ຂ່າວຫຼ້າສຸດ

ກຽມສະຫຼອງວັນອາຫານໂລກ-ວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ

256 11 ຕ.ລ. 2017 ຂ່າວໜ້າ​ໜຶ່ງ
ກຽມສະຫຼອງວັນອາຫານໂລກ-ວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ

ໃນ​ໂອກາດ​ການ​ສະເຫຼີມ​ສະຫຼອງ​ວັນ​ອາຫານ​ໂລກ ວັນ​ສາກົນ ແລະ ສັບປະດາ​ແຫ່ງ​ຊາດ ເພື່ອລຶບລ້າງ​ຄວາມທຸກ​ຍາກ ທີ່​ຈະໝູນວຽນ​ມາ​ບັນຈົບ​ຄົບຮອບ​ອີກເທື່ອ​ໜຶ່ງ ໃນ​ປີ 2017 ນີ້ ວັນ​ທີ 9 ຕຸລາ 2017 ທີ່​ກະຊວງ​ກະສິກຳ ແລະ ປ່າໄມ້ ທ່ານ ລຽນ ທິ​ແກ້ວ ລັດຖະມົນຕີກະຊວງ​ກະສິກຳ ແລະ ປ່າໄມ້ ໄດ້​ຖະແຫຼງ​ຂ່າວ​ຕໍ່​ສື່ມວນ​ຊົນ​ວ່າ: ພິທີ​ສະເຫຼີມ​ສະຫຼອງ​ວັນ​ທີ່​ມີ​ຄວາມ​ໝາຍ​ຄວາມສຳຄັນ​ດັ່ງກ່າວ​ຢ່າງ​ເປັນ​ທາງການ ​ຈະ​ໄດ້​ຈັດ​ຂຶ້ນ​ໃນ​ວັນ​ທີ 17 ຕຸລາ 2017 ທີ່​ສະ​ຖາ​ບັນ​ຄົ້ນຄວ້າກະສິກຳ ແລະ ປ່າໄມ້​ແຫ່ງ​ຊາດ ສຳລັບ​ວັນ​ອາຫານ​ໂລກ​ປີ​ນີ້ ແມ່ນຄົບຮອບ 37 ປີ ພາຍ​ໃຕ້​ຄຳ​ຂວັນ: “ລົງ​ໃສ່​ການ​ຄ້ຳປະກັນ​ຄວາມໝັ້ນຄົງ​ດ້ານ​ສະບຽງ​ອາຫານ ແລະ ການ​ພັດທະນາ​ຊົນນະບົດ ເພື່ອ​ແກ້​ໄຂ​ການ​ເຄື່ອນ​ຍ້າຍ​ຖິ່ນຖານ​ໃນ​ອະນາຄົດ” ວັນ​ສາກົນ ເພື່ອ​ລຶບລ້າງ​ຄວາມທຸກ​ຍາກ ຄົບຮອບ 25 ປີ ແລະ ສັບປະດາ​ແຫ່ງຊາດ ເພື່ອ​ລຶບລ້າງ​ຄວາມທຸກຍາກ ຄົບຮອບ 14 ປີ ພາຍ​ໃຕ້​ຄຳຂວັນ: “ກ້າວ​ໄປ​ສູ່​ສັງຄົມ​ສັນຕິ ສຸກ ແລະ ເພື່ອ​ທຸກ​ຄົນ”.

ດັ່ງນັ້ນ ຂໍ​ຖື​ໂອກາດ​ນີ້​ຮຽກຮ້ອງມາ​ຍັງ​ທົ່ວ​ພັກ​ທົ່ວ​ລັດ ທົ່ວ​ປວງ ຊົນ​ລາວ​ທັງ​ຊາດ ຕະຫຼອດ​ຮອດອົງ​ການຈັດຕັ້ງ​ສາກົນ​ຢູ່​ໃນ ​ສປປ ລາວ ຈົ່ງ​ພ້ອມ​ກັນ​ເປັນ​ເຈົ້າ​ການສະເຫຼີມສະຫຼອງ​ວັນ​ດັ່ງກ່າວ​ໃຫ້ເປັນ​ຂະ​ບວນ​ຟົດຟື້ນ ມີ​ຄວາມເປັນ​ລະບຽບ​ຮຽບ​ຮ້ອຍ ມີ​ເນື້ອ​ໃນດ້ວຍ​ການ​ເຂົ້າ​ຮ່ວມ​ຜະລິດ​ກະ​ສິກຳ ປູກຝັງ-ລ້ຽງສັດ ຄ້ຳປະກັນຄວາມ​ໝັ້ນຄົງ​ດ້ານ​ສະບຽງ​ອາຫານ ເຮັດ​ກະສິກຳ​ສະອາດ​ຕາມທິດ​ສີຂຽວ​ຍືນ​ຍົງ ຊຸກຍູ້​ການ​ຜະລິດ​ເປັນ​ສິນຄ້າ ສ້າງ​ລາຍ​ຮັບ​ໃຫ້ແກ່​ຄອບຄົວ ກໍ່​ຄືການ​ຮ່ວມ​ກັນ ເຮັດ​ວຽກ​ເພື່ອ​ຫຼຸດ​ພົ້ນ​ອອກ​ຈາກຄວາມທຸກ​ຍາກ ທຸກ​ຄົນ​ສາມາດເຂົ້າ​ເຖິງ​ອາຫານ​ທີ່​ມີ​ໂພຊະ​ນາການ​ຕະຫຼອດ​ປີ ຕັ້ງໜ້າ​ເຂົ້າ​ຮ່ວມປະຕິບັດ​ສອງ​ໜ້າທີ່​ຍຸດ​ທະ​ສາດຂອງ​ຊາດ ຄື: ການ​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດຊາດ ຮອດ​ປີ 2020 ນຳ​ເອົາ​ປະເທດ​ຊາດ​ຫຼຸດ​ພົ້ນ​ອອກ​ຈາກຄວາມ​ດ້ອຍ​ພັດທະນາ.

ສຳລັບ​ບັນດາ​ກິດຈະກຳ ທີ່​ຈະຈັດ​ຕັ້ງ​ປະຕິບັດ​ໃນ​ການ​ສະເຫຼີມສະຫຼອງ​ປີ​ນີ້ ຄື: ໂຮມ​ຊຸມນຸມ​ມິດຕິງ ຈັດ​ປາຖະກະຖາ ສຳ​ມະ​ນາ ວິທະ​ຍາ​ສາດ ຈັດ​ຕະຫຼາດນັດ ວາງສະແດງ​ກະສິກຳ ເພື່ອ​ເປັນ​ການປະກອບສ່ວນ​ທຶນຮອນ ແລະ ວັດຖຸ​ຊ່ວຍເຫຼືອ​ແກ້​ໄຂ​ຄວາມທຸກ​ຍາກຂອງ​ປະຊາຊົນ ຢູ່​ບ້ານ​ຄຳ​ປາ​ແໝ ແລະ ບ້ານ​ປ່າ​ກ້ວຍ ເມືອງ​ຈຳພອນ ແຂວງ​ສະຫວັນ​ນະ​ເຂດ ເຊິ່ງ​ມາ​ຮອດ​ປັດຈຸບັນ ເມືອງ​ທຸກຍາກ ມີ 23 ເມືອງ ບ້ານ​ທຸກ​ຍາກ 1.653 ບ້ານ ເທົ່າ​ກັບ 19,55% ຄອບຄົວ​ທຸກ​ຍາກມີ 69.772 ຄອບຄົວ ເທົ່າ​ກັບ 5,98%.

ຂ່າວທີ່ກ່ຽວຂ້ອງ