ຂ່າວຫຼ້າສຸດ

ການຄົ້ນຫາກໍລະນີຜູ້ຕິດເຊື້ອວັນນະໂຣກ

417 12 ຕ.ລ. 2017 ຂ່າວໜ້າ​ໜຶ່ງ
ການຄົ້ນຫາກໍລະນີຜູ້ຕິດເຊື້ອວັນນະໂຣກ

ກອງ​ປະຊຸມ​ສະຫຼຸບ​ການ​ເຄື່ອນໄຫວ​ປະຕິບັດ​ວຽກ​ງານ ຄວບ​ຄຸມພະຍາດ​ວັນນະ​ໂຣກ ປະຈຳ​ປີ 2016-2017 ຈັດ​ຂຶ້ນ​ວັນ​ທີ 11-13 ຕຸລາ 2017 ທີ່​ທ່າ​ລາດ ແຂວງວຽງ​ຈັນ ເປັນ​ປະທານ​ຂອງ​ທ່ານ ພູທອນ ເມືອງ​ປາກ ຮອງ​ລັດ​ຖະມົນຕີ​ກະຊວງ​ສາທາລະນະ​ສຸກ ມີ​ທ່ານ​ຮອງ​ຫົວໜ້າ​ກົມ​ຄວບຄຸມພະ​ຍາດ​ຕິດຕໍ່ ຫົວໜ້າ​ກົມ​ເສນາ​ຮັກ ກະຊວງ​ປ້ອງ​ກັນ​ຄວາມສະຫງົບ ຄະນະ​ປົກຄອງ​ແຂວງ ຄະນະ​ອຳນວຍ​ການ 5 ແຂວງ (ວຽງ​ຈັນ ບໍ​ລິ​ຄຳ​ໄຊ ໄຊ​ສົມບູນ ຄຳ​ມ່ວນ ແລະ ນະຄອນຫຼວງ) ແລະ ພາກສ່ວນ​ກ່ຽວຂ້ອງ​ເຂົ້າຮ່ວມ.

