ການເປັນຄູ່ຮ່ວມເພື່ອສ້າງຄວາມເຂັ້ມແຂງໃໝ່ ໃຫ້ແກ່ການເຊື່ອມຈອດ-ການເຊື່ອມໂຍງແບບຮອບດ້ານ

526 13 ພ.ຈ. 2017 ຂ່າວໜ້າ​ໜຶ່ງ
ການເປັນຄູ່ຮ່ວມເພື່ອສ້າງຄວາມເຂັ້ມແຂງໃໝ່ ໃຫ້ແກ່ການເຊື່ອມຈອດ-ການເຊື່ອມໂຍງແບບຮອບດ້ານ

ທ່ານ ບຸນ​ຍັງ ວໍລະ​ຈິດ ປະທານ​ປະເທດ ພ້ອມ​ດ້ວຍ​ພັນ​ລະຍາ ແລະ ຄະນະ​ໄດ້​ເດີນທາງ​ເຂົ້າຮ່ວມ​ກອງ​ປະຊຸມ​ເວທີ​ສົນທະນາແບບ​ບໍ່​ເປັນ​ທາງ​ການ ລະຫວ່າງຜູ້ນຳ​ເສດຖະກິດ​ຂອບ​ການ​ຮ່ວມມື​ດ້ານ​ເສດຖະກິດ​ຂອງ​ພາກ​ພື້ນອາຊີ-ປາ​ຊີ​ຟິກ ຫຼື ອາ​ເປັກ ແລະ ຜູ້ນຳ​ອາ​ຊຽນ ພາຍ​ໃຕ້​ຫົວຂໍ້ “ການ​ເປັນ​ຄູ່​ຮ່ວມ ເພື່ອ​ສ້າງຄວາມ​ເຂັ້ມແຂງ​ໃໝ່ ໃຫ້​ແກ່​ການເຊື່ອມ​ຈອດ ແລະ ການ​ເຊື່ອມໂຍງ ອາຊີ-ປາ​ຊີ​ຟິກ ແບບ​ຮອບດ້ານ” (Partnering for New Dynamism for a Comprehensively Connected and Integrated Asia-Pacific) ຈັດ​ຂຶ້ນ​ວັນ​ທີ 10-11 ພະຈິກ 2017 ທີ່​ດາ​ນັງ ​ສສ ຫວຽດນາມ.

ກອງ​ປະຊຸມ​ດັ່ງກ່າວ ​ເປັນ​ເວທີ​ປຶກສາ​ຫາລື​ແລກປ່ຽນ​ຄວາມຄິດ​ເຫັນ ​ກ່ຽວ​ກັບ​ການ​ສົ່ງເສີມການ​ເຊື່ອມ​ໂຍງ ແລະ ພັດທະນາເສດຖະກິດ ການ​ຄ້າ ແລະ ການລົງທຶນ ການ​ຮ່ວມ​ມື​ດ້ານ​ການເຊື່ອມ​ຈອດ ໃນ​ພາກ​ພື້ນ​ອາຊີ-ປາ​ຊີ​ຟິກ ແລະ ການ​ສ້າງ​ຄວາມເຂັ້ມແຂງ​ໃຫ້​ໂຄງ​ສ້າງ​ເສດຖະກິດ​ຂອງ​ພາກ​ພື້ນ ໃຫ້​ມີ​ຄວາມ​ຍືນ​ຍົງ ປອດ​ໃສ ແລະ ສາມາດ​ປັບ​ໂຕ​ໄດ້ຢ່າງ​ຄ່ອງ​ແຄ້ວ ເພື່ອ​ຮັບປະກັນໃຫ້​ມີ​ການ​ປັບປຸງ​ສາຍ​ພົວພັນ ແລະ ການ​ຮ່ວມ​ມື​ຫຼາຍ​ລະດັບ​ຢູ່ໃນ​ພາກ​ພື້ນ ໂດຍ​ມີ​ຜູ້ນຳ​ຈາກ​ສະມາ​ຊິກ​ອາ​ເປັກ​ເຂົ້າ​ຮ່ວມ​ທັງ​ໝົດ 21 ເຂດ​ເສດຖະກິດ ​ສປປ ລາວ ກຳປູເຈຍ ແລະ ມຽນ​ມາ ເຂົ້າຮ່ວມ ເພື່ອ​ເພີ່ມ​ທະວີ​ການ​ຮ່ວມ​ມືລະຫວ່າງປະເທດ​ສະມາຊິກ​ເອເປັກ ແລະ ອາ​ຊຽນ.

