ຄະນະຜູ້ແທນລາວ ເຂົ້າຮ່ວມກອງປະຊຸມລັດຖະມົນຕີ ຟຣັງໂກໂຟນີ ຄັ້ງທີ 34

82 05 ທ.ວ. 2017 ຂ່າວໜ້າ​ໜຶ່ງ

ຄະນະ​ຜູ້​ແທນ ​ສປປ ລາວ ນຳ​ໂດຍ​ທ່ານ ຢົງ ຈັນທະ​ລັງສີ ເອກ​ອັກ​ຄະ​ລັດ​ຖະ​ທູດ ແຫ່ງ ​ສປປ ລາວ ປະຈຳ​ປະເທດ​ຝຣັ່ງ ຕາງໜ້າ​ໃຫ້​ລັດຖະບານ ​ສປປ ລາວ ໄດ້​ເຂົ້າ​ຮ່ວມ​ກອງ​ປະຊຸມ​ລັດຖະມົນຕີ ຟຣັງ​ໂກ​ໂຟ​ນີ ຄັ້ງ​ທີ 34 ເຊິ່ງ​ຈັດ​ຂຶ້ນ​ໃນ​ວັນ​ທີ 25-26 ພະຈິກ 2017 ທີ່​ປາ​ຣີ ປະເທດຝຣັ່ງ ເຂົ້າ​ຮ່ວມ​ໃນ​ກອງ​ປະຊຸມ​ດັ່ງກ່າວ ມີ​ບັນດາ​ລັດຖະມົນຕີ ແລະ ຜູ້ຕາງໜ້າ​ຈາກ​ປະເທດ​ສະມາຊິກ ຟຣັງ​ໂກ​ໂຟ​ນີ 84 ປະເທດ ໃນ​ນັ້ນ ມີ 58 ປະເທດ​ສະມາຊິກ​ສົມບູນ 26 ປະເທດ ສັງເກດ​ການ ແລະ ມີ​ບັນດາ​ຜູ້ຕາງໜ້າ​ຈາກ​ອົງ​ການຈັດຕັ້ງ​ຄູ່​ຮ່ວມ​ງານ​ທີ່​ກ່ຽວຂ້ອງ​ເຂົ້າ​ຮ່ວມ ກອງ​ປະຊຸມ​ດັ່ງກ່າວ ໄດ້​ດຳເນີນ​ພາຍ​ໃຕ້​ຫົວຂໍ້ “ເສດຖະກິດ​ແບບ​ໃໝ່ ເສດຖະກິດ​ສີຟ້າ ແລະ ສີຂຽວ ກົນ​ຈັກ​ຂັບ​ເຄື່ອນ​ແບບ​ໃໝ່​ຂອງການ​ເຕີບ​ໂຕ ການ​ລວມ​ຕົວ​ທາງ​ສັງຄົມ ແລະ ການ​ພັດທະນາ​ແບບ​ຍືນ​ຍົງ”.

