດ ນອກ​ນັ້ນຍັງມີ​ນາງ​ສາວ​ລາວ ນາງ​ສາວຫວຽດນາມ ແລະ ນາງ​ສາວກຳປູ​ເຈຍ​ເຂົ້າ​ຮ່ວມ ພ້ອມ​ທັງ​ນາງແບບຈາກ​ປະເທດ​ຫວຽດນາມ ແລະ ນັກສະແດງ​ຫຼາຍ​ຮ້ອຍ​ຄົນຂຶ້ນ​ສະແດງ​ ບັນດາ​ລາຍການຕ່າງໆ​ດ້ວຍ​ບັນຍາກາດ​ອັນ​ຄຶກຄື້ນ​ມ່ວນຊື່ນ ເພື່ອ​ເປັນ​ການ​ເປີດຕະຫຼາດ​ການທ່ອງທ່ຽວ ທີ່​ສ້າງຄວາມ​ປະ​ທັບ​ໃຈ​ໃຫ້​ແຂກ​ຜູ້​ເຂົ້າຮ່ວມ​ງານ.

ຂ່າວທີ່ກ່ຽວຂ້ອງ