ຈະສ້າງສູນຄົ້ນຄວ້າຢາງພາລາລາວ ຢູ່ເມືອງໄຊທານີ

659 17 ພ.ຈ. 2017 ຂ່າວໜ້າ​ໜຶ່ງ
ຈະສ້າງສູນຄົ້ນຄວ້າຢາງພາລາລາວ ຢູ່ເມືອງໄຊທານີ

ພິທີ​ເຊັນ​ສັນຍາ​ໂຄງການ​ຮ່ວມມື​ສ້າງ​ສູນ​ຄົ້ນຄວ້າ​ຢາງພາລາລາວ ລະຫວ່າງກະຊວງ​ກະສິກຳ ແລະ ປ່າໄມ້ ກັບກຸ່ມ​ບໍລິສັດ​ ພັດທະ​ນາ​ກະສິກຳ​ຢຸນ​ນານ ຈຳກັດ ​ສປ ຈີນ ຈັດ​ຂຶ້ນ​ວັນ​ທີ 15 ພະຈິກ 2017 ທີ່​ກະຊວງ​ກະສິກຳ ແລະ ປ່າໄມ້ ຮ່ວມ​ລົງ​ນາມ​ໂດຍ​ທ່ານ ຄຳ​ພັນ ເໝືອນ​ສິດທິ​ດາ ຫົວໜ້າຫ້ອງການ​ກະສິກຳ ແລະ ປ່າໄມ້ ແລະ ທ່ານ ລີ ສື​ຈູ່ນ ຜູ້​ຊ່ວຍ​ອຳນວນ​ການ​ໃຫຍ່​ ກຸ່ມ​ບໍລິສັດ ​ພັດ​ທະນາ​ກະສິກຳ​ຢຸນ​ນານ ທັງ​ເປັນ​ປະທານ​ບໍລິສັດ ການ​ລົງທຶນ​ຢາງ​ພາລາ​ຢຸນ​ນານ ຈຳກັດ ມີ​ພາກສ່ວນທີ່​ກ່ຽວຂ້ອງ​ສອງ​ຝ່າຍ​ເຂົ້າ​ຮ່ວມ.

ທ່ານ ສົມບູນ ໄຊ​ຍະ​ວົງ ຮອງຫົວໜ້າ​ສູນ​ຄົ້ນຄວ້າ​ວິທະຍາສາດປ່າໄມ້ ກ່າວ​ວ່າ: ໂຄງການ​ຄົ້ນຄວ້າ​ຢາງພາລາ ແລະ ພືດ​ກະ​ສິກຳ​ລາວ ແມ່ນ​ໂຄງການ​ຮ່ວມ​ມືດ້ານ​ວິຊາ​ການ ເຊິ່ງ​ທາງ​ກະຊວງກະສິກຳ ແລະ ປ່າໄມ້​ ໄດ້​ປະກອບສ່ວນ​ດິນ​ເນື້ອທີ່ 20.040 ຕາແມັດ ຕັ້ງ​ຢູ່​ບ້ານ​ໂນນ​ສະອາດ ເມືອງ​ໄຊ​ທານີ ນະຄອນຫຼວງ​ວຽງຈັນ ເພື່ອ​ເປັນ​ເນື້ອທີ່​ປຸກ​ສ້າງ​ອາຄານ ຈຳນວນ 5 ຫຼັງ ປະກອບດ້ວຍອາຄານ​ຫ້ອງການ ຫ້ອງເຝິກອົບຮົມ 1 ຫຼັງ ອາຄານ​ຫ້ອງທົດ​ລອງ 2 ຫຼັງ ແລະ ອາຄານ​ຫໍພັກ 2 ຫຼັງ ສ່ວນ​ກຸ່ມ​ບໍລິສັດແມ່ນ​ປະກອບສ່ວນ​ເງິນ 10 ລ້ານໂດ​ລາ​ສະຫະລັດ ຫຼື ປະມານ 80 ຕື້​ກີບ ເພື່ອ​ເປັນ​ທຶນ​ກໍ່ສ້າງ​ອາຄານ​ດັ່ງກ່າວ ເຊິ່ງ​ໂຄງການ​ນີ້ແບ່ງ​ອອກ​ເປັນ 2 ໄລຍະ​ຄື: ປີ 2018-2020 ເປັນ​ໄລຍະ​ກໍ່ສ້າງຕຶກ​ອາຄານ ແລະ ກໍ່ສ້າງ​ພະນັກງານ​ວິຊາ​ການ​ລາວ ແລະ ປີ 2021-2051 ເປັນ​ໄລຍະ​ການຮ່ວມ​ມື​ດ້ານ​ວິຊາ​ການ.

ຈຸດປະສົງ​ເພື່ອ​ກໍ່ສ້າງ​ພື້ນຖານໂຄງ​ລ່າງ ລວມ​ທັງ​ຫ້ອງ​ວິໄຈ​ຢາງພາລາ ແລະ ພືດ​ກະສິກຳ ຫ້ອງເຝິກອົບຮົມ​ຂໍ້​ມູນ​ຂ່າວສານ ຫ້ອງວາງສະແດງ​ໝາກຜົນ​ຂອງ​ການປູກ​ພືດ​ທົດ​ແທນ​ການ​ປູກ​ຝິ່ນ ຫ້ອງການ ຫໍ​ພັກ ພ້ອມ​ທັງ​ອຸປະກອນ​ເຄື່ອງມື​ການ​ວິໄຈ ແລະ ສິ່ງອຳນວຍ​ອື່ນໆ​ທີ່​ກ່ຽວຂ້ອງ ພັດ​ທະນາ​ຄວາມ​ສາມາດ ແລະ ເຝິກ​ອົບຮົມ​ວິຊາ​ການ​ໃຫ້​ແກ່​ພະນັກງານແລກປ່ຽນ​ປະສົບ​ການ ແລະ ບົດຮຽນ​ຈາກ​ວິຊາ​ການ​ຊ່ຽວຊານຂອງ​ຈີນ​ໃນ​ການ​ຜະລິດ ແລະ ການ​ວິໄຈ​ຄຸນະພາບ ການ​ກຳນົດມາດຕະຖານ​ຢາງພາລາ ແລະ ພືດ​ກະສິກຳ ດຳເນີນ​ການ​ວິໄຈຄຸນະພາບ ກຳນົດ​ມາດຕະຖານຢາງພາລາ ແລະ ພືດ​ກະສິກຳຂອງ​ລາວ ພ້ອມ​ທັງ​ອອກ​ໃບ​ຢັ້ງຢືນ​ຜົນ​ຂອງ​ການ​ວິໄຈ​ດັ່ງກ່າວ.

ຂ່າວທີ່ກ່ຽວຂ້ອງ