ໄວ​ລຸ້ນ​ຕິດ​ການ​ພະ­ນັນ - ໂດຍ : ດັ້ນ​ກີບ​ເມກ

162 06 ພ.ຈ. 2017 ນານາສາລະ

ຜູ້​ຂຽນ​ຄິດ​ແລ້ວ​ຄິດ​ອີກວ່າ​ຈະ​ຂຽນ​ດີ ຫຼື ບໍ່ ສຸດທ້າຍ​ກໍ່​ຕ້ອງ​ໄດ້​ຂຽນ​ ເພາະ​ມັນ​ແມ່ນ​ໜ້າ­ທີ່ ແລະ ຈັນ​ຍາ​ບັນ ຝາກ​ຜູ້​ປົກ­ຄອງທັງ​ພໍ່​ແມ່ ແລະ ສະ​ຖາບັນ​ກ່ຽວ­ຂ້ອງ​ ໄດ້​ຊ່ວຍ​ກັນ​ເບິ່ງ­ແຍງ​ຄວບ​ຄຸມ ແລະ ອົບ­ຮົມ​ສັ່ງ­ສອນ​ລູກ​ຫຼານ​ຂອງ​ຕົນ​ໃຫ້​ໃຊ້​ຊີ­ວິດ​ທີ່​ດີ­ງາມ ຖືກ­ຕ້ອງ​ຕາມ​ຄວາມ​ເໝາະ​ສົມ ໝາຍຄວາມ​ວ່າ ຖ້າ​ຢູ່​ໃນ​ໄວ​ສຶກ​ສາ​ຮຽນ​ຮູ້​ ກໍ່​ຄວນ​ເອົາເລື່ອງ​ຮຽນ​ເປັນ​ຫຼັກ ແລະ ອອກ­ກຳ­ລັງ​ກາຍ ຫຼິ້ນກີ­ລາ​ເປັນ​ສຳ­ຄັນ ໂດຍ​ຫຼີກ­ເວັ້ນ​ການ​ທ່ຽວ​ຫຼິ້ນ​ເກມ ຫຼື ແອບ​ຫຼິ້ນ​ພະ­ນັນ​ບານ ເຊິ່ງ​ເປັນ​ທີ່​ມາ​ຂອງ​ການເສຍ​ຊັບ ແລະ ເສຍ​ອະ­ນາ­ຄົດ.

