ຈັດກິດຈະກຳພາຍໃຕ້ໂຄງການ ໜຶ່ງແລວທາງໜຶ່ງເສັ້ນທາງ

386 13 ພ.ຈ. 2017 ຂ່າວໜ້າ​ໜຶ່ງ
ຈັດກິດຈະກຳພາຍໃຕ້ໂຄງການ ໜຶ່ງແລວທາງໜຶ່ງເສັ້ນທາງ

ເພື່ອ​ປະຕິບັດ​ຕາມ​ນະໂຍບາຍຍຸດ​ທະ​ສາດ ໜຶ່ງ​ແລວ​ທາງ​ໜຶ່ງເສັ້ນທາງ ​ທີ່​ປະທານ ສີ ຈິ້ນ​ຜິງ ວາງ​ອອກ ເພີ່ມ​ທະວີ​ສາຍ​ພົວພັນການ​ແລກປ່ຽນ ການ​ຮ່ວມ​ມື ແລະ ເສີມ​ຂະຫຍາຍ​ການ​ພັດ​ທະນາ​ຮ່ວມ​ກັນ ສະມາຄົມ​ການ​ກຸສົນ​ແຫ່ງ​ປະເທດ​ຈີນ ຮ່ວມ​ກັບກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ເປັນ​ເຈົ້າພາບ ຄະນະ​ກຳມະການ​ສົ່ງເສີມ​ວຽກງານ​ຂ່າວສານ​ຂອງ​ສະມາຄົມ ການ​ກຸສົນ​ຮ່ວມ​ກັບ​ສູນ​ສຶກ​ສາ​ສາກົນ ລາວ-ຈີນ ປະຈຳ​ວິທະຍາໄລເຕັກນິກ​ປາກ​ປ່າ​ສັກ​ ໄດ້​ເປັນ​ເຈົ້າການ​ຈັດ​ກິດຈະກຳ​ສານ​ສາຍໃຈປະຊາຊົນ​ສອງ​ຊາດ ເພື່ອ​ນັກຮຽນຊັ້ນ​ປະຖົມ ພາຍ​ໃຕ້: ໂຄງການໜຶ່ງ​ແລວ​ທາງ​ໜຶ່ງ​ເສັ້ນທາງ ຂຶ້ນວັນ​ທີ 9 ພະຈິກ 2017 ທີ່​ນະຄອນຫຼວງ​ວຽງ​ຈັນ.

ໃນ​ກິດຈະກຳ​ຄັ້ງ​ນີ້ ມີ​ນັກຮຽນເຂົ້າ​ຮ່ວມ 2.000 ຄົນ ໃນ​ນັ້ນ ມີນັກຮຽນ​ລາວ 1.000 ຄົນ ແລະ ນັກຮຽນ​ຈີນ 1.000 ຄົນ ເຊິ່ງພວກ​ເຂົາ​ໄດ້​ເຂົ້າ​ຮ່ວມ​ແຂ່ງຂັນແຕ້ມ​ຮູບ ພາຍ​ໃຕ້​ຫົວຂໍ້​ທີ່​ກຳນົດໃຫ້ ເຊັ່ນ: ໝູ່​ເພື່ອນ ຄວາມ​ໄຝ່​ຝັນນະຄອນຫຼວງ​ວຽງ​ຈັນ ແລະ ນະຄອນ​ຫຼວງ​ປັກ​ກິ່ງ ໃນ​ຈິນ​ຕະ​ນາການ ແລະ ອື່ນໆ ນອກ​ນີ້ ສະມາ​ຄົມ​ເພື່ອ​ການ​ກຸສົນ ​ຍັງ​ໄດ້​ມອບ​ອຸປະກອນ​ການ​ສຶກ​ສາ​ໃຫ້​ນັກຮຽນ ຈຳນວນ 1.000 ຊຸດ ແລະ ຜ່ານ​ການ​ແຂ່ງຂັນ​ຄັ້ງ​ນີ້​ ໄດ້​ຄັດເລືອກ​ເອົາ​ຜູ້​ຊະນະ​ເລີດ 1 ຄົນ ລາງວັນ​ທີ 2 ຈຳນວນ 5 ຄົນ ລາງວັນ​ທີ 3 ຈຳນວນ 10 ຄົນ ແລະ ລາງວັນ​ຊົມເຊີຍ 84 ຄົນ.

