ຊາວໜຸ່ມ CLV ຮ່ວມມືພັດທະນາ-ການເຊື່ອມໂຍງອາຊຽນ

170 13 ກ.ຍ. 2017 ຂ່າວໜ້າ​ໜຶ່ງ
ຊາວໜຸ່ມ CLV ຮ່ວມມືພັດທະນາ-ການເຊື່ອມໂຍງອາຊຽນ

ກອງ​ປະຊຸມ​ການ​ຮ່ວມ​ມື​ການນຳ​ຊາວ​ໜຸ່ມກຳປູເຈຍ-ລາວ-ຫວຽດນາມ (CLV) ໄຂ​ຂຶ້ນ​ໃນວັນ​ທີ 8 ກັນຍາ 2017 ທີ່​ນະຄອນ​ໂຮ່​ຈີ​ມິງ ​ສສ ຫວຽດນາມ ໂດຍ​ເປັນ​ປະທານ​ຮ່ວມ​ຂອງ​ຄະນະ​ນຳ​ຊາວ​ໜຸ່ມ​ທັງ 3 ປະເທດ (​ສສ ຫວຽດນາມ-ລາຊະ​ອານາຈັກກຳປູເຈຍ-​ສປປ ລາວ) ເຊິ່ງຄະນະ​ຜູ້​ແທນ​ຊາວ​ໜຸ່ມ​ລາວ ນຳໂດຍ​ສະຫາຍ ສອນ​ທະນູ ທຳ​ມະວົງ ກຳມະການ​ສູນ​ກາງ​ພັກ ເລຂາ​ຄະນະ​ບໍລິຫານ​ງານ​ສູນ​ກາງ ​ຊປປລ ຄະນະ​ຜູ້​ແທນ​ຫວຽດນາມ ນຳ​ໂດຍ​ສະຫາຍ ເລ ກອ່ກ ຝອງ ກຳມະການ​ສຳຮອງ​ສູນ​ກາງ​ພັກ ເລຂາ​ທີ 1 ຄະນະ​ບໍລິຫານ​ງານຊາວ​ໜຸ່ມ​ກອມ​ມູ​ນິດ​ໂຮ່​ຈີ​ມິງ ແລະ ຄະນະ​ກຳປູເຈຍ ນຳ​ໂດຍສະຫາຍ ຮຸ່ນ​ມະນີ ສະມາຊິກ​ສະພາ​ແຫ່ງ​ຊາດ ປະທານ​ສະຫະພັນຊາວ​ໜຸ່ມ​ແຫ່ງ​ຊາດ ປະທານ​ສະຫະ​ພັນ​ຊາວ​ໜຸ່ມ​ແຫ່ງ​ຊາດ​ກຳ​ປູເຈຍ ມີ​ບັນດາ​ສະຫາຍ​ການ​ນຳ ແລະ ຜູ້​ທີ່​ກ່ຽວຂ້ອງ​ທັງ 3 ປະເທດ ເຂົ້າ​ຮ່ວມ.

ກອງ​ປະຊຸມ​ການ​ຮ່ວມ​ມືການ​ນຳ​ຊາວ​ໜຸ່ມກຳປູເຈຍ-ລາວ-ຫວຽດນາມ ທີ່​ນະຄອນ​ໂຮ່ຈີ​ມິງ​ຄັ້ງ​ນີ້ ໄດ້​ມີ​ການ​ພົບ​ປະ​ແລກປ່ຽນຄົ້ນຄວ້າ​ປຶກສາ​ຫາລື​ກັນ​ໃນ 3 ຫົວຂໍ້​ໃຫຍ່ຄື: ການ​ສຶກ​ສາ​ອົບຮົມ​ຊາວ​ໜຸ່ມ 3 ປະເທດ​ຮັບ​ຮູ້​ໄດ້ມິດຕະພາບ ແລະ ມູນເຊື້ອ​ຄວາມສາມັກຄີ​ອັນ​ເປັນ​ມູນເຊື້ອ ເປັນ​ຈຸດລິ​ເລີ່ມ​ຂອງ​ແຕ່​ລະ​ປະເທດ ແລກປ່ຽນ​ປະສົບ​ການ​ໃນ​ການ​ພັດ​ທະນາ​ວຽກ​ງານ​ທຸລະ​ກິດ​ໜຸ່ມ 3 ປະເທດ ແລະ ເພີ່ມ​ທະວີ​ຊຸກຍູ້​ກິດ​ຈະກຳ​ວຽກ​ງານ​ອາສາ​ສະໝັກ ເພື່ອພັດທະນາ​ຊຸມ​ຊົນ ແລະ ສັງຄົມ ໃນ​ແຕ່​ລະ​ຫົວຂໍ້​ຄະນະ​ຜູ້​ແທນ​ທັງ 3 ປະເທດ ກໍ່​ໄດ້​ມີ​ການ​ປະກອບຄຳ​ເຫັນແລກປ່ຽນ​ບົດຮຽນເຊິ່ງກັນ ແລະ ກັນ​ຢ່າງ​ພາວະ​ວິໄສ.

