ຮັບຮອງເອົາຮ່າງກົດໝາຍອຸຕຸນິຍົມ-ອຸທົກກະສາດ

96 14 ພ.ຈ. 2017 ຂ່າວໜ້າ​ໜຶ່ງ

ກອງ​ປະຊຸມ​ສະໄໝ​ສາມັນເທື່ອ​ທີ 4 ຂອງ​ສະພາ​ແຫ່ງ​ຊາດ ຊຸດ​ທີ VIII ໃນ​ວັນ​ທີ 13 ພະຈິກ 2017 ຢູ່​ຫ້ອງ​ປະຊຸມ​ຫ້ອງ​ວ່າການສູນ​ກາງ​ພັກ ໂດຍ​ເປັນ​ປະທານຂອງ​ທ່ານ ບຸນ​ປອນ ບຸດ​ຕະ​ນະ​ວົງ ຮອງ​ປະທານ​ສະພາ​ແຫ່ງ​ຊາດ ມີ​ສະມາຊິກ​ສະພາ​ແຫ່ງ​ຊາດ (​ສສຊ) ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ທ່ານ ສົມ​ມາດ ພົນ​ເສນາ ລັດຖະມົນຕີ​ກະຊວງ​ຊັບ​ພະຍາກອນ​ທຳ​ມະ​ຊາດ ແລະ ສິ່ງ​ແວດລ້ອມ ໄດ້​ສະເໜີ​ຮ່າງ​ກົດໝາຍ​ວ່າດ້ວຍ​ອຸຕຸນິຍົມ ແລະ ອຸ​ທົກ​ກະສາດ ເຊິ່ງ​ກົດໝາຍ​ສະບັບ​ນີ້​ປະກອບ​ມີ XI ພາກ 6 ໝວດ 71 ມາດຕາ ໃນ​ນັ້ນ​ໄດ້​ກຳນົດ​ຫຼັກການ ລະບຽບ​ການ ແລະ ມາດຕະການ​ກ່ຽວ​ກັບ​ການ​ຄຸ້ມ​ຄອງ ຕິດຕາມ​ກວດກາ​ການເຄື່ອນໄຫວວຽກ​ງານ​ອຸຕຸນິຍົມ ແລະ ອຸ​ທົກກະ​ສາດ ເພື່ອ​ພັດທະນາ​ວຽກ​ງານດັ່ງກ່າວ ໃຫ້​ມີ​ການ​ຂະຫຍາຍຕົວ ທັນ​ສະໄໝ ແລະ ມີ​ປະ​ສິດທິ​ຜົນ ແນໃສ່​ສະກັດ​ກັ້ນ​ຫຼຸດຜ່ອນ​ຜົນ​ກະທົບ​ທີ່​ເກີດ​ຈາກ​ໄພ​ທຳ​ມະ​ຊາດ​ຕໍ່ສິ່ງ​ທີ່​ມີ​ຊີວິດ ຊັບ​ສິນ​ຂອງ​ລັດ ລວມ​ໝູ່ ແລະ ຂອງ​ປະຊາຊົນໃນສັງຄົມ ສາມາດ​ເຊື່ອມ​ໂຍງ​ກັບພາກ​ພື້ນ ແລະ ສາກົນ ປະກອບສ່ວນ​ເຂົ້າ​ໃນ​ການ​ພັດທະນາ​ເສດຖະ​ກິດ-ສັງຄົມ ຕາມ​ທິດ​ສີຂຽວ ຍືນ​ຍົງ ແລະ ຄວາມ​ໝັ້ນຄົງ​ຂອງຊາດ.

