ຈັບເປົ້າໝາຍຄ້າຂາຍຢາເສບຕິດ 86 ພັນເມັດ

92 11 ຕ.ລ. 2017 ຂ່າວໜ້າ​ໜຶ່ງ

ພະ​ແນກ​ຕຳຫຼວດ​ສະກັດ​ກັ້ນ ແລະ ຕ້ານ​ຢາ​ເສບ​ຕິດ ​ປກສ ແຂວງ​ຫຼວງ​ນ້ຳ​ທາ ໄດ້​ນຳ​ກຳລັງເຂົ້າ​ຈັບ​ຕົວ​ຜູ້​ລັກລອບ​ຄ້າຂາຍຢາ​ເສບ​ຕິດ ປະເພດ​ຢາ​ບ້າ ໃນ​ຂະນະ​ທີ່​ພວກ​ກ່ຽວ​ກຳລັງ​ນັດ​ສົ່ງ​ຢາບ້າ​ໃຫ້​ກັນ​ຢູ່​ສວນ​ຫຼັກ​ເມືອງ ເມືອງສິງ ແຂວງ​ຫຼວງ​ນ້ຳ​ທາ ສາມາດຢຶດ​ຢາ​ບ້າ​ໄດ້ 86.000 ເມັດ ໃນວັນ​ທີ 4 ກັນຍາ 2017 ພ້ອມທັງ​ກັກ​ຕົວ​ຜູ້​ຖືກ​ຫາ​ໄດ້ 2 ຄົນ ໄປສອບ​ສວນ​ຂະຫຍາຍ​ຜົນ​ຫາ​ຜູ້ຮ່ວມ​ຂະ​ບວນ​ການ​ນຳ​ກັນ.

ເຈົ້າ​ໜ້າທີ່​ວິຊາ​ສະເພາະ ​ປກສ ແຂວງ​ຫຼວງ​ນ້ຳ​ທາ ໃຫ້​ຮູ້​ວ່າ: ພາຍຫຼັງ​ໄດ້​ຮັບ​ລາຍງານ​ຈາກ​ພົນລະເມືອງ​ດີ​ວ່າ: ໃນວັນ​ທີ 4 ກັນຍາ ຈະ​ມີ​ກຸ່ມ​ຄົນ​ບໍ່​ດີລັກລອບ​ເຄື່ອນ​ໄຫວ​ຄ້າຂາຍ ແລະ ຂົນສົ່ງ​ຢາ​ເສບ​ຕິດ ປະເພດຢາ​ບ້າ ​ຢູ່​ສວນ​ຫຼັກ​ເມືອງ ເມືອງ​ສິງ ແຂວງ​ຫຼວງ​ນ້ຳ​ທາ ຈາກ​ນັ້ນ ຈຶ່ງໄດ້​ຈັດ​ກຳລັງ​ວິຊາ​ສະເພາະ​ລົງຕິດຕາມ​ເກັບ​ກຳ​ຂໍ້​ມູນ​ຈາກ​ແຫຼ່ງຂ່າວ ຜ່ານ​ການ​ຕິດຕາມ​ເຫັນ​ວ່າມີ​ມູນ​ຄວາມ​ຈິງ ຈຶ່ງ​ໄດ້​ວາງ​ແຜນມ້າງ​ຄະດີ​ດັ່ງກ່າວ ມາ​ຮອດ​ເວລາ​ປະມານ 12:00 ໂມງ​ຂອງ​ວັນດຽວ​ກັນ ຈຶ່ງ​ພົບ​ເຫັນ​ເປົ້າ​ໝາຍ 2 ຄົນ​ຂີ່​ລົດຈັກ​ໄປ​ຈອດ​ຢູ່​ສວນ​ຫຼັກເມືອງ ຈາກ​ນັ້ນ ເຈົ້າ​ໜ້າທີ່​ຕຳຫຼວດ​ຈຶ່ງ​ເຂົ້າ​ຈັບ​ຕົວ​ໄດ້ 2 ຄົນ ຊື່ທ້າວ ສອນ​ຄຳ ອາຍຸ 24 ປີ ຢູ່ບ້ານ​ຈອມ​ໝອກ ແລະ ທ້າວ ອາລີ ອາຍຸ 22 ປີ ຢູ່​ບ້ານ​ພະຍາ​ຫຼວງ ເມືອງ​ລອງ ແຂວງ​ຫຼວງ​ນ້ຳ​ທາ ພົບ​ເຫັນ​ຢາ​ບ້າ 43 ມັດ ເທົ່າ​ກັບ 86.000 ເມັດ ທີ່​ຊຸກເຊື່ອງ​ໄວ້ໃນ​ເປົາ ພ້ອມ​ໂທລະສັບ​ມື​ຖື 3 ໜ່ວຍ ແລະ ລົດຈັກ 2 ຄັນ.

ຜ່ານ​ການ​ສືບສວນ-ສອບ​ສວນ ຜູ້​ຖືກ​ຫາ​ທັງ​ສອງ​ຮັບ​ສາລະພາບວ່າ: ຢາ​ບ້າ​ຈຳນວນ​ດັ່ງກ່າວແມ່ນ​ຂອງ​ພວກ​ຕົນ​ແທ້ ເຊິ່ງ​ໄດ້ສັ່ງ​ຊື້​ມາ​ຈາກ​ຄົນ​ປະເທດ​ເພື່ອນບ້ານ (ປະເທດ​ມຽນ​ມາ) ຈຳນວນ 43 ມັດ ເທົ່າ​ກັບ 86.000 ເມັດ ເພື່ອ​ຈະ​ເອົາ​ໄປ​ຂາຍ​ໃຫ້​ຜູ້​ສັ່ງ​ຊື້​ຢູ່ເມືອງ​ສິງ ໂດຍ​ນັດ​ສົ່ງ​ໃຫ້​ກັນ​ຢູ່ສວນ​ຫຼັກ​ເມືອງ ແຕ່​ຍັງ​ບໍ່​ທັນ​ໄດ້ຂາຍ​ກໍ່​ຖືກ​ເຈົ້າ​ໜ້າທີ່​ກັກ​ຕົວ ພ້ອມ​ຢາ​ບ້າ​ຈຳນວນ​ດັ່ງກ່າວ ໄປດຳເນີນ​ການ​ສືບສວນ-ສອບ​ສວນຂະຫຍາຍ​ຜົນ​ຫາ​ກຸ່ມ​ແກ້ງ​ຜູ້​ຮ່ວມຂະ​ບວນ​ການ​ມາ​ດຳເນີນ​ຄະດີ ຕາມ​ລະບຽບ​ກົດໝາຍ.

ຂ່າວທີ່ກ່ຽວຂ້ອງ