ສົ່ງເສີມໄວໜຸ່ມ ຫັນມາອ່ານໜັງສືພິມໃຫ້ຫຼາຍຂຶ້ນ

94 11 ຕ.ລ. 2017 ຂ່າວໜ້າ​ໜຶ່ງ

ເພື່ອ​ເປັນ​ການ​ຊອກ​ແນວທາງດຶງ​ດູດ​ໃຫ້​ສັງຄົມ ໂດຍ​ສະເພາະແມ່ນ​ໄວ​ໜຸ່ມ​ຫັນ​ມາ​ອ່ານໜັງສືພິມ​ຫຼາຍ​ຂຶ້ນ ເນື່ອງ​ຈາ​ກວ່າ​ສື່ມວນ​ຊົນ​ໃນ​ທົ່ວ​ໂລກ ກໍ່​ຄືປະເທດລາວ ກຳລັງ​ປະສົບ​ກັບ​ບັນຫາ​ສື່ອອນ​ລາຍ​ເຂົ້າ​ມາ​ແຊກ​ແຊງ ເຮັດໃຫ້​ສື່​ສິ່ງ​ພິມ​ວິທະຍຸ ແລະ ໂທລະພາບ​ນັບ​ມື້​ໄດ້​ຮັບ​ຄວາມ​ສົນໃຈໜ້ອຍ​ລົງ ສິ່ງ​ດັ່ງກ່າວ​ໄດ້​ສົ່ງ​ຜົນກະທົບ​ໂດຍ​ກົງ​ຕໍ່​ສື່​ສິ່ງ​ພິມ ເມື່ອຄົນ​ຫັນ​ມາ​ນິຍົມ​ອ່ານ​ຂ່າວ​ທາງອິນ​ເຕີ​ເນັດ ເຮັດ​ໃຫ້​ຍອດ​ຂາຍໜັງສືພິມ​ຫຼຸດ​ລົງ ການ​ໂຄສະນາຫຼຸດ​ລົງ ເຊິ່ງ​ເປັນ​ສິ່ງ​ທ້າ​ທ້າຍເຮັດ​ໃຫ້​ສື່​ມວນ​ຊົນ​ຕ້ອງ​ໄດ້​ບຸກບືນ ພັດທະນາ​ອົງ​ກອນ ໃຫ້​ມີຄຸນະພາບ ປັບປຸງ​ທາງ​ດ້ານ​ເນື້ອໃນ ເພີ່ມ​ຄວາມ​ສາມາດ​ໃນ​ການຂຽນ​ຂ່າວ​ທີ່​ດີ ແລະ ອື່ນໆ.

ວັນ​ທີ 9 ຕຸລາ 2017 ສະ​ມາຄົມ​ນັກ​ຂ່າວ ແຫ່ງ ​ສປປ ລາວ ໄດ້​ຈັດ​ພິທີ​ພົບ​ປະ​ແລກປ່ຽນ​ບົດຮຽນ ​ກ່ຽວ​ກັບ​ວິທີ​ການ​ດຶງ​ດູດ​ໄວໜຸ່ມ​ໃຫ້​ຫັນ​ມາ​ອ່ານໜັງສື​ພິມຫຼາຍ​ຂຶ້ນ ​ທີ່​ສະມາຄົມ​ນັກ​ຂ່າວ ເຊິ່ງ​ໄດ້​ເຊີນ​ທ່ານ ຢັນ​ວິນ ແຊ້ນສະ​ຕີນ ຊ່ຽວຊານ​ດ້ານ​ຂ່າວສານຈາກ​ປະເທດນໍ​ເວ ມາ​ໃຫ້​ຄວາມຮູ້ມີ​ທ່ານ ສົມ​ສະໜຸກ ມີ​ໄຊ ຮອງ​ປະທານ​ສະມາຄົມ​ນັກ​ຂ່າວ ແຫ່ງ ​ສປປ ລາວ ພ້ອມ​ດ້ວຍ​ສື່ມວນ​ຊົນ​ເຂົ້າ​ຮ່ວມ.

ໂອກາດ​ນີ້ ຜູ້​ເຂົ້າ​ຮ່ວມ​ໄດ້ແລກປ່ຽນ​ຄວາມ​ຮູ້ ແລະ ປະສົບການ​ຕົວ​ຈິງ​ໃນ​ວຽກ​ງານ​ສື່​ມວນຊົນ ເຂົ້າໃຈ​ກ່ຽວ​ກັບ​ຫຼັກການ ແລະ ການ​ໝູນ​ໃຊ້ວິທີ​ການ​ດຶງດູດ​ຜູ້​ອ່ານ​ ໃຫ້​ຫັນ​ມາ​ສົນໃຈ​ອ່ານໜັງສືພິມ ເປັນຕົ້ນແມ່ນ​ການກຳນົດ​ຄໍ​ລຳ​ຂຽນ​ຂ່າວ​ທີ່​ດີ ເລົ່າປະສົບ​ການ ປະໂຫຍດ​ທີ່​ໄດ້​ຈາກການ​ອ່ານ​ໃຫ້​ຄົນ​ອື່ນ​ໄດ້​ຮັບ​ຮູ້ ແນໃສ່​ສ້າງ​ຈິດ​ສຳນຶກ​ໃຫ້​ສັງຄົມ ໂດຍ​ສະເພາະ​ແມ່ນ​ຄົນ​ຮຸ່ນ​ໃໝ່ຫັນ​ມາ​ສົນໃຈ ແລະ ອ່ານໜັງສືພິມ​ແທນ​ການ​ອ່ານ​ຂ່າວ​ທາງ​ສື່ອອນ​ລາຍ​ຕ່າງໆ ເພື່ອ​ຍົກ​ບົດບາດ​ຄວາມ​ໜ້າ​ເຊື່ອ​ຖື​ຂອງ​ສື່​ສິງພິມ​ໃນ​ຍຸກ​ປັດຈຸບັນ ​ໃຫ້​ເປັນ​ທີ່ຍອມຮັບ​ຂອງ​ສັງຄົມ​ຫຼາຍ​ຂຶ້ນ.

ຂ່າວທີ່ກ່ຽວຂ້ອງ