ການນຳຂັ້ນສູງ ຕ້ອນຮັບລັດຖະມົນຕີສະຫະອາຣັບເອມິເຣດ

117 17 ພ.ຈ. 2017 ຂ່າວໜ້າ​ໜຶ່ງ

ວັນ​ທີ 16 ພະຈິກ 2017 ທ່ານ ທອງ​ລຸນ ສີ​ສຸ​ລິດ ນາຍົກ​ລັດ​ຖະມົນຕີ ໄດ້​ຕ້ອນຮັບ​ການ​ເຂົ້າ​ຢ້ຽມຄຳນັບ​ຂອງ​ທ່ານ ເຊັກຄ໌ ອັບ​ດູລາບິນ ຊາ​ຢິດ​ບິນ ຊຸນ​ຕານ ອາລນາ​ຢັນ ລັດຖະມົນຕີ​ກະຊວງ​ການຕ່າງປະເທດ ແລະ ການ​ຮ່ວມ​ມືສາກົນ​ແຫ່ງ​ສະຫະ​ອາ​ຣັບເອ​ມິເຣດ ພ້ອມ​ດ້ວຍ​ຄະນະ ທີ່​ສຳນັກງານ​ນາຍົກລັດຖະມົນຕີ ແລະ ໃນເວລາ​ຕໍ່​ມາ​ທ່ານ ພັນ​ຄຳ ວິພາ​ວັນ ຮອງ​ປະທານ​ປະເທດ ກໍ່​ໄດ້​ຕ້ອນຮັບ​ການ​ເຂົ້າ​ຢ້ຽມ​ຄຳນັບ​ຄະນະດັ່ງກ່າວ ​ທີ່​ທຳ​ນຽບ​ປະທານ​ປະເທດ ໃນ​ໂອກາດ​ທີ່​ຄະນະ​ເດີນທາງ​ມາ​ຢ້ຽມຢາມ ​ສປປ ລາວ ຢ່າງ​ເປັນ​ທາງ​ການ​ໃນ​ວັນ​ທີ 16 ພະຈິກ​ນີ້.

