ເບິ່ງບ້ານເຂົາເອົາບົດຮຽນ - ໂດຍ : ວິເສດ ສະແຫວງສຶກສາ : ມຽນ​ມາ ຟິ​ລິບ​ປິນ ສປ ຈີນ

115 07 ພ.ຈ. 2017 ຫົວຂໍ້ຂ່າວອື່ນໆ

ພົບ​ກັນ​ປະ­ຈຳ​ວັນ​ນີ້ ຂໍ​ທົບ​ທວນ​ຫວນ​ຄືນ​ຂ່າວເກົ່າໆ ແຕ່​ຍັງ​ມີ​ຄຸນ­ຄ່າ​ກ່ຽວ​ກັບ​ນະ­ໂຍ­ບາຍ​ປະ­ຢັດມັດ­ທະ­ຍັດ​ຂອງ​ມຽນ​ມາ ຕໍ່​ໃສ່​ເລື່ອງ​ມາດ​ຕະ­ການປ້ອງ​ກັນ​ຄວາມ​ປອດ​ໄພ​ໃນ​ຟິ​ລິບ​ປິນ ເຊິ່ງ​ຈະ​ເປັນເຈົ້າ­ພາບ​ກອງ​ປະ­ຊຸມ​ສຸດ​ຍອດ​ອາ​ຊຽນ ສຸດທ້າຍແມ່ນ​ຂ່າວ​ກ່ຽວ​ກັບ​ຄຳ​ແນະ­ນຳ​ຂອງ​ຜູ້­ນຳ ສປ ຈີນ ຕໍ່​ກອງ­ທັບ.

ທີ່ ມຽນ​ມາ: ດັ່ງ​ທີ່​ເປັນ​ຂ່າວ​ມາ​ເມື່ອ​ຕົ້ນ​ປີ 2016 ວ່າ ທາງ​ການ​ມຽນ​ມາ​ໄດ້​ວາງ​ນະ­ໂຍ­ບາຍ​ປະ­ຢັດຮັດ​ສາຍ­ແອວ​ອອກ​ດ້ວຍ​ວິ­ທີ​ຕັດ​ເບ້ຍ­ລ້ຽງ ຫຼື ເງິນອຸດ​ໜູນ (Allowance) ພະ­ນັກ­ງານ​ການ​ນຳ ສະມາ​ຊິກ​ລັດ­ຖະ­ບານ (ລັດ​ຖະ​ມັນ​ຕີ) ແລະ ບັນ­ດາພະ­ນັກ­ງານ​ຂັ້ນ​ສູງ​ອື່ນໆ​ຂອງ​ລັດ ເອີ້ນ​ໄດ້​ວ່າ​ເປັນການ​ປັບ​ແຕ່​ຂັ້ນ​ເທິງ​ລົງ​ລຸ່ມ ຄ້າຍ​ກັບ​ນະ­ໂຍ­ບາຍຕັດ​ການ​ໃຊ້ຈ່າຍ​ຟູມ​ເຟືອຍ​ຫຼູ​ຫຼາ​ທີ່​ບໍ່​ຈຳ­ເປັນ​ຢູ່​ບ້ານເຮົາ​ໃນ​ປັດ­ຈຸ­ບັນ.

