ລາ­ງວັນ​ໂນ​ແບລ 2017 ເພີ່ມ​ມູນ​ຄ່າ​ລາ­ງວັນ​ຕື່ມ 120.000 ໂດ​ລາ

447 29 ກ.ຍ. 2017 ຂ່າວຕ່າງປະເທດ
ລາ­ງວັນ​ໂນ​ແບລ 2017 ເພີ່ມ​ມູນ​ຄ່າ​ລາ­ງວັນ​ຕື່ມ 120.000 ໂດ​ລາ

ແຈ້ງ​ການ​ສະ­ບັບ​ໜຶ່ງ​ທີ່​ມີ​ອອກ​ມາ​ເມື່ອ​ວັນ​ທີ 25 ກັນ­ຍາ​ທີ່​ຜ່ານ​ມາ ໃຫ້​ຮູ້​ວ່າ ກອງ​ທຶນ​ໂນ​ແບລ (Nobel) ໄດ້​ຕົກ­ລົງ​ເພີ່ມ​ເງິນ​ລາ­ງວັນ​ໃຫ້​ແກ່​ລາຍ­ການ​ຕ່າງໆ​ຂຶ້ນ​ຕື່ມ 1 ລ້ານ​ໂຄຣ​ນາ (ເທົ່າ​ກັບ​ປະ­ມານ 120.000 ໂດ​ລາ​ສະ­ຫະ­ລັດ) ທຽບ­ໃສ່​ລາ­ງວັນ​ທີ່​ໄດ້​ມີ​ອອກ​ມາ​ໃນ​ລະ­ດູ​ການ​ທີ່​ຜ່ານ​ມາ.

ດັ່ງ­ນັ້ນ ຜູ້​ເປັນ​ເຈົ້າ​ຂອງ​ລາ­ງວັນ​ໂນ​ແບລ 2017 ຈະ​ໄດ້​ຮັບ​ໃບ­ຢັ້ງ­ຢືນ​ຫຼຽນ​ຄຳ ລວມ​ເຖິງ​ລາ­ງວັນ​ເງິນ­ສົດ​ມູນ​ຄ່າ 9 ລ້ານ​ໂຄຣ​ນາ (ເທົ່າ​ກັບ​ປະ­ມານ 1,1 ລ້ານ​ໂດ​ລາ​ສະ­ຫະ­ລັດ) ນີ້​ເປັນ​ການ​ດັດ­ແກ້​ມູນ​ຄ່າ​ເງິນ​ລາ­ງວັນ​ເປັນ​ເທື່ອ​ທຳ​ອິດ​ຂອງ​ກອງ​ທຶນ​ໂນ​ແບລ ນັບ​ແຕ່​ປີ 2012 ເປັນ­ຕົ້ນ​ມາ.

ເມື່ອ​ກ່ອນ​ໜ້າ​ນີ້ 5 ປີ ກອງ​ທຶນ​ໂນ​ແບລ ໄດ້​ຕົກ­ລົງ​ຫຼຸດ​ມູນ​ຄ່າ​ເງິນ​ລາ­ງວັນ​ລົງ 20% ສຳ­ລັບ​ແຕ່​ລະ​ລາຍ­ການ ຈາກ​ລະ­ດັບ 10 ລ້ານ​ໂຄຣ​ນາ (ວາງ​ໄວ້​ມາ​ແຕ່​ປີ 2001) ລົງ​ມາ​ຍັງ​ເຫຼືອ 8 ລ້ານ​ໂຄຣ​ນາ ທ່າມ­ກາງ​ທີ່​ຕ້ອງ​ໄດ້​ສ້າງ​ຄວາມ​ສົມ​ດຸນ​ງົບ­ປະ­ມານ​ໃນ​ໄລ­ຍະ​ຍາວ ກອງ​ທຶນ​ໂນ​ແບລ ໃຫ້​ຮູ້​ວ່າ ການ​ຕົກ­ລົງ​ເພີ່ມ​ມູນ​ຄ່າ​ລາ­ງວັນ​ດັ່ງ­ກ່າວ​ມີ​ອອກ​ມາ ຫຼັງ​ຈາກ​ທີ່​ສະ­ພາບ​ການ​ດ້ານ​ການ​ເງິນ​ໃນ​ປັດ­ຈຸ­ບັນ​ໄດ້​ຮັບ​ການ​ແກ້​ໄຂ ແລະ ມີ​ສ່ວນ​ໝັ້ນ­ຄົງ​ກວ່າ​ເກົ່າ.

ຕາມ​ທີ່​ເຄີຍ​ປະ­ຕິ­ບັດ​ມາ ລາ­ງວັນ​ໂນ​ແບລ 2017 ຈະ​ໄດ້​ເລີ່ມ​ຕົ້ນ​ດ້ວຍ​ການ​ປະ­ກາດ​ລາ­ງວັນ​ໂນ​ແບລ​ສາ­ຂາ​ການ​ແພດ​ວິ­ທະ­ຍາ ໃນ​ວັນ​ທີ 2 ຕຸ­ລາ​ໜ້າ​ນີ້ ຖັດ​ມາ​ຕາມ​ລຳ­ດັບ​ກໍ​ແມ່ນ​ລາ­ງວັນ​ໂນ​ແບລ​ສາ­ຂາ​ຟີ​ຊິກ ເຄ​ມີ​ສາດ ແລະ ເສດ­ຖະ­ກິດ ສ່ວນ​ລາ­ງວັນ​ໂນ​ແບລ​ສາ­ຂາ​ສັນ­ຕິ­ພາບ ຈະ​ໄດ້​ປະ­ກາດ​ໃນ​ວັນ​ທີ 6 ຕຸ­ລາ ໃນ​ຂະ­ນະ​ທີ່​ຍັງ​ບໍ່​ທັນ​ໄດ້​ກຳ­ນົດ​ວັນ​ປະ­ກາດ​ລາ­ງວັນ​ໂນ​ແບລ​ສາ­ຂາ​ວັນ­ນະ­ຄະ­ດີ.

ພິ­ທີ​ມອບ​ລາ­ງວັນ​ໂນ​ແບລ 2017 ຈະ​ໄດ້​ຈັດ​ຂຶ້ນ​ທີ່​ໂຮງ​ລະ­ຄອນ​ໃຫຍ່ ໃນ​ນະ­ຄອນ­ຫຼວງ​ສະ​ຕົກ​ໂຮມ (ປະ­ເທດ​ຊູ​ແອດ) ໃນ​ວັນ​ທີ 10 ທັນ­ວາ ເພື່ອ​ເປັນ​ການ​ລ້ຳ​ລຶກ​ເຖິງ​ວັນ​ຈາກ​ໄປ​ຂອງ ອາ​ລ​ເຟຣດ ໂນ​ແບລ (Alfred Nobel) ນັກ­ວິ­ທະ­ຍາ­ສາດ​ຂອງ​ຊູ​ແອດ ທີ່​ໄດ້​ສ້າງ­ຕັ້ງ​ລາ­ງວັນ​ນີ້​ຂຶ້ນ​ມາ.

ຂ່າວທີ່ກ່ຽວຂ້ອງ