ບັນ­ຫາ​ລົດ​ເຖື່ອນ - ໂດຍ : ດັ້ນ​ກີບ​ເມກ

530 27 ກ.ຍ. 2017 ນານາສາລະ

ຄວາມ​ຈິງ​ຄຳ​ວ່າ​ລົດ​ເຖື່ອນ​ນີ້ ແມ່ນ​ພາ­ສາ​ເວົ້າກັນ​ຕາມ​ທີ່​ໄດ້​ຍິນ​ມາ ເຊິ່ງ​ນັ້ນ​ກໍ່​ຄື​ ລົດ​ນຳ​ເຂົ້າ​ບໍ່​ຖືກຕ້ອງ​ຕາມ​ລະ­ບຽບ​ກົດ­ໝາຍ ຫຼືຈະ​ເອີ້ນ​ວ່າ: ລົດນຳ​ເຂົ້າ​ແບບ​ໜີ​ພາ­ສີ (ບໍ່​ໄດ້​ເສຍ​ພາ­ສີ) ໃຫ້​ແກ່​ລັດ ດັ່ງ­ນັ້ນ ລັດ​ກໍ່​ຈະ​ຂາດ​ລາຍ​ໄດ້​ເຂົ້າ​ເງິນ​ຄັງ​ຂອງລັດ­ຖະ­ບານ ເຊິ່ງ​ເຮັດ​ໃຫ້­ການ​ຄ້າ­ຂາຍ​ລົດ ແລະ ຂັບ​ຂີ່່​ນຳ​ໃຊ້​ຍານ­ພາ­ຫະ­ນະ​ມີ​ບັນ­ຫາ​ຫຍຸ້ງ­ຍາກຕາມ​ມາ ນອກ­ຈາກ​ນັ້ນ ລົດ​ທີ່​ນຳ​ເຂົ້າ​ບໍ່​ຖືກ​ລະບຽບ​ກົດ­ໝາຍ​ນີ້ ຍັງ​ສ້າງ​ຄວາມ​ເສຍ​ຫາຍ​ໃຫ້ເສດ­ຖະ­ກິດ​ໃນ​ລັກ­ສະ­ນະ​ທີ່​ການ​ຄ້າ­ຂາຍ​ບໍ່​ເຂົ້າໃນ​ກົນ​ໄກ​ການ​ຕະ­ຫຼາດ.

ກອງ​ປະ­ຊຸມ​ລັດ­ຖະ­ບານ​ສະ­ໄໝ​ສາ­ມັນ​ປະ­ຈຳເດືອນ​ມັງ­ກອນ ໄດ້​ຈັດ​ຂຶ້ນ​ວັນ​ທີ 14-25 ມັງ­ກອນ 2017 ໄດ້​ພິ­ຈາ­ລະ­ນາແກ້​ໄຂ​ບັນ­ຫາ​ຮີບ​ດ່ວນ ໂດຍສະ­ເພາະແມ່ນ​ສະ­ພາບ​ການ​ຄຸ້ມ​ຄອງ​ການ​ນຳເຂົ້າ​ນ້ຳ­ມັນ​ເຊື້ອ​ໄຟ ແລະ ບັນ­ຫາ​ການ​ນຳ​ເຂົ້າລົດບໍ່​ຖືກ­ຕ້ອງ​ຕາມ​ລະ­ບຽບ​ກົດ­ໝາຍ​ໃນ​ຂອບ​ເຂດ​ທົ່ວປະ­ເທດ ຈຳ­ນວນ 5.639 ຄັນ ກອງ​ປະ­ຊຸມ​ໄດ້​ຕົກລົງ​ມອບ​ໃຫ້​ກະ­ຊວງ​ການ​ເງິນ ສົມ­ທົບ​ກັບ​ພາກສ່ວນ​ກ່ຽວ­ຂ້ອງ ​ສືບ­ຕໍ່​ແກ້​ໄຂ​ລົດ​ນຳ​ເຂົ້າ​ບໍ່​ຖືກ­ຕ້ອງ ລົດ​ທີ່​ນຳ​ເຂົ້າ​ແບບ​ຜິດ​ກົດ­ໝາຍ ຖ້າກວດ​ເຫັນແມ່ນ​ໃຫ້​ຢຶດ ແລະ ປະ­ຕິ­ບັດ​ຕາມ​ລະ­ບຽບ​ກົດ­ໝາຍ ແລ້ວ​ນຳ​ສົ່ງ​ຄືນ​ປະ­ເທດ​ດັ່ງ­ກ່າວ ລົດ​ທີ່​ມີ​ການປອມ​ແປງເອ­ກະ­ສານ​ແມ່ນ​ໃຫ້​ຢຶດ​ເປັນ​ຂອງ​ລັດ ແລະ ດຳ­ເນີນ​ມາດ​ຕະ­ການ​ຕໍ່​ຜູ້​ກະ­ທຳ​ຜິດ​ຕາມ​ລະບຽບ​ກົດ­ໝາຍ​ຢ່າງ​ເຂັ້ມ​ງວດ ຖ້າບໍ­ລິ­ສັດ​ໃດ​ກະ­ທຳຜິດ​ກໍ່​ໃຫ້​ຖອນ​ໃບ​ທະ­ບຽນ​ວິ​ສາ​ຫະ​ກິດ ເຫັນ​ດີ​ໃຫ້ກະ­ຊວງ​ການ​ເງິນ​ແຕ່ງ­ຕັ້ງ 2 ໜ່ວຍ​ງານ ເພື່ອ​ດຳເນີນການ​ແກ້​ໄຂ​ລົດ​ນຳ​ເຂົ້າ​ບໍ່​ຖືກ­ຕ້ອງ ຄື: ໜ່ວຍງານ​ກວດ­ກາ ແລະ ເກັບ​ກູ້.

