ຂ່າວຫຼ້າສຸດ

ສິດທິ ພະລັງຂອງໄວໜຸ່ມຍິງ ວິໃສທັດ 2030

443 12 ຕ.ລ. 2017 ຂ່າວໜ້າ​ໜຶ່ງ
ສິດທິ ພະລັງຂອງໄວໜຸ່ມຍິງ ວິໃສທັດ 2030

ສູນ​ກາງ​ສະຫະພັນ​ແມ່ຍິງລາວ ຮ່ວມ​ກັບ​ກະຊວງ​ສຶກ​ສາ​ທິການ ແລະ ກີລາ ອົງການ​ສະຫະປະຊາ​ຊາດ ກອງ​ທຶນ​ສຳລັບ​ປະຊາ​ກອນ ປະຈຳ​ພາກ​ພື້ນ​ອາຊີ-ປາ​ຊີ​ຟິກ ແລະ ກະຊວງ​ແຜນການ ແລະ ການ​ລົງທຶນ ຈັດ​ງານ​ສະເຫຼີມ​ສະຫຼອງ​ວັນເດັກນ້ອຍ​ຍິງ 2017 ໃນ​ວັນ​ທີ 11 ຕຸລາ 2017 ທີ່ໂຮງແຮມ​ຄຣາວ​ພລາ​ຊາ ໂດຍການ​ເປັນ​ປະທານ​ຂອງ​ທ່ານ​ນາງ ອິນ​ລາ​ວັນ ແກ້ວ​ບຸນ​ພັນ ປະທານສູນ​ກາງ​ສະຫະພັນ​ແມ່ຍິງ​ລາວ ທ່ານ​ນາງ ເຈນ​ນິ​ເຟີ ບຸດ​ເລີ (Ms. Jennifer Butler) ຮອງ​ຫົວໜ້າ​ຫ້ອງການ ອົງການ ສປຊ ກອງ​ທຶນ​ສຳລັບ​ປະຊາກອນ ປະຈຳ​ພາກ​ພື້ນ​ອາຊີ-ປາ​ຊີ​ຟີກ ບາງກອກ​ປະເທດ​ໄທ ບັນດາ​ທ່ານ​ຫົວໜ້າ​ກົມ ຮອງ​ກົມ ອົງ​ການຈັດຕັ້ງສາກົນ ແຂກ​ຖຶກ​ເຊີນ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ທ່ານ​ນາງ ອິນ​ລາ​ວັນ ແກ້ວບຸນ​ພັນ ກ່າວ​ວ່າ: ໃນ​ນາມ​ຄະນະກຳມາ​ທິ​ການ​ແຫ່ງ​ຊາດ ເພື່ອຄວາມ​ກ້າວໜ້າ​ຂອງ​ແມ່ຍິງ ແລະ ແມ່-ເດັກ ຂໍ​ຂອບໃຈ ແລະ ຕ້ອນຮັບ​ບັນດາ​ທ່ານ​ທີ່​ເຂົ້າ​ຮ່ວມງານ​ສະເຫຼີມສະຫຼອງ​ຄັ້ງ​ນີ້ ໃນ​ຫົວຂໍ້ ພະລັງ​ຂອງ​ໄວ​ໜຸ່ມ ວິ​ໃສ​ທັດ 2030 ເຊິ່ງ​ໄດ້​ຮັບ​ການ​ສະໜັບສະ​ໜູນ​ໂດຍ​ອົງການ UNFPA ເປັນ​ການ​ເປີດ​ໂຕ​ນາງ​ນ້ອຍ ທີ່ເປັນ​ຕົວ​ແທນ​ໃຫ້​ແກ່​ໄວ​ໜຸ່ມ​ຍິງລາວ ອາຍຸ 10-19 ປີ ​ທັງໝົດ 700.230 ຄົນ ໃນ ​ສປປ ລາວ ເພື່ອ​ໃຫ້​ເຂົາເຈົ້າ​ໄດ້​ຮັບ​ສິດ​ໃນການ​ພັດທະນາ ເຂົ້າ​ເຖິງ​ການ​ສຶກສາ ສາທາລະນະ​ສຸກ ປາ​ສະຈາກ​ການ​ໃຊ້​ຄວາມ​ຮຸນ​ແຮງ ຫຼີກເວັ້ນ​ການ​ແຕ່ງດອງ​ກ່ອນ​ໄວ​ອັນຄວນ ກ້າວ​ຂຶ້ນ​ເປັນ​ຜູ້​ໃຫຍ່​ທີ່ພຽບ​ພ້ອມ​ໄປ​ດ້ວຍ​ຄວາມ​ຮູ້ ຄວາມ​ສາມາດ ມີ​ສຸຂະພາບ​ແຂງແຮງ ແນໃສ່​ເປັນ​ກຳລັງ​ແຮງ​ຊຸກຍູ້​ໃຫ້​ບັນລຸ​ທຸກ​ເປົ້າ​ໝາຍ​ຂອງ​ສະຫັດ​ສະ​ວັດ.

ງານ​ສະເຫຼີມສະຫຼອງ​ໃນ​ຄັ້ງ​ນີ້ ຍັງ​ໄດ້​ເປີດ​ເວທີ​ສົນທະນາຂອບແຜນ​ງານນ້ອຍ 2030 ແລກປ່ຽນ​ທັດສະນະ​ຄວາມ​ຄິດ​ຄວາມເຫັນ​ຂອງ​ແຕ່​ລະ​ພາກສ່ວນ​ທີ່​ເຂົ້າຮ່ວມ​ງານ ໂດຍ​ມີ​ສະຫະພັນ​ແມ່ຍິງ​ລາວ ກະຊວງ​ສຶກ​ສາ​ທິ​ການ ແລະ ກີລາ ກະຊວງ​ແຮງ​ງານ ແລະ ສະຫວັດດີ​ການ-ສັງຄົມ ກະຊວງ​ສາທາລະນະ​ສຸກ ອົງການແພລນ​ສາກົນ ແລະ ສະຫະພາບເອີ​ຣົບ (EU) ເຂົ້າ​ຮ່ວມ​ສົນ​ທະນາ​ໃນ​ບັນດາ​ຫົວຂໍ້​ຕ່າງໆ​ຮ່ວມກັນ ເພື່ອ​ຄວາມ​ເປັນ​ເອກະ​ພາບເນັ້ນ​ສິດທິ​ຂອງ​ເດັກ​ຍິງ.

ຂ່າວທີ່ກ່ຽວຂ້ອງ