ລາວຈະເປັນເຈົ້າພາບກອງປະຊຸມ ລມຕ ຄຸ້ມຄອງໄພພິບັດອາຊຽນ

98 11 ຕ.ລ. 2017 ຂ່າວໜ້າ​ໜຶ່ງ

ທ່ານ ປະສົງ ວົງ​ຄຳ​ຈັນ ຫົວໜ້າກົມ​ສັງຄົມ​ສົງເຄາະ ກະຊວງ​ແຮງ​ງານ ແລະ ສະຫວັດດີການ-ສັງຄົມ ໄດ້​ຖະແຫຼງ​ຂ່າວ ກ່ຽວ​ກັບ​ການ​ກຽມ​ຄວາມ​ພ້ອມທີ່ ​ສປປ ລາວ ໄດ້​ຮັບ​ກຽດ​ເປັນ​ເຈົ້າພາບ​ຈັດ​ກອງ​ປະຊຸມ​ລັດ​ຖະ​ມົນຕີ​ຄຸ້ມ​ຄອງ​ໄພພິບັດ​ອາ​ຊຽນ ຄັ້ງ​ທີ 5 ແລະ ກອງ​ປະຊຸມ​ປິ່ນ​ອ້ອມ​ຂຶ້ນ ວັນ​ທີ 9 ຕຸລາ 2017 ທີ່​ກະຊວງດັ່ງກ່າວ​ວ່າ: ກອງ​ປະຊຸມ​ລັດ​ຖະມົນຕີ​ຄຸ້ມ​ຄອງ​ໄພພິບັດ​ອາ​ຊຽນ ຄັ້ງ​ທີ 5 ແລະ ກອງ​ປະຊຸມ​ປິ່ນອ້ອມ​ນີ້ ຈະ​ໄດ້​ຈັດ​ຂຶ້ນ​ທີ່​ແຂວງຫຼວງ​ພະ​ບາງ ວັນ​ທີ 17-20 ຕຸລາ 2017 ໃນ​ການ​ກະກຽມ​ກອງ​ປະຊຸມ​ໃນ​ຄັ້ງ​ນີ້ ມາ​ຮອດ​ປັດຈຸບັນ ບັນດາ​ອະນຸ​ກຳມະການ​ຮັບ​ຜິດຊອບ​ແມ່ນ​ມີ​ຄວາມ​ພ້ອມ ແລະ ໄດ້​ສຳເລັດ​ການ​ກະກຽມ​ໃນ​ທຸກດ້ານ ເປັນຕົ້ນ ດ້ານ​ເນື້ອ​ໃນ​ເສດຖະ​ກິດ ພິທີການ ແລະ ການ​ປ້ອງກັນ ແລະ ດ້ານ​ອື່ນໆ.

ກອງ​ປະຊຸມ​ໃນ​​ຄັ້ງ​ນີ້ ແມ່ນ​ມີຄວາມ​ໝາຍ​ສຳຄັນ​ເປັນ​ຢ່າງ​ຍິ່ງເປັນ​ເວທີ​ລະດັບ​ສູງ ເພື່ອ​ຮ່ວມ​ກັນປຶກສາ​ຫາລື​ແລກປ່ຽນ ແລະ ກຳນົດ​ບັນດາ​ມາດ​ຕະການ ເພື່ອກຽມພ້ອມ​ຕອບ​ໂຕ້​ປ້ອງ​ກັນ ແກ້ໄຂ ແລະ ຫຼຸດຜ່ອນ​ຜົນ​ກະທົບ​ທີ່ອາດ​ຈະ​ເກີດ​ຂຶ້ນ​ຈາກ​ໄພພິບັດ​ທຳມະ​ຊາດ ໂດຍ​ສະເພາະ ໃນ​ການຈັດ​ຕັ້ງ​ຜັນ​ຂະຫຍາຍ​ສັນຍາ​ອາຊຽນ ວ່າ​ດ້ວຍ​ການ​ຄຸ້ມ​ຄອງ​ໄພພິບັດ ແລະ ການ​ຕອບ​ໂຕ້​ຕໍ່​ເຫດການ​ສຸກ​ເສີນ ແລະ ຖະແຫຼງການອາ​ຊຽນ​ວ່າ​ດ້ວຍ ໜຶ່ງ​ອາ​ຊຽນ ໜຶ່ງ​ການ​ຕອບ​ໂຕ້: ອາ​ຊຽນ​ຮວມກັນ​ເປັນ​ໜຶ່ງ​ດຽວ​ໃນ​ການ​ຕອບ​ໂຕ້ໄພພິບັດ​ທັງ​ໃນ ແລະ ນອກ​ອາຊຽນ ຊຶ່ງ​ທັງ​ສອງ​ເອກະສານແມ່ນ​ໄດ້​ຮັບຮອງ​ເອົາ​ໂດຍ​ບັນດາຜູ້ນຳ​ອາ​ຊຽນຢູ່ ​ສປປ ລາວ ແລະ ບັນຫາ​ສຳຄັນ​ທີ່​ຈະ​ໄດ້​ນຳ​ສະເໜີແລກປ່ຽນ ແລະ ພິຈາລະນາ​ຮັບຮອງ​ເອົາ​ຢູ່​ໃນ​ກອງ​ປະຊຸມ​ຄັ້ງ​ນີ້: ຮັບ​ຊາບຂໍ້​ຕົກລົງ​ຕ່າງໆ​ຂອງ​ບັນດາ​ຜູ້ນຳ​ອາ​ຊຽນ ທີ່​ພົວພັນ​ກັບວຽກ​ງານ​ຄຸ້ມ​ຄອງ​ໄພພິບັດ ໃນກອງ​ປະຊຸມ​ສຸດ​ຍອດ​ອາ​ຊຽນ​ຜ່ານມາ ໂດຍ​ສະເພາະ ຄືບ​ໜ້າການຈັດ​ຕັ້ງ​ປະຕິບັດ​ຖະແຫຼງການ​ອາຊຽນ ວ່າ​ດ້ວຍໜຶ່ງ​ອາ​ຊຽນ ໜຶ່ງການ​ຕອບ​ໂຕ້: ອາ​ຊຽນ​ເປັນ​ໜຶ່ງດຽວ​ໃນ​ການ​ຕອບ​ໂຕ້​ໄພພິບັດໃນ ແລະ ນອກ​ພາກ​ພື້ນ​ອາ​ຊຽນ ໃນລະຫວ່າງກອງ​ປະຊຸມ​ສຸດ​ຍອດອາ​ຊຽນ ຄັ້ງ​ທີ 28 ທີ່​ຈັດ​ຂຶ້ນ​ຢູ່ ​ສປປ ລາວ ໃນ​ວັນ​ທີ 6 ກັນຍາ 2016 ຮັບ​ຮູ້ ແລະ ສະແດງຄວາມ​ຊົມເຊີຍ​ຕໍ່​ຜົນສຳເລັດ​ໃນການຈັດຕັ້ງ​ປະຕິບັດ ບັນດາ​ແຜນງານ​ສັນຍາ​ອາ​ຊຽນວ່າ​ດ້ວຍການ​ຄຸ້ມ​ຄອງ​ໄພພິບັດ ແລະ ການ​ຕອບ​ໂຕ້​ສຸກ​ເສີນ​ຜ່ານ​ມາ.