ທ່ານ ບຸນ​ຍັງ ວໍລະ​ຈິດ ຍັງ​ໄດ້ປະກອບ​ຄຳ​ເຫັນ​ໃນ​ກອງ​ປະຊຸມ​ທີ່ມີ​ຫົວຂໍ້: “ການ​ເປັນ​ຄູ່​ຮ່ວມ ເພື່ອສ້າງ​ຄວາມ​ເຂັ້ມແຂງ​ໃໝ່​ໃຫ້​ແກ່ການ​ເຊື່ອມ​ຈອດ ແລະ ການເຊື່ອມ​ໂຍງ​ອາຊີ-ປາ​ຊີ​ຟິກ ແບບຮອບດ້ານ” ທ່ານ​ໄດ້​ກ່າວ​ເຖິງ​ຈຸດຢືນ​ອັນ​ຈະ​ແຈ້ງວ່າ: ໃນ​ຍຸກ​ສະໄໝ​ປັດຈຸບັນ ການ​ເຊື່ອມ​ຈອດ ແລະ ເຊື່ອມ​ໂຍງ​ໃນ​ພາກ​ພື້ນ ແລະ ສາກົນ ແມ່ນ​ສິ່ງ​ທີ່​ຈຳເປັນສຳລັບ​ທຸກ​ປະເທດ​ໃນ​ໂລກ ບໍ່​ວ່າໃຫຍ່ ຫຼື ນ້ອຍ ທຸກ ຫຼື ຮັ່ງມີ ໃນຖານະ​ທີ່​ເປັນ​ສະມາຊິກ​ອາ​ຊຽນ ​ສປປ ລາວ ສະໜັບສະໜູນ ແລະ ເຂົ້າ​ຮ່ວມ​ຢ່າງ​ເຕັມ​ປ່ຽມ ປະຕິບັດແຜນ​ແມ່​ບົດ​ວ່າ​ດ້ວຍ​ການ​ເຊື່ອມຈອດ​ອາ​ຊຽນ​ແຕ່​ນີ້​ຫາ​ປີ 2025 ເຊິ່ງ​ມີ​ຈຸດປະສົງ​ແນໃສ່​ສ້າງຄວາມ​ເຂັ້ມແຂງ​ໃຫ້​ປະຊາ​ຄົມ​ອາຊຽນ​ບົນ​ພື້ນຖານ​ປະຕິບັດ​ການເຊື່ອມ​ໂຍງ ແລະ ເຊື່ອມ​ຈອດ ຢ່າງ​ມີ​ປະ​ສິດທິ​ຜົນ​ຢູ່​ພາຍ​ໃນ​ອາຊຽນ ແລະ ລະຫວ່າງອາ​ຊຽນກັບ​ພາກ​ພື້ນ​ອື່ນ ເພື່ອ​ນຳ​ຜົນ​ປະໂຫຍດ​ຕົວ​ຈິງ​ມາສູ່​ທຸກ​ປະເທດ ເຊິ່ງ​ສອດຄ່ອງ​ກັບ​ແຜນ​ງານ​ການເຊື່ອມ​ຈອດ ອາ​ເປັກ 2015-2025.

ເພື່ອ​ເຮັດ​ໃຫ້ການ​ເຊື່ອມ​ໂຍງພາຍ​ໃນ​ອາ​ຊຽນ​ປາກົດ​ຜົນ​ເປັນຈິງ ແລະ ຮັບປະກັນ​ຄວາມ​ເທົ່າທຽມ​ກັນລະຫວ່າງ​ປະເທດ​ອາຊຽນ​ດ້ວຍ​ກັນ ໃນ​ໄລຍະ​ຜ່ານ​ມາ ບັນດາ​ສະມາຊິກ​ອາ​ຊຽນ ໄດ້​ມີຂໍ້​ລິ​ເລີ່ມວ່າ​ດ້ວຍ​ການ​ເຊື່ອມ​ໂຍງອາ​ຊຽນ ເພື່ອ​ຊ່ວຍເຫຼືອ​ປະເທດສະມາຊິກ​ໃໝ່ ລວມ​ທັງ ​ສປປ ລາວ ເຊິ່ງ​ແນໃສ່​ຫຼຸດຜ່ອນ​ຄວາມແຕກ​ໂຕນ​ຂອງ​ລະດັບ​ການ​ພັດທະ​ນາ​ເສດຖະກິດ ແລະ ເພີ່ມ​ທະວີ​ຄວາມ​ສາມາດ​ໃນ​ການ​ເຊື່ອມໂຍງ​ເສດຖະກິດ​ຢູ່​ພາຍ​ໃນ​ອາຊຽນ ແລະ ກັບ​ພາກ​ພື້ນ​ອື່ນໆຂອງ​ໂລກ​ໄດ້ ພ້ອມ​ນີ້ ທ່ານ​ຍັງ​ໄດ້ສະແດງ​ຄວາມ​ຫວັງ​ວ່າອາ​ເປັກ ຈະ​ພິຈາລະນາ​ໃຫ້ການ​ສະໜັບສະ​ໜູນ​ຄວາມ​ພະຍາຍາມ​ໃນ​ຈຸດນີ້​ຂອງ​ອາ​ຊຽນ.