ການ​ແກ້​ໄຂ​ລົດ​ນຳ​ເຂົ້າ​ບໍ່​ຖືກ­ຕ້ອງ (ລົດ​ໜີ​ພາ­ສີ) ບໍ່​ໄດ້​ເສຍ​ພາ­ສີ​ແກ່​ລັດ ເຊິ່ງ​ຄວາມ​ຈິງ​ຄວນ​ຈະ​ໄດ້ພາ­ສີ​ດັ່ງ­ກ່າວ​ເພື່ອ​ເອົາເຂົ້າ​ຄັງ​ເງິນ ແຕ່​ຂາດ​ລາຍໄດ້ ລົດ​ບໍ່​ຖືກ​ກົດ­ໝາຍ​ເອົາ​ເຂົ້າ​ມາ​ຂາຍ​ກໍ່​ຕົກ​ຢູ່​ໃນລັກ­ສະ­ນະ​ທ່າ​ເອົາ​ປຽບ​ຄູ່​ແຂ່ງ ເຖິງ​ຈະ​ລ້ຳລວຍ​ມີເງິນ​ໄວ ແຕ່​ກໍ່­ສ້າງ​ບັນ­ຫາ​ໃຫຍ່​ໃຫ້​ແກ່​ສ່ວນ​ລວມ ຝ່າຍ​ລັດ­ຖະ­ບານ​ຈຶ່ງ​ບໍ່​ນິ້ງ​ນອນ​ໃຈ​ຮີບ​ດ່ວນ​ແກ້​ໄຂບັນ­ຫາ​ນີ້ ເພື່ອບໍ່​ໃຫ້​ເກີດ​ຊ່ອງ​ຫວ່າງ​ທາງ​ການ​ຄ້າທຸ­ລະ​ກິດ​ຄ້າ­ຂາຍ​ລົດ ເພາະ​ຖ້າ­ວ່າ​ປະ­ປ່ອຍ​ໃຫ້​ບັນຫາ​ແກ່­ຍາວ ຍິ່ງ​ຈະ​ເຮັດ​ໃຫ້​ກົນ​ໄກການ​ຕະ­ຫຼາດ​ມີບັນ­ຫາ​ຍາວ​ນານ ອີງ​ຕາມ​ຂ່າວ​ໜັງ­ສື­ພິມ​ເສດ​ຖະກິດ-ການ​ຄ້າ ໄດ້​ເວົ້າ​ເຖິງ​ບັນ­ຫາ​ລົດ​ນຳ​ເຂົ້າ​ບໍ່​ຖືກກົດ­ໝາຍ ເຊິ່ງ​ມີ​ຕົວ­ຢ່າງ​ຢູ່​ແຂວງ​ໄຊ​ຍະ​ບູ​ລີ ສາມາດ​ແກ້​ໄຂ​ລົດ​ນຳ​ເຂົ້າ​ບໍ່​ຖືກ​ເປົ້າ​ໝາຍທັງ​ໝົດ 870 ຄັນ ໄດ້​ແຈ້ງ​ເສຍ​ພາ­ສີ ແລະ ຂຶ້ນ​ທະ­ບຽນແລ້ວ 717 ຄັນ ແຂວງ​ສະ­ຫວັນ​ນະ​ເຂດ ກໍ່​ສາ­ມາດແກ້​ໄຂ​ບັນ­ຫາ​ນີ້​ໄດ້ 649 ຄັນ ຈາກ​ຕົວ​ເລກ​ບັນ­ຊີທັງໝົດ 1.296 ຄັນ ສາ­ມາດ​ເກັບ​ພາ­ສີ​ເຂົ້າ​ງົບ​ປະມານ​ໄດ້ 24.143 ຕື້​ກີບ ແລະ ສຳ­ລັບ​ກຳ­ລັງ ປກສ ນະ­ຄອນ­ຫຼວງ​ວຽງ​ຈັນ ໃນ 6 ເດືອນ​ຕົ້ນ​ປີ 2017 ມີ​ກຳ­ມະ­ການ​ປະ​ເມີນ​ໄວ້​ທັງ​ໝົດ​ມີ 382 ຄັນ ຊຳລະ​ຄ່າ​ພາ­ສີ​ອາ­ກອນ ຈຳ­ນວນ 4,8 ຕື້​ກີບ ຄິດເປັນ​ເງິນ​ປັບ​ໃໝ​ໄດ້ຈຳ­ນວນ 223 ລ້ານ​ກວ່າ​ກີບ.