ໃນ​ກອງ​ປະຊຸມບັນດາ​ຜູ້​ເຂົ້າ​ຮ່ວມ​ໄດ້​ພິຈາລະນາ​ບັນຫາ​ສຳຄັນ​ຕ່າງໆ ເຊັ່ນ: ການ​ແກ້​ໄຂ​ວິ​ກິດ​ການ​ທາງ​ການເມືອງ​ຢູ່​ບາງ​ປະເທດ​ສະມາຊິກ ການ​ຮ່າງ​ແຜນການ 4 ປີ 2019-2022 ແລະ ວຽກ​ງານ​ບໍ​ລິຫານ​ຢູ່​ພາຍ​ໃນ​ອົງການ ນອກຈາກ​ນີ້ ກອງ​ປະຊຸມ​ໄດ້​ພິຈາລະນາ​ບັນຫາ​ທີ່​ເຄັ່ງຮ້ອນ​ໃນ​ປັດຈຸບັນ ເຊັ່ນ: ການເຄື່ອນໄຫວ​ຂອງ​ກຸ່ມ​ກໍ່​ການ​ຮ້າຍ ການ​ເຄື່ອນ​ຍ້າຍ​ຖິ່ນ​ຖານ​ຢູ່​ລີ​ບີ ອັນ​ນຳໄປ​ສູ່​ການ​ຄ້າ​ມະນຸດ ເພື່ອເປັນ​ຂ້າ​ທາດ ແລະ ການ​ປ່ຽນແປງ​ຂອງ​ດິນ​ຟ້າ​ອາກາດ ກອງ​ປະຊຸມ​ດັ່ງກ່າວ ໄດ້​ສະແດງ​ຄວາມ​ໄວ້​ອາໄລ​ຕໍ່​ຜູ້​ເສຍ​ຊີວິດ ໃນ​ເຫດການ​ກໍ່​ການ​ຮ້າຍ​ທີ່​ໄດ້​ເກີດ​ຂຶ້ນ​ຢູ່​ປະເທດມາລີ ແລະ ປະເທດເອ​ຢິບ ເຊິ່ງເຮັດ​ໃຫ້​ມີ​ຜູ້​ເສຍ​ຊີວິດ​ຢ່າງ​ຫຼວງຫຼາຍ ນອກຈາກ​ນັ້ນ ກອງ​ປະຊຸມ​ດັ່ງກ່າວ​ຍັງ​ໄດ້​ຊົມເຊີຍ​ຜົນສຳເລັດ​ຂອງ​ງານ​ມະ​ຫະ​ກຳ​ກີລາ ແລະ ສິລະ​ປະ​ວັນນະຄະດີ ຟຣັງ​ໂກ​ໂຟ​ນີ ຄັ້ງ​ທີ 8 ເຊິ່ງ​ໄດ້​ຈັດ​ຂຶ້ນ​ໃນ​ວັນ​ທີ 21-30 ກໍລະກົດ 2017 ທີ່ອາ​ບີ​ຈັງ ປະເທດກົດ​ດີ​ວົວ ແລະ ກອງ​ປະຊຸມ​ແມ່ຍິງ ຟຣັງ​ໂກ​ໂຟ​ນີ ເຊິ່ງ​ໄດ້​ຈັດ​ຂຶ້ນ​ໃນ​ວັນ​ທີ 1-2 ພະຈິກ 2017 ທີ່ບູ​ກາ​ແຣດ ປະເທດຣູ​ມາ​ນີ.

ໃນ​ໂອກາດ​ເຂົ້າ​ຮ່ວມ​ກອງ​ປະຊຸມ​ດັ່ງກ່າວ ທ່ານ​ເອກ​ອັກ​ຄະ​ລັດ​ຖະ​ທູດ ແຫ່ງ ​ສປປ ລາວ ໄດ້​ປະກອບ​ຄຳ​ເຫັນ ໂດຍ​ໄດ້​ຕີ​ລາຄາ​ສູງ​ຕໍ່​ການ​ຈັດ​ກອງ​ປະຊຸມ ກໍ່​ຄືການ​ກຳນົດ​ຫົວຂໍ້​ຂອງ​ກອງ​ປະຊຸມ​ດັ່ງກ່າວ ອັນ​ມີ​ຄວາມ​ໝາຍ​ຄວາມ​ສຳຄັນ​ຫຼາຍ ສຳລັບ​ບັນດາ​ປະເທດ​ສະມາຊິກ ຟຣັງ​ໂກ​ໂຟ​ນີ ໃນ​ການພັດທະນາ​ເສດຖະກິດ​ສີຂຽວ ແນໃສ່​ເພື່ອ​ບັນລຸ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ ໄດ້​ຍົກ​ໃຫ້​ເຫັນ​ຄວາມ​ເອົາໃຈໃສ່​ຂອງ​ລັດຖະບານ​ລາວ​ ໃນ​ການ​ພັດທະນາ​ເສດຖະກິດ-ສັງຄົມ ກໍ່​ຄືການ​ແກ້​ໄຂ​ຄວາມທຸກ​ຍາກ​ຂອງ​ປະຊາຊົນ ແນໃສ່​ເພື່ອ​ໃຫ້ ສປປ ລາວ ຫຼຸດ​ພົ້ນ​ອອກ​ຈາກ​ສະຖານະ​ພາບ​ປະເທດ​ດ້ອຍ​ພັດທະນາ ໃນ​ປີ 2020 ການ​ກຳນົດ​ແຜນ​ຍຸດ​ທະ​ສາດ​ສຳລັບ​ການ​ພັດທະນາ​ເສດຖະກິດ​ສີຂຽວ ຄວາມ​ຫຍຸ້ງຍາກ​ດ້ານ​ງົບ​ປະທານ ແລະ ຄວາມ​ຊຳນິ​ຊຳນານ​ໃນ​ວຽກ​ເສດຖະກິດ​ສີຂຽວ ແລະ ໄດ້​ສະເໜີ​ໃຫ້​ມີ​ການ​ຮ່ວມ​ມື​ຢ່າງ​ມີ​ປະ​ສິດທິ​ຜົນ ລະຫວ່າງບັນດາ​ປະເທດ​ສະມາຊິກ ກໍ່​ຄືການ​ຊ່ວຍເຫຼືອ​ຂອງ​ອົງການ ຟຣັງ​ໂກ​ໂຟ​ນີ ໃນ​ວຽກ​ງານ​ດັ່ງກ່າວ.