ກິດຈະກຳ​ໜຶ່ງ​ແລວ​ທາງ​ໜຶ່ງເສັ້ນທາງ​ ສານ​ສາຍໃຈ​ປະຊາຊົນສອງ​ຊາດ ​ເພື່ອ​ນັກຮຽນ​ຊັ້ນ​ປະຖົມ ໄດ້​ຮັບ​ການ​ຊີ້​ນຳ ແລະ ສະໜັບສະ​ໜູນ​ຈາກ​ກະຊວງ​ສຶກ​ສາ​ທິການ ແລະ ກີລາ ກະຊວງ ຖວທ ກະຊວງ​ການ​ຕ່າງປະເທດ ແລະ ພາກສ່ວນ​ທີ່​ກ່ຽວຂ້ອງ ນອກ​ນີ້ ຂ່າວສານ​ດັ່ງກ່າວ​ຍັງ​ໄດ້​ນຳ​ສະເໜີ​ຜ່ານ​ສື່​ມວນ​ຊົນ​ທຸກ​ຂະແໜງການ​ອີກ​ດ້ວຍ ສະນັ້ນ ກິດຈະກຳຄັ້ງ​ນີ້ ​ເປັນ​ສິ່ງ​ໜຶ່ງ​ທີ່​ຢັ້ງຢືນ​ໃຫ້​ເຫັນໄດ້​ເຖິງ​ມູນເຊື້ອ​ຄວາມ​ສຳຄັນຂອງ​ປະເທດ​ບ້ານ​ໃກ້​ເຮືອນ​ຄຽງ ​ທີ່ມີ​ຄວາມ​ຮັກແພງ​ສາມັກຄີ ເປັນມິດ​ສະຫາຍ​ທີ່​ດີ ມີ​ການ​ໄປ​ມາ​ຫາສູ່​ກັນ ແລະ ຊ່ວຍເຫຼືອ​ເຊິ່ງ​ກັນ ແລະ ກັນ​ຕະຫຼອດ​ມາ ພ້ອມ​ນີ້ກໍ່ຍັງ​ເປັນ​ການ​ສ້າງ​ໂອກາດ​ໃຫ້​ນັກຮຽນ​ຊັ້ນ​ປະຖົມ ກໍ່​ຄືເຍົາວະ​ຊົນ-ອະນຸຊົນ​ຂອງ​ສອງ​ຊາດ​ ໄດ້​ມີ​ການແລກປ່ຽນ​ເຊິ່ງ​ກັນ ແລະ ກັນ ສ້າງ​ໃຫ້​ພວກ​ເຂົາ​ເປັນ​ຂົວ​ຕໍ່​ແຫ່ງມິດຕະພາບ​ອັນ​ດີງາມ​ສືບຕໍ່​ໄປ​ໃນອະນາຄົດ.

ສຳລັບ​ກິດຈະກຳ​ໃນຕໍ່ໜ້າແມ່ນ​ຈະ​ໄດ້​ຈັດ​ຂຶ້ນ ໃນ​ປີ 2018 ເຊິ່ງ​ຈະ​ໄດ້​ຈັດ​ໃຫ້​ມີ​ການ​ທັດ​ສະນະ​ພາກ​ລະດູ​ໜາວ​ຂຶ້ນ ໂດຍ​ຈະໃຫ້​ນັກຮຽນ​ທີ່​ໄດ້​ຮັບ​ລາງວັນ​ມີການ​ແຂ່ງຂັນ​ແຕ້ມ​ຮູບ ພ້ອມດ້ວຍ​ການ​ນຳ​ຈາກ​ກະຊວງ​ສຶກສາ​ທິ​ການ ແລະ ກີລາ ແລະ ພະນັກ​ງານ​ຄູ-ອາຈານຂອງ​ວິ​ທະຍາ​ໄລ​ເຂົ້າ​ຮ່ວມ ແຜນການ​ເດີນທາງ​ຈຸດ​ທຳ​ອິດ ແມ່ນ​ຈະ​ໄດ້​ທ່ຽວຊົມ​ຈຸດ​ກຳເນີດ​ເສັ້ນທາງ​ສາຍໄໝ ນະຄອນ​ຊີ​ອານຂອງ​ແຂວງ​ສ່ານຊີ ຫຼັງ​ຈາກ​ນັ້ນ ຕໍ່​ດ້ວຍ​ນະຄອນຫຼວງ​ປັກ​ກິ່ງ ແລ້ວ​ສິ້ນ​ສຸດ​ທີ່​ເສັ້ນທາງ​ສາຍໄໝ​ເທິງ​ທະເລ ນະຄອນຊວຽນ​ໂຈ່ວ ແຂວງ​ຟູ​ຈ້ຽນ ເພື່ອສຳຜັດ​ກັບ​ແບບແຜນ​ການ​ດຳລົງຊີວິດ​ແບບ​ໃໝ່.

ຂ່າວທີ່ກ່ຽວຂ້ອງ