ສ້າງຂະບວນການສັກຢາກັນພະຍາດໃຫ້ສັດລ້ຽງ

358 13 ພ.ຈ. 2017 ຂ່າວໜ້າ​ໜຶ່ງ
ສ້າງຂະບວນການສັກຢາກັນພະຍາດໃຫ້ສັດລ້ຽງ

ເພື່ອ​ເປັນ​ການຈັດຕັ້ງ​ປະຕິບັດກົດໝາຍ​ວ່າ​ດ້ວຍ​ການ​ລ້ຽງສັດ ແລະ ສັດຕະວະແພດ ທີ່​ໄດ້​ກຳນົດ​ເອົາ​ວັນ​ທີ 11 ພະຈິກຂອງທຸກໆ​ປີ ເປັນ​ວັນ​ສັກ​ຢາ​ກັນ​ພະຍາດ​ສັດ​ແຫ່ງ​ຊາດ ເພື່ອ​ປູກ​ຈິດສຳນຶກ ສ້າງ​ສະຕິ​ຄວາມ​ເປັນ​ເຈົ້າການ​ໃຫ້​ປະຊາຊົນ ເອົາໃຈໃສ່ຄຸ້ມ​ຄອງ​ສັດລ້ຽງ​ຂອງ​ຕົນ ໃນການ​ຮັກສາ​ສຸຂະພາບ​ສັດລ້ຽງ ແລະ ສັກ​ຢາ​ກັນ​ພະຍາດ​ສັດ​ໃຫ້ຫຼາຍ​ຂຶ້ນ ຫຼຸດຜ່ອນ​ການ​ຕາຍ​ຂອງສັດ ໄດ້​ຢ່າງ​ຊິ້ນ​ເຊີງ​ໃນ​ອະນາຄົດ ຫຼຸດຜ່ອນ​ການ​ຕິດເຊື້ອລະຫວ່າງສັດ​ກັບ​ສັດ ແລະ ສັດ​ຕິດຕໍ່​ໃສ່​ຄົນ ຮັບປະກັນ​ໃຫ້​ສັດ​ເຕີບ​ໃຫຍ່​ຂະຫຍາຍ​ຕົວ ສະໜອງ​ທາດ​ຊີ້ນ​ໃຫ້ແກ່​ສັງຄົມ ທັງ​ປະລິມານ ແລະ ຄຸນະພາບ​ຢ່າງ​ປອດ​ໄພ.

ວັນ​ທີ 10 ພະຈິກ 2017 ຫ້ອງການ​ກະສິກຳ ແລະ ປ່າໄມ້ ເມືອງນາ​ຊາຍ​ທອງ ສົມທົບ​ກັບ​ພະແນກ​ກະສິກຳ ແລະ ປ່າໄມ້ ນະຄອນ​ຫຼວງ​ວຽງ​ຈັນ ແລະ ກຸ່ມໂພນ​ທອງ ຈັດ​ພິທີ​ສັກ​ຢາ​ກັນ​ພະຍາດ​ໃຫ້​ສັດລ້ຽງ​ຂອງ​ພໍ່​ແມ່​ປະຊາຊົນ ເນື່ອງ​ໃນ​ວັນ​ສັກ​ຢາ​ກັນ​ພະຍາດ​ສັດ​ແຫ່ງ​ຊາດ​ວັນ​ທີ 11 ພະຈິກ ປະຈຳ​ປີ 2017 ຂຶ້ນ​ຢູ່​ທີ່​ສຸກສາລາ ບ້ານ​ໂພ​ໄຊ ເມືອງ​ນາຊາຍ​ທອງ ນະຄອນຫຼວງ​ວຽງ​ຈັນ ໂດຍ​ມີ​ທ່ານ ລຽນ ທິ​ແກ້ວ ລັດຖະ​ມົນຕີກະຊວງ​ກະສິກຳ ແລະ ປ່າໄມ້ ທ່ານ ອຸດອນ ໄຊ​ມຸນຕີ ຮອງ​ປະທານສະພາ​ປະຊາຊົນ​ນະຄອນ​ຫຼວງ​ວຽງ​ຈັນ ທ່ານ ວິລະສັກ ນາມ​ມຸນຕີ ເຈົ້າເມືອງ​ນາຊາຍ​ທອງ ພ້ອມ​ດ້ວຍ​ພາກສ່ວນກ່ຽວຂ້ອງ​ເຂົ້າ​ຮ່ວມ.