ກອງ​ປະຊຸມ​ລະດັບ​ລັດຖະມົນຕີ ຟຣັງ​ໂກ​ໂຟ​ນີ ຄັ້ງ​ທີ 34 ໄດ້​ປິດ​ລົງ​ດ້ວຍ​ຜົນສຳເລັດ​ເປັນ​ຢ່າງ​ດີ ໂດຍ​ໄດ້​ມີ​ການ​ພິຈາລະນາ​ສະພາບ​ການເມືອງ​ຢູ່​ໃນ​ບາງ​ປະເທດ​ສະມາຊິກ ແລະ ໄດ້​ວາງ​ງົບປະມານ​ສຳລັບ​ການ​ດຳເນີນ​ງານ​ຂອງ​ອົງການ ໃນ​ສົກ​ປີ 2018 ເຊິ່ງ​ມີ​ມູນ​ຄ່າ 72.232.036 ເອີ​ໂຣ ນອກຈາກ​ນັ້ນ ກອງ​ປະຊຸມ​ຍັງ​ໄດ້​ຮັບຮອງ​ເອົາ​ຍັດຕິ​ຕ່າງໆ ຄື: ເສດຖະກິດ​ສີຟ້າ ແລະ ສີຂຽວ ການ​ຮັກສາ​ສັນຕິພາບ ໂດຍ​ອາໄສ​ການ​ສຶກ​ສາ ແລະ ການ​ປຶກສາ​ຫາລື​ລະຫວ່າງ​ສາສະໜາ ແລະ ວັດທະນະທຳ ແລະ ການ​ປ່ຽນແປງ​ຂອງ​ດິນ​ຟ້າ​ອາກາດ ພ້ອມ​ທັງ​ໄດ້​ຮັບຮອງ​ເອົາ​ຖະແຫຼງ​ການ​ຂອງ​ກອງ​ປະຊຸມ​ປິດ​ລັບ ​ກ່ຽວ​ກັບ​ການ​ເຄື່ອນ​ຍ້າຍ​ຖິ່ນ​ຖານ ອັນ​ນຳໄປ​ສູ່​ການ​ຄ້າ​ມະນຸດ ເພື່ອ​ເປັນ​ຂ້າ​ທາດ​ຢູ່​ລີ​ບີ ພ້ອມ​ດຽວ​ກັນ​ນີ້ ກອງ​ປະຊຸມ​ດັ່ງກ່າວ​ຍັງ​ໄດ້​ຮັບ​ຟັງ​ການ​ລາຍການ​ສະພາບ​ການ​ກະກຽມ​ໃຫ້​ແກ່​ກອງ​ປະຊຸມ​ສຸດ​ຍອດ ຄັ້ງ​ທີ 17 ເຊິ່ງ​ຈະ​ຈັດ​ຂຶ້ນ​ຢູ່​ປະເທດອາກ​ເມ​ນີ ໃນ​ເດືອນ​ຕຸລາ ປີ 2018.

ຂ່າວທີ່ກ່ຽວຂ້ອງ