ທົບທວນການປະຕິບັດແຜນງານຂອງສະມາຊິກລຸ່ມແມ່ນ້ຳຂອງ

801 17 ພ.ຈ. 2017 ຂ່າວໜ້າ​ໜຶ່ງ
ທົບທວນການປະຕິບັດແຜນງານຂອງສະມາຊິກລຸ່ມແມ່ນ້ຳຂອງ

ວັນ​ທີ 16-17 ພະຈິກ 2017 ກະຊວງ​ການ​ຕ່າງປະເທດ​ຮ່ວມກັບ​ສະຫະລັດ​ອາ​ເມ​ຣິ​ກາ ໄດ້​ຈັດກອງ​ປະຊຸມ​ໜ່ວຍ​ງານ​ວິຊາ​ການລະດັບ​ພາກ​ພື້ນ​ແມ່ນ້ຳ​ຂອງ​ຕອນລຸ່ມ-ສະຫະລັດ​ອາ​ເມ​ຣິ​ກາ ຄັ້ງ​ທີ 10 ແລະ ເພື່ອນ​ແມ່ນ້ຳ​ຂອງ​ຕອນລຸ່ມ ຂຶ້ນ​ທີ່​ໂຮງແຮມ​ຄຣາວ​ພລາຊາ ມີ​ທ່ານ ສົງການ ຫຼວງ​ມຸນິນທອນ ຫົວໜ້າ​ກົມ​ເສດຖະກິດ ກະຊວງ​ການ​ຕ່າງປະເທດ ແລະ ທ່ານ​ນາງ ຣີ​ນາ ບິດ​ເຕີ ເອກ​ອັກຄະ​ລັດ​ຖະ​ທູດ​ອາ​ເມ​ຣິ​ກາ ປະຈຳລາວ ພ້ອມ​ດ້ວຍ​ຄະນະ​ຜູ້​ແທນຈາກ​ປະເທດ​ສະມາຊິກ​ແມ່ນ້ຳຂອງ​ຕອນ​ລຸ່ມ (ກຳປູເຈຍ ມຽນມາ ໄທ ຫວຽດນາມ ​ສປປ ລາວ ແລະ ສະຫະລັດ​ອາ​ເມ​ຣິ​ກາ) ແລະ ບັນດາ​ເພື່ອນ​ແມ່ນ້ຳ​ຂອງຕອນ​ລຸ່ມ (ສ ເກົາຫຼີ ຍີ່ປຸ່ນ ອົດສະ​ຕຣາ​ລີ ນີວ​ຊີ​ແລນ ທະ​ນາຄານ​ພັດທະນາ​ອາຊີ ທະນາຄານໂລກ ແລະ ກອງ​ເລຂາ​ອາ​ຊຽນ) ເຂົ້າ​ຮ່ວມ.

ກອງ​ປະຊຸມ​ໄດ້​ທົບ​ທວນຄືນ ການຈັດຕັ້ງ​ຜັນ​ຂະຫຍາຍ​ປະຕິບັດງານ 2016-2020 ກໍ່​ຄືການ​ຈັດຕັ້ງ​ປະຕິບັດ​ບັນດາ​ແຜນ​ວຽກ ແລະ ໂຄງການ​ຕ່າງໆ​ຂອງ​ແຕ່ລະ 6 ເສົາຄ້ຳ​ບຸລິມະສິດ ຄວາມໝັ້ນຄົງ​ທາງ​ດ້ານ​ສະບຽງ​ອາຫານ ກະສິກຳ ການ​ເຊື່ອມ​ຈອດ ການ​ສຶກ​ສາ ຄວາມ​ໝັ້ນຄົງ​ດ້ານພະລັງງານ ສິ່ງແວດລ້ອມ ນ້ຳ ແລະ ສາທາລະນະ​ສຸກ ໃນ​ໄລຍະຜ່ານ​ມາ ພ້ອມ​ທັງ​ປຶກສາ​ຫາລືກ່ຽວ​ກັບ​ທິດ​ທາງ​ການ​ຮ່ວມ​ມື​ໃນຕໍ່ໜ້າ ໂດຍ​ສະເພາະ ການຈັດຕັ້ງຜັນ​ຂະຫຍາຍ​ຂໍ້​ຕົກລົງ​ຕ່າງໆ ທີ່ໄດ້​ຮັບຮອງ​ເອົາ​ໃນ​ກອງ​ປະຊຸມ​ລັດຖະມົນຕີ​ຕ່າງປະເທດ ເພື່ອ​ໃຫ້​ໄດ້ຮັບ​ຜົນ​ຢ່າງ​ເປັນ​ຮູບ​ປະ​ທຳ​ຂຶ້ນ​ເທື່ອ​ລະ​ກ້າວ ນອກ​ນີ້ ກອງ​ປະຊຸມ​ຍັງຈະ​ໄດ້​ປຶກສາ​ຫາລື​ກ່ຽວ​ກັບ​ການປັບປຸງ​ເສົາຄ້ຳ​ບຸລິມະສິດ ເພື່ອເຮັດ​ໃຫ້​ຂອບ​ການ​ຮ່ວມ​ມື​ມີ​ປະສິດທິ​ຜົນ​ຫຼາຍ​ຂຶ້ນ.