ເພື່ອ​ເສີມ​ຂະຫຍາຍ​ນ້ຳໃຈຮັກ​ຊາດ​ອັນ​ດູດດື່ມ ເພື່ອ​ສືບ​ທອດມູນເຊື້ອ​ຕໍ່ສູ້​ບໍ່​ຍອມ​ຈຳນົນ​ຂອງບັນ​ພະ​ບູ​ລຸດ ແລະ ປະຊາຊົນສາມ​ຊາດ​ອ້າຍ​ນ້ອງ ຜ່ານ​ການ​ຕໍ່ສູ້​ໃນ​ແປວໄຟ​ແຫ່ງ​ການ​ຕໍ່ສູ້​ກູ້ຊາດ​ອັນ​ທຸກ​ຍາກລຳບາກ​ໃນ​ເມື່ອກ່ອນ ເຊິ່ງ​ກຳລັງ​ແຮງ​ຕົ້ນຕໍ​ກໍ່່ແມ່ນ​ຊາວ​ໜຸ່ມ​ພວກ​ເຮົາ​ເປັນ​ກຳລັງ​ປະຈັນບານ​ເຂັ້ມແຂງ ໄດ້​ສ້າງວິລະ​ກຳ​ອັນ​ລ້ຳ​ເລີດ ຈາລຶກ​ໄວ້​ໃນໜ້າ​ປະຫວັດສາດ​ຂອງ 3 ປະເທດ ດັ່ງ​ແນວ​ຄິດ​ຂອງ​ປະທານ​ ໂຮ່​ຈີ​ມິງ ​ທີ່​ວ່າ: ບໍ່​ມີ​ສິ່ງ​ໃດ​ທີ່​ດີ​ກວ່າ​ເອກະລາດ​ແຫ່ງ​ຊາດ ແຕ່​ເອກະລາດແຫ່ງ​ຊາດ ຕ້ອງ​ຮັບປະກັນ​ໃຫ້​ປະຊາ​ຊົນ​ມີ​ສິດ​ເສລີພາບ ມີ​ຄວາມອີ່ມ​ໜຳ​ສຳລານ ແລະ ມີ​ຄວາມສຸກ​ທີ່ແທ້​ຈິງໃນ​ຍຸກ​ໂລກາ​ພິ​ວັດ ແລະ ເຊື່ອມ​ໂຍງ ຍິ່ງ​ຕ້ອງ​ເພີ່ມທະວີ​ຄວາມ​ສາມັກຄີ ແລະ ການຮ່ວມ​ມື​ກັນລະຫວ່າງ 3 ປະເທດອ້າຍ​ນ້ອງ ຫວຽດນາມ-ລາວ-ກຳປູເຈຍ ຢ່າງ​ກວ້າງຂວາງ ແລະ ຍືນ​ຍົງ​ຮອບດ້ານ ເຊິ່ງ​ໃນຊຸມ​ປີ​ທີ່​ຜ່ານ​ມາ​ ໄດ້​ມີ​ບົດ​ບັນທຶກຮ່ວມ​ມື​ກັນ​ເປັນ​ແຕ່​ລະ​ໄລຍະ ເຊິ່ງໃນ​ນັ້ນໄດ້​ລະບຸ​ໄວ້​ວ່າ ຊາວ​ໜຸ່ມ 3 ປະເທດ​ພວກ​ເຮົາ ຈະ​ໄດ້​ເພີ່ມທະວີ​ການ​ຮ່ວມ​ມື​ກັນ​ແຕ່​ຂັ້ນ​ສູງກາງຈົນ​ຮອດ​ທ້ອງຖິ່ນ​ຮາກ​ຖານ ໄດ້​ມີ​ການ​ພົບ​ປະ​ຢ້ຽມຢາມ ແລະ ແລກປ່ຽນ​ບົດຮຽນຊ່ວຍເຫຼືອ​ເຊິ່ງກັນ ແລະ ກັນ​ໃນ​ດ້ານ​ຕ່າງໆ ບໍ່ວ່າ​ຈະ​ດ້ານ​ການເມືອງ ເສດ​ຖະກິດ ແລະ ວັດທະນະທຳ-ສັງຄົມ ເປັນຕົ້ນແມ່ນ​ການ​ປົກ​ປັກ​ຮັກສາຄວາມ​ສະຫງົບ​ຕາມ​ຊາຍ​​ແດນ ຮັກສາ​ສະພາບ​ແວດ​ລ້ອມ ສົ່ງເສີມ​ການ​ຄ້າ-ການ​ລົງທຶນ ແລະ ທ່ອງ​ທ່ຽວ ເພື່ອ​ໃຫ້​ປະຊາຊົນ 3 ຊາດ​ພວກ​ເຮົາ​ມີ​ຄວາມ​ຜາ​ສຸກ ແລະ ໃຫ້ການ​ຊ່ວຍເຫຼືອ​ເຊິ່ງ​ກັນ ແລະ ກັນ ຢ່າງ​ໜັກ​ແໜ້ນ​ເລິກເຊິ່ງ.

ຂ່າວທີ່ກ່ຽວຂ້ອງ