ເຮືອ JDB ເຝິກ­ຊ້ອມ​ສີ­ພາຍ​ມາ​ເປັນ​ຢ່າງ​ດີ​ເພື່ອ​ຮັກ­ສາ​ແຊັມ

441 04 ຕ.ລ. 2017 ວົງຈອນກີລາ
ເຮືອ JDB ເຝິກ­ຊ້ອມ​ສີ­ພາຍ​ມາ​ເປັນ​ຢ່າງ​ດີ​ເພື່ອ​ຮັກ­ສາ​ແຊັມ

    ທະ­ນາ­ຄານ​ຮ່ວມ​ພັດ­ທະ­ນາ (JDB) ເປັນ​ຫົວ­ໜ່ວຍ​ທຸ­ລະ​ກິດ​ໜຶ່ງ​ທີ່​ເຫັນ​ໄດ້​ຄວາມ​ສຳ­ຄັນ​ໃນ​ການ​ອະ­ນຸລັກ​ຮັກ­ສາ​ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ ໂດຍ​ສະ­ເພາະ​ແມ່ນ​ບຸນ​ປະ­ເພ­ນີ​ຊ່ວງ​ເຮືອ​ທີ່ JDB ໄດ້​ໃຫ້ ການ​ປະ­ກອບ­ສ່ວນ​ທີ່​ມີ​ເຮືອ​ເປັນ​ຂອງ​ຕົນ​ເອງ ເພື່ອ​ລົງ​ແຂ່ງ­ຂັນ​ໃນ​ເຊີງ​ກີ­ລາ​ກັບ​ເຮືອ​ຊ່ວງ​ພາກ­ສ່ວນ​ອື່ນໆ ແລະ ໃນ​ບຸນ­ຊ່ວງ­ເຮືອ​ປະ­ເພ­ນີ​ແຕ່​ລະ​ທ້ອງ­ຖິ່ນ​ຈັດ​ຂຶ້ນ​ໃນ​ເດືອນ​ຜ່ານ​ມາ​ນັ້ນ JDB ໄດ້​ສົ່ງ​ເຮືອ​ຂອງ​ຕົນ​ເຂົ້າ ຮ່ວມ​ແຂ່ງ­ຂັນ​ກັບ​ສີ​ພາຍ­ເຮືອ​ຊ່ວງ​ພາກ­ສ່ວນ​ອື່ນໆ ແລະ ໄດ້​ຮັບ​ຜົນ­ສຳ­ເລັດ​ຄອງ​ຊະ­ນະ​ເລີດ​ມາ​ຫຼາຍ​ງານ ບຸນ​ເປັນ­ຕົ້ນ​ບຸນ­ຊ່ວງ­ເຮືອ​ຫາດ​ສ້ຽວ ແລະ ບຸນ­ຊ່ວງ­ເຮືອ​ຫຼິ່ງ​ຊັນ ອັນ​ໄດ້​ສ້າງ​ຊື່​ສຽງ​ໃຫ້​ແກ່​ເຮືອ​ຈີ​ດີ​ບີ.