ສຳລັບ ​ສປປ ລາວ ຂອງ​ພວກເຮົາ ນອກຈາກ​ໄດ້​ຮັບ​ກຽດ​ທີ່​ເປັນເຈົ້າພາບ​ຈັດ​ກອງ​ປະຊຸມ​ຄັ້ງ​ນີ້ ລາວ​ຍັງ​ຈະ​ໄດ້​ຖືກ​ຮັບ​ຮູ້​ຢ່າງກວ້າງຂວາງ ທັງ​ໃນ ແລະ ນອກອາ​ຊຽນ ກ່ຽວ​ກັບ​ຄວາມ​ສາມາດ ແລະ ບົດບາດ​ທີ່​ພົ້ນ​ເດັ່ນ​ຂອງ ​ສປປ ລາວ ໃນ​ເວທີ​ອາ​ຊຽນ ແລະ ສາກົນ ໃນ​ດ້ານ​ວຽກ​ງານ​ຄຸ້ມຄອງ​ໄພພິບັດ ເປັນ​ການ​ປະກອບສ່ວນ ແລະ ຈັດ​ຕັ້ງ​ພັນທະ​ຂອງອາ​ຊຽນ ໃນ​ຖານະທີ່ ​ສປປ ລາວ ເປັນ​ປະທານ​ຄະນະ​ກຳມະການຄຸ້ມ​ຄອງ​ໄພພິບັດ​ອາ​ຊຽນ ກໍ່​ຄືປະທານ​ກອງ​ປະຊຸມ​ລັດຖະມົນຕີ​ຄຸ້ມຄອງ​ໄພພິບັດ​ອາ​ຊຽນ ປີ 2017 ຊຶ່ງ​ຜ່ານ​ມາ ເລີ່ມ​ແຕ່​ຕົ້ນ​ປີ 2017 ​ສປປ ລາວ ກໍ່​ໄດ້​ເຄື່ອນ​ໄຫວ​ຢ່າງຕັ້ງໜ້າ ແລະ ຍາດ​ໄດ້​ຜົນສຳເລັດຫຼາຍ​ດ້ານ ໃນ​ວຽກ​ງານ​ຄຸ້ມ​ຄອງໄພພິບັດ​ຂອງ​ອາ​ຊຽນ ແລະ ຫຼັງຈາກ​ນີ້ ກໍ່​ຈະ​ໄດ້​ສືບຕໍ່​ຈັດ​ຕັ້ງ​ຜັນຂະຫຍາຍ​ບັນດາ​ຜົນສຳເລັດ​ທີ່​ໄດ້ກ່າວ​ມາ​ຂ້າງ​ເທິງ ວຽກ​ງານ​ຄຸ້ມຄອງ​ໄພພິບັດ​ອາ​ຊຽນ ໄດ້​ຖືກ​ຮັບຮູ້​ຢ່າງ​ກວ້າງຂວາງ ໂດຍ​ປະຊາຊົນ​ບັນດາເຜົ່າ ​ສປປ ລາວ ລວມທັງ​ບັນດາ​ຄູ່​ຮ່ວມ​ງານ​ສາກົນ​ທີ່ເຄື່ອນ​ໄຫວ​ວຽກ​ງານ​ຄຸ້ມ​ຄອງ​ໄພພິບັດຢູ່ ​ສປປ ລາວ ສ້າງ​ໄດ້​ກາລະ​ໂອກາດ ໃນ​ການ​ປູກ​ຈິດ​ສຳນຶກ​ແກ່​ຊຸມ​ຊົນ​ທົ່ວ​ສັງຄົມ​ລາວ ໄດ້ຮັບ​ຮູ້​ເຖິງ​ຄວາມ​ອັນຕະລາຍ​ຂອງໄພພິບັດ ແລະ ຄວາມ​ສຳຄັນ​ໃນການ​ກຽມພ້ອມ​ຕອບ​ໂຕ້​ປ້ອງ​ກັນ ແລະ ຫຼຸດຜ່ອນ​ຜົນ​ກະທົບ​ທາງ​ລົບຈາກ​ໄພພິບັດ.

ຂ່າວທີ່ກ່ຽວຂ້ອງ