ການ​ສ້າງ​ກົດໝາຍ​ດັ່ງກ່າວ ເພື່ອ​ຍົກ​ລະດັບ​ການ​ຄຸ້ມ​ຄອງ​ວຽກງານ​ດ້ານ​ອຸຕຸນິຍົມ ແລະ ອຸ​ທົກກະ​ສາດ ໃຫ້​ມີ​ຄວາມ​ທັນ​ສະໄໝຢ່າງ​ເປັນ​ເອກະ​ພາບ ​ໃນ​ຂອບ​ເຂດທົ່ວ​ປະເທດ ສາມາດ​ວັດແທກ ແລະ ປະ​ເມີນ​ການ​ມີ​ສ່ວນ​ຮ່ວມຂອງ ​ສປປ ລາວ ໃນ​ການ​ປະຕິບັດ​ລະບຽບ​ຫຼັກການ​ສາກົນ​ດ້ານອຸຕຸນິຍົມ ແລະ ອຸ​ທົກ​ກະ​ສາດຂອງ​ອົງການ​ອຸຕຸນິຍົມ​ໂລກ​ ທີ່ລາວ​ເຮົາ​ເຂົ້າ​ເປັນ​ສະມາຊິກ​ແຕ່​ປີ 1955 ເປັນຕົ້ນ​ມາ ແລະ ການກຽມ​ຄວາມ​ພ້ອມ​ແກ່​ການ​ປະຕິບັດ​ພັນທະ​ຂອງ​ຄະນະ​ກຳມະການໄຕ້​ຝຸ່ນ 1973 ແລະ ພັນທະ​ຄວາມຮັບຜິດຊອບ​ແກ່​ບັນດາ​ປະເທດ​ສະມາ​ຊິກ​ພາຄີ​ສັນຍາ​ແມ່ນ້ຳ​ຂອງ​ປີ 1995 ທີ່ ​ສປປ ລາວ ເຂົ້າ​ເປັນສະມາຊິກ​ໃຫ້​ແທດເໝາະ​ກັບ​ສະພາບ​ການ​ຕົວ​ຈິງ ເພື່ອ​ເປັນ​ນິຕິ​ກຳ ແລະ ເປັນ​ບ່ອນ​ອີງ​ໃຫ້​ຂະແໜງການ​ກ່ຽວຂ້ອງ​ນຳ​ໃຊ້​ເຂົ້າ​ໃນການຈັດຕັ້ງ​ປະຕິບັດ​ວຽກ​ງານ ໂດຍ​ສະເພາະແມ່ນ​ການ​ປະກອບ​ສ່ວນ​ເຂົ້າ​ໃນ​ການ​ພັດທະນາເສດຖະກິດ-ສັງຄົມ ກໍ່​ຄືການ​ກໍ່ສ້າງ​ພື້ນຖານ​ໂຄງ​ລ່າງ ແຈ້ງການ​ເຕືອນ​ໄພ​ທຳ​ມະ​ຊາດ​ລ່ວງໜ້າ​ໃຫ້​ແກ່​ສັງຄົມ​ໄດ້​ຮັບ​ຮູ້​ຢ່າງທັນ​ການ ເພື່ອ​ຫຼຸດຜ່ອນ​ຜົນ​ເສຍຫາຍ​ທີ່​ເກີດ​ຂຶ້ນ​ເຊັ່ນ: ໄພ​ແຫ້ງແລ້ງ ນ້ຳ​ຖ້ວມ ແຜ່ນດິນ​ໄຫວ ແລະ ດິນ​ເຈື່ອນ​ເປັນຕົ້ນ.

ຫຼັງ​ຈາກ​ຜູ້​ແທນ​ໃນ​ກອງ​ປະຊຸມ ປະກອບ​ຄຳ​ເຫັນ​ດ້ວຍ​ຄວາມ​ຮັບຜິດຊອບສູງ​ໃສ່​ຮ່າງ​ກົດໝາຍວ່າ​ດ້ວຍ​ອຸຕຸນິຍົມ ແລະ ອຸ​ທົກກ​​ະ​ສາດ​ແລ້ວ ຕອນທ້າຍ ​ສສຊ ກໍ່​ໄດ້​ເປັນ​ເອກະ​ພາບ ຮັບຮອງ​ເອົາ​ຮ່າງ​ກົດໝາຍ​ວ່າດ້ວຍ​ອຸຕຸນິຍົມ ແລະ ອຸ​ທົກກ​​ະ​ສາດ ດ້ວຍ​ຄະແນນ​ສຽງ​ສ່ວນ​ຫຼາຍ.

ຂ່າວທີ່ກ່ຽວຂ້ອງ