ທ່ານ ມິນ​ວິນ ປະ­ທານ​ສະ­ພາ​ຜູ້​ແທນ​ລາ­ຊະດອນ​ມຽນ​ມາ ມີ​ຄຳ​ເວົ້າ​ເດັດໆ​ກ່ຽວ​ກັບ​ນະ​ໂຍບາຍ​ປະ­ຢັດ​ຄັ້ງ​ນີ້​ວ່າ “ເບ້ຍ­ລ້ຽງ​ທີ່​ພະ­ນັກ­ງານພວກ​ເຮົາ​ໄດ້​ຮັບ​ແມ່ນ​ໄດ້​ມາ​ຈາກ​ພາ­ສີ​ທີ່​ປະ­ຊາ­ຊົນເປັນ​ຜູ້​ຈ່າຍ ສະ­ນັ້ນ ພວກ​ເຮົາ​ຕ້ອງ​ເອົາ­ໃຈ­ໃສ່​ດູ​ແລ ປະ­ຊາ­ຊົນ​ໃຫ້​ຫຼາຍ​ທີ່​ສຸດ​ເທົ່າ​ທີ່​ສາ­ມາດ​ເຮັດ​ໄດ້ ປະ­ຊາ­ຊົນ​ແມ່ນ​ເປົ້າ​ໝາຍ​ບຸ­ລິ­ມະ­ສິດ​ຂອງ​ພວກ​ເຮົາ ເນື່ອງ​ຈາ​ກວ່າ​ປະ­ເທດພວກ​ເຮົາ​ຍັງ​ທຸກ​ຍາກ ພວກເຮົາ​ຕ້ອງ​ຫຼຸດ​ການ​ໃຊ້​ຈ່າຍ​ຂອງ​ລັດ­ຖະ­ບານ ແລະ ສືບ­ຕໍ່​ປັບ​ຫຼຸດ​ໃຫ້​ຫຼາຍ​ຂຶ້ນ” ຢູ່​ມຽນ​ມາ ປະທາ​ນາ​ທິບໍ­ດີ​ໄດ້​ຮັບ​ເງິນ­ເດືອນໆ​ລະ 50 ລ້ານ​ຈາດ (1 ຈາດ ມີ​ມູນ​ຄ່າ​ເກືອບ 7 ກີບ) ສ່ວນ​ການ​ນຳ​ຂັ້ນ​ຫຼຸດ​ມາ ໄດ້​ຮັບ​ເດືອນລະ 40 ລ້ານ​ຈາດ ລົງ​ມາ​ຈຳ­ນວນ 30 ລ້ານ​ຈາດ (ສຳ­ລັບ​ລະ­ດັບ​ລັດ​ຖະ​ມັນ​ຕີ ແລະ ທຽບ​ເທົ່າ) ນັ້ນ​ແມ່ນ​ຂັ້ນ​ເງິນ­ເດືອນ ສ່ວນ​ເງິນ​ນະໂຍ​ບາຍ ຫຼື ອຸດ​ໜູນ​ນັ້ນ​ແມ່ນ​ພູດ​ໃຊ້​ຈ່າຍ​ສຳ­ລັບ​ທີ່ພັກ​ການ​ປິ່ນ­ປົວ​ພະ­ຍາດ ການ​ຮັກ­ສາ​ຄວາມ​ປອດໄພ ຄ່າ​ໂທລະ­ສັບ ຄ່າ​ເຈົ້າ​ໜ້າ­ທີ່​ຮັບ​ໃຊ້​ປະ­ຈຳ​ຕົວ ຄົນ​ໃຊ້​ປະ­ຈຳ​ຄົວ​ເຮືອນ ເຄື່ອງ​ລົດ​ໃຫຍ່​ຮັບ​ໃຊ້ ແລະ ອື່ນໆ (ບົດ​ນີ້​ສັງ​ລວມ​ຈາກ​ໜັງ­ສື­ພິມ​ຜູ້​ແທນປະ­ຊາ­ຊົນ ສະ­ບັບ 314 ເມ­ສາ 2016).

ທີ່ ຟິ​ລິບ​ປິນ: ແຕ່​ວັນ​ທີ 8 ເຖິງ​ວັນ​ທີ 15 ເດືອນພະ­ຈິກ​ນີ້ ຟິ​ລິບ​ປິນ​ຈະ​ໄດ້​ເປັນ​ເຈົ້າ­ພາບ​ກອງ​ປະ­ຊຸມສຸດ​ຍອດ​ອາ​ຊຽນ ແລະ ອາ­ຊີ​ຕາ­ເວັນ​ອອກ ການປ້ອງ​ກັນ​ຄວາມ​ປອດ​ໄພ​ແມ່ນ​ວຽກ​ບຸ­ລິ­ມະ­ສິດ ເພື່ອຮັບ­ປະ­ກັນ​ເຫຼົ່າ​ຜູ້­ນຳ​ບັນ­ດາ​ປະ­ເທດ​ສະ­ມາ­ຊິກໂດຍທາງ​ການ​ຂອງ​ປະ­ເທດ​ນີ້​ ຈະ​ໄດ້​ນຳ​ໃຊ້​ກຳ­ລັງ​ທະຫານ ແລະ ຕຳ­ຫຼວດ ຈຳ­ນວນ 60 ພັນ​ຄົນ ເພື່ອປະ­ຈຳ­ການ​ຢູ່ນະ­ຄອນ­ຫຼວງ​ມະ­ນິ­ລາ ແລະ ເມືອງປ່າ​ປັງ​ກາ.