ກອງ​ປະຊຸມ​ຄັ້ງ​ນີ້ເປັນ​ຄັ້ງ​ທີ 2 ທີ່​ລາວ​ເຮົາ​ໄດ້​ຮັບ​ກຽດ​ເປັນເຈົ້າພາບ​ຮ່ວມ​ກັບ​ສະຫະລັດ​ອາເມ​ຣິ​ກາ ໃນ​ການ​ຈັດ​ກອງ​ປະຊຸມນັບ​ແຕ່​ມີ​ການ​ສ້າງຕັ້ງ​ຂອບ​ການຮ່ວມ​ມື​ດັ່ງກ່າວ​ຂຶ້ນ ໃນ​ປີ 2009 ເປັນຕົ້ນ​ມາ ໂດຍ​ອີງ​ຕາມ​ຮອບວຽນ​ການ​ຜັດປ່ຽນ​ຂອງ​ສະມາຊິກ ການ​ຮ່ວມ​ມື​ແມ່ນ້ຳ​ຂອງ​ຕອນ​ລຸ່ມ-ສະຫະລັດ​ອາ​ເມ​ຣິ​ກາ ເຊິ່ງ​ຄັ້ງທຳ​ອິດ​ທີ່ ​ສປປ ລາວ ເປັນ​ເຈົ້າພາບ ໃນ​ປີ 2014.

ພ້ອມ​ນີ້​ວັນ​ດຽວ​ກັນ ຄະນະ​ຜູ້ແທນ​ຍັງ​ໄດ້​ເຂົ້າ​ຮ່ວມ​ພິທີ​ເປີດ​ສູນປະກອບ​ການ​ແມ່ຍິງ “Women’s Entrepreneurial Centre (WEC)” ທີ່​ຖືກ​ສ້າງ​ຂຶ້ນ ໂດຍ​ການ​ສະໜັບສະໜູນ​ຈາກອົງການ​ສຶກ​ສາ​ໂລກ ເພື່ອ​ແນໃສ່ໃຫ້​ຜູ້​ປະກອບ​ການ​ແມ່ຍິງ ​ສາມາດ​ເຂົ້າ​ເຖິງ​ການ​ຊ່ວຍເຫຼືອ ແລະ ການ​ເຂົ້າ​ເຖິງ​ແຫຼ່ງ​ທຶນ​ໃນການ​ເຮັດ​ທຸລະ​ກິດ ແລະ ສ້າງ​ໃຫ້ທຸລະ​ກິດ​ມີ​ຄວາມ​ຍືນ​ຍົງ ແລະ ທັນ​ສະໄໝ ເຊິ່ງ​ເປັນ​ໜຶ່ງ​ໃນ​ໂຄງການ​ທີ່​ສຳເລັດ​ເປັນ​ຮູບ​ປະ​ທຳຂອງ​ຂະ​ບວນ​ການ​ຮ່ວມ​ມື​ດັ່ງກ່າວ.

ຂ່າວທີ່ກ່ຽວຂ້ອງ