    ທ່ານ ບົວ​ວອນ ຈັນ­ທະ​ນີ​ເລີດ ຫົວ­ໜ້າ​ຫ້ອງ­ການ ແລະ ຈັດ​ຕັ້ງ​ພະ­ນັກ­ງານ JDB ໄດ້​ກ່າວ​ວ່າ: ເພື່ອກະ­ກຽມ​ໃສ່​ບຸນ​ອອກ​ພັນ​ສາ​ປະ​ວໍ­ລະ­ນາ ແລະ ຊ່ວງ​ເຮືອ​ປະ­ຈຳ​ປີ 2017 ທີ່​ທ່າ​ວັດ​ຈັນ ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ ທີ່​ຈະ​ຈັດ​ຂຶ້ນ​ວັນ​ທີ 5-6 ຕຸ­ລາ 2017 ນີ້ ທັງ​ເປັນ​ການ​ຮັກ­ສາ​ແຊັມ​ເກົ່າ ທີ່​ໄດ້​ໃນ​ປີ 2016 ພວກ​ເຮົາ​ໄດ້​ທຸມ​ເທ​ເຝິກ­ຊ້ອມ​ສີ­ພາຍ​ຢ່າງ​ເຕັມ­ທີ ເຊິ່ງ​ໄດ້​ເລີ່ມ​ເຝິກ­ຊ້ອມ​ມາ​ແຕ່​ເດືອນ ພຶດ­ສະ­ພາ 2017 ເປັນ­ຕົ້ນ​ມາ ທັງ​ນີ້​ກໍ່​ເພື່ອ​ສ້າງ​ຄວາມ​ແຂງ­ແຮງ ແລະ ການ​ປະ­ສານ​ເຂົ້າ­ກັນ​ຂອງ​ນັກ ສີ­ພາຍ​ເພື່ອ​ຮັບ­ປະ­ກັນ​ໂດຍ​ບໍ່​ປະ­ໝາດ​ຄູ່​ແຂ່ງ​ຢ່າງ​ເດັດ­ຂາດ ເນື່ອງ​ຈາກ​ພວກ​ເຮົາ​ບໍ່​ສາ­ມາດ​ຮູ້​ໄດ້​ການ​ກະ­ກຽມ​ຄວາມ​ພ້ອມ​ຂອງ​ຄູ່​ແຂ່ງ​ວ່າ​ປີ​ນີ້​ເຂົາ­ເຈົ້າ​ຈະ​ມາ​ຮູບ​ແບບ​ໃດ ສຳ­ລັບ​ປີ​ນີ້ JDB ແຊັມ​ເກົ່າ​ປະ­ເພດ​ເຮືອ ປະ­ເພ­ນີ​ຊາຍ 55 ສີ­ພາຍ ໄດ້​ປັບ­ປຸງ​ຫຼາຍ​ດ້ານ​ໂດຍ​ສະ­ເພາະ​ແມ່ນ​ດ້ານ​ຄຸ­ນະ­ພາບ​ຂອງ​ສີ­ພາຍ ລວມ​ທັງ ການ​ເພີ່ມ​ງົບ​ສະ­ໜັບ­ສະ­ໜູນ ເພື່ອ​ເຮັດ​ໃຫ້​ສາ­ມາດ​ປ້ອງ​ກັນ​ແຊັມ​ໄວ້​ໄດ້ ນອກ­ຈາກ​ເຮືອ​ປະ­ເພ­ນີ​ຊາຍ​ແລ້ວ JDB ຍັງ​ໄດ້​ມີ​ເຮືອ​ເຊີ້ງ​ເພື່ອ​ສ້າງ​ສີ­ສັນ​ໃຫ້​ກັບ​ບຸນ­ຊ່ວງ­ເຮືອ ແລະ ຍັງ​ໄດ້​ຈັດ​ສັນ​ສະ­ຖານ­ທີ່​ສຳ­ລັບ​ກອງ​ເຊຍ ຕື່ມ​ອີກ ທັງ​ນີ້​ກໍ່​ເພື່ອ​ສ້າງ​ບັນ­ຍາ­ກາດ​ເບີກ­ບານ​ມ່ວນ­ຊື່ນ​ຕ້ອນ­ຮັບ​ເປີດ​ປີ​ທ່ອງ​ທ່ຽວ​ລາວ 2018 ເຊິ່ງ ກິດ­ຈະ­ກຳ​ດັ່ງ­ກ່າວ​ຈະ​ເປັນ​ກິດ­ຈະ­ກຳ​ດີໆໜຶ່ງ​ທາງ​ດ້ານ​ວັດ­ທະ­ນະ­ທຳ​ທີ່​ຈະ​ປະ­ກອບ­ສ່ວນ​ຊ່ວຍ​ໂຄ­ສະ­ນາ​ໃຫ້​ນັກ​ທ່ອງ​ທ່ຽວ​ຕ່າງ­ປະ­ເທດ​ເຫັນ​ໄດ້​ຮີດ ຄອງ​ປະ​ນີ​ອັນ​ດີ­ງາມ​ຂອງ​ຊາດ​ລາວ​ເຮົາ​ໃຫ້​ພ້ອມ​ພາ­ກັນ​ຫຼັ່ງ­ໄຫຼ​ເຂົ້າ​ມາ ທ່ຽວ​ປະ­ເທດ​ລາວ​ນັບ​ມື້​ຫຼາຍ​ຂຶ້ນ ແລະ ອັນ​ສຳ­ຄັນ​ໜຶ່ງ​ອີກ​ເພື່ອ​ຢາກ​ເປັນ​ສ່ວນ​ໜຶ່ງ​ໃນ​ການ​ປົກ​ປັກ​ຮັກ­ສາ​ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ລາວ ​ທີ່​ປະ­ຕິ­ບັດ​ກັນ​ມາ​ແຕ່​ດຶກ​ດຳ​ບັນ​ໃຫ້​ສືບ​ທອດ​ໄປ​ຮອດ​ເຊັນ​ລູກ​ເຊັນ​ຫຼານ​ຕໍ່ໆ​ໄປ.

ຂ່າວທີ່ກ່ຽວຂ້ອງ