ໂອກາດ​ນີ້ ການ​ນຳ​ຂັ້ນ​ສູງ​ໄດ້ສະແດງ​ຄວາມ​ຍິນ​ດີ​ຕ້ອນຮັບ​ຢ່າງ​ອົບ​ອຸ່ນ ແລະ ຕີ​ລາຄາ​ສູງ​ຕໍ່​ການຢ້ຽມຢາມ​ລາວ​ຢ່າງ​ເປັນ​ທາງການ​ຂອງ​ຄະນະ​ຜູ້​ແທນ​ຄັ້ງ​ນີ້ ເຊິ່ງເປັນ​ຄັ້ງ​ທຳ​ອິດ ແລະ ເປັນ​ປະຫວັດ​ສາດ​ແຫ່ງ​ການ​ພົວພັນລະຫວ່າງ​ສອງ​ປະເທດ ​ນັບ​ຕັ້ງແຕ່​ໄດ້ສ້າງຕັ້ງ​ສາຍ​ພົວພັນ​ການ​ທູດ​ນຳກັນ ແຕ່​ວັນ​ທີ 15 ຕຸລາ 1996 ເປັນຕົ້ນ​ມາ ແລະ ເປັນ​ຂີດ​ໝາຍອັນ​ສຳຄັນ​ໃຫ້​ແກ່​ການ​ເສີມ​ຂະຫຍາຍ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ລະຫວ່າງ​ສອງປະເທດ ​ໃຫ້​ນັບ​ມື້​ແໜ້ນ​ແຟ້ນ​ຍິ່ງຂຶ້ນ ແລະ ມີ​ບາດກ້າວ​ອັນ​ໃໝ່ ພ້ອມ​ກັນ​ນີ້ ການ​ນຳ​ໄດ້​ສະແດງຄວາມ​ຊົມເຊີຍ​ທີ່​ສອງ​ປະເທດ ​ໄດ້ຮ່ວມ​ກັນ​ລົງ​ນາມ​ສັນຍາ​ວ່າ​ດ້ວຍການ​ຂົນສົ່ງ​ທາງ​ອາກາດ ເຊິ່ງ​ມີຜົນ​ບັງຄັບ​ໃຊ້ ໃນ​ປີ 2016 ເປັນຕົ້ນ​ມາ ແລະ ຫວັງ​ວ່າ​ສັນຍາ​ດັ່ງກ່າວ ​ຈະ​ເປັນ​ພື້ນຖານ​ໃຫ້​ແກ່​ການເປີດ​ກວ້າງ​ການ​ໄປມາຫາສູ່​ລະຫວ່າງ​ປະຊາຊົນ​ສອງ​ປະເທດ ​ໃຫ້ຫຼາຍ​ຂຶ້ນ​ໃນ​ອະນາຄົດ ຊົມເຊີຍ​ທີ່ສະຫະ​ອາ​ຣັບເອ​ມິ​ເຣດ ທີ່​ໄດ້​ຮັບການ​ເລືອກ​ຕັ້ງ​ເປັນ​ສະມາຊິກ​ສະພາ​ອົງການ​ການບິນ​ພົນ​ລະ​ເຮືອນ ສຳລັບ​ສົກ​ປີ 2017-2020 ແລະ ອົງການ​ອື່ນໆ​ໃນ​ໄລຍະ​ຜ່ານ​ມາ ແລະ ການ​ກະກຽມ​ເປັນ​ເຈົ້າພາບ ຈັດ​ງານ​ວາງສະແດງ​ໂລກ (World Expo 2020) ຂອງ​ສະຫະ​ອາ​ຣັບເອ​ມິ​ເຣດ ພ້ອມ​ດຽວ​ກັນ​ນີ້ ການ​ນຳ​ກໍ່​ສະເໜີ​ໃຫ້​ພາກສ່ວນ​ກ່ຽວຂ້ອງ​ຂອງສອງ​ຝ່າຍ​ສືບຕໍ່​ປຶກສາ​ຫາລື ແລະ ເຮັດ​ວຽກ​ຮ່ວມ​ກັນ ເພື່ອ​ຊຸກຍູ້​ໃຫ້ມີ​ການ​ແລກປ່ຽນ​ຄະນະ​ຜູ້​ແທນຂອງ​ສອງ​ປະເທດ​ໃຫ້​ຫຼາຍ​ຂຶ້ນ ເພື່ອ​ສົ່ງເສີມ​ການ​ພົວພັນ​ຮ່ວມມື​ດ້ານ​ຕ່າງໆ ແລະ ເສີມ​ສ້າງຄວາມ​ເຂົ້າ​ອົກ​ເຂົ້າໃຈລະຫວ່າງລັດຖະບານ ແລະ ປະຊາຊົນ​ທັງສອງ​ປະເທດ ລວມ​ທັງ​ໃຫ້ການສະໜັບສະໜູນ​ເຊິ່ງ​ກັນ ແລະ ກັນ ໃນ​ເວທີ​ພາກ​ພື້ນ ແລະ ສາກົນ.

ໃນ​ໂອກາດ​ດຽວ​ກັນ ທ່ານ​ລັດຖະ​ມົນຕີ ໄດ້​ສະແດງ​ຄວາມ​ຂອບໃຈ​ຕໍ່​ການ​ນຳ​ຂັ້ນ​ສູງ​ຂອງ​ລາວ​ທີ່ໄດ້​ໃຫ້​ກຽດ​ຕ້ອນຮັບ ພ້ອມ​ທັງ​ໄດ້ນຳ​ເອົາ​ຄວາມ​ຢື້​ຢາມ​ຖາມ​ຂ່າວຈາກ​ຮອງ​ປະທານາທິບໍດີ ແລະ ນາຍົກລັດຖະມົນຕີ ແຫ່ງ ສະຫະອາ​ຣັບ​ເອ​ມິ​ເຣດ ມາ​ຍັງ​ຄູ່​ຮ່ວມ​ຕຳແໜ່ງ​ຝ່າຍ​ລາວ ສະແດງ​ຄວາມເຫັນ​ດີ​ໃນ​ການ​ສືບຕໍ່​ເສີມ​ຂະຫຍາຍ​ ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ອັນ​ດີງາມ​ຂອງສອງ​ປະເທດ​ ໃຫ້​ນັບ​ມື້​ໄດ້​ຮັບ​ການເສີມ​ຂະຫຍາຍ​ຂຶ້ນ​ເລື້ອຍໆ.

ຂ່າວທີ່ກ່ຽວຂ້ອງ