ລາວ-ຈີນ ບັນລຸການຮ່ວມມືດ້ານການເງິນເພື່ອສົ່ງເສີມ SME

831 16 ພ.ຈ. 2017 ຂ່າວໜ້າ​ໜຶ່ງ
ລາວ-ຈີນ ບັນລຸການຮ່ວມມືດ້ານການເງິນເພື່ອສົ່ງເສີມ SME

ທະນາຄານ ແຫ່ງ ​ສປປ ລາວ ແລະ ທະນາຄານ​ພັດທະນາແຫ່ງ​ຊາດ​ຈີນ ໄດ້​ບັນລຸ​ການ​ເຊັນບົດ​ບັນທຶກ​ຄວາມ​ເຂົ້າໃຈ ​ວ່າ​ດ້ວຍການ​ຮ່ວມ​ມື​ທາງ​ດ້ານ​ການ​ເງິນ ເພື່ອ​ສົ່ງເສີມ​ວິ​ສາ​ຫະ​ກິດ​ຂະໜາດນ້ອຍ ແລະ ຂະໜາດ​ກາງ (SME) ໂດຍ​ໃຫ້​ກຽດ​ເຂົ້າ​ຮ່ວມເປັນ​ສັກຂີ​ພິຍານຂອງ​ທ່ານ ບຸນຍັງ ວໍລະ​ຈິດ ເລຂາທິການ​ໃຫຍ່ ຄະນະ​ບໍລິຫານ​ງານ​ສູນ​ກາງ​ພັກປະຊາຊົນປະຕິວັດ​ລາວ ປະທານປະເທດ ແລະ ທ່ານ ສີ ຈິ້ນ​ຜິງ ເລຂາທິການ​ໃຫຍ່​ຄະນະ​ກຳ​ມະການ​ສູນ​ກາງ​ພັກກອມ​ມູ​ນິດ​ຈີນ ປະທານ​ປະເທດ​ແຫ່ງ ​ສປ ຈີນ ເຊິ່ງ​ພິທີ​ດັ່ງກ່າວ​ ໄດ້​ຈັດ​ຂຶ້ນ​ວັນ​ທີ 13 ພະຈິກ 2017 ທີ່​ທຳ​ນຽບ​ປະທານ​ປະເທດ ນະຄອນຫຼວງ​ວຽງຈັນ.

ການ​ລົງ​ນາມ​ໃນ​ບົດ​ບັນທຶກຄວາມ​ເຂົ້າໃຈ ວ່າ​ດ້ວຍ​ການຮ່ວມ​ມື​ທາງ​ດ້ານ​ການ​ເງິນ ເພື່ອສົ່ງເສີມ​ວິ​ສາ​ຫະ​ກິດ​ຂະໜາດນ້ອຍ ແລະ ຂະໜາດ​ກາງ​ຄັ້ງ​ນີ້ ຕາງໜ້າ​ທະນາຄານ ແຫ່ງ ​ສປປ ລາວ ໂດຍ​ແມ່ນ​ທ່ານ ສົມ​ພາວ ໄຟ​ສິດ ຜູ້​ວ່າການ​ທະນາຄານ ແຫ່ງ ​ສປປ ລາວ ແລະ ຕາງໜ້າທະນາຄານ​ພັດທະນາ​ແຫ່ງ​ຊາດຈີນ ໂດຍ​ແມ່ນທ່ານ ຫູ​ຫວຍ​ປາງ ປະທານ​ສະພາ​ບໍລິຫານ​ທະ​ນາຄານ​ພັດທະນາ​ແຫ່ງ​ຊາດ​ຈີນ ເຊິ່ງ​ການ​ເຊັນ​ບົດ​ບັນທຶກ​ຄວາມເຂົ້າໃຈ​ການ​ຮ່ວມ​ມື​ກັນ​ຄັ້ງ​ນີ້ ເພື່ອປະກອບສ່ວນ​ຊຸກຍູ້​ການ​ພັດ​ທະນາ​ເສດຖະກິດ-ສັງຄົມ​ຂອງ​ລາວ ໃຫ້​ມີ​ການ​ພັດທະນາ​ແບບ​ຍືນ​ຍົງ ການ​ເຂົ້າ​ເຖິງ​ແຫຼ່ງ​ທຶນ​ຂອງ​ຫົວໜ່ວຍ​ທຸລະ​ກິດ ໂດຍ​ຖື​ເອົາ​ການລະດົມ​ທຶນ ເພື່ອ​ສະໜອງ​ສິນ​ເຊື່ອໃຫ້​ແກ່​ວິ​ສາ​ຫະ​ກິດ​ຂະໜາດ​ນ້ອຍ ແລະ ຂະໜາດ​ກາງ ໃນ ​ສປປ ລາວ ໄດ້​ຮັບ​ການ​ຂະຫຍາຍຕົວຢ່າງ​ຕໍ່​ເນື່ອງ.

ບົດ​ບັນທຶກ​ຄວາມ​ເຂົ້າໃຈ ລະຫວ່າງ​ທະນາຄານ ແຫ່ງ ​ສປປ ລາວ ແລະ ທະນາຄານ​ພັດ​ທະນາ​ແຫ່ງ​ຊາດ​ຈີນ ກ່ຽວ​ກັບ​ການຮ່ວມ​ມື​ທາງ​ດ້ານ​ການ​ເງິນ ເພື່ອສົ່ງເສີມ​ວິ​ສາ​ຫະ​ກິດ​ຂະໜາດນ້ອຍ ແລະ ຂະໜາດ​ກາງ ແມ່ນນອນ​ໃນ​ການ​ລົງ​ນາມ​ບັນດາເອກະສານ 17 ສະບັບ ທີ່​ໄດ້​ເຊັນກັນ​ໃນ​ມື້​ດັ່ງກ່າວ ເຊິ່ງ​ໄດ້​ເປັນ​ຂີດໝາຍ​ອັນ​ສຳຄັນ​ແຫ່ງ​ການ​ພົວພັນ ແລະ ຮ່ວມ​ມື ລາວ-ຈີນ ບົນພື້ນຖານ​ຄວາມ​ໄວ້​ເນື້ອ​ເຊື່ອ​ໃຈເຊິ່ງ​ກັນ ແລະ ກັນ ຕາມ​ທິດ​ບ້ານໃກ້​ເຮືອນ​ຄຽງ​ທີ່​ດີ ເພື່ອນ​ມິດ​ທີ່​ດີ ສະຫາຍ​ທີ່​ດີ ແລະ ຄູ່​ຮ່ວມ​ມື​ທີ່​ດີ ແລະ ເປັນ​ຄູ່​ຮ່ວມ​ຍຸດ​ທະ​ສາດ ຮອບດ້ານ ໝັ້ນຄົງ ຍາວ​ນານ ລະຫວ່າງ ​ສປປ ລາວ ແລະ ​ສປ ຈີນ.

ຂ່າວທີ່ກ່ຽວຂ້ອງ