ເປີດຂະບວນການລວງຄອງເໝືອງ-ປ່ອຍນ້ຳຊົນລະປະທານ ສະໜອງການຜະລິດລະດູແລ້ງ

740 10 ພ.ຈ. 2017 ຂ່າວໜ້າ​ໜຶ່ງ
ເປີດຂະບວນການລວງຄອງເໝືອງ-ປ່ອຍນ້ຳຊົນລະປະທານ ສະໜອງການຜະລິດລະດູແລ້ງ

ການ​ສ້າງ​ຂະ​ບວນ​ການ​ອະ​ນາໄມ​ລວງ​ຄອງເໝືອງ ແລະ ປ່ອຍນ້ຳ​ຊົນລະປະທານ ສະໜອງ​ໃຫ້ແກ່​ເນື້ອທີ່​ການ​ຜະລິດ​ລະດູແລ້ງ ສົກ​ປີ 2017-2018 ຈັດ​ຂຶ້ນ​ວັນ​ທີ 9 ພະຈິກ 2017 ທີ່​ສະຖານີ​ດົງໂພ​ສີ ເມືອງ​ຫາດ​ຊາຍ​ຟອງ ນະຄອນ​ຫຼວງ​ວຽງ​ຈັນ ມີ​ທ່ານ ສິນລະ​ວົງ ຄຸດ​ໄພທູນ ເຈົ້າ​ຄອງ​ນະຄອນ​ຫຼວງ​ວຽງ​ຈັນ ທ່ານ ລຽນ ທິ​ແກ້ວ ລັດຖະມົນຕີກະຊວງ​ກະສິ​ກຳ ແລະ ປ່າໄມ້ ບັນດາ​ຫົວໜ້າ ຮອງ​ຫົວໜ້າ​ພະ​ແນກ ເຈົ້າເມືອງ ຮອງ​ເຈົ້າເມືອງ ຕະຫຼອດຮອດ​ປະຊາຊົນ​ອ້ອມ​ຂ້າງ​ບ້ານ​ດົງໂພ​ສີ ເຂົ້າ​ຮ່ວມ.

ທ່ານ ຫຼ້າ​ສາຍ ນວນ​ທາ​ສິງ ຫົວໜ້າ​ພະ​ແນກ​ກະສິກຳ ແລະ ປ່າໄມ້ ນະຄອນຫຼວງ​ວຽງ​ຈັນ (ນວ) ລາຍ​ງານ​ໃຫ້​ຊາບ​ວ່າ: ປັດຈຸ​ບັນ ທົ່ວ ນວ ມີ​ລະບົບ​ຊົນ​ລະປະທານ​ທັງ​ໝົດ 80 ແຫ່ງ (ມອບ-ໂອນ​ແລ້ວ 51 ແຫ່ງ) ໃນ​ນັ້ນ ປະກອບ​ມີ​ອ່າງເກັບນ້ຳ 11 ແຫ່ງ ຝາຍ​ນ້ຳ​ລົ້ນ 2 ແຫ່ງ ປະຕູ​ນ້ຳ 2 ແຫ່ງ ຈັກສູບນ້ຳ​ດ້ວຍ​ໄຟຟ້າ 65 ແຫ່ງ ຊົນລະປະທານ​ຝົນຝອຍ 1 ແຫ່ງ ມີ​ກຸ່ມ​ຜູ້ນຳ​ໃຊ້​ນ້ຳ​ທັງ​ໝົດ 135 ກຸ່ມ ມີ​ລະບົບ​ຄອງເໝືອງຍາວ​ທັງ​ໝົດ 471.685 ແມັດ ໃນນັ້ນ ມີ​ຄອງ​ເບ​ຕົງ 47.948 ແມັດ ຄອງເໝືອງ​ແມ່ 184.848 ແມັດ ແລະ ຄອງ​ຮ່ອມ 238.889 ແມັດ ລະບົບ​ຊົນລະປະທານ​ເຫຼົ່ານີ້ ​ສາມາດ​ສະຫຼອງ​ນ້ຳ​ໃຫ້​ແກ່ການ​ຜະລິດ​ລະດູຝົນ ເຂດ​ຊົນ​ລະປະທານ​ໄດ້ 53.000 ເຮັກຕາ ແລະ ເນື້ອທີ່​ສະໜອງ​ນ້ຳ​ເຂດ​ຊົນລະ​ປະທານ 25.000 ເຮັກຕາ ໂດຍ​ແຜນ​ສະໜອງ​ນ້ຳ ປີ​ນີ້ 17.718 ເຮັກຕາ ໃນ​ນັ້ນ ປູກ​ພືດ 1.832 ເຮັກຕາ ແລະ ປູກ​ເຂົ້າ 15.886 ເຮັກຕາ.

