ແບ່ງ​ສາຍ​ແລ້ວ ຊ່ວງ​ເຮືອ​ທົ່ວ​ນະ­ຄອນ­ຫຼວງ ທີ່​ບຶງ​ທາດ­ຫຼວງ

331 18 ຕ.ລ. 2017 ວົງຈອນກີລາ
ແບ່ງ​ສາຍ​ແລ້ວ ຊ່ວງ​ເຮືອ​ທົ່ວ​ນະ­ຄອນ­ຫຼວງ ທີ່​ບຶງ​ທາດ­ຫຼວງ

    ພິ­ທີ​ຈັບ​ສະ­ຫຼາກ​ການ​ແຂ່ງ­ຂັນ​ຊ່ວງ​ເຮືອ​ຍາວ​ປະ­ເພ­ນີ​ຍິງ-ຊາຍ ປະ­ເພດ 55 ສີ­ພາຍ ເຮືອ​ສູດ​ຊາຍ 55 ສີ­ພາຍ ເຮືອ​ກິ­ລາ 12 ສີ­ພາຍ ແລະ ເຮືອ​ເຈ​ັສ​ກີ ທົ່ວ​ນະ­ຄອນ­ຫຼວງ​ວຽງ​ຈັນ (ນວ) 2017 ທີ່​ບຶງ​ທາດ­ຫຼວງ ເມືອງ​ໄຊ​ເຊດ​ຖາ ນວ ໄດ້​ມີ​ຂຶ້ນ​ວັນ​ທີ 17 ຕຸ­ລາ 2017 ທີ່​ຫ້ອງ­ການ​ສຶກ​ສາ​ທິ​ການ ແລະ ກີ­ລາ ເມືອງ​ໄຊ​ເຊດ​ຖາ ມີ​ທ່ານ ບຸນ​ປີງ ປັນ­ຍາ​ຈິດ ຮອງ​ເຈົ້າ­ເມືອງ ທ່ານ ກອງ​ແກ້ວ ແຫ່ງ​ດາ​ວົງ​ໄຊ ຫົວ­ໜ້າ​ຂະ­ແໜງ​ກີ­ລາ​ລະ­ດັບ​ສູງ ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ມີ​ຫົວ­ໜ້າ​ຫ້ອງ­ການ​ສຶກ​ສາ​ທິ​ການ ແລະ ກີ­ລາ​ເມືອງ ພ້ອມ​ດ້ວຍ​ຄະ­ນະ ແລະ ບັນ­ດາ​ຫົວ­ໜ້າ​ເຮືອ​ພາກ­ສ່ວນ​ຕ່າງໆ ແລະ ພະ­ນັກ­ງານ​ທີ່​ກ່ຽວ­ຂ້ອງ​ເຂົ້າ​ຮ່ວມ.

    ສຳ­ລັບ​ເຮືອ​ທີ່​ເຂົ້າ​ຮ່ວມ​ແຂ່ງ­ຂັນ ປະ­ເພ­ນີ​ຊາຍ ມີ 9 ລຳ ປະ­ເພ­ນີ​ຍິງ 5 ລຳ ແລະ ເຮືອ​ສູດ​ຊາຍ ມີ 5 ລຳ ທັງ 2 ລາຍ­ການ​ຈາກ 3 ປະ­ເພດ​ເຮືອ​ດັ່ງ­ກ່າວ ກຳ­ນົດ​ໃຫ້​ຈັດ​ເປັນ​ກຸ່ມ​ດຽວ​ແຂ່ງ­ຂັນ​ພົບ​ກັນ​ໝົດ​ຄັດ​ເອົາ​ທີ 1-2 ຜ່ານ​ເຂົ້າ​ຊີງ​ຊະ­ນະ​ເລີດ ສ່ວນ ທີ 3 ແລະ ທີ 4 ແມ່ນ​ຄັດ​ເອົາ​ເຮືອ​ທີ່​ມີ​ຄະ­ແນນ​ດີ​ຈັດ​ຕາມ​ລຳ­ດັບ ສ່ວນ​ເຮືອ​ກີ­ລາ 12  ສີ­ພາຍ ມີ​ທັງ​ໝົດ 28 ລຳ ແບ່ງ​ອອກ​ເປັນ 8 ສາຍ ແຕ່​ລະ​ສາຍ​ແຂ່ງ­ຂັນ​ພົບ​ກັນ​ໝົດ ຄັດ​ເອົາ​ເຮືອ​ທີ່​ມີ​ຄະ­ແນນ​ດີ ອັນ​ດັບ​ທີ 1-2 ຜ່ານ​ເຂົ້າ​ຮອບ​ຕໍ່​ໄປ.

    ໂອ­ກາດ​ນີ້ ທ່ານ ບຸນ​ປີງ ປັນ­ຍາ​ຈິດ ກໍ່​ໄດ້​ເນັ້ນ​ໜັກ​ໃຫ້​ຄະ­ນະ​ຮັບ­ຜິດ­ຊອບ ແລະ ຄະ­ນະ​ນຳ­ພາ​ເຮືອ​ເຂົ້າ​ຮ່ວມ​ແຂ່ງ­ຂັນ​ຄັ້ງ​ນີ້ ໃຫ້​ເພີ່ມ​ທະ­ວີ​ຄວາມ​ເອົາ­ໃຈ­ໃສ່​ເຂົ້າ​ໃນ​ການ​ແຂ່ງ­ຂັນ ເພື່ອ​ເຮັດ​ແນວ­ໃດ​ໃຫ້­ການ​ແຂ່ງ­ຂັນ​ມີ​ບັນ­ຍາ­ກາດ​ຟົດຟື້ນ ແລະ ສຳ­ເລັດ​ຢ່າງ​ສົມ­ບູນ ບັນ­ລຸ​ເປົ້າ​ໝາຍ​ທີ່​ວາງ​ໄວ້ ທັງ​ນີ້ ກໍ່​ເພື່ອ​ເປັນ​ການ​ຫຼີກ­ເວັ້ນ​ບັນ­ຫາ​ຫຍໍ້­ທໍ້​ຕ່າງໆ ພ້ອມ​ທັງ​ຈັດ​ໃຫ້​ມີ​ການ​ໂຄ­ສະ­ນາ​ປະ­ຊາ­ສຳ­ພັນ​ຢ່າງ​ກວ້າງ­ຂວາງ ເພື່ອ​ສົ່ງ­ເສີມ​ການ­ທ່ອງ­ທ່ຽວ​ຂອງ​ລາວ ກໍ່​ຄືນະ­ຄອນ­ຫຼວງ​ວຽງ​ຈັນ ໃຫ້​ນັບ​ມື້​ກວ້າງ­ຂວາງ​ຂຶ້ນ​ເລື້ອຍໆ.

ຂ່າວທີ່ກ່ຽວຂ້ອງ