ກອງ​ປະຊຸມ​ຄັ້ງ​ນີ້ ໄດ້​ປຶກສາ​ຫາລື​ທົບ​ທວນຄືນ​ການຈັດຕັ້ງ​ປະຕິບັດ​ຜ່ານ​ມາ ສົກ​ປີ 2016-2017 ແລະ ແຜນການ​ສົກ​ປີ 2017-2018 ດັ່ງ​ທີ່​ຮູ້​ດີ​ແລ້ວ​ວ່າ ວັນນະໂຣກ​ເປັນ​ພະຍາດ​ຕິດແປດ ແລະ ຍັງ​ເປັນ​ບັນຫາ​ສຳຄັນ​ໃນ​ຂົງເຂດວຽກ​ງານ​ສາທາລະນະ​ສຸກ ຕາມຂໍ້​ມູນ​ສູນ​ຄວບ​ຄຸມ​ວັນນະ​ໂຣກ ແລະ ອົງການ​ອະນາໄມ​ໂລກ ເຫັນ​ໄດ້​ວ່າ: ດ້ານ​ລະບາດ​ວິ​ທະຍາ​ວັນນະ​ໂຣກ​ໃນ​ລາວ ປີ 2016 ມີ​ການ​ຄາດ​ຄະເນ​ການ​ເກີດ​ເປັນວັນນະ​ໂຣກ​ໃໝ່ (Incidence) 175/100.000 ຄົນ (ປະມານ 12.000 ຄົນ) ວັນນະ​ໂຣກ​ດື້​ຢາ 10/100.000 (ປະມານ 680 ຄົນ) ຊຶມ​ເຊື້ອ​ຮ່ວມ​ວັນນະ​ໂຣກ/ເອດ 710 ຄົນ ແລະ ຈຳນວນຄົນ​ຕາຍ​ຍ້ອນ​ວັນນະ​ໂຣກ 43/100.000 ຄົນ (ປະມານ 3.240 ຄົນ) ອັດຕາ​ການ​ຊອກ​ຄົ້ນ ຫຼື ຄົ້ນພົບ​ກໍລະນີຍັງ​ເຫັນ​ວ່າ​ຕ່ຳ ເມື່ອທຽບໃສ່​ອັດຕາ​ຄວາມ​ຊຸກ​ຊຸມແລ້ວ​ ເຫັນ​ວ່າ​ໄດ້​ພຽງ 41% ເທົ່ານັ້ນ (2016) ເຫັນ​ໄດ້​ວ່າຍັງ​ມີ​ກໍລະ​ນີ​ວັນນະ​ໂຣກ​ຈຳນວນ​ຫຼາຍ​ ທີ່ຍັງ​ລີ້​ຊ່ອນ​ຢູ່​ໃນ​ຊຸມ​ຊົນ​ບໍ່​ໄດ້​ຖືກ​ບົ່ງມະຕິ ແລະ ຮັບ​ການ​ປິ່ນປົວ ປັດໄຈ​ສຳຄັນ​ກວ່າ​ໝູ່​ທີ່​ກໍ່ໃຫ້ເກີດເປັນ​ພະຍາດ​ນີ້​ຫຼາຍ ກໍ່​ແມ່ນຄວາມທຸກ​ຍາກ ເຊິ່ງ​ຄົນ​ສ່ວນໃຫຍ່​ຈະ​ຢູ່​ໃນ​ກຸ່ມ​ອາຍຸ 15-55 ປີ ເຊິ່ງ​ເປັນ​ໄລຍະ​ກຳລັງ​ທຳ​ການ​ຜະລິດ ແລະ ເປັນ​ຜູ້​ຊາຍ​ຫຼາຍ​ກວ່າຜູ້ຍິງ 2 ຕໍ່ 1 ແລະ ເປັນ​ຜົນ​ກະທົບຕໍ່​ເສດຖະກິດ​ຄອບຄົວ ແລະ ສັງຄົມ​ໜັກ​ສົມຄວນ.

