ເຮືອນ້ອຍອິດທິລິດ ມອບຂັນໝູນວຽນໃຫ້ JDB ຜູ້ສະໜັບສະໜູນຫຼັກ

461 12 ຕ.ລ. 2017 ຂ່າວໜ້າ​ໜຶ່ງ
ເຮືອນ້ອຍອິດທິລິດ ມອບຂັນໝູນວຽນໃຫ້ JDB ຜູ້ສະໜັບສະໜູນຫຼັກ

ຄະນະ​ນຳ​ເຮືອ​ນ້ອຍ​ອິດທິລິດ ບ້ານ​ທາດຫຼວງ ເມືອງ​ໄຊ​ເຊດ​ຖາ ນະຄອນຫຼວງ​ວຽງ​ຈັນ ນຳ​ເອົາ​ຂັນໝູນວຽນ​ເຮືອ​ປະເພນີ​ຊາຍ ພ້ອມດ້ວຍ​ຂັນເງິນ​ນ້ຳໜັກ 1 ກິ​ໂລກຣາມ ທີ່​ໄດ້​ຮັບ​ຈາກ​ການ​ຊະນະເລີດ​ເຮືອ​ປະເພນີ​ຊາຍ 55 ສີພາຍ ໃນ​ງານ​ບຸນ​ອອກ​ພັນ​ສາປະ​ວໍລະນາ ແລະ ຊ່ວງ​ເຮືອ​ປະຈຳ​ປີ 2017 ທີ່​ທ່າ​ວັດ​ຈັນ ເມືອງ​ຈັນທະບູ​ລີ ນະຄອນຫຼວງ​ວຽງ​ຈັນ ມາມອບ​ໃຫ້​ກັບທະນາຄານ​ຮ່ວມ​ພັດທະ​ນາ (JDB) ຜູ້​ໜັບ​ສະ​ໜູນ​ຫຼັກເຮືອ​ດັ່ງກ່າວ.

ພິທີ​ມອບ-ຮັບ​ຂັນ​ລາງວັນ ໄດ້ຈັດ​ຂຶ້ນ​ໃນ​ວັນ​ທີ 10 ຕຸລາ 2017 ຜ່ານ​ມາ ທີ່​ທະນາຄານ​ຮ່ວມ​ພັດທະ​ນາ ນະຄອນຫຼວງ​ວຽງ​ຈັນ ໂດຍ​ຕາງໜ້າ​ກ່າວ​ມອບ​ຂອງທ່ານ ນວນ ສີດາ​ລາ ເຈົ້າ​ຂອງເຮືອ​ນ້ອຍ​ອິດທິລິດ ແລະ ກ່າວຮັບ​ແມ່ນ​ທ່ານ ສູນ​ທອນ ຈັນທະວົງ ຜູ້ອຳນວຍການ​ໃຫຍ່ ທະ​ນາຄານ​ຮ່ວມ​ພັດທະນາ ມີ​ຄະນະ​ນຳທະນາຄານ JDB ພາກສ່ວນ​ທີ່ກ່ຽວຂ້ອງ ແລະ ສື່​ມວນ​ຊົນ ເຂົ້າຮ່ວມ​ເປັນ​ສັກຂີ​ພິຍານ.

ສຳລັບ​ການ​ແຂ່ງຂັນ​ຊ່ວງ​ເຮືອ ໃນ​ງານ​ບຸນ​ອອກ​ພັນ​ສາ​ປະ​ວໍລະນາ ແລະ ຊ່ວງ​ເຮືອ​ປະເພນີ ປະຈຳປີ 2017 ທີ່​ທ່າ​ວັດ​ຈັນ​ໃນ​ປີ​ນີ້ ມີ​ເຮືອ​ເຂົ້າ​ຮ່ວມ 35 ລຳ ສະເພາະ​ເຮືອ​ປະເພນີ​ຊາຍ ມີ​ເຮືອເຂົ້າ​ຮ່ວມ 9 ລຳ ແບ່ງ​ອອກ​ເປັນ 2 ກຸ່ມ ຜ່ານ​ການ​ແຂ່ງຂັນ​ໃນຮອບ​ຊີງ​ຊະນະ​ເລີດ ຜົນ​ປາກົດວ່າ: ເຮືອ​ນ້ອຍ​ອິດທິລິດ ສາມາດແຊງ​ເອົາ​ຊະນະ​ເຮືອ​ບໍລິສັດ​ ພັນທະ​ມິດ​ກໍ່ສ້າງ-ຂົວ​ທາງ ແຂວງໄຊ​ຍະ​ບູ​ລີ ໄປ​ແບບ​ຫວຸດ​ຫວິດ ຄອງ​ຂັນ​ລາງວັນ​ຊະນະ​ເລີດ​ເຮືອປະເພນີ​ຊາຍ ປະຈຳ​ປີ 2017 ພ້ອມ​ເງິນສົດ 20 ລ້ານ​ກີບ ແລະ ຂັນ​ໝູນວຽນ​ໄປ​ຄອງ​ໄດ້​ຢ່າງ​ສົມສັກ​ສີ ພາຍຫຼັງ​ກ່ອນ​ໜ້າ​ນີ້ ເມື່ອ​ປີ 2009 ແລະ 2010 ເຮືອ​ນ້ອຍ​ອິດທິ​ລິດ​ລຳ​ນີ້ ເຄີຍ​ຊະນະ​ເລີດ​ເຮືອປະເພນີ​ຊາຍທີ່​ທ່າ​ວັດ​ຈັນ​ມາ​ໄດ້ແລ້ວ 2 ຄັ້ງ ແລະ ມາ​ປີ​ນີ້​ຖື​ເປັນຄັ້ງ​ທີ 3 ເຮັດ ໃຫ້​ໄດ້​ຮັບ​ຂັນ​ໝູນວຽນ​ໄປ​ຄອບ​ຄອງ.

ຂ່າວທີ່ກ່ຽວຂ້ອງ