ການ​ນຳ​ໃຊ້​ແຫຼ່ງ​ນ້ຳ​ເຂົ້າ​ໃນການ​ຜະລິດ​ຂອງ ນວ ຕົ້ນຕໍ​ແມ່ນແມ່ນ້ຳ​ຂອງ ແມ່ນ້ຳ​ງື່ມ ຫ້ວຍໜອງ​ຄອງ​ບຶງ ແລະ ນ້ຳ​ໃຕ້​ດິນ ເພື່ອ​ສະໜອງ​ນ້ຳ​ໃຫ້​ແກ່​ການ​ຜະລິດ​ລະດູແລ້ງ ດ້ວຍ​ວິທີ​ໄຫຼ​ເອງ ແລະ ໃຊ້​ຈັກສູບນ້ຳ ເຊິ່ງ​ໄລຍະຜ່ານ​ມາ ໄດ້​ສ້າງ​ຂະ​ບວນ​ການ​ອະນາ​ໄມ​ລວງ​ຄອງເໝືອງ​ເປັນ​ປົກກະຕິ ແຕ່​ພາຍຫຼັງ​ກົດໝາຍ​ວ່າດ້ວຍ​ຊົນລະປະທານ​ ໄດ້​ກຳນົດເອົາວັນ​ທີ 3 ພະຈິກ ເປັນ​ວັນ​ຊົນລະ​ປະທານ​ແຫ່ງ​ຊາດ ກໍ່​ຄື ນວ ໄດ້​ຈັດ​ຕັ້ງ​ປະຕິບັດ​ຂຶ້ນ​ມາ​ເປັນ​ເວລາ 6 ປີ​ຕິດຕໍ່​ກັນ.

ສຳລັບ​ການ​ສ້າງ​ຂະ​ບວນ​ການເຮັດອະນາໄມ​ລວງ​ຄອງເໝືອງ ແລະ ປ່ອຍ​ນ້ຳ​ຊົນລະປະທານ​ຄັ້ງນີ້ ແມ່ນ​ມີ​ຄວາມ​ໝາຍ​ສຳຄັນ ເນື່ອງ​ຈາກ​ຖືກ​ກັບ​ເງື່ອນໄຂ ແລະ ກາລະ​ໂອກາດ​ໃນ​ໄລຍະ​ໃໝ່ ກໍ່​ຄືການ​ຜະລິດ​ສະບຽງ​ອາຫານ ແລະ ຜະລິດ​ເປັນ​ສິນຄ້າ ສ້າງວຽກ​ເຮັດ​ງານ​ທຳ​ໃຫ້​ແກ່​ປະຊາຊົນ ແລະ ເຮັດ​ໃຫ້​ເຂົາເຈົ້າ​ມີ​ລາຍຮັບ​ຫຼາຍ​ຂຶ້ນ​ເປັນ​ສ່ວນ​ໜຶ່ງ GDP ຂອງ ນວ ເພີ່ມ​ຂຶ້ນ.

ພະ​ແນກ​ກະສິກຳ ແລະ ປ່າໄມ້ ນວ ຮຽກຮ້ອງ​ມາ​ຍັງ​ປະຊາ​ຊົນ​ບັນດາເຜົ່າ ໂດຍ​ສະເພາະ ຊາວ ນວ ກໍ່​ຄືຊາວ​ເມືອງ​ຫາດຊາຍ​ຟອງ​ ໃຫ້​ຖື​ເອົາ​ວັນ​ທີ 3 ພະຈິກ ເປັນ​ວັນ​ສ້າງ​ຂະ​ບວນ​ການອອກແຮງ​ງານ​ອະນາໄມ​ລວງຄອງເໝືອງ ພ້ອມ​ທັງ​ເປີດ​ນ້ຳ​ຊົນລະ​ປະທານ​ໃຫ້​ເປັນ​ປະເພນີ ແລະ ນຳໄປ​ຈັດ​ຕັ້ງ​ປະຕິບັດ​ຢູ່​ໃນ​ຂັ້ນເມືອງ ຂັ້ນ​ບ້ານ ເພື່ອ​ເປັນ​ການຜັນ​ຂະຫຍາຍ​ເນື້ອ​ໃນ​ຈິດໃຈ ມະຕິກອງ​ປະຊຸມ​ໃຫຍ່ ຄັ້ງ​ທີ X ຂອງພັກ ສືບຕໍ່​ສ້າງ​ຂະ​ບວນ​ການ​ຮັກຊາດ ແລະ ພັດທະນາ ໂດຍ​ຕິດພັນ​ກັບ​ວຽກ​ງານ 3 ສ້າງ ໃຫ້​ປາກົດ​ຜົນ​ເປັນ​ຈິງ.

ຂ່າວທີ່ກ່ຽວຂ້ອງ