ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ຫວຽດ­ນາມ ສປ ຈີນ

277 28 ກ.ຍ. 2017 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້​ມີ​ຂ່າວ​ທີ່​ໜ້າ​ສົນ­ໃຈ 2 ເລື່ອງ ຄື: ບັນ­ຫາ​ການ​ລັກ­ລອບ​ຕັດ​ໄມ້​ຢູ່​ເຂດ​ປ່າ​ສະ­ຫງວນຂອງ​ຫວຽດ­ນາມ ແລະ ແຜນ​ຜະ­ລິດ​ລົດ­ຍົນ​ທີ່​ໃຊ້​ພະລັງ​ງານ​ສະ­ອາດ​ຢູ່ ສປ ຈີນ.

    ທີ່ ຫວຽດ­ນາມ: ຂ່າວ​ໜັງ­ສື­ພິມ​ ວຽງ​ຈັນ​ ທາມ ສະບັບ​ວັນ​ທີ 23 ເດືອນ​ກັນ­ຍາ​ນີ້​ໃຫ້​ຮູ້​ວ່າ: ອຳ­ນາດ​ການປົກ­ຄອງ​ແຂວງກວາງ​ນາມ ຢູ່​ພາກ​ກາງ​ຫວຽດ­ນາມ ພວມ​ຮີບ​ຮ້ອນ​ຕິດ­ຕາມ​ກວດ­ກາ​ການ​ລັກ­ລອບ​ຕັດ​ໄມ້ ໃນ​ເນື້ອ­ທີ່ 110 ເຮັກ­ຕາ ຢູ່​ເຂດ​ປ່າ​ສະ­ຫງວນ​ຂອງແຂວງ ທ່ານ ຫງວ​ຽນ ຮົງ​ກວາງ ຫົວ­ໜ້າ​ຫ້ອງ­ການກອງ​ເລ­ຂາ​ຂອງ​ແຂວງ ໄດ້​ເປີດ­ເຜີຍເລື່ອງ​ນີ້​ຕໍ່ນັກຂ່າວ ແລະ ວ່າທາງ​ແຂວງ​ໄດ້​ສ້າງ­ຕັ້ງ​ຄະ­ນະ​ຕິດຕາມ​ກວດ­ກາ​ບັນ­ຫາ​ນີ້​ເປັນ​ທີ່​ຮຽບ​ຮ້ອຍ​ແລ້ວ ເພື່ອ​ສົ່ງ​ບົດ​ລາຍ​ງານກ່ຽວ​ກັບ​ສະ­ພາບ​ຄວາມ​ເປັນ​ຈິງໃຫ້​ທ່ານ​ນາ­ຍົກ­ລັດ­ຖະ­ມົນ­ຕີ ເຫດ­ການ​ດັ່ງ­ກ່າວແດງ​ຂຶ້ນ​ໃນ​ກາງ​ເດືອນ​ນີ້ ເມື່ອ​ເຂດ​ປ່າສະ­ຫງວນຖືກ​ບຸ­ກລຸກ ເພື່ອ​ສັບ​ສ່າວ​ເປັນ​ເນື້ອ­ທີ່​ປູກ​ຕົ້ນ​ອາ​ກາເຊຍ (ຕົ້ນ​ຢາງ​ພັນ​ອາ​ຣັບ) ທີ່​ມີ​ມູນ​ຄ່າ​ສູງ ສະ­ພາບການ​ລັກ­ລອບ​ຕັດ​ໄມ້​ຢ່າງ​ຜິດ​ກົດ­ໝາຍ​ເພື່ອ​ຂະຫຍາຍ​ເນື້ອ­ທີ່​ປູກ​ພືດ​ພັນ​ຊະ­ນິດ​ອື່ນ​ນັ້ນ ​ໄດ້​ກາຍເປັນ​ປາ­ກົດ­ການ​ແຜ່​ລະ­ບາດ​ຢູ່​ໃນຫຼາຍ​ປະ­ເທດ ຢູ່ອິນ​ໂດ​ເນ​ເຊຍ ພວກ​ນາຍ­ທຶນ​ອຸດ­ສາ­ຫະ­ກຳ​ຜະ­ລິດເຈ້ຍ ແລະ ນ້ຳ­ມັນ​ປາມ ໄດ້​ວ່າ​ຈ້າງ​ຄົນ​ທ້ອງ­ຖິ່ນ​ທຳລາຍ ແລະ ຈູດ​ປ່າ​ເຂດ​ຮ້ອນ ເພື່ອ​ເອົາ​ເນື້ອ­ທີ່​ປູກໄມ້​ອຸດ­ສາ­ຫະ­ກຳ​ທີ່​ເປັນ​ເປົ້າ​ໝາຍ ເຊິ່ງ​ນອກ­ຈາກເປັນ​ການ​ທຳ­ລາຍປ່າ­ໄມ້​ຢ່າງ​ໜັກ­ໜ່ວງ​ແລ້ວ ຍັງໄດ້​ສ້າງ​ມົນ​ລະ​ພິດ​ທາງ​ອາ­ກາດ​ຢ່າງ​ໜັກ­ໜ່ວງ​ອີກ​ດ້ວຍ.