ທ່ານ ຫຼ້າ​ສາຍ ນວນ​ທາ​ສິງ ຫົວໜ້າ​ພະ​ແນກ​ກະສິກຳ ແລະ ປ່າໄມ້ ນະຄອນຫຼວງ ກ່າວ​ວ່າ: ຂະ​ບວນ​ການ​ສັກ​ຢາ​ກັນ​ພະຍາດສັດ​ ໄດ້​ຈັດ​ຕັ້ງ​ປະຕິບັດ​ມາ​ແຕ່​ປີ 2008 ເປັນຕົ້ນ​ມາ ປີ 2016 ຜ່ານ​ມາ ການ​ສັກ​ຢາ​ກັນ​ພະຍາດສັດ​ຂອງ​ປະຊາຊົນ​ພາຍ​ໃນ​ນະຄອນ​ຫຼວງ​ວຽງ​ຈັນ ສາມາດ​ສັກຢາ​ກັນ​ພະຍາດ​ເຕົ້າໂຮມ​ເລືອດ ພະຍາດ​ໄຂ້​ບວມ ພະຍາດ​ປາກເປື່ອຍ​ລົງ​ເລັບ ພະຍາດ​ອະຫິ​ວາໝູ ພະຍາດ​ວໍ້ ພະຍາດ​ອະຫິວາ​ສັດ​ປີກ ແລະ ພະຍາດ​ນິວ​ເຊີນ ໄດ້ຄື: ງົວ 63.985 ໂຕ ຄວາຍ 10.256 ໂຕ ແບ້ 9.977 ໂຕ ໝູ 153.514 ໂຕ ໝາ 42.465 ໂຕ ແລະ ສັດ​ປີກ 1.923.905 ໂຕ ການ​ສັກ​ຢາ​ກັນ​ພະຍາດໃນ​ນະຄອນ​ຫຼວງ ສົກ​ປີ 2016-2017 ແລະ 3 ເດືອນ​ຂ້າມ​ຜ່ານ​ປະຕິບັດໄດ້ 73,45% ຂອງ​ຝູງ​ສັດ​ທັງໝົດ ສ່ວນ​ສັດລ້ຽງ​ທີ່​ລ້ຽງ​ແບບຟາມ ຜະລິດ​ເປັນ​ສິນຄ້າປະຕິບັດໄດ້ 100% ສຳລັບ​ປີ 2017 ໄດ້​ມີແຜນ​ຈັດ​ຕັ້ງ​ປະຕິບັດ​ພິທີ​ສັກ​ຢາກັນ​ພະຍາດ​ສັດຢູ່ 9 ເມືອງໃນນະຄອນຫຼວງ ເພື່ອ​ເປັນ​ການປ້ອງ​ກັນ​ບໍ່​ໃຫ້​ເກີດ​ການ​ລະບາດພະຍາດ​ສັດ ສ້າງ​ຂະ​ບວນ​ການໃຫ້​ກວ້າງຂວາງ ແລະ ຕໍ່​ເນື່ອງ ໃນ​ປີ​ນີ້ ຕ້ອງ​ສູ້​ຊົນ​ສັກ​ຢາ​ວັກ​ຊິນກັນ​ພະຍາດ​ໃຫ້​ໄດ້ຫຼາຍ​ກວ່າ 70% ຂອງ​ຝູງ​ສັດ​ທັງ​ໝົດ ໃນ​ທົ່ວນະຄອນຫຼວງ​ວຽງ​ຈັນ ເຊິ່ງ​ຄາດວ່າ​ຈະ​ມີ​ສັດ​ທີ່​ໄດ້​ຮັບ​ການ​ສັກ​ຢາກັນ​ພະຍາດ​ໃນ​ມື້ນີ້​ປະເພດ​ງົວ 50 ໂຕ ຄວາຍ 2 ໂຕ ແບ້ 15 ໂຕ ໝາ 10 ໂຕ ສັດ​ປີກ 250 ໂຕ.

ຂ່າວທີ່ກ່ຽວຂ້ອງ