ການສຶກສາເອກະຊົນ ຂະຫຍາຍຕົວທັງປະລິມານ-ຄຸນະພາບ

97 14 ພ.ຈ. 2017 ຂ່າວໜ້າ​ໜຶ່ງ

ສະມາຄົມ​ການ​ສຶກ​ສາ​ເອກະຊົນ ສ້າງຕັ້ງ​ຂຶ້ນ​ແຕ່​ປີ 2001 ເປັນຕົ້ນ​ມາ ມີ​ພາລະ​ບົດບາດ​ໃນ​ການເຕົ້າໂຮມ​ເອົາ​ຜູ້​ປະກອບ​ການ ​ສະຖານ​ສຶກ​ສາ​ເອກະ​ຊົນ​ຂອບ​ເຂດທົ່ວ​ປະເທດ ເຂົ້າ​ຢູ່​ໃນ​ການຈັດຕັ້ງດຽວ​ກັນ ສ້າງ​ຄວາມ​ສາມັກຄີ​ມິດຕະ​ພາບ ຊ່ວຍເຫຼືອ​ແລກປ່ຽນ​ບົດຮຽນລະຫວ່າງສະຖານ​ການ​ສຶກສາ​ເອກະ​ຊົນ​ດ້ວຍ​ກັນ ຕະຫຼອດເຖິງ​ການ​ເປັນ​ເສນາ​ທິ​ການ​ແກ່​ກະຊວງ​ສຶກ​ສາ​ທິ​ການ ແລະ ກີລາ ໃນ​ການຈັດຕັ້ງ​ນຳພາ​ສະຖານການ​ສຶກ​ສາເອກະ​ຊົນ ມີ​ສ່ວນຮ່ວມປະກອບສ່ວນ​ເຂົ້າ​ໃນ​ການພັດທະນາລະບົບ​ການ​ສຶກ​ສາແຫ່ງ​ຊາດ​ ໃຫ້​ປະສົບ​ຜົນສຳເລັດຕາມ​ນະໂຍບາຍພັກ-ລັດ​ຖະບານ​ວາງ​ໄວ້.

ກອງ​ປະຊຸມ​ໃຫຍ່​ຄັ້ງ​ທີ V ຂອງສະມາຄົມ​ການ​ສຶກ​ສາ​ເອກະ​ຊົນ ໄດ້​ຈັດ​ຂຶ້ນ​ໃນ​ວັນ​ທີ 10 ພະຈິກ 2017 ຢູ່​ສູນ​ການ​ຮ່ວມ​ມື​ສາກົນ ລາວ-ຍີ່ປຸ່ນ ໂດຍ​ການ​ເຂົ້າ​ຮ່ວມຂອງ​ທ່ານ ກອງ​ສີ ແສງ​ມະນີ ຮອງ​ລັດຖະມົນຕີ​ກະຊວງ​ສຶກ​ສາທິ​ການ ແລະ ກີລາ ພ້ອມ​ດ້ວຍບັນດາ​ຫົວໜ້າ​ກົມ ຫ້ອງການ ແລະ ສະມາຊິກ​ສະມາຄົມ​ການສຶກ​ສາ​ເອກະ​ຊົນ​ຈາກ​ທົ່ວ​ປະເທດ ໂອກາດ​ນີ້ ທ່ານ ສົມ​ເພັດ ​ຣັຕະນາ​ສິມ ປະທານ​ສະມາຄົມ​ການສຶກ​ສາ​ເອກະ​ຊົນ ກ່າວ​ວ່າ: 1 ປີຜ່ານ​ມາ ສະມາຄົມ​ໄດ້​ເອົາໃຈໃສ່ສ້າງ​ຄວາມ​ເຂັ້ມແຂງ ຄຽງ​ຄູ່​ກັບການ​ຂະຫຍາຍ​ທັງ​ປະລິມານ-ຄຸນະພາບ​ຂອງ​ຕົນ ສາມາດ​ເຮັດໃຫ້​ປັດຈຸບັນ​ມີ​ສະມາຊິກ​ທັງ​ໝົດ 463 ແຫ່ງ ປະກອບ​ມີ 3 ສາຍການ​ສຶກ​ສາຄື: ສາຍ​ວິທະຍາໄລ 47 ແຫ່ງ ສາຍ​ອະ​ຊີວະ 18 ແຫ່ງ ແລະ ສາຍ​ສາມັນ 398 ແຫ່ງ ເຊິ່ງ​ສະມາຄົມ​ໄດ້​ເປັນ​ເຈົ້າ​ການຢ່າງ​ຕັ້ງໜ້າ​ເຂົ້າ​ໃນ​ການ​ສົ່ງເສີມ ແລະ ສ້າງ​ຄວາມ​ເຂັ້ມແຂງ​ໃຫ້ແກ່​ບັນດາ​ສະຖານ​ການ​ສຶກ​ສາ ພ້ອມ​ກັນ​ປະຕິບັດ​ຕາມ​ພາລະ​ບົດບາດ​ຢ່າງ​ແຂງແຮງ ພ້ອມ​ນັ້ນ ຍັງປະກອບສ່ວນ​ຊ່ວຍເຫຼືອ​ສັງຄົມ ສ້າງ​ກິດຈະກຳ​ໃຫ້ຄູ-ອາຈານ ແລະ ນ້ອງ​ນັກຮຽນ ໄດ້​ພົບ​ປະສ້າງ​ຄວາມ​ສາມັກຄີ​ພາຍ​ໃນ​ສະຖານ​ການ​ສຶກ​ສາ​ເອກະ​ຊົນ ແລະ ຄະນະ​ບໍລິຫານ​ງານ​ສະມາຄົມ ໄດ້​ເປັນ​ເຈົ້າ​ການ​ລົງ​ຕິດຕາມເຄື່ອນ​ໄຫວ​ກັບ​ສະມາຊິກ​ຢູ່​ບັນດາແຂວງ ແລະ ທ້ອງຖິ່ນ​ຢ່າງ​ເປັນປົກກະຕິ-ຕໍ່​ເນື່ອງ ອັນ​ເຮັດ​ໃຫ້​ຮູ້ເຖິງ​ຈຸດ​ດີ​ຈຸດ​ອ່ອນ​ຂອງ​ສະຖານການ​ສຶກ​ສາ​ເອກະ​ຊົນ​ເຂດ​ຫ່າງໄກ ແລະ ໄດ້​ນຳ​ມາ​ປັບປຸງ​ແກ້​ໄຂໃຫ້​ມີ​ຄວາມ​ສອດຄ່ອງ ແນໃສ່ຮັບປະກັນ​ໄດ້​ຄວາມ​ຮຽກຮ້ອງຕ້ອງການ​ຂອງ​ຂັ້ນ​ເທິງ ​ໃນ​ການພັດທະນາ​ລະບົບ​ການ​ສຶກ​ສາ​ທົ່ວປະເທດ​ ໃຫ້​ມີ​ຄວາມ​ໜັກ​ແໜ້ນ-ເຂັ້ມແຂງ​ທັງ​ປະລິມານ-ຄຸ​ນະພາບ ແລະ ກ້າວ​ໄປ​ສູ່​ວຽກ​ງານການ​ສຶກ​ສາ​ເພື່ອ​ໝົດ​ທຸກ​ຄົນ ​ໃຫ້ປະສົບ​ຜົນສຳເລັດ​ຕາມ​ເປົ້າ​ໝາຍວາງ​ໄວ້.

ຂ່າວທີ່ກ່ຽວຂ້ອງ