    ທີ່ ສປ ຈີນ: ອຸດ­ສາ­ຫະ­ກຳ​ຜະ­ລິດ​ພາ­ຫະ­ນະ​ປະເພດ​ລົດ­ຍົນ​ຈີນ ໄດ້​ກຳ­ນົດ​ວິ­ໄສ​ທັດ​ທີ່​ກ້າວ​ໄກ ທັນສະ­ໄໝ ເພື່ອ​ຫຼຸດ­ຜ່ອນ​ມົນ​ລະ​ພິດ​ທາງ​ອາ­ກາດ​ ດ້ວຍວິ­ທີ​ການ​ປ່ຽນ​ແທນ​ລົດ​ທີ່​ແລ່ນ​ດ້ວຍ​ນ້ຳ­ມັນ​ແອັດຊັງ ແລະ ກາ​ຊ້ວນ ເປັນ​ລົດ​ແລ່ນດ້ວຍ​ພະ­ລັງ­ງານ​ໄຟຟ້າ ເພື່ອ​ບັນ­ລຸ​ເປົ້າ​ໝາຍ​ດັ່ງ­ກ່າວ​ດ້ວຍ​ບາດ­ກ້າວອັນ​ໜັກ​ແໜ້ນ ທາງ​ການ​ຈີນ​ໄດ້​ສະ­ເໜີ​ໃຫ້​ບໍ­ລິ­ສັດຜະ­ລິດ​ລົດ​ທັງ​ໝົດ​ຜະ­ລິດ​ລົດ­ໄຟ​ຟ້າ ແລະ ໄຮ​ບຼິດ​ ໃຫ້ໄດ້​ຢ່າງ​ໜ້ອຍ 8% ຂອງ​ຈຳ­ນວນ​ລົດ​ທີ່​ຜະ­ລິດ​ທັງໝົດ ໃນ​ປີ 2018 ແລະ ໃຫ້​ເພີ່ມ​ຂຶ້ນ​ເປັນ 12% ພາຍ​ໃນ​ປີ 2020 ຜົນ​ການ​ສຳ​ຫຼວດ​ໃນ​ປີ 2016 ຊີ້ບອກ​ວ່າ ສປ ຈີນ ມີ​ລົດ­ຍົນ (ລົດ​ໃຫຍ່) ທັງ​ໝົດ 28 ລ້ານ​ຄັນ ຫຼື ເກືອບ 1/3 ຂອງ​ຈຳ­ນວນ​ລົດ​ໃນ​ທົ່ວ​ໂລກ.

    ທາງ​ການ​ຝຣັ່ງ ແລະ ອັງ­ກິດ ໄດ້​ວາງ​ແຜນ​ຍົກເລີກ​ການ​ຜະ­ລິດ​ລົດ​ທີ່​ໃຊ້​ນ້ຳ­ມັນ​ແອັດ​ຊັງ ແລະ ກາ​ຊ້ວນ​ຢ່າງ​ຊິ້ນ​ເຊີງ ພາຍ​ໃນ​ປີ 2040 ສຳ­ລັບ​ລົດຍີ່­ຫໍ້​ວອນ​ໂວ້​ ທີ່​ຜະ­ລິດ​ໃນ ສປ ຈີນ ນັ້ນ ໄດ້​ປະ­ກາດ​ໃນເດືອນ​ກໍ­ລະ­ກົດ​ປີ​ນີ້​ວ່າ ລົດ​ໃໝ່​ທັງ​ໝົດ​ທີ່​ຈະ​ຜະ­ລິດໃນ​ປີ 2019 ເປັນ­ຕົ້ນ​ໄປ ຈະ​ໃຊ້​ພະ­ລັງ­ງານ​ໄຟ­ຟ້າ ພາຍ​ໃນ​ປີ 2025 ຄາດ​ວ່າ​ຍອດ​ຈຳ­ໜ່າຍ​ລົດ­ໄຟ​ຟ້າ ແລະ ໄຮ​ບຼິດ ຈະ​ກວມ​ເອົາ 1/5 ຂອງ​ຈຳ­ນວນ​ລົດ ທີ່​ຈຳ­ໜ່າຍ​ທັງ​ໝົດ ສປ ຈີນ ຊົມ­ໃຊ້​ນຳ​ມັນ​ເປືອງເປັນ​ອັນ​ດັບ​ທີ​ສອງ​ຂອງ​ໂລກ ​ຮອງ​ຈາກ ສ ອາ​ເມ​ຣິກາ ການ​ນຳ​ໃຊ້​ລົດ​ພະ­ລັງ­ງານ​ສະ­ອາດ (ໄຟ­ຟ້າ ແລະ ໄຮ​ບຼິດ) ບໍ່​ພຽງ​ແຕ່​ຈະ​ຊ່ວຍ​ຫຼຸດ­ຜ່ອນ​ມົນ​ລະ​ພິດທາງ​ອາ­ກາດ​ທີ່ ສປ ຈີນ ພວມ​ປະ​ເຊີນ​ຢ່າງ​ໜັກ­ໜ່ວງ ແຕ່​ຍັງ​ຈະ​ເຮັດ​ໃຫ້­ການ​ຊົມ­ໃຊ້​ນ້ຳ­ມັນ​ຫຼູດ​ລົງ​ຢ່າງແນ່­ນອນ.

ຂ່າວທີ່ກ່ຽວຂ້ອງ