ຂ່າວຫຼ້າສຸດ

ກີ­ລາ​ຄົນ​ພິ­ການ ສ້າງ​ຜົນ­ງານ​ບັນ­ລຸ​ເປົ້າ​ໝາຍ ອາ​ຊຽນ ພາ​ຣາ ເກມ

134 29 ກ.ຍ. 2017 ວົງຈອນກີລາ
ກີ­ລາ​ຄົນ​ພິ­ການ ສ້າງ​ຜົນ­ງານ​ບັນ­ລຸ​ເປົ້າ​ໝາຍ ອາ​ຊຽນ ພາ​ຣາ ເກມ

    ພາຍ­ຫຼັງ​ນັກ​ກິ­ລາ​ຄົນ​ພິ­ການ​ທີມ​ຊາດ​ລາວ ຈຳ­ນວນ 100 ຊີ­ວິດ ໄດ້​ເດີນ­ທາງ​ກັບ​ມາ​ເຖິງ​ບ້ານ​ເກີດ ວັນ​ທີ 24 ກັນ­ຍາ 2017 ທີ່​ສະ­ໜາມ​ບິນ​ສາ­ກົນ​ວັດ​ໄຕ ນະ­ຄອນ­ຫຼວງ​ວຽງ​ຈັນ ໄດ້​ຮັບ​ການ​ຕ້ອນ­ຮັບ​ຢ່າງ​ອົບ​ອຸ່ນ​ຂອງທ່ານ ສີ­ທາດ ຈັນ­ທະ​ບູ​ລີ ຫົວ­ໜ້າ​ກົມ​ກີ­ລາ​ມວນ​ຊົນ ກະ­ຊວງ​ສຶກ​ສາ​ທິ​ການ ແລະ ກີ­ລາ ພ້ອມ​ດ້ວຍ​ຄະ­ນະ ແລະ ບັນ­ດາ​ພະ­ນັກ­ງານ​ວິ­ຊາ​ການ​ທີ່​ກ່ຽວ­ຂ້ອງ ຕະ­ຫຼອດ​ຮອດ​ພໍ່ແມ່​ປະ­ຊາ­ຊົນ​ຊາວ​ລາວ ກໍ່​ຄືຊາວ​ນະ­ຄອນ­ຫຼວງ​ວຽງ​ຈັນ ສະ­ແດງ​ຄວາມ​ຍິນ​ດີ​ຢ່າງ​ຫຼວງ­ຫຼາຍ.

    ໂອ­ກາດ​ນີ້ ທ່ານ ລັດ​ຖະ​ໄຊ ອິນ​ທະ​ວົງ ຫົວ­ໜ້າ​ພະ​ແນກ​ບໍ­ລິ­ຫານກົມ​ກີ­ລາ​ມວນ​ຊົນ ໃຫ້​ສຳ­ພາດ​ຕໍ່​ສື່​ມວນ​ຊົນ​ວ່າ: ການ​ແຂ່ງ­ຂັນ​ງານ​ກີ­ລາ ອາ​ຊຽນ​ ພາ­ລາ ເກມ ຄັ້ງ​ທີ 9 ທີ່​ປະ­ເທດ​ມາ​ເລ​ເຊຍ ເປັນ​ເຈົ້າ­ພາບ ມີ​ນັກ­ກີ­ລາ​ຈາກ 11 ປະ­ເທດ ໃນ​ຂົງ­ເຂດ​ອາ​ຊຽນ ເຂົ້າ​ຮ່ວມ​ແຂ່ງ­ຂັນ 16 ປະ­ເພດ ຈາກ​ການ​ຊີງ​ຫຼຽນ 294 ຫຼຽນ​ຄຳ ຈາກ 883 ລາຍ­ການ ສະ­ເພາະ​ນັກ­ກີ­ລາ​ຄົນ​ພິ­ການ​ລາວ ໄດ້​ສົ່ງ​ຄະ­ນະ​ນຳ ຄູ​ເຝິກ ແລະ ນັກ­ກີ­ລາ​ຄົນ​ພິ­ການ​ທີມ​ຊາດ​ລາວ ຈຳ­ນວນ 100 ຄົນ ຍິງ 27 ຄົນ ສະ­ເພາະຄູ​ເຝິກ ແລະ ນັກ​ກິ­ລາ 84 ຄົນ ຍິງ 20 ຄົນ ຈາກ 6 ປະ­ເພດ ປະ­ກອບ​ມີ ກິ­ລາ​ເຕະ­ບານ ຄົນ​ພິ­ການ​ຕາ ແລ່ນ-ລານ ຄົນ​ພິ­ການ ລອຍ­ນ້ຳ ຄົນ​ພິ­ການ ຍົກ​ນ້ຳ­ໜັກ ຄົນ​ພິ­ການ ໂກນ​ບານ ຄົນ​ພິ­ການ ແລະ ບານ­ບ້ວງ​ລໍ້​ເລື່ອນ​ຄົນ​ພິ­ການ.

    ຜ່ານ​ການ​ແຂ່ງ­ຂັນ​ໃນ​ໄລ­ຍະ 7 ວັນ ສາ­ມາດ​ຍາດ​ໄດ້ 4 ຫຼຽນ​ເງິນ ແລະ 4 ຫຼຽນ​ທອງ ພ້ອມ​ທັງ​ຖືກ​ຈັດ​ຢູ່​ອັນ​ດັບ​ທີ 11 ໃນ​ຕາ­ຕະ­ລາງ  ແນວ­ໃດ​ກໍ່​ຕາມ ສຳ­ລັບ​ທິດ​ທາງ​ແຜນ­ການ​ໃນ­ຕໍ່­ໜ້າ ໂດຍ​ສະ­ເພາະ​ໃນ​ປີ 2018 ຍັງ​ຈະ​ໄດ້​ເປັນ​ເຈົ້າ​ການຈັດ­ການ​ແຂ່ງ­ຂັນງານ​ມະ­ຫະ​ກຳ​ກີ­ລາ​ຄົນ​ພິ­ການ ທົ່ວ​ປະ­ເທດ ຄັ້ງ​ທີ 3 ທີ່​ແຂວງ​ຊຽງ​ຂວາງ ເປັນ​ເຈົ້າ­ພາບ ນອກ­ຈາກ​ນັ້ນ ກໍ່​ຍັງ​ມີ​ບາງ​ປະ­ເພດ​ກີ­ລາ​ສືບ­ຕໍ່​ເຄື່ອນ​ໄຫວ​ເຂົ້າ​ຮ່ວມ​ແຂ່ງ­ຂັນ​ທັງ​ພາຍ​ໃນ ແລະ ຕ່າງ­ປະ­ເທດ ເພື່ອ​ກຽນ​ຮ່ວມງານ​ມະ­ຫະ​ກຳ​ກີ­ລາ​ເອ​ຊຽນ ພາ​ຣາ​ເກມ ທີ່​ປະ­ເທດ​ອິນ​ໂດ​ເນ​ເຊຍ ເປັນ​ເຈົ້າ­ພາບ ໃນ​ປີ 2018.

ຂ່າວທີ່ກ່ຽວຂ້ອງ