ຕໍ່​ກັບ​ສິ່ງ​ທ້າ​ທາຍ​ດັ່ງກ່າວນັ້ນ ​ທາງ​ໂຄງການ​ຄວບ​ຄຸມ​ວັນນະໂຣກ ແລະ ພາກສ່ວນ​ຕ່າງໆ​ທີ່ກ່ຽວຂ້ອງ ​ໄດ້​ສູ້​ຊົນ​ເຮັດ​ວຽກ​ຂອງຕົນ​ໃຫ້​ລ້ອນ​ໜ້າທີ່ ແລະ ຍາດມາ​ໄດ້​ບາງ​ຜົນສຳເລັດ ໃນ​ປີ 2016 ຄື​ດັ່ງນີ້: ສະພາບ​ຄວາມຊຸກ​ຊຸມ​ໄດ້​ບັນລຸ MDG 6 ເປົ້າໝາຍ 4 ຄືວັນນະ​ໂຣກ​ຫຼຸດ​ລົງເຄິ່ງ​ໜຶ່ງ​ປີ 2015 ໂດຍ​ສົມ​ທຽບກັບ​ປີ 1990 (1.490/100.000-464/100.000) ຄົນ​ເຈັບ​ໄດ້​ຂຶ້ນທະບຽນ​ປິ່ນປົວ​ໄລຍະ​ຜ່ານ​ມາ​ແຕ່ປີ 2005-2015 ມີ​ປະມານ 4 ພັນ​ກວ່າ​ກໍລະນີ​ຕໍ່​ປີ ແລະ 5.184 ກໍລະນີ​ໃນ​ປີ 2016 ຜົນສຳເລັດຂອງ​ການ​ປິ່ນປົວຫຼາຍ​ກວ່າ 90% ຫຼາຍ​ກວ່າ 90% ຄົນເຈັບ​ວັນນະ​ໂຣກ ໄດ້​ກວດ​ຫາເຊື້ອ​ເອດ ຄົນ​ເຈັບ​ວັນນະ​ໂຣກ​ດື້ຢາ ຈຳນວນ 32 ຄົນ ໄດ້​ຮັບ​ການປິ່ນປົວ​ໄລຍະ​ສັ້ນ 9 ເດືອນ ແລະ ຜົນສຳເລັດ​ຂອງ​ການ​ປິ່ນປົວ​ສູງເຖິງ 85% ປະທານ​ກອງ​ປະຊຸມໄດ້​ເນັ້ນ​ໜັກ 5 ບັນຫາຄື: ຄວາມຮັບ​ຮູ້ ແລະ ຄວາມ​ເຂົ້າໃຈ​ວຽກງານ​ວັນນະ​ໂຣກ ຕ້ອງ​ໄດ້​ເອົາໃຈໃສ່​ຕື່ມ​ຕາ​ໜ່າງ​ການ​ປົກ​ຄຸມ ແລະ ປິ່ນປົວ​ວັນນະ​ໂຣກ​ຍັງ​ບໍ່​ສາມາດ​ປົກ​ຄຸມ​ໄດ້​ທົ່ວ​ເຖິງ ການ​ຄົ້ນຫາ​ກໍລະນີ​ຜູ້​ຕິດ​ເຊື່ອ​ວັນນະ​ໂຣກ ຍັງ​ພົບ​ບັນຫາ​ການ​ປິ່ນປົວ​ພະຍາດ​ວັນນະ​ໂຣກ ເປີເຊັນ​ຂອງ​ຄົນເຈັບ​ດື້​ຢາ​ເພີ່ມ​ຂຶ້ນ ງົບປະມານສະໜັບ​ໜູນ​ວັນນະ​ໂຣກ​ຍັງ​ຈຳກັດ ສ່ວນ​ທິດ​ທາງ​ໃນຕໍ່ໜ້າ​ມີ 7 ບັນຫາຄື: ອີງໃສ່​ແນວທາງ​ສາທາ​ລະນະ​ສຸກ ການ​ປ້ອງ​ກັນ ແລະ ປິ່ນປົວ​ພະຍາດ​ເປັນຕົ້ນ​ຕໍ ການ​ປິ່ນປົວ​ຢູ່​ໂຮງໝໍ​ ຕ້ອງ​ໄດ້​ຄົ້ນຫາ​ຄົນ​ເຈັບ​ຫຼັກ ການ​ປິ່ນປົວ​ຄົນເຈັບ​ດື້​ຢາ ​ອຳນາດ​ການ​ປ້ອງ​ຄອງທ້ອງຖິ່ນ​ຊ່ວຍ​ເພີ່ມ​ງົບປະມານ​ໃສ່ພະຍາດ​ວັນນະ​ໂຣກ ​ປັບປຸງ​ລະບົບການຈັດຕັ້ງ​ໜ່ວຍ​ງານ​ຮັບ​ຜິດຊອບ​ວັນນະ​ໂຣກຂັ້ນ​ແຂວງ ເມືອງ ສຸກສາລາ ແບບແຜນ​ວິທີການ​ເຮັດ​ວຽກ​ຕໍ່​ໂຮງໝໍ ແລະ ສູນວັນນະ​ໂຣກສືບຕໍ່​ລາຍ​ງານ​ຂໍ້​ມູນເປັນ​ປະຈຳ ແລະ ອຳນາດ​ການປົກຄອງ​ຊ່ວຍ​ເພີ່ມ​ທະວີ​ການ​ປຸກລະດົມ​ຊຸມ​ຊົນ ​ຍົກ​ບັນຫາ​ໃຫ້​ຄະນະ​ສະພາ​ຜູ້​ແທນ​ເຂົ້າໃຈ.

ຂ່າວທີ່ກ່ຽວຂ້ອງ