ຈຸດ​ຂອງ​ການ​ປ້ອງ​ກັນ​ເວນ­ຍາມ​ໄດ້­ແກ່: ສະໜາມ​ບິນ ເສັ້ນ­ທາງ ສະ­ຖານ­ທີ່​ປະ­ຊຸມ​ທຸກ​ແຫ່ງ ແລະ ສະ­ຖານ­ທີ່​ທ່ອງ​ທ່ຽວຂອງ​ຜູ້​ແທນ ແລະ ແຂກ ນອກ­ຈາກ​ນັ້ນ ທາງ​ການ​ຍັງ​ໄດ້​ແຈ້ງ​ໃຫ້​ປະຊາ​ຊົນ​ຊາບ​ກ່ຽວ​ກັບ​ແຜນ​ປິດ​ເປັນ​ພາກ­ສ່ວນ ແລະ ປິດ​ແບບ​ຖາ­ວອນເສັ້ນ­ທາງ​ສູ່​ສະ­ຖານ­ທີ່​ກອງ​ປະຊຸມ​ໃນ​ໄລ­ຍະ​ແຕ່​ວັນ​ທີ 8 ເຖິງ 15 ເດືອນ​ພະ­ຈິກ​ນີ້ ລັດ­ຖະ­ບານ​ຟິ​ລິບ​ປິນ​ໄດ້​ອອກ​ຄຳ​ສັ່ງ​ຫ້າມ​ບຸກ­ຄົນ​ທີ່​ບໍ່​ມີ​ສ່ວນ​ພົວ­ພັນ​ກັບ​ການ​ປ້ອງ​ກັນ​ຄວາມ​ປອດ​ໄພ ພົກ​ພາ​ປືນ​ໃນ​ກຳ­ນົດ 15 ວັນ ນັບ​ແຕ່​ວັນ​ທີ 1 ເດືອນ​ພະ­ຈິກ​ນີ້​ເປັນ­ຕົ້ນ​ໄປ ຄຳ​ສັ່ງ​ນີ້​ມີ​ຜົນ​ສັກ­ສິດໃນ​ນະ­ຄອນ­ຫຼວງ​ມະ­ນິ­ລາ ແລະ 12 ແຂວງ​ອ້ອມແອ້ມ.

ທີ່ ສປ ຈີນ: ຫວ່າງ​ມໍ່ໆມານີ້ (ໜັງ­ສື­ພິມ ​ວຽງຈັນ ​ທາມ 6/11/2017) ທ່ານ ສີ ​ຈິ້ນ​ຜິງ ປະ­ທານປະ­ເທດ ແຫ່ງ ສປ ຈີນ ໄດ້ໄປ​ເຄື່ອນ​ໄຫວ​ກວດ­ກາສູນ​ບັນ­ຊາ​ການ​ທະ­ຫານທີ່​ນະ­ຄອນ­ຫຼວງ​ປັກ​ກິ່ງ ແລະ ໄດ້​ມີ​ຄຳ​ເຫັນ​ແນະ­ນຳ​ໃຫ້​ກອງ­ທັບ​ປົດ​ປ່ອຍປະ­ຊາ­ຊົນ​ຈີນ ​ເອົາ­ໃຈ­ໃສ່​ທຸກ​ວິ­ທີ​ທາງ​ເພື່ອ​ຍົກ​ສູງຄວາມ​ສາ­ມາດ​ໃນ​ການ​ສູ້​ຮົບ ໂດຍ​ໃຫ້​ເຫດ­ຜົນ​ວ່າ ສປ ຈີນ ພວມຢູ່​ໃນ​ໄລ­ຍະ​ເວ­ລາ​ທີ່​ສຳ­ຄັນ​ຍິ່ງ ບົນເສັ້ນ­ທາງ​ສູ່​ການ​ເປັນ​ປະ­ເທດ​ມະ­ຫາ​ອຳ­ນາດ​ໂລກ ເຊິ່ງ​ມີ​ທັງ​ອະ­ນາ­ຄົດ​ອັນ​ສົດ­ໃສ ກໍ່​ຄືສິ່ງ​ທ້າ​ທາຍນາໆ​ປະ­ການ.

ຂ່າວທີ່ກ່ຽວຂ້ອງ