ເຫັນ​ວ່າ​ຖ້າ​ແຕ່​ລະ​ແຂວງ ກໍ່​ຄືອົງ​ການ­ຈັດ­ຕັ້ງຕ່າງໆ​ທີ່​ມີ​ບັນ­ຫາ​ເລື່ອງ​ລົດ​ນຳ​ເຂົ້າ​ບໍ່​ຖືກ­ຕ້ອງ (ບໍ່ໄດ້​ເສຍ​ພາ­ສີ​ແກ່​ລັດ) ລັດ­ຖະ­ບານ​ຈະ​ຂາດ​ລາຍ​ໄດ້ໄປ​ຫຼາຍ​ໜ້ອຍ​ພຽງ​ໃດ ເຊິ່ງ​ເຮົາ​ສາ­ມາດ​ເຫັນ​ວ່າ ພຽງ​ແຕ່​ຕົວ​ເລກ​ທີ່​ແກ້​ໄຂ​ໄດ້​ຈາກໄຊ​ຍະ​ບູ​ລີ ສະຫວັນ​ນະ​ເຂດ ປກສ ນະ­ຄອນ­ຫຼວງ ເປັນ​ເງິນ​ເສຍພາ­ສີ​ກໍ່​ມີ​ມູນ​ຄ່າ​ມະ­ຫາ­ສານ.

ສະ­ນັ້ນ ຫາກ​ແກ້​ໄຂ​ໄດ້​ໝົດ​ໃນ​ທົ່ວ​ປະ­ເທດ 5 ພັນ​ກວ່າ​ຄັນ ຄິດ​ວ່າ​ຄົງ​ມີ​ລາຍ​ຮັບ​ເຂົ້າ​ສູ່​ງົບ​ປະມານ​ຫຼາຍ​ຂຶ້ນ.

ຂໍ​ຊົມ­ເຊີຍ​ການ​ແກ້​ໄຂ​ບັນ­ຫາ​ນີ້​ຢ່າງ​ສຸດ​ໃຈ!

ຂ່າວທີ່ກ່ຽວຂ້ອງ