ສຳລັບ ​ສປປ ລາວ ເຊິ່ງ​ເປັນປະເທດ​ທີ່​ອ້ອມ​ຮອບ​ດ້ວຍ 5 ປະເທດ​ໃກ້​ຄຽງ​ນັ້ນ ໄດ້​ຖື​ເອົາ​ການເຊື່ອມ​ຈອດ​ເປັນ​ບຸລິມະສິດ​ໜຶ່ງ​ ໃນການ​ພັດທະນາ​ປະເທດ​ຂອງ​ຕົນ ລັດຖະບານ​ລາວ​ ໄດ້​ດຳເນີນ​ນະໂຍ​ບາຍ​ຫັນ​ຈາກ​ປະເທດ​ທີ່​ບໍ່​ມີຊາຍ​ແດນ​ຕິດ​ກັບ​ທະເລ ໄປ​ເປັນປະເທດ​ເຊື່ອມ​ຈອດ ໂດຍ​ສຸມ​ໃສ່ພັດທະນາ​ລະບົບ​ພື້ນຖານ​ໂຄງລ່າງ ເພື່ອ​ເຊື່ອມ​ຈອດ​ພາຍ​ໃນປະເທດ​ໃຫ້​ທົ່ວ​ເຖິງ ແລະ ລະຫວ່າງ ​ສປປ ລາວ ກັບ​ປະເທດໃກ້​ຄຽງ ເຊັ່ນ: ສ້າງ ແລະ ປັບປຸງ​ຖະໜົນ​ຫົນທາງ ຂະຫຍາຍສາຍ​ການບິນ ພັດທະນາ​ການເດີນ​ເຮືອ​ຕາມ​ລຳ​ແມ່ນ້ຳ​ຂອງ ເລີ່ມ​ກໍ່ສ້າງ​ເສັ້ນທາງ​ລົດໄຟ ເພື່ອເຊື່ອມ​ຈອດ​ກັບ​ເສັ້ນທາງ​ລົດໄຟປະເທດ​ໃກ້​ຄຽງ ພ້ອມ​ທັງ​ມີ​ການສຶກ​ສາ​ຂະຫຍາຍ​ຕາ​ໜ່າງ​ເສັ້ນທາງ​ລົດໄຟ​ໃຫ້​ກວ້າງຂວາງ​ຂຶ້ນກວ່າ​ເກົ່າ ດ້ວຍ​ເປົ້າ​ໝາຍ​ອັນ​ຈະແຈ້ງ​ດັ່ງກ່າວ ​ສປປ ລາວ ຈຶ່ງ​ສະໜັບ​ສະ​ໜູນ​ຂໍ້​ລິ​ເລີ່ມ “ໜຶ່ງ​ແລວໜຶ່ງ​ເສັ້ນທາງ” ສະເໜີ​ໂດຍ ​ສປ ຈີນ ເພາະ​ເຫັນ​ວ່າຂໍ້​ລິ​ເລີ່ມ​ດັ່ງກ່າວ ຈະ​ປະກອບສ່ວນ​ອຳນວຍຄວາມ​ສະດວກ​ໃຫ້​ແກ່​ການ​ໄປ​ມາຫາ​ສູ່​ຂອງ​ປະຊາຊົນ ກໍ່​ຄືການສົ່ງເສີມ​ເປີດ​ກວ້າງ​ການ​ຄ້າ ການລົງທຶນ ການທ່ອງທ່ຽວ ກໍ່​ຄືການເຊື່ອມ​ໂຍງ ແລະ ການ​ເຊື່ອມຈອດ​ຂອງ​ອາ​ຊຽນ ແລະ ພາກພື້ນ​ອື່ນໆ​ຂອງ​ໂລກ.

ຂ່າວທີ່ກ່ຽວຂ້ອງ