ເລື່ອງ​ໄວ​ລຸ້ນ​ຕິດ​ການ​ພະ­ນັນ​ຄິດ​ວ່າ ​ຜູ້​ຂຽນ​ພຽງແຕ່​ສາ­ມາດ​ຍົກ​ຕົວ­ຢ່າງ​ສົມ­ມຸດ​ເອົາ​ເທົ່າ​ນັ້ນ ເພາະຖ້າ​ນຳ​ເອົາ​ຕົວ​ຈິງ​ມາສະ­ເໜີ ກໍ່​ອາດ​ຈະ​ເຮັດ​ໃຫ້ຫຼາຍ​ຄົນ​ບໍ່​ເຫັນ​ດີ ແລະ ມີ​ຜົນ​ລົບ​ຕໍ່​ຜູ້­ກ່ຽວ ເຊິ່ງ​ພຶດຕິ​ກຳ​ຂອງ​ໄວ​ລຸ້ນ (ຢູ່​ໃນ​ໄວ​ຮຽນ) ອາດເບິ່ງ​ເຫັນຜົນ​ປະ­ໂຫຍດ​ລໍ້​ໃຈ​ໃນ​ການ​ພະ­ນັນ ເຊັ່ນ: ການ​ຫຼິ້ນພະ­ນັນ​ເຕະ­ບານ​ທາງ​ອິນ​ເຕີ​ເນັດ ທຳ​ອິດ​ອາດ​ໄດ້ເງິນ ພໍ​ຫຼິ້ນດົນ​ໄປ​ມີ​ທັງ​ໄດ້ ແລະ ເສຍ​ເງິນ ຈາກເສຍ​ໜ້ອຍ​ກາຍ­ເປັນ​ເສຍ​ຫຼາຍ ​ຈົນ​ບໍ່​ສາ­ມາດ​ຫາເງິນ​ໄປ​ໃຊ້​ເຈົ້າ­ມື ເມື່ອ​ຕົນ​ເອງ​ເປັນໜີ້​ພະ­ນັນ ກໍ່​ບໍ່ໄປ​ໂຮງ­ຮຽນ ສ່ວນ​ເງິນ​ທີ່​ພໍ່​ແມ່​ຝາກ​ໃຫ້​ຈ່າຍ​ຄ່າເທີມ​ກໍ່​ໄປ​ຫຼິ້ນ​ພະ­ນັນ​ໝົດ ທາງ​ຝ່າຍ​ເຈົ້າ​ໜີ້​ໄດ້​ໃຫ້ລູກ​ນ້ອງມາ​ຄອຍ​ຕິດ­ຕາມ​ທວງ​ໜີ້ ເຮັດ​ໃຫ້​ຜູ້­ກ່ຽວຕ້ອງ​ໄດ້​ໃຊ້​ຊີ­ວິດ​ຫຼົບໆ​ຊ່ອນໆ​ນຳ​ໝູ່ ຫຼື ບໍ່​ດັ່ງ­ນັ້ນກໍ່​ໄປ​ຕົວະ​ຢືມ​ເງິນ​ນຳ​ໝູ່​ຄົນ​ອື່ນຕໍ່ ເພື່ອ​ມາ​ໃຊ້​ໜີ້ ນີ້​ແຫຼະມັນ​ເປັນ​ພຽງ​ຕົວ­ຢ່າງ ຜູ້​ຂຽນ​ໄດ້​ຮູ້​ເຫັນ​ມາ ແລະ ເຊື່ອ​ວ່າ​ທ່ານ​ຜູ້​ອ່ານ​ຫຼາຍ​ຄົນ​ອາດ​ຮູ້​ເຫັນເລື່ອງແບບ​ນີ້​ເຊັ່ນ​ກັນ ເພາະ­ວ່າ​ຜົນ​ເສຍ​ຫາຍ​ຈາກການ​ຕິດ​ພະ­ນັນ​ຈົນ​ເປັນ​ໜີ້ ມັນ​ກໍ່​ສາ­ມາດ​ກາຍເປັນ​ວົງ​ຈອນ​ອຸ­ບາດ​ລາມ​ໄປເຖິງ​ການ​ສຶກ​ສາ​ຂອງຜູ້­ກ່ຽວ ເມື່ອ​ຮຽນ​ບໍ່​ຈົບ​ຊີ­ວິດ​ກໍ່​ເພ­ພັງ ຫຼື ມີ​ບັນ­ຫາ​ອື່ນໆ​ຕາມ​ມາ.

ຄວາມ​ຈິງ​ບັນ­ຫາ​ຂອງ​ຄົນ​ຢູ່​ໃນ​ອາ­ຍຸ​ໄວ​ລຸ້ນ ກໍ່ຈະ​ມີ​ແນວ​ຄິດ​ບໍ່​ໝັ້ນ­ຄົງ ເຊື່ອ​ງ່າຍ ແລະ ຕິດ​ໄວ ຂາດ​ການ​ຢັ້ງ​ຄິດ ເມື່ອ​ບໍ່​ຮູ້ປຶກ­ສາ ຫຼື ຂາດ​ຄົນ​ເບິ່ງແຍງ​ໃກ້­ຊິດ ກໍ່​ຈະ​ມີ​ຄວາມ​ສ່ຽງ​ຕໍ່​ພຶດ­ຕິ​ກຳ​ເສ​ເພເຮ​ຮາ​ໄປ​ຕາມ​ຂະ​ບວນ​ການ ເພາະ​ມັນ​ຕິດ​ມາ​ນຳໝູ່­ຄູ່ ບາງ​ຄົນ​ອອກ​ໂຮງ­ຮຽນ ຫຼື ພໍ່​ແມ່​ໝົດ​ປັນ­ຍາ ສັ່ງ­ສອນ​ບໍ່​ຟັງ​ຄວາມ ​ກໍ່​ໄດ້​ແຕ່​ປ່ອຍ​ຕາມ­ໃຈ ເມື່ອເກີດ​ແນວ​ນັ້ນ​ ທາງ​ແກ້ຄື ພໍ່​ແມ່​ຜູ້​ປົກ­ຄອງ​ຕ້ອງ​ຕັດໄຟ​ແຕ່​ຕົ້ນ​ລົມ ແລະ ແກ້​ບັນ­ຫາ​ຕົ້ນ​ເຫດ ຄື​ຕ້ອງປ້ອງ​ກັນ​ດ້ວຍ​ການ​ລ້ຽງ​ດູ​ເບິ່ງ­ແຍງ​ຢ່າງ​ໃກ້­ຊິດ ໂດຍ​ຮ່ວມ​ມື​ກັບ​ສະ​ຖາ​ບັນ​ການ​ສຶກ​ສາ ໃຫ້​ແຈ້ງເຕືອນ​ພຶດ­ຕິ​ກຳ​ຂອງ​ລູກ​ຕົນ​ເອງ ເຊັ່ນ: ຂາດ​ໂຮງຮຽນ​ໂດຍ​ບໍ່​ມີ​ສາ­ເຫດ ເລື່ອງ​ນີ້​ພໍ່​ແມ່​ຜູ້​ປົກ­ຄອງຕ້ອງ​ຍອມ­ຮັບ​ຟັງ ຍອມ­ຮັບ​ຄວາມ​ຈິງ​ຈາກ​ຫຼາຍຝ່າຍ​ທີ່​ສົ່ງ​ຂ່າວ​ຕຳ​ໜິ ບໍ່​ດັ່ງ­ນັ້ນ ຈະ​ມີ​ແຕ່​ຫຼົງ​ຄິດວ່າ​ລູກ​ຕົນ​ເອງ​ດີ​ໝົດ ແລະ ຄິດ​ວ່າ​ລູກ​ຕົນ​ເອງ​ຄືຊິ​ບໍ່​ເປັນ​ດັ່ງ​ເຂົາ​ເວ​ົົ້າ​ກັນ ໃນ​ຄວາມ​ເປັນ​ຈິງ ໄດ້​ຍິນພໍ່​ແມ່​ຜູ້​ປົກ­ຄອງ​ຫຼາຍທ່ານ​ທີ່­ຢູ່​ໃນ​ສະ­ພາບ​ທຸກ​ໃຈນຳ​ພຶດ­ຕິ​ກຳ​ຂອງ​ລູກ​ຫຼາຍ​ແບບ ເຊັ່ນ: ມີ​ທັງ​ຂູ່​ໃຫ້ຊື້​ໂທລະ­ສັບ​ຍີ່­ຫໍ້​ທີ່​ຕ້ອງ­ການ ແລະ ລູກ​ບາງຄົນ​ກໍ່ໄປ​ທ່ຽວ​ບໍ່​ມາ​ເຮືອນ ພໍ​ໂທ​ຖາມ​ກໍ່​ບອກ​ວ່າ​ຫຼິ້ນ​ຢູ່ເຮືອນ​ໝູ່ ຫຼື ນອນ​ເຮືອນ​ໝູ່ ເມື່ອ​ເປັນ​ແນວ​ນີ້ ພໍ່ແມ່​ຜູ້​ປົກ­ຄອງ​ຕ້ອງໄດ້​ຮ່ວມ​ມື​ກັນ​ໃຊ້​ມາດ​ຕະ­ການເດັດ­ຂາດ.

ເລື່ອງ​ໄວ​ລຸ້ນ​ຕິດ​ການ​ພະ­ນັນ​ນີ້ ມັນ​ເປັນ​ວົງ​ຈອນອຸ­ບາດດຶງ​ຈ່ອງ​ໃຫ້​ເສຍ​ການ​ສຶກ​ສາ ເສຍ​ອະ​ນາຄົດ ພໍ່​ແມ່​ຜູ້​ປົກ­ຄອງ ແລະ ສະ​ຖາ​ບັນ​ກ່ຽວ­ຂ້ອງຕ້ອງ​ໄດ້​ຫາ​ວິ­ທີ​ການ​ແກ້​ໄຂ​ຮ່ວມ​ກັນ ບໍ່​ວ່າ​ຢູ່​ບ້ານເຮືອນ ຫຼື ສະ​ຖາ​ບັນ​ການ​ສຶກ​ສາ ​ກໍ່​ຄວນ​ມີ​ຫຼັກ­ການ ແລະ ລະ­ບຽບ​ການ​ໃນ​ການ​ປ້ອງ​ກັນ​ຄວບ​ຄຸມ​ພຶດຕິ​ກຳ​ຂອງ​ໄວ​ລຸ້ນ ເພື່ອ​ບໍ່​ໃຫ້​ເສຍ​ອະ­ນາ­ຄົດ​ຂອງຊາດ ເພາະເລື່ອງ​ແບບ​ນີ້ມັນ​ອາດ​ເປັນ​ໄພ​ງຽບ​ທີ່ຜູ້​ປົກ­ຄອງ​ອາດ​ຂໍ​ສະ­ເໜີ​ເປັນ​ຂໍ້​ຄິດ? ຂາດ​ສະ­ຕິ ຖື​ເບົາ ສຸດ​ທ້າຍ​ຈະ​ຈົ່ມ​ເສຍ​ໃຈ​ພາຍ­ຫຼັງ.

ຂ່າວທີ່ກ່ຽວຂ້ອງ