AFF ປັບ​ຮູບ​ແບບ​ແຂ່ງ­ຂັນ​ຊູ​ຊຸ​ກິ​ຄັບ

273 28 ກ.ຍ. 2017 ວົງຈອນກີລາ
AFF ປັບ​ຮູບ​ແບບ​ແຂ່ງ­ຂັນ​ຊູ​ຊຸ​ກິ​ຄັບ

    ສະ­ຫະ­ພັນ​ເຕະ­ບານ​ອາ​ຊຽນ ຫຼື AFC  ໄດ້​ແຈ້ງ​ປ່ຽນ​ຮູບ​ແບບ​ການ​ແຂ່ງ­ຂັນ​ເຕະ­ບານ​ຊິງ​ແຊັມ​ອາ​ຊຽນ AFF SUZUKI CUP 2018 ໃນ​ກອງ​ປະ­ຊຸມ​ສະ­ພາ​ກຳ­ມະ­ການ ຄັ້ງ​ທີ 12 ທີ່​ຈັດ​ຂຶ້ນ​ທີ່​ປະ­ເທດ​ອິນ​ໂດ​ເນ​ເຊຍ.

    ຮູບ​ແບບ​ການ​ແຂ່ງ­ຂັນ​ເຕະ­ບານ​ຊິງ​ແຊັມ​ອາ​ຊຽນ ກ່ອນ​ໜ້າ​ນີ້​ຄື​ການ​ແຂ່ງ​ໃນ​ຮອບ​ແບ່ງ​ກຸ່ມ ແບບ 2 ກຸ່ມ ໂດຍ​ມີ​ເຈົ້າ­ພາບ​ຮ່ວມ 2 ຊາດ ໂດຍ​ມີ 8 ທີມ​ທີ່​ໄດ້​ຫຼິ້ນ​ໃນ​ຮອບ​ສຸດ​ທ້າຍ ແລະ ຈະ​ຫາ​ທີມ​ແຊັມ​ກຸ່ມ ແລະ ຮອງ​ແຊັມ​ກຸ່ມ ແຂ່ງ­ຂັນ​ກັນ​ແບບ​ຮັບ​ການ​ມາ​ຢາມ-ໄປ​ຢາມ ທັງ​ໃນ​ຮອບ​ຮອງ​ຊະ­ນະ​ເລີດ ແລະ ຮອບ​ຊິງ​ຊະ­ນະ​ເລີດ.

    ສຳ­ລັບ​ຮູບ​ແບບ​ໃໝ່​ນັ້ນ ຈະ​ມີ​ທີມ​ທີ່​ເຂົ້າ​ໄປ​ຫຼິ້ນ​ໃນ​ຮອບ​ດັ່ງ­ກ່າວ 10 ຊາດ ໂດຍ​ແບ່ງ​ອອກ​ເປັນ 2 ກຸ່ມ​ເຊັ່ນ​ເດີມ ແຕ່​ຈະ​ມີ​ກຸ່ມ​ລະ 5 ທີມ ດຳ­ເນີນ​ການ​ແຂ່ງ­ຂັນ​ແບບ​ພົບ​ກັນ​ໝົດ 4 ນັດ ໂດຍ​ແຕ່​ລະ​ທີມ​ຈະ​ໄດ້​ຫຼິ້ນ​ໃນ​ຖິ່ນ 2 ນັດ ແລະ ຕ້ອງ​ຫຼິ້ນ​ເກມ​ໄປ​ຢາມ 2 ນັດ ໃນ​ຂະ­ນະ​ທີ່​ຮອບ​ຮອງ​ຊະ­ນະ​ເລີດ ແລະ ຮອບ​ຊິງ​ຊະ­ນະ​ເລີດ ຍັງ​ຄົງ​ແຂ່ງ­ຂັນ2 ນັດ​ຮັບ​ການ​ມາ​ຢາມŒໄປ​ຢາມ ເໝືອນ​ເດີມ.

    ປັດ­ຈຸ­ບັນ ຊາດ​ທີ່​ເປັນ​ສະ­ມາ­ຊິກ​ຂອງ​ສະ­ຫະ­ພັນ​ເຕະ­ບານ​ອາ​ຊຽນ ປະ­ກອບ​ໄປ​ດ້ວຍ 12 ຊາດ​ຄື  ໄທ, ອິນ​ໂດ​ເນ​ເຊຍ, ມາ​ເລ​ເຊຍ, ຫວຽດ­ນາມ,ສິງ­ກະ­ໂປ, ຟິ​ລິບ​ປິນ, ມຽນ​ມາ, ສປປ ລາວ, ກຳ­ປູ­ເຈຍ, ບຣູ​ໄນ, ຕິ​ມໍ ເລ​ສ​ເຕ ແລະ ອົດ​ສະ​ຕຣາ​ລີ.

    ເຮັດ​ໃຫ້​ຕ້ອງ​ມີ​ການ​ແຂ່ງ­ຂັນ​ຮອບ​ຄັດ​ເລືອກ ເຊິ່ງ​ຕາມ​ການ​ຈັດ​ອັນ​ດັບ​ຂອງ​ການ​ແຂ່ງ­ຂັນ​ເມື່ອ​ປີ 2016 ທີ່​ຜ່ານ​ມາ ຕິ​ມໍ ເລ​ສ​ເຕ ແລະ ບຣູ​ໄນ ຄື​ສອງ​ທີມ​ອັນ​ດັບ​ສຸດ​ທ້າຍ ຈະ​ຕ້ອງ​ແຂ່ງ­ຂັນ​ກັນ​ໃນ​ແບບ​ຮັບ​ການ​ມາ​ຢາມ-ໄປ​ຢາມ ໃນ​ໄລ­ຍະ​ລະ­ຫວ່າງ​ວັນ​ທີ 3-11 ກັນ­ຍາ 2018 ເພື່ອ​ຫາ​ຜູ້​ຊະ­ນະ​ເຂົ້າ​ມາ​ຫຼິ້ນ​ໃນ​ການ​ແຂ່ງ­ຂັນ​ເຕະ­ບານ​ຊິງ​ແຊັມ​ອາ​ຊຽນ​ຮອບ​ສຸດ​ທ້າຍ ຮ່ວມ​ກັບ​ອີກ 9 ທີມ.

    ທັງ​ນີ້ ເນື່ອງ​ຈາກ ອົດ​ສະ​ຕຣາ​ລີ ທີ່​ເປັນ​ໜຶ່ງ​ໃນ​ສະ­ມາ­ຊິກ​ຂອງ​ສະ­ຫະ­ພັນ​ເຕະ­ບານ​ອາ​ຊຽນ ໄດ້​ຕອບ​ປະ­ຕິ­ເສດ​ທີ່​ຈະ​ສົ່ງ​ທີມ​ເຂົ້າ​ຮ່ວມ​ການ​ແຂ່ງ­ຂັນ​ເຕະ­ບານ​ຊິງ​ແຊັມ​ອາ​ຊຽນ.

    ສ່ວນ​ການ​ແຂ່ງ­ຂັນ​ເຕະ­ບານ​ຊິງ​ແຊັມ​ອາ​ຊຽນ 2018 ຫຼື AFF SUZUKI CUP 2018 ຈະ​ແຂ່ງ­ຂັນ​ກັນ​ໃນ​ໄລ­ຍະ​ລະ­ຫວ່າງ​ວັນ​ທີ 8 ພະ­ຈິກ-15 ທັນ­ວາ​ປີ 2018.

ຂ່າວທີ່ກ່ຽວຂ້ອງ