ການໂຮມບ້ານນ້ອຍເປັນບ້ານໃຫຍ່ ເຮັດໃຫ້ຈຳນວນບ້ານຫຼຸດລົງຫຼາຍ

124 17 ພ.ຈ. 2017 ຂ່າວໜ້າ​ໜຶ່ງ

ຄວາມທຸກ​ຍາກ ແລະ ໄພ​ອຶດຫິວ ຍັງ​ເປັນ​ບັນຫາ​ສຳຄັນ​ທີ່​ທົ່ວໂລກ​ປະສົບ​ຢູ່ປັດຈຸບັນ ການ​ແກ້ໄຂ​ບັນຫາ​ນີ້ຍັງ​ສືບຕໍ່​ເປັນ​ບຸລິ​ມະສິດ​ຂອງ​ວົງ​ຄະນາ​ຍາດ​ສາກົນ ໂດຍ​ຖືກ​ລະບຸ​ໄວ້​ໃນ​ເປົ້າ​ໝາຍ​ສະຫັດ​ສະ​ວັດ​ດ້ານ​ການ​ພັດທະນາ ຈົນ​ຮອດ​ປີ 2030 ເພື່ອ​ພ້ອມ​ກັນແກ້​ໄຂ​ບັນຫາ​ໃຫ້​ຫຼຸດຜ່ອນ​ລົງ ແລະ ໝົດ​ໄປ​ຈາກ​ສັງຄົມ​ເທື່ອ​ລະກ້າວ.

ກະຊວງ​ກະສິກຳ ແລະ ປ່າໄມ້ ຈັດ​ປາຖະກະຖາ​ລະນຶກ​ວັນ​ສາກົນ ແລະ ສັບປະດາ​ແຫ່ງ​ຊາດ ເພື່ອລຶບລ້າງ​ຄວາມທຸກ​ຍາກ 17-24 ຕຸລາ 2017 ຂຶ້ນ​ວັນ​ທີ 15 ພະຈິກ 2017 ຢູ່​ມະຫາວິທະຍາໄລ​ແຫ່ງຊາດ ປາ​ກະ​ຖະ​ຖາ​ໂດຍ​ທ່ານ ຈິດ ທະວິ​ໄຊ ຫົວໜ້າ​ກົມ​ແຜນການ ແລະ ພົວພັນ​ຕ່າງປະເທດ ກະຊວງ​ກະສິກຳ ແລະ ປ່າໄມ້ ມີ​ຄະນະ​ບໍດີ ຄູ-ອາຈານ ແລະ ນັກ​ສຶກສາ​ເຂົ້າ​ຮ່ວມ.

ອົງການ​ອາຫານ​ໂລກ ແລະ ການ​ກະເສດ​ຂອງ​ສະຫະ​ປະຊາຊາດ ໄດ້​ກຳນົດ​ເອົາ​ວັນ​ທີ 16 ຕຸລາ​ຂອງ​ທຸກ​ປີ ເປັນ​ວັນ​ອາຫານໂລກ ແຕ່​ປີ 1980 ເປັນຕົ້ນ​ມາ ຈາກ​ນັ້ນ ອົງການ​ສະຫະ​ປະຊາຊາດ ໄດ້​ກຳນົດ​ວັນ​ທີ 17 ຕຸລາ ເປັນ​ວັນ​ສາກົນ ເພື່ອ​ລຶບລ້າງຄວາມທຸກ​ຍາກ ເລີ່ມ​ແຕ່​ປີ 1993 ແລະ ມາຮອດ​ປີ 2003 ລັດ​ຖະບານ​ລາວ ໄດ້​ກຳນົດ​ເອົາ​ວັນ​ທີ 17-24 ຕຸລາ​ຂອງ​ທຸກ​ປີ ເປັນ​ສັບປະດາ​ແຫ່ງ​ຊາດ ເພື່ອ​ລຶບລ້າງຄວາມທຸກ​ຍາກ ແລະ ສຳລັບ​ປີ​ນີ້ ອົງການ​ສະຫະ​ປະຊາ​ຊາດ ໄດ້​ມີຄຳ​ຂວັນ​ຂອງ​ວັນ​ອາຫານ​ໂລກ ແລະ ວັນ​ສາກົນ​ລຶບລ້າງ​ຄວາມທຸກ​ຍາ​ກວ່າ “ສຸມ​ໃສ່​ການ​ຄ້ຳ​ປະກັນ​ສະບຽງ​ອາຫານ ແລະ ພັດທະ​ນາ​ຊົນນະບົດ ເພື່ອ​ແກ້​ໄຂ​ບັນຫາ​ການ​ເຄື່ອນ​ຍ້າຍ​ໃນ​ອະ​ນາຄົດ” ຕໍ່​ກັບ​ຄຳ​ຂວັນ​ນີ້ ສອດຄ່ອງ ແລະ ເໝາະ​ສົມ​ທີ່​ສຸດ​ກັບ​ແນວທາງ​ນະໂຍບາຍ​ຂອງ​ພັກ-ລັດຖະ​ບານ​ລາວ​ວາງ​ອອກ ໂດຍ​ສະເພາະແມ່ນ​ນະໂຍບາຍ​ກ່ຽວ​ກັບການ​ຈັດ​ສັນ​ພູມລຳເນົາ​ຄົງ​ທີ່ ແລະ ບ່ອນ​ທຳ​ມາ​ຫາ​ກິນ​ຖາວອນ ຕິດ​ພັນ​ກັບ​ການ​ຢຸດຕິ​ການ​ເຄື່ອນຍ້າຍ​ຊະຊາຍ​ຂອງ​ພົນລະເມືອງ ອັນ​ເຮັດ​ໃຫ້​ລັດຖະບານ​ໄດ້​ເອົາໃຈໃສ່​ເປັນ​ພິເສດ ​ໃນ​ການຈັດຕັ້ງ​ປະຕິບັດ​ວຽກ​ງານ​ພັດທະນາ​ຊົນນະບົດ ແລະ ລຶບລ້າງ​ຄວາມທຸກ​ຍາກຂອງ​ປະຊາຊົນ​ບັນດາເຜົ່າ ປັດ​ຈຸບັນ ທົ່ວ​ປະເທດ​ສາມາດ​ໂຮມບ້ານ​ນ້ອຍ​ເຂົ້າ​ເປັນ​ບ້ານ​ໃຫຍ່ ຫຼຸດລົງ​ໄດ້ 1.579 ບ້ານ​ຈາກ 10.152 ບ້ານ ໃນ​ປີ 2008 ແລະ ມາ​ຮອດປີ 2017 ມີ 8.454 ບ້ານ ພ້ອມ​ນີ້ ກຸ່ມ​ບ້ານ​ໄດ້​ຫຼຸດ​ລົງ​ຈາກ 1.152 ກຸ່ມ​ຍັງພຽງ​ແຕ່ 1.040 ກຸ່ມ​ບ້ານ ປະຊາຊົນ​ມີ​ບ່ອນ​ທຳ​ມາ​ຫາ​ກິນຖາວອນ ເພີ່ມ​ຂຶ້ນ​ຈາກ 6.848 ບ້ານ​ໃນ​ປີ 2011 ເພີ່ມ​ເປັນ 7.656 ບ້ານ​ໃນ​ປີ 2015 ເປັນຕົ້ນ.

ຂ່າວທີ່ກ່